Koula 21 - Mbede Lə Luba Kone Gə Sigi

Pɔl aw Tir gə Sejar

¹ Logə d-ɔdə d-ḭya̰ si ɗaa j-al to j-aw njarara Kos, cibi lokar-ɛ ɗaa j-aw ɓe gə Rodə ngaɓa j-ḭ kəne j-aw gə Patara.

² Lo-e gə nee le j-inga to gə aw nday gə Penisi ɗaa j-al j-aw ne.

³ Logə j-o ɓe gə Sipərə no-si gə ɗaa j-unja gə ɗəw gə dɔ gəl ngaɓa j-a ləl to dɔ-si gə Siiri, ɓa gə mba ce ne Tir gə d-a kɔr nekodoje nangə kəne.

⁴ Be ɓa j-isi kəne ndɔ siri mba j-inga ngan njenendoje kəne. Ngaɓa Njil ɔsə-je ar ꞌpa d-ar Pɔl mba kar aw Jerujalɛm ang.

⁵ Ngaa logə ndɔje nee nday ɗaa j-un ɗəw ngaɓa ꞌdan-si tɔ̰y gə jeneje lə-je gə nganje, d-aw gə si saar gir ɓebo gə ɗaga. Cibi j-um takəji-si nangə dɔ kungu gə j-a dəji Luba.

⁶ Be ɓa logə j-a ndəji naa gə yo gə nee ɗaa j-ɔdə j-al to ɗaa ꞌjejee d-ɔdə d-aw ɓe.

⁷ J-a ləl to j-a ce mə ɓe gə Tir ɓa j-ḭ kəne j-aw Tolemɛ, j-o ngan ko̰-si kəne ngaɓa j-isi gə je ndɔ kara.

⁸ Lo kar-ɛ ngaɓa j-ɔdə j-aw Sejare ɗaa j-aw kəy lə Pilibi gə njekila mbərə Tar gə May, gə to kara lə diyakərəje gə siri le ɓa j-a to kəne.

⁹ Ngan-ɛ gə ngan mandə ꞌmbakumje sɔɔ ꞌga̰ ɓe lə-a, d-ar ꞌpa tar gə pajambərəje

¹⁰ J-isi kəne ndɔ bula ɓəəl ɗaa pajambərə kara ri-a na Agabus ḭ dɔ nangə gə Jude ɗe ɓə lə-si.

¹¹ Logə n-ɗe n-inga-si ɗaa n-ɔr gagəra lə Pɔl, n-tɔ ne gɔl-ɛ gə ji-a ngaɓa n-pa na: Oje tar gə Njil Njerɔsangə pa ɓa nee: Dəw gə nje gagəra nee le Jiibije d-a tɔ-ɛ to gə be ja tɔ a Jerujalɛm ngaɓa d-a kila mə ji dəwje gə ꞌgərə Luba ang gə.

¹² Logə j-o tar nee le to gə be ɗaa sijee gə nje gə d-isi lo-e gə, j-a ɗa Pɔl kɔgərɔ kar-ɛ aw Jerujalɛm ang.

¹³ Be ɓa Pɔl təl ila kəne na: Ɗi ɓa ꞌnoje ne ngaɓa ar-je mə-m gangə ne man wa? Mba ꞌma le m-isi pɛrɛrɛ mba kar ꞌtɔ-m gə tɔ ja baa ang, ngaa mba kuy Jerujalɛm nəm mba ri Mbayɓe Jeju.

¹⁴ Mba n-ar dɔ ndu-e gə njang le ɗaa lo kar j-a pa tar gə ɗangə godo ɗaa j-a pa na: May kar Mbayɓe ɗa mə njigi lə-a.

PƆL AR JERUJALƐM, GƏ SEJAR GƏ RƆM Pɔl ce Jerujalɛm

¹⁵ Go ndɔje gə nee le ɗaa j-a gɔl rɔ-si, j-ɔdə j-aw Jerujalɛm.

