Koula 23 - Mbede Lə Luba Kone Gə Sigi

¹ Kəm Pɔl to gə dɔ nje gə no ngɔ gə nda̰a̰ ngaɓa pa na: Ngan ko̰-mje, m-nja no Luba gə gə kəji gə may ja saar ce ɓogəne.

² Buba njekapolo gə ri-a na Ananiyas un ɗəw ar nje gə d-ar mbɔr-ɛ gə kar d-unda t-ɛ.

³ Be ɓa Pɔl pa ar-ɛ na: Luba a kunda-i, ꞌi gə to to gə kar bɔrɔ gə d-ɔr pɔrɔ kəne gə nda be. Isi aw gangə tar dɔ-m gə gə go torondu ɗaa ꞌi ja cibi al dɔ torondu, un ɗəw mba kar d-unda-m.

⁴ Nje gə d-ar kəne le ꞌpa na: N-taji Buba njekapolo lə Luba səmə!

⁵ Ngaɓa Pɔl təl ila kəne na: Ngan ko̰-mje, m-gərə to gə to buba njekapolo ang, mba ꞌɗa mə mbede gə na: ꞋI a pa tar gə kṵra̰y dɔ mbay gə lə dəw mə ɓeje lə-i ang.

⁶ Logə Pɔl gərə to gə dəwje gə mbo̰ naa le dəbəje gə kara to Sadusiyɛ̰je ngaɓa ye gə kara to Parijiyɛ̰je tɔ ɗaa, pa tar uru ne ꞌkuwi no ngɔ gangə tar gə lə Jiibije na: Ngan ko̰-m, ꞌma m-to Parijiyɛ̰, gə ngon kuji Parijiyɛ̰, mba tar nekunda mə gə tar ce buwa yo gə lə nje gə d-uy ɓa m-ar ne lo gangə tar nee.

⁷ Logə n-pa tar gə nee le ɗaa tar ma̰y ce bib oso horo Parijiyɛ̰je gə je gə Sadusiyɛ̰je, ar dəwje bula ꞌkay naa.

⁸ Mba Sadusiyɛ̰je le ꞌpa to gə, ce buwa yo gə godo nəm, gə anji godo, gə njil kara godo ngaa Parijiyɛ̰je na neje nee le ga̰ ja.

⁹ D-uru ꞌkuwi to gə boy wu ɗaa njekɔr gəl toronduje gə kɛm gə ꞌto nje kar Parijiyɛ̰je d-uba nangə d-ḭ, ꞌma̰y tar gə singa ꞌpa na: Dəw gə ar nee le ne gə kṵra̰y kara ja kara j-o rɔ-ɛ gə ang, njil ose anji ɓa pa tar ar-ɛ kara dəw gərə ang.

¹⁰ Logə ma̰y tar le aw mongə ya̰ ɗaa, njekun dɔ njeɗɔje gə tɔl-tɔl dɔg le ɓəəl na d-a kḭ tuga Pɔl jag-jag ɗaa un ɗəw ar njeɗɔje mba kar d-ɔr-ɛ horo-je gə ɓo d-aw sə-a mə ndogo bɔrɔ gə.

¹¹ Mə cil gə njekore go-e gə ɗaa, Mbayɓe ce dɔ Pɔl gə, pa na: Uwa jingaw mə-i gə, mba ɗəw kara baa to gə ꞌɗa ne tar naji lə-m Jerujalɛm le, a ɗa to to gə be ja tɔ a mə ɓe gə Rɔm gə.

Jiibije d-ula njuma dɔ Pɔl gə

¹² Logə gə ndɔ asə ɗaa Jiibije ꞌgɔl kula njuma ngaɓa d-ḭ d-ugu yo dɔ-je mba tɔl Pɔl nam ɓa kusa ne gə kay ne ɓi.

¹³ Nje gə gɔl njuma nee le d-ḭ dɔg sɔɔ gir-je kəne.

¹⁴ D-aw d-inga buba njekapoloje gə buba ɓeje mba pa kar-je: Sijee le j-ugu yo dɔ-si gə mba kar ne kara kara a kɔr ta-si ang saar ja tɔl Pɔl ja ɓa.

¹⁵ Ɓisine ɗaa sisəy le, may kar-si ꞌpaje ngadə ar-je njekun dɔ njeɗɔje gə tɔl-tɔl dɔg le to gə ndu-si asə naa gə nje gə no ngɔ gangə tar gə lə Jiibije mba kar ꞌɗe sə-a to to gə a kaw tən-je tar le gə maj-ɛ koje ɗaa sijee j-a kum ba̰a̰ mba tɔl-ɛ nam ɓa kar-ɛ n-ce rɔ-si gə ɓi.

¹⁶ Be ɓa ngon lə ko̰ nan Pɔl o tar ba̰a̰ gə d-a kum le ɗaa ɔdə aw mə ndogo bɔrɔ gə le, aw pa tar-ɛ ar Pɔl.

