Koula 24 - Mbede Lə Luba Kone Gə Sigi

Pɔl ar no njeko̰ɓe Pilis gə Sejar

¹ Ndɔ mi nday go-e gə ɗaa buba njekapolo gə ri-a na Ananiyas aw gə ngatɔgəje gə kɛm ngaɓa nje pa tar ta ne dɔ dəwje kara be, ri-a na Tɛrətulusu. ꞌƊe ꞌsəgə Pɔl no njeko̰ ɓe gə.

² Logə ꞌɓar Pɔl ɗaa, Tɛrətulusu un kudu kila tar dɔ-ɛ gə na: Yejeje, Pilis, mbɔr dɔ-i ꞌi ɓa ɗɛgɛgɛ to ne mə ɓe gə lə-si.

³ Ngaɓa neɗa mayje lə-i gə dɔ karje tɔ̰y gə loje tɔ̰y le, j-a ɗa-i ne oyo ja.

⁴ Ngaa mba kar m-jɔg-i ɓi-ɓi ang ɗaa m-ɗa-i kɔgərɔ kar-i ꞌtuga mbi-i o ne tar lə-si.

⁵ J-inga dəw gə ar nee le gə dəw gə kṵra̰y gə nje kɔsə gəl ɓɛlɛ horo Jiibije gə tɔ̰y gə dɔ nangə nee, njekɔr no dəwje gə d-unda rɔ-je gangə gə ꞌɓar-je gə dəwje gə Najarɛd,

⁶ ngaɓa n-na mba tuji lo sangə kəy gə lə Luba, be ɓa j-uwa-a ne ɗaa j-a njigi gangə tar dɔ-ɛ gə gə go torondu lə-si.

⁷ Ngaa njekun dɔ lə njeɗɔje gə tɔl-tɔl dɔg gə ri-a na Lijiyias ce t-ɛ gə singa ji-si gə.

⁸ Cibi un ɗəw ar nje gə d-ila tar dɔ-ɛ gə le kar ꞌɗe no-i gə nee. Be ɓa kar ꞌi ja ꞌdəji-e gəl ne gə j-ila ne tar dɔ-ɛ gə le o.

⁹ Jiibije tɔ̰y ꞌnjigi go tar gə nee le ja tɔ, to gə neje nee le to to gə bənəng ja.

¹⁰ Go-e gə ngaɓa njeko̰ ɓe ɗa ji-a un ne ɗəw ar Pɔl kar-ɛ pa tar ɗaa Pɔl pa na: M-gərə to gə asə ɓalje bula ja ꞌto nje gangə tar dɔ gəl kuji gə nee gə ɗaa m-ḭya̰ mə-m yag ja mba pa tar ta ne dɔ rɔ-m.

¹¹ Kar-i ꞌgərə to gə asə ndɔ nday dɔg gə gir-e gə joo ang ja ɓi m-aw Jerujalɛm mba polo Luba.

¹² Ɗaa d-inga-m mə kəy gə lə Luba gə ang nəm, mə kəy nendo gə lə Jiibije ang nəm, mə ɓebo gə m-ar m-aw ma̰y tar ose m-ɔsə bula dəwje m-um-je dɔ ngang gə ang.

¹³ Ngaɓa ɓisine d-asə tɔji gəl ne gə d-ila ne tar dɔ-m gə le ang.

¹⁴ M-pa gə ɗaga no-i gə: M-aw m-polo Luba lə ka-sijee gə ɗəw gə ꞌɓar-ɛ na dəwje gə d-unda rɔ-je ꞌgangə, m-ta kagə torondu tɔ̰y gə tarje tɔ̰y gə Pajambərəje ꞌɗa mə mbede gə,

¹⁵ ngaɓa m-unda mə-m dɔ Luba gə to to gə ꞌjejee kara d-unda ne mə-je be tɔ, ɗaa nje gə gadə-gadə gə nje gə gadə-gadə ang d-a ce buwa yo gə.

¹⁶ Gəl-e gə nee ɓa ꞌma kara m-ula rɔ-m ndubu gə dɔ karje tɔ̰y mba kar dəw ila tar dɔ kəji gə lə-m no Luba gə ngaɓa no dəwje gə ang.

¹⁷ Go ɓalje gə nday bula ɗaa m-təl m-ɗe gəl kuji gə lə-m, m-un ne m-ar njenekɔyje ngaɓa m-ar nenuji tɔ.

¹⁸ Logə m-unda ngangə sangə rɔ-m ɗaa, ꞌɗe d-inga-mje mə kəy gə lə Luba, ɓo gə bula dəwje ang nəm ngaɓa gə kunda bula ang nəm.

¹⁹ Ngaa Jiibije gə kɛm gə dɔ nangə gə Aji, ꞌjejee nee ɓa to gə ɓo d-aw sə-m gə tar nama kəm kar-je ɗe d-ar no-i gə d-ila tar dɔ-m gə.

²⁰ Ose logə m-ar no nje gə no ngɔ gangə tar lə Jiibije le, ɓo tar gə uwa dɔ-m ga̰ nama ꞌjejee nee le may kar ꞌpa gə ɗaga.

²¹ Ose ɔji dɔ tar kara baa gə m-uru ne ꞌkuwi horo-je gə na: Tar gə ɔji dɔ ce buwa yo gə lə nje gə d-uy le ɓa ɓogəne m-ar ne no ngɔ gangə tar gə no-si gə!

²² Pilis le ꞌpa tarje gə ɔji dɔ ɗəw nee le d-ar gərə ya̰ ɗaa ɔr ndɔ ɗa tar lə-si ila gə kede pa na: Ndɔ gə njekun dɔ njeɗɔje gə tɔl-tɔl dɔg, gə ri-a na Lijiyias a ɗe ɓa m-a kuru ngira tar lə-si nee gə maj-ɛ ɓi.

²³ Ngaɓa n-un ɗəw n-ar njekun dɔ njeɗɔje gə tɔl mba kar ngəm Pɔl ngaa kar ḭya̰ ɗəw ar njeka-ɛje mba kar ꞌɗe ꞌla sə-a.

²⁴ Ndɔje nday ɓəl go-e gə ɗaa, Pilis ɗe gə jene lə-a Durusil gə to Jiibi ngaɓa ula ɓar Pɔl. N-ɗe n-o tar t-ɛ gə ɔji dɔ ta kagə Kirisi Jeju.

²⁵ Ngaa logə Pɔl pa tar gə ɔji dɔ neɗa gə gadə-gadə, gə ko̰ dɔ rɔ ngaɓa gangə tar gə dɔ ndɔ gə bara ɗaa ɓəəl unda Pilis badə gang-e ar pa ar-ɛ na: Dɔ kar gə nee ɗaa, aw mbum ɗaa logə m-inga dɔ kar ɗaa m-a təl ɓar-i ɓi.

²⁶ N-unda m-e to gə Pɔl a kar-ɛ lar gəl-e gə nee ɓa n-ula n-ɓar-ɛ ne taar-taar mba pa ne sə-a tar.

²⁷ Logə ɓal joo nday ɗaa Pɔrsiyus Pɛsətus ngaɓa a ta toro Pilis. Pilis gə njigi may ta kəm Jiibije le ḭya̰ Pɔl gə kəy kula gə baa.