Koula 26 - Mbede Lə Luba Kone Gə Sigi

Pɔl pa tar no Agiripa gə

¹ Agiripa pa ar Pɔl na: Ɗəw to kar-i ꞌpa tar ꞌta ne dɔ-i. Be ɓa Pɔl odo ji-a rəw ngaɓa pa tar ta ne dɔ rɔ-ɛ na:

² Ɔji dɔ neje tɔ̰y gə Jiibije d-ila ne tar dɔ-m gə le ꞌma ja kara to nokarə lə-m ɓogəne kar m-pa tar no-i ꞌi mbay Agiripa gə m-ta ne dɔ rɔ-m,

³ mba ꞌi ꞌgərə nejiɓeje lə Jiibije tɔ̰y gə maj-ɛ gə gəl ma̰y naa tar lə-je. Gəl-e gə nee ɓa m-ɗa-i, kɔgərɔ ja ore ur-i o ne tar lə-m.

⁴ Kuji gə d-uji-m le m-ḭ basa̰ mə ɓebo gə Jerujalɛm, horo gəl kuji gə lə-m, to ne gə Jiibije tɔ̰y ꞌgərə.

⁵ To gə ɓo ꞌnjigi ɗa tar naj-ɛ nama ꞌgərə-mje kede ləw baa, m-to Parijiyɛ̰, m-to kara lə dəwje gə d-uwa tar nepolo lə-sijee d-ar-ɛ kədərə ya̰.

⁶ Ngaɓa ɓogəne m-ar no ngɔ gangə tar gə ɔji dɔ nekunda mə gə Luba uwa dɔ gɔl-ɛ ar bɔ-sijee-je,

⁷ gə to gə gəl kaje lə-sijee gə dɔg gə gir-je gə joo d-uwa ne gədərə ꞌpolo ne Luba cil gə kar lal kḭya̰ go-e. Əy mbay, mba nekunda mə gə nee le ja ɓa Jiibije d-ila ne tar dɔ-m gə!

⁸ Mba ɗi ɓa sisəy əjije to gə Luba asə ndol nje gə d-uy ang wa?

⁹ ꞌMa le ja ɓa m-əji to gə tɔsə kəm ri Jeju gə Najarɛd le to ne gə may, a m-ɗa gə singa-m ja.

¹⁰ Ye ɓa m-ɗa mə ɓe gə Jerujalɛm tɔ, logə buba njekapoloje d-un ndu d-ar-m nama m-tuwa njerɔsangəje bula m-um-je kəy kula gə ngaɓa ꞌnjigi mba tɔl-je nama ꞌma ja kara m-njigi gə je go-e tɔ.

¹¹ Ngaɓa taar-taar ja gə mə kəy nendo lə Jiibije kara kara tɔ̰y ja m-aw m-bɛ̰ ta-je, m-uwa-je gə singa m-ar ꞌtaji Luba d-ar al dɔ lo. Logə wungu uru-m mu dɔ-je gə nama m-ula kəm-je ndoo saar mə ɓeboje gə dɔɔɓe gə.

¹² Mba neje gə nee le ja ɓa m-aw ne gə Damasə gə go ndu gə buba njekapoloje d-um ne kula ji-m gə.

¹³ Əy mbay, dan kar gadə gə ja logə m-aw nja ɗəw boo be ɗaa ne ḭ dara ndogo to ɓəəl unda kar ja gugu-m mbugu gə nje gə dan-m naa gə.

¹⁴ Tɔ̰y ja gə̰y nangə burugu-burugu ngaɓa m-o ndu dəw pa tar gə ndo̰ tar ebərə na: Sɔl, Sɔl, mba ɗi ɓa ula kəm ndoo wa? To kədərə kar-i ꞌɗa dɔ ngangə mba ꞌnay to gə mangə ndɔ gə ꞌmbudu om-e be.

¹⁵ Ɗaa ꞌma m-təl m-dəj-e na: ꞋI to na wa, Mbayɓe ɗaa Mbayɓe na: ꞌMa, m-to Jeju gə ula kəm-m ndoo.

¹⁶ Ngaa uba nangə ḭ taar ar dɔ gɔl-i gə; ne gə m-kila ne rɔ-m kəm-i gə ɓa nee: M-ɔr-i gə njekula lə-m ngaɓa njetar naji lə neje tɔ̰y gə o gə yeje gə m-a kar-i a ko.

