Koula 22 - Mbede Lə Luba Kone Gə Sigi

¹ Ngan ko̰-mje gə bɔy-jeje, ꞌtuga-je mbi-si oje ne tar gə m-njigi pa kar-si dɔ kar gə nee mba ma̰y ne tar dɔ rɔ-m gə.

² Logə d-o to gə n-pa tar n-ar-je gə ndo̰ tar ebərə ɗaa, mbi-je pa kəng ar lo oso ɗɛr ja cibi ngaɓa Pɔl pa na:

³ ꞌMa le, m-to Jiibi, d-uji-m Tarəsə dɔ nangə gə Silisi, ngaa d-odo-m mə ɓebo gə nee ja ngaɓa m-ndo ne no-gɔl Gamaliyɛl gə mba kar m-ila ne kuji dɔ torondu gə lə ka-sijee gə gə dɔ gɔl-ɛ ja. Tar polo Luba o̰-m ya̰ to gə sisəy tɔ̰y ɓogəne be ja tɔ.

⁴ M-ula kəm nje gə d-un ɗəw nee le ndoo asə yo ngaɓa m-tɔ jingawje gə jeneje m-um-je kəy kula gə.

⁵ Buba njekapolo kara to njetar naji lə-m tɔ ngaɓa ngatɔgəje tɔ̰y nəm, ɓa ꞌɗa mbede d-un ne ɗəw d-ar-m ɔji dɔ ngan ko̰ naaje gə mə ɓe gə Damasə, mba kar-m m-aw kəne ɓo m-tɔ-je m-ɗe gə je Jerujalɛm mba kar ꞌbɛ̰ ta-je.

⁶ Logə m-aw nja ɗəw boo ngaɓa m-nay dəb gə ɓe gə Damasə, gə kar gə ar dana gadə-gadə ɗaa ndogo gə boy ja ḭ dara ce bus baa ja, dəbə-m guburu ila-m dana.

⁷ M-ce m-oso nangə burugə ɗaa m-o ndu dəw pa na: Sɔl, Sɔl, ula kəm ndoo mba ɗi wa?

⁸ M-ila kəne na: ꞌTo na wa, Mbayɓe. Ngaɓa n-ila-m kəne na: ꞌMa, m-to Jeju gə Najarɛd gə ꞌi ula kəm-m ndoo.

⁹ Nje gə d-ar sə-m d-o ndogo le ngaa d-o ndu dəw gə aw pa sə-m tar le ang.

¹⁰ Be ɓa m-pa na: Mbayɓe, ɗi ngaa m-a ɗa wa? Ɗaa Mbayɓe pa ar-m na: Uba nangə ḭ aw Damasə ɗaa, kəne əng ɓa d-a pa ne tɔ̰y gə d-a kun ɗəw kar-i a ɗa.

¹¹ Ngaa, gə go ndogo gə uru kəm le m-o lo ang, ɗaa nje gə d-aw sə-m le ɓa m-pa m-ar-je d-uwa ji-m gə kuwa ɓa m-ce ne Damasə.

¹² Dəw kara ri-a na Ananiyas, to dəw gə ila kuji dɔ ne gə lə Luba gə ɗəw torondu ngaɓa Jiibije gə Damasə kara ꞌpa tar naji lə-a may ya̰ tɔ,

¹³ ɗe inga-m ɗaa pa ar-m na: Sɔl, ngon ko̰-m, may kar kəm-i unja ɗaa gə lo-e gə nee ja kəm-m unja ar-m m-o lo ngaɓa m-o darɔ-ɛ tɔ.

¹⁴ Ananiyas le təl pa na: Luba lə ka-sijee ɔr-i kede nam mba kar-i ꞌgərə mə njigi lə-a, mba kar-i o ne dəw gə gadə-gadə ngaɓa mba ko ne tarje gə t-ɛ gə;

¹⁵ mba a to njetar naji lə-a no dəwje gə tɔ̰y ɔji dɔ ne gə o gə kəm-i gə mbi-i nəm.

¹⁶ Ngaa ɓisine ꞌngə̰y mba ɗi cibi wa? Ḭ taar, ɓo ar ꞌɗa-i batɛm ngaɓa ꞌto go neɗaje gə kṵra̰y lə-i gə go ri-a gə a ɓar.

