Koula 19 - Mbede Lə Luba Kone Gə Sigi

Pɔl tɔji ne Epɛs

¹ Dɔ ndɔje gə Apolos ga̰ ne Kɔrɛnt ɗaa Pɔl nday mə ɓeko̰je gə dɔ ər gə aw Epɛs ngaɓa logə n-aw ɗaa n-inga ngan njenendoje ɓəəl, ɗaa

² n-pa n-ar-je na: Ndɔ gə ꞌtaje kagə le inga-je Njil Njerɔsangə ja wa? D-ila-je kəne na: Ndɔ kara ja kara jo tar-ɛ to gə Njil Njerɔsangə ga̰ ang baa.

³ N-təl pa na: Batɛm gə ban ɓa inga-je wa? D-ila-je kəne na: Batɛm kar Ja̰ ɓo.

⁴ Be ɓa Pɔl pa na: Ja̰ le ɗa dəwje batɛm kar turu kəji, mba n-pa n-ar dəwje kar ꞌta kagə dəw gə a ɗe go ꞌne gə, Jeju ɓa kar ꞌta kag-ɛ.

⁵ Gə go tar gə nee le ɗaa d-ar ꞌɗa-je batɛm gə ri Mbayɓe Jeju.

⁶ Logə Pɔl ila ji-a dɔ-je gə ɗaa Njil Njerɔsangə ɗe dɔ-je gə ar ꞌpa ndo̰ tarje ngaɓa ꞌpa ne tar gə Pajambərəje.

⁷ Dəwje nee tɔ̰y le d-asə dɔg gə gir-je gə joo be.

⁸ Pɔl andə kəy nendo gə lə Jiibjije n-pa tar kəne gə ɓəəl ang ngaɓa ma̰y gə je tar n-cɛdə ne singa-je gə ɔji dɔ ɓeko̰ lə Luba. N-ɗa be ja asə nay munda.

⁹ Ngaa nje gə kɛm mə-je kədərə al dɔ lo ɗaa ꞌpa tarje gə kṵra̰y ɔji dɔ ɗəw lə Mbayɓe be ɓa n-ɔr kəm ngan njenendoje ɗədə n-aw gə je kəy nendo gə lə dəw gə ri-a na Tiranus ɗaa gə ndɔ-ndɔ ja n-to̰ gə je tam.

¹⁰ To to gə be-be ja ɓal joo saar ar dəwje tɔ̰y gə d-isi dɔ nangə gə Aji d-o ne tar lə Mbayɓe, Jiibije ngaɓa dəwje gə ꞌgərə Luba ang nəm.

¹¹ Luba uwa ji Pɔl ɗa ne nemisije gə dəw o gɔl kara ang,

¹² ngaɓa ɗa ar dəwje d-aw gə ta kubuje ose kubuje gə ɔr rɔ Pɔl d-aw d-ɔr ne rɔ njerɔko̰je nama d-aji kəbərə ngaɓa njilje gə kṵra̰y kara ce mə-je nəm tɔ.

¹³ Njetɔbə njilje gə kṵra̰y gə kɛm to Jiibije gə nje nja taar horo dəwje gə, d-un kudu ɓar ri Mbayɓe Jeju dɔ nje gə njilje ɗa ɓe mə-je gə, ꞌpa na: M-un ndu gə ri Jeju gə Pɔl aw ila mbərə lə-a nee.

¹⁴ Nje gə aw ɗa ne gə nee le to ngan lə dəw kara gə ri-a na Seba, to kara lə buba njekapolo lə Jiibije, dɔ-je siri.

¹⁵ Be ɓa njil gə kṵra̰y le ila-je kəne na: M-gərə Jeju ngaɓa m-gərə Pɔl gə maj-ɛ ngaa sisəy ꞌtoje naje wa?

¹⁶ Ɗaa dəw gə njil gə kṵra̰y ɗa ɓe m-e gə le ḭ uru dɔ-je gə, guru singa-je rɛm-rɛm gə yo gə nee ar d-inga do ngaɓa ꞌce kəy kudu-je dum baa d-a̰y.

¹⁷ Ne gə nee le dəwje tɔ̰y gə d-isi Epɛs ꞌgərə, Jiibije gə dəwje gə ꞌgərə Luba ang gə ar ɓəəl unda-je badə gangə-je ɗaa d-ila riɓar dɔ ri Mbayɓe Jeju gə.

¹⁸ Dəwje bula gə ꞌta kagə ꞌɗe ꞌce gəl rɔ-je ngaɓa d-ɔr gəl pa ɗa mbɛ̰ lə-je kɔdɛ-kɔdɛ.

¹⁹ Dəwje bula horo njembɛ̰je gə ꞌɗe gə mbede mbɛ̰je lə-je, ꞌɗo gə pər tulug-tulug no-je gə tɔ̰y. Mbedeje nee le ɓo d-uji lar-ɛ nama asə tɔl-tɔl dɔg lo tɔl bula.

²⁰ To gə be ɓa gə go singamongə lə Mbayɓe ɗaa, Tar lə Luba ta ne lo gə singa-a gə kede-kede.

²¹ Logə neje nee nday ɗaa Pɔl gɔl mə kəji gə lə-a mba kaw Jerujalɛm ɗaa a nday gə mə ɓeko̰ gə Masedowan gə dɔ nangə gə Akayi. N-təl n-pa na: Ɓo m-aw Jerujalɛm nama may kar-m m-o Rɔm gə kəm ja tɔ.

²² Be ɓa n-ula njebakulaje lə-a joo, Timoce je gə Erasətə Masedowan gə ɗaa ꞌne n-təl n-isi dɔ nangə gə Aji njɛ̰ ja cibi.

Demetəriyus gə njekɔrə ɔsə gəl wungu bula

²³ Dɔ ndɔ-ɛje gə nee le ndu kasə naa ang gə boy ja to horo dəwje gə ɔji dɔ ɗəw lə Mbayɓe.

²⁴ Njekɔrə kara gə ri-a na Demetəriyus odo ngaw lar ɓa ɗa ne no ngɔ lə magə gə ꞌɓar-ɛ Arətemis ngaɓa inga ne nekinga ya̰ ar njegusuje.

²⁵ Be ɓa n-mbo̰ njekɔrə mar-ɛje n-pa n-ar-je na: Sisəy le ꞌgərə gə maj-ɛ to gə gəl kisi may lə-si to kɔrə gə nee le.

²⁶ Ngaɓa oje gə kəm-si nəm gə mbi-si nəm, Epɛs nee baa ang ngaa gə dɔ nangə gə Aji ja tɔ̰y, ꞌne gə Pɔl nee le, n-pa na: Magəje gə dəwje ꞌɗa gə ji-je le ꞌto magəje ang, n-bɛ̰ ne ta bula dəwje ngaɓa n-turu ne kəji lə-je nəm.

²⁷ Ne gə d-aw ɗa nee le a tuji riɓar gə ɔji dɔ kula lə-si baa ang ngaa a təl no ngɔ polo magə gə boy gə jene ri-a na Arətemis le gə ne gə baa ngaɓa polo gə dəwje gə ɓeko̰ gə Aji gə dɔ nangə tɔ̰y d-aw pol-e le a kunda nangə.

²⁸ Gə go tar gə nee le ɗaa mə-je o̰-je ar d-uru ꞌkuwi na: Arətemis, magə gə jene lə dəwje gə Epɛs to magə gə boy.

²⁹ Be ɓa bangə ɓar gə mə ɓebo wu-wu. D-unda ndu-je naa gə tɔ̰y d-aw gə tɔg-ɛ baa nadə kagə miḭ gə. Dəwje gə Masedowan gə ri-je na Gayus je gə Arisətarəkə, gə njebalokawje lə Pɔl kara ꞌtuwa-je d-ar d-aw gə je naa gə tɔ.

³⁰ Pɔl sangə ɗəw mba ce gə ɗaga no dəw mə ɓeje ngaa ngan njenendoje d-ɔg-ɛ,

³¹ ngaɓa njeko̰ ɓeje gə kɛm gə to njekuraje lə-a kara d-ula dəwje d-ar ꞌpa d-ar-ɛ na kar n-ce n-aw nadə kagə miḭ gə ang.

³² Dəwje d-uru ꞌkuwi gə yo gə nee baa mba ꞌgərə dɔ ji-je ang ngaɓa dəwje bula ja gərə gəl ne gə ꞌmbo̰ ne naa le ang.

³³ Be ɓa Alɛgəjandərə gə Jiibije ɔs-ɛ gə kede-kede le d-ar-ɛ ce ar no dəwje gə ngaɓa un ji-a bil, cibi sangə ɗəw mba ma̰y tar dɔ rɔ-ɛ gə kəm dəw mə ɓeje gə.

³⁴ Ngaa logə dəwje tɔ̰y ꞌgər-e gə Jiibi ɗaa d-uru ꞌkuwi gə ndu-je gororo asə ngira kar joo na: Arətemis, magə gə jene lə dəwje gə Epɛs to magə gə boy.

³⁵ Ngaa njeɗa mbede gə mə ɓebo ar dəwje d-əw rɔ-je ngaɓa pa na: Dəwje gə Epɛs, dəw gə ɗa ɓa gərə to gə ɓebo gə Epɛs ngəm kəy polo magə lə jene gə boy, Arətemis ang wa? Ngaɓa gərə ndaji-ɛ gə ḭ dara oso nangə ang ja cibi wa?

³⁶ Mba dəw asə ma̰y ang ɗaa əw-je rɔ-si ngaɓa ꞌɗaje ne kara gə ndəbə ang.

³⁷ Mba dəwje gə ꞌɗe-je gə je nee le ꞌɗa ne gə kṵra̰y ang nəm ɓa ꞌtaji magə lə-sijee gə jene le ang nəm.

³⁸ To gə ɓo Demetəriyus je gə njekɔrəje gə d-um go-e gə le d-aw gə dəw gə tar nama ndɔ ɗa tar ga̰ ngaɓa njeɗa tarje kara ꞌga̰ nəm ɗaa may kar d-aw ꞌsəgə.

³⁹ Ngaa ɓo ne gə ɗangə ɓa aw ꞌsangəje nama may kar d-a mbo̰ naa gə dɔ gɔl-ɛ ja ɓa mba gɔl.

⁴⁰ D-a kḭ ko-si gə njekal tarje ta njeko̰ ɓeje gə mba ne gə nday ɓogəne mba mbo̰ naa gə nee le ɓo ꞌdəji si nama j-a kasə kɔr gəl-e ang. Go tar gə nee ɗaa n-tɔbə dəwje n-ar d-aw ɓe.