¹⁷ Pɔl ɓar dəw kara horo njekun dɔ njeɗɔje gə tɔl gə pa ar-ɛ na: Aw gə ngon basa̰ nee ɓe lə njekun lə njeɗɔje gə tɔl-tɔl dɔg mba tar to t-ɛ gə əng kar n-pa n-ar-ɛ.

¹⁸ Be ɓa njekun dɔ njeɗɔje gə tɔl aw gə ngon basa̰ le aw inga ne njekun dɔ njeɗɔje gə tɔl-tɔl dɔg le ngaɓa pa na: Pɔl gə to kəy kula gə nee ɓa ɓar-m na kar-m m-ɗe gə ngon basa̰ m-ar-i mba tar to t-ɛ əng kar-ɛ n-pa n-ar-i.

¹⁹ Be ɓa njekun dɔ njeɗɔje gə tɔl-tɔl dɔg le uwa ji-a aw sə-a nganga̰ ngaɓa dəji-e na: Ɗi ɓa ꞌnjigi pa kar-m wa?

²⁰ N-pa na: Jiibije d-unda ndu-je naa gə mba dəji-i kar bara nama aw gə Pɔl no ngɔ gangə tar gə lə Jiibije, to to gə d-a kaw ɗa tar lə-a be.

²¹ ꞌNjigi gə je go-e ang mba dəwje dɔg sɔɔ gə gir-je kəne horo-je gə ꞌgɔl kum ba̰a̰ ngaɓa d-ugu yo dɔ-je gə mba tɔl Pɔl ja ɓa kusa ne gə kay ne ɓi. Ɓisine d-ar pɛrɛrɛ ngina ndu-i ja baa.

²² Njekun dɔ njeɗɔje gə tɔl-tɔl dɔg le mbusu ngon basa̰ le na mba kar tar gə pa ar ꞌne nee le ce t-ɛ gə ar dəw o ang ngaɓa ḭya̰-a ar-ɛ n-aw.

²³ Go-e gə ɗaa n-ɓar njekun dɔ njeɗɔje gə tɔl le joo n-pa n-ar-je na: ꞌGɔl-je njeɗɔje tɔl-tɔl joo, njekundaje dɔg siri ngaɓa njeningaje tɔl-tɔl joo mba kar d-aw cil gə saar Sejare.

²⁴ ꞌGɔlje kundaje tɔ mba kaw ne gə Pɔl no njeko̰ ɓe Pilis lal kar rɔ to-e gə dɔ-ɛ təl-e.

²⁵ N-ɗa mbede to gə be:

²⁶ ꞌMa Kolodə Lijiyias, m-ɗa mbede m-ar-sisəy yejeje njeko̰ ɓe, Pilis, m-o-i ɓa.

²⁷ Dəw gə nee le, Jiibije d-uwa-a mba tɔl-ɛ ngaa logə m-aw gə njeɗɔje ngaɓa m-t-ɛ ji-je gə ɗaa d-ula-m na n-to ngon njeɓe gə Rɔm.

²⁸ Be ɓa m-njigi gərə gəl ne gə d-ila ne tar dɔ-ɛ gə ɗaa m-aw sə-a no ngɔ gangə tar gə lə-je.

²⁹ Lo-e gə nee ɗaa m-o to gə tar d-ila dɔ-ɛ gə le ɔji dɔ tar ma̰y gə ɗe go torondu lə-je ɓo tar kara gə asə kar n-inga ne yo ose d-a tɔ-ɛ gə kula lar le godo.

³⁰ Cibi d-ula-m tar njuma gə d-ula dɔ-ɛ gə ɗaa m-ula-a gə tɔg-ɛ baa gə rɔ-i gə ngaɓa m-dəji njekila tar dɔ-ɛ gə je le kar ꞌɗa mbede ꞌsəg-e ne no gɔl-i gə.

³¹ Njeɗɔje le, gə go ɗəw gə d-un d-ar-je le ɗaa, d-un-je Pɔl d-aw sə-a cil gə cil gə ja saar ꞌce sə-a Antipatiris.

³² Lokar-ɛ ɗaa d-ḭya̰ njekundaje ngaa d-ar-je d-aw gə Pɔl ngaa njeɗɔje d-ɔsə ꞌtəl d-aw mə ndogo bɔrɔ gə gugu.

³³ Logə ꞌce Sejare ɗaa d-ɔr mbede le d-ar njeko̰ ɓe ngaɓa ꞌtɔj-ɛ ne Pɔl tɔ.

³⁴ Be ɓa njeko̰ ɓe tura mbede le ɗaa təl dəji mba gərə se Pɔl to gə dɔ nangə gə ɗa wa? Ɗaa ꞌpa d-ar-ɛ na n-to gə dɔ nangə Silisi.

³⁵ Njeko̰ɓe le na: Logə njekila tar dɔ-i gə je d-a ɗe ɓa m-a ko tar lə-i ɓi ngaɓa təl un ɗəw mba kar ꞌngəm-e mə ndogo gə lə Erɔdə.