¹⁷ M-ɔrə-i horo dəw mə ɓeje gə horo dəwje gə ꞌgərə Luba ang gə m-a kula-i ɓe lə-je,

¹⁸ mba kar-i ꞌcɛ̰ kəm-je ar-je d-uba londul d-ḭya̰ ꞌturu kəm-je gə lokarə gə ngaɓa kar ꞌce lo gə ꞌSu o̰ ɓe kəne ɓo ꞌɗəm gə rɔ Luba gə, ɓo d-ar tar neɗa gə kṵra̰y ɔr dɔ-je gə, ngaɓa d-inga nenduba naa gə gə nje gə to gə losang-ɛ ɗəw ta kagə-m gə.

¹⁹ Gəl-e gə ne ɓa mbay Agiripa, m-ɗa dɔ ngangə gə ne gə ḭ dara gə m-o lokiya gə le ang,

²⁰ ngaa m-pa tar turu kəji gə mbəl kəji təl gə rɔ Luba gə, gə ɗa kul-ɛ gə dana gadə m-ar nje gə Damasə kede ngaɓa nje gə Jerujalɛm, gə nje gə dɔ nangə gə Jude tɔ̰y, ngaɓa dəwje gə ꞌgərə Luba ang nəm tɔ.

²¹ Gəl-e gə nee ɓa Jiibije d-ila-m d-uwa-m ne mə kəy gə lə Luba ngaɓa ꞌsangə ɗəw mba tɔl-m ne.

²² Ngaa mbɔr dɔ Luba gə ngom-m ɓa saar ɓogəne m-ɗa tar naji lə ne gə Pajambərəje, gə Moyiji ꞌpa tar-ɛ kede to gə a ɗe le, no nganje gə no bubaje gə, lal pa tar gə ɗangə.

²³ To gə Kirisi a ko ꞌməsərə ngaɓa a ce buwa yo gə dɔngɔr horo nje gə d-uy gə, ɗaa a kila mbərə lokarə kar dəw mə ɓeje gə dəwje gə ꞌgərə Luba ang.

²⁴ Logə n-aw n-pa tar neje nee le n-ta ne dɔ rɔ-ɛ to gə be ɗaa, Pɛsətus pa tar gə singa na: ꞌTo mbə, Pɔl! ꞌGərə ne ya̰ ɗaa tur-i ila-i mbə gə baa!

²⁵ Ngaa Pɔl təl ila kəne na: Iyejeje Pɛsətus, m-to mbə ang ngaa tar gə tɔgərɔ gə tar kəm karə ja m-pa.

²⁶ Mbay kara ꞌtɔj-ɛ neje gə nee le tɔ, ɗaa m-pa tar-ɛ gə ɓəəl ang ja m-ar-ɛ, mba m-gərə to gə ne kara kara igi-e ang mba ne gə nee le nday lokiya gə ang.

²⁷ Mbay Agiripa, ꞌi ꞌta kagə Pajambərəje tɔ wa? M-gərə to gə ꞌta kagə-je ja.

²⁸ Agiripa təl ila Pɔl kəne na: Nay njɛ̰ baa kar-i ꞌɗa-m ar-m m-təl njetakagə Kirisi!

²⁹ Pɔl ila kəne na: Nay njɛ̰ baa ose ya̰ kara m-dəji Luba mba kar ꞌi gə kar-i baa ang ngaa dəwje tɔ̰y gə d-o ndu-m ɓogəne kar ꞌtəl-je to gə ꞌma be lal kar ꞌtɔ si gə kula lar!

³⁰ Mbay, gə njeko̰ ɓe, gə Berenisə ngaɓa gə dəwje tɔ̰y gə d-isi gə je le d-uba nangə d-ḭ,

³¹ d-ɔdə ɗaa ꞌpa tar horo naa gə na: Dəw nee le, ɗa ne kara gə asə yo ose asə tɔ-ɛ ne gə kula lar ang.

³² Ngaɓa Agiripa pa ar Pɛsətus na: Dəw nee le to gə ɓo dəji mba kaw no Sejar gə ang nama kəm kḭya̰-a.