Koula 25 - Mbede Lə Luba Kone Gə Sigi

Pɔl ar no Pɛsətus gə

¹ Ndɔ munda nday go ɗe gə n-ɗe dəbə ɓeko̰ gə le ɗaa Pɛsətus ɔdə Sejare aw Jerujalɛm.

² Buba njekapoloje gə buba ɓeje ꞌɗe ꞌsəgə Pɔl no-ɛ gə ngaɓa ꞌtəl ɗ-ɛ kɔgərɔ,

³ kar n-la gə je gə go ɗəw məmay n-ar ꞌɗe gə Pɔl Jerujalɛm, mba ꞌgɔl kum ba̰a̰ ɗəw boo mba tɔl Pɔl.

⁴ Pɛsətus le təl ila-je kəne na Pɔl le d-a ngəm-e Sejare ngaɓa ꞌne kara nay njɛ̰ baa kar n-a təl kaw tɔ.

⁵ Be ɓa nje gə kɛm horo-sisəy gə ɓo d-asə kaw nama kəm kar d-aw sə-m naa gə ngaɓa ɓo dəw nee le ɗa ne gə kṵra̰y nama d-ila tar dɔ-ɛ gə.

⁶ Ɗaa Pɛsətus ɗa ndɔ ji nay joo ose dɔg horo-je gə ang ja baa ɔdə aw Sejare. Lo kar-ɛ, logə n-isi no ngɔ gangə tar ɗaa n-un ɗəw n-ar-je ꞌɗe gə Pɔl.

⁷ Be ɓa logə Pɔl ɗe ɗaa, Jiibije gə d-ḭ Jerujalɛm le d-ila tarje gə to ɓəəl to ɓəəl ja bula dɔ-ɛ gə ngaa d-asə kɔr kud-e ang.

⁸ Pɔl pa tar dɔ rɔ-ɛ gə na: M-ɗa ne gə kṵra̰y kara ɔji dɔ torondu lə Jiibije ang nəm, ɔji dɔ kəy lə Luba ang nəm ngaɓa ɔji dɔ Sejar ang nəm tɔ.

⁹ Pɛsətus njigi may ta kəm Jiibije gə ɗaa ila Pɔl kəne na: Se njigi kar d-aw ɗa tar le no gɔl-m gə Jerujalɛm nu wa?

¹⁰ Pɔl təl pa na: M-ar no ngɔ gangə tar gə lə Sejar ɓa nee ɗaa lo gə nee ja d-a ɗa tar nəm kəne. Ne gə kṵra̰y kara baa be gə m-ɗa gə Jiibije le godo, ꞌi ja kara ꞌgərə gə maj-ɛ.

¹¹ To gə ɓo m-ɗa ne gə gə dɔ gɔl-ɛ ang, gə asə kar ꞌgangə tar yo dɔ-m gə nama m-mbadə ang ngaa to gə ɓo tar gə d-ila dɔ-m le to tar gə baa nama dəw asə kuwa-m kila-m mə ji-je gə ang. Ɗaa m-njigi kaw no Sejar gə.

¹² Be ɓa logə ndu Pɛsətus asə naa gə nje baa kulaje lə-a tɔ̰y ɗaa ɗe ila kəne na: ꞋI ꞌnjigi kaw no Sejar gə le ɗaa a kaw ja.

Pɔl ar no Agiripa gə

¹³ Ndɔje nday ɓəl go-e gə ɗaa mbay Agiripa je gə jene lə-a Berenisə ꞌɗe gə Sejare mba ɗa Pɛsətus m-o-i ɓa.

¹⁴ Mba ꞌɗa-je ndɔ bula kəne ɗaa Pɛsətus un tar lə Pɔl le pa ar mbay Agiripa na: Pilis ɓa ḭya̰ dəw gə nee le kəy kula gə,

¹⁵ dɔ ndɔ gə m-aw Jerujalɛm ɗaa buba njekapoloje gə buba ɓeje lə Jiibije ꞌɗe ꞌsəg-e ta-m gə mba kar m-gangə tar dɔ-ɛ gə.

¹⁶ Be ɓa m-ila-je kəne m-pa na, dəwje gə Rɔm le, nam ɓa kar d-ila dəw mə ji nje gə d-aw sə-a gə tar gə nama, d-ar d-inga naa d-o tar le kəm naa gə ngaɓa dəw gə d-ila tar dɔ-ɛ gə le kara d-ḭya̰ ɗəw d-ar pa tar dɔ rɔ-ɛ gə tɔ ɓa.

¹⁷ Lal kila ndɔ kar je ja ꞌɗe sə-m naa gə ɗaa lo kar-ɛ m-isi no ngɔ gangə tar gə lə-m ngaɓa m-un ɗəw m-ar ꞌɗe gə dəw nee le.

¹⁸ Go-e gə ɗaa nje kəm tarje lə-a le ꞌɗe d-ila tar dɔ-ɛ gə ngaa oso go ye gə ꞌma m-əji kəne kara ang,

¹⁹ ngaa tar gə ꞌɗa ne naa le ɔji dɔ nepoloje lə-je, gə ɔji dɔ dəw kara kəne əng ri-a na Jeju gə uy nam ja ngaa Pɔl na n-aw kəm baa.

²⁰ Ɔji dɔ-m ꞌma ɗaa m-gərə ne kara gə m-a ɗa ang ɗaa m-dəj-e pa na se n-a njigi kaw Jerujalɛm kar ꞌɗa tar lə-a le kəne nu wa?

²¹ Ngaa Pɔl njigi kar d-aw sə-a no Sejar gə, be ɓa m-un ɗəw mba kar ꞌngəm-e saar mba kar m-ula no Sejar gə le.

²² Be ɓa Agiripa pa ar Pɛsətus na, ꞌma ja kara m-njigi ko ndu dəw nee le tɔ. Ɗaa Pɛsətus na bara ɓa a ko ndu-e ɓi.

²³ Lokar-ɛ ɗaa Agiripa je gə Berenisə le ꞌɗe gə tɔg-ɛ baa d-andə no ngɔ gangə tar gə naa gə gə njekun dɔ njeɗɔje gə tɔl-tɔl dɔg ngaɓa gə buba ɓeje. Gə go ɗəw gə Pɛsətus un ɗaa ꞌɗe gə Pɔl le.

²⁴ Be ɓa Pɛsətus un tar pa na: Mbay Agiripa, gə sisəy dəwje tɔ̰y gə ꞌga̰ gə si nee, oje dəw gə to gə bula bo Jiibije ɗe no-m gə mba tar lə-a mə ɓe gə Jerujalɛm ngaɓa logə nee nəm, d-uru ne ꞌkuwi na kəm tɔl-ɛ gə tɔl.

²⁵ ꞌMa m-o to gə ne kara gə n-ɗa gə asə gangə ne tar yo dɔ-ɛ gə le godo ngaa ꞌne ja njigi kaw no Sejar gə ɗaa ꞌma kara m-njigi kula kəne tɔ.

²⁶ M-o ne kara gə arə ngadə gə m-a ɗa mbede gə kar yejeje ɔji dɔ-ɛ ang; gəl-e gə nee ɓa m-ar-ɛ n-ɗe no-si gə, ngaɓa no-i ꞌi mbay Agiripa gə mba kar gə go tarje gə a dəji-e nama m-a kinga ne ne gə m-a ɗa mbede gə.

²⁷ Mba kar m-a kuwa dəw kula lal kudu tar gə uwa dɔ-ɛ le m-o to gə to ne to gə dɔ gɔl-ɛ ang.