¹⁷ Ndɔ kara m-təl m-aw Jerujalɛm ɗaa, m-aw m-dəji Luba no kɔgə gə ɗaa m-o ne dɔ-m gə yiil ar-m m-gərə rɔ-m ang,

¹⁸ ngaɓa m-o Mbayɓe pa ar-m na: Ḭ ja̰y ɓo ꞌce gə tɔg-ɛ Jerujalɛm gə ɗaga, mba d-a njigi go tar naji lə-m gə a ce ta-i gə ang.

¹⁹ Ɗaa ꞌma m-pa na: Mbayɓe, ꞌjejee ja kara ꞌgərə to gə m-aw gə kəy nendo kəy nendo lə Jiibije m-tuwa nje gə ꞌta kag-i m-kunda-je ngaɓa m-um-je kəy kula gə,

²⁰ ngaɓa ndɔ gə d-aw d-ila məsə Etiyɛn, njetar naji lə-i nangə le, ꞌma ja kara m-ga̰ kəne nəm, m-njigi go-e nəm ngaɓa m-ngom kubuje lə njetɔl-ɛje nəm tɔ.

²¹ Be ɓa n-pa n-ar-m na: Aw, mba m-a kula-i əw dɔ-i gə ɓe lə dəwje gə ꞌgərə Luba ang.

Pɔl tɔji rɔ-ɛ gə ngon njeɓe gə Rɔm

²² D-o-je ndu-e saar ꞌce-je ne dɔ tar gə nee gə le. Ngaa d-ila ndu-je nangə ɓolong, ꞌpa na: Dəw gə be le kəm tɔl-ɛ gə tɔl ɓo kəm kḭy-a̰ kəm baa ang.

²³ Ngaɓa d-uru ꞌkuwi, ꞌtɔr kubuje lə-je kar-je gə, gə ꞌja̰rɛ̰ ꞌbaburu gə taar d-ar kuru ḭ bul-bul.

²⁴ Be ɓa mbay lə njeɗɔje gə tɔl-tɔl dɔg le un ɗəw ar d-ar Pɔl andə mə ndogo bɔrɔ gə ngaɓa kar ꞌlab-ɛ gə ndəy ɓa gə mba gərə ne gəl ne gə d-uru ne ꞌkuwi kəm tar dɔ-ɛ to gə be le.

²⁵ Logə ꞌtɔ-ɛ mba kunda ɗaa Pɔl pa ar mbay lə njeɗɔje gə tɔl gə ar lo-e gə le na: Se ɗəw to kar d-unda ngon njeɓe gə Rɔm lal gangə tar dɔ-ɛ gə wa?

²⁶ Gə go tar gə nee le ɗaa njekun dɔ njeɗɔje gə tɔl le ɔdə aw pa ar njekun dɔ njeɗɔje gə tɔl-tɔl dɔg na: Ɗi ngaa a ɗa wa? Dəw le to ngon njeɓe gə Rɔm.

²⁷ Njekun dɔ njeɗɔje gə tɔl-tɔl dɔg le ɗe inga Pɔl dəji-e na: ꞌPa ar-m m-o, ꞌto ngon njeɓe gə Rɔm wa? N-ila-a kəne na: Oyo

²⁸ Njekun dɔ njeɗɔje gə tɔl-tɔl dɔg le təl pa na: ꞌMa le, m-odo lar bula ya̰ m-ndogo ne ɗəw ɓa m-to ne ngon njeɓe gə Rɔm. Ngaa Pɔl pa na: ꞌMa ɗaa d-uji-m gə kuji.

²⁹ Be ɓa nje gə d-a kaw kunda le d-ɔdə gə tɔg-ɛ gə ɗangə ngaɓa logə mbay lə njeɗɔje gə tɔl-tɔl dɔg le gərə to gə Pɔl to ngon njeɓe gə Rɔm ɓa n-ar-je ꞌtɔ-ɛ le ɗaa, ɓəəl unda-a badə gang-e.

Pɔl ar no ngɔ gangə tar lə Jiibije

³⁰ Lokar-ɛ ɗaa ꞌnjigi gərə gəl ne Jiibije d-ila ne tar dɔ Pɔl gə le ɗaa, d-ɔr-ɛ ngaɓa d-un ɗəw d-ar buba njekapoloje gə nje gə no ngɔ gangə tar gə lə Jiibije tɔ̰y mba kar ꞌmbo̰ naa, ngaɓa d-aw gə Pɔl no-je gə.