¹⁶ Ngan njenendoje gə Sejare kara ꞌɗe gə si tɔ ɗaa j-aw kəy lə dəw kara gə ri-a na Naso̰ gə ɓe lə-a Sipərə, n-to ngon njenendo ləw baa ɗaa kəy lə-a ɓa d-a kar j-a to kəne.

¹⁷ Ce gə j-a ce Jerujalɛm le, ngan ko̰ naaje d-uwa si gə rɔ-je gə rɔləl.

¹⁸ Lo kar-ɛ ɗaa Pɔl aw gə si ɓe lə Jagə ngaɓa ngatɔgəje tɔ̰y kara ꞌɗe kəne tɔ.

¹⁹ Pɔl oje nam ngaɓa un tar ɔr ne go ne gə Luba ɗa horo dəwje gə ꞌgərə Luba ang gə, gə ɗəw kula lə-a.

²⁰ ꞌTuga mbi-je d-o-je ɗaa d-ula ne rɔnduba dɔ Luba gə. Cibi ꞌpa na: Ngon ko̰-si, o, Jiibije tɔl dɔg lo bula ꞌta kagə Mbayɓe ngaɓa ꞌjejee tɔ̰y ꞌto dəwje gə mə-je uwa dɔ torondu.

²¹ Be ɓa d-o tar-ɛ to gə ꞌi ꞌtɔji Jiibije gə d-isi horo dəwje gə ꞌgərə Luba ang mba kar d-uba torondu Moyiji d-ḭya̰, kar d-unja bərə nganje ang nəm ngaɓa kar nja go nejiɓeje gə ang.

²² J-a ɗa ban wa? Le ɗi-ɗi kara d-a ko to gə ꞌɗe nam.

²³ Be ɓa may kar ꞌi ꞌɗa ne gə j-a pa kar ꞌi nee: Dəwje sɔɔ horo-si gə nee d-un ndu-je,

²⁴ ɗaa odo-je, ɓo ꞌsangə rɔ-i ngaɓa ar-je lar ꞌgisa ne dɔ-je. Be nama, tɔ̰y ja d-a ko to gə tarje gə ꞌpa ɔji dɔ-i le tar gə tɔgərɔ kara kara godo kəne, nəm ɓa ꞌi kara ꞌto njekila kuji dɔ torondu gə tɔ.

²⁵ Ɔji dɔ dəwje gə ꞌgərə Luba ang gə ꞌta kagə le, j-a ɗa mbede j-ar-je j-un ne ndu mba kar d-a rɔ-je dɔ daje gə ꞌpolo ne magəje, gə dɔ kusa məsə gə, gə dɔ daje gə ꞌmundu-je ꞌtɔl-je gə ngaɓa dɔ kaya gə.

²⁶ Be ɓa ndɔ gə go-e gə ɗaa Pɔl odo dəwje nee le, sangə rɔ-ɛ gə je ngaɓa andə mə kəy gə Luba. N-ula-je ndɔ gə sangə rɔ lə-je a kunda ne ngang-ɛ ngaɓa n-tɔji ne nenuji gə na-na kara ar.

Kuwa gə d-uwa Pɔl

²⁷ Logə ndɔ gə siri le a kaw ɗunga ɗaa, Jiibije gə Aji d-o-e mə kəy polo Luba gə ɗaa d-ula tar mə bula dəwje gə tɔ̰y ngaɓa d-ila d-uwa-a,

²⁸ d-uru ne ꞌkuwi na: Ijirayɛlje ꞌce-je, oje dəw gə njetɔji ne gə lo-lo kar dəwje tɔ̰y, tila ne kəm dəw mə ɓeje nəm, tila ne kəm torondu nəm ngaɓa kəm lo gə nee nəm ngaɓa n-ɗe gə dəwje gə ꞌgərə Luba ang mə kəy polo Luba gə mba kar lo gə to losang-ɛ nee le mina ne.

²⁹ Mba kede le d-o Toropim gə ɓe lə-a Epɛs je gə Pɔl mə ɓe gə ɗaa d-o to gə Pɔl aw sə-a kəy lə Luba.

³⁰ Bangə ɓar gə mə ɓebo baa wu-wu ar dəw mə ɓeje d-ḭ gə lo-lo ꞌɗe ꞌmbo̰ naa. Be ɓa d-uwa Pɔl mə kəy gə lə Luba gə ꞌndɔr-ɛ ꞌce sə-a ɗaga ngaɓa d-uwa ta kəyje d-udu badə.

³¹ Logə d-aw ꞌsangə ɗəw mba tɔl-ɛ ɗaa tar-ɛ aw oso mbi mbay lə njeɗɔje gə tɔl-tɔl dɔg gə to gə dəwje gə Jerujalɛm tɔ̰y ja ꞌgərə dɔ jije ang.

³² Gə tɔg-ɛ ja n-odo njeɗɔje gə njekun dɔ njeɗɔje gə tɔl-tɔl n-um-je dɔ-ɛ gə ngaɓa d-a̰y ngɔdə gə dɔ-je gə. Logə d-o-je mbay lə njeɗɔje gə tɔl-tɔl dɔg le ɗaa, d-əw rɔ-je kunda Pɔl.

³³ Be ɓa njekun dɔ njeɗɔje nee le ula ji-a uwa Pɔl ɗaa un ndu kar ꞌtɔ-ɛ gə kula larje joo ngaɓa təl dəji-e se n-to na wa, cibi se ɗi ɓa n-ɗa wa?

³⁴ Ngaa horo bula dəwje gə le d-uru ꞌkuwi gə yo gə nee ar n-asə gərə gəl ne kara gə ꞌɗa ne ne le ang, ɗaa n-un ndu-e mba kar d-aw sə-a mə ndogo bɔrɔ gə.

³⁵ Logə Pɔl nja ce dɔ ɗigije gə ɗaa njeɗɔje d-un-e gə kun mba bula dəwje ꞌɗa d-ar mongə ya̰,

³⁶ mba dəw mə ɓeje bula d-uru ꞌkuwi d-uwa ne go-e na: ꞌTɔl-ɛ gə tɔl ja!

Pɔl pa tar ar dəw mə ɓeje gə Jerujalɛm

³⁷ Logə d-a kaw kandə sə-a gə mə ndogo bɔrɔ gə ɗaa Pɔl pa ar njekun dɔ njeɗɔje gə tɔl-tɔl dɔg le na: Ɗəw to kar m-pa tar kara m-ar-i wa? N-təl n-ila kəne na: ꞌGərə ndo̰ tar gərɛk wa?

³⁸ Se ꞌi ɓa to dəw gə Ejipətə gə ɓisine ɓi ɔsə dəwje um-je dɔ ngangə gə ngaɓa ɔr no nje gə tɔl-tɔl dɔg sɔɔ ndag lo gə gə kula lə-je gə kula tɔl dəwje ja baa le ang wa?

³⁹ Be ɓa Pɔl pa na, ꞌma le ɗaa, m-to Jiibi gə Tarəsə dɔ nangə gə Silisi, ngon kuji ɓebo gə ri-a ɓar. M-ɗa-i kɔgərɔ ja ḭya̰ ɗəw ar-m m-pa tar m-ar dəw mə ɓeje.

⁴⁰ Njekun njeɗɔje gə tɔl-tɔl dɔg le ḭya̰ ɗəw ar-ɛ ɗaa Pɔl ar taar dɔ ɗigije gə ngaɓa bil ji-a ar dəw mə ɓeje. Lo to yɛnɛnɛ ngaɓa Pɔl un tar pa gə ndo̰ tar ebərə na: