Koula 18 - Mbede Lə Luba Kone Gə Sigi

Pɔl aw Kɔrɛnt

¹ Logə Pɔl ɔdə Atɛn le ɗaa aw Kɔrɛnt.

² Mə ɓebo gə nee le n-inga Jiibi kara ri-a na Akilas, to ngon njeɓe gə Po̰, je gə jene lə-a ri-a na Pirisika, d-ḭ ɓeko̰ gə Itali ɓisine ɓi, mba dɔ ndɔ-ɛje gə əng le mbay Kolodə un ndu mba kar Jiibije tɔ̰y d-ɔdə Rɔm gə gugu. Ɗaa Pɔl um gə je naa gə.

³ ꞌJejee kara ꞌto njegusu kuji kəy kubuje to gə Pɔl be tɔ. Be ɓa Pɔl isi gə je ɗaa ꞌɗaje kula kara baa, d-uji-je kəy kubu.

⁴ Gə ndɔ kuwa kɔrje tɔ̰y ja Pɔl aw ma̰y tar gə Jiibije nəm gə dəwje gə ꞌgərə Luba ang nəm kəy nendo gə lə Jiibije mba cɛdə ne singa-je.

⁵ Logə Silas je gə Timoce d-ɔdə d-aw ɓeko̰ gə Masedowan ngaa Pɔl ila rɔ-ɛ kula kila mbərə, gə pa tar naji ar Jiibije to gə Jeju ja to Kirisi.

⁶ Ngaa d-ɔsə ngərəng ngaɓa ꞌtaji Luba ɗaa Pɔl uwa kubu sugu bugu-bugu ngaɓa pa ar-je na: Tar məsə-si a kuwa dɔ sisəy ja ɓo ɔr-m ꞌma ang ngaa, un kud-e ɓogəne ja m-a turu kəm gə ɓə lə dəwje gə ꞌgərə Luba ang.

⁷ Logə n-ɔdə lo-e gə ɗaa n-aw kəy lə dəw kara gə to nje ɓəəl Luba ri-a na Titiyus Jusətus, kəy lə-a le to mbɔr kəy nendo gə lə Jiibije lɛr baa.

⁸ Be ja kara Kirisəpus gə to nje ka dɔ kəy nendo lə Jiibije ta kagə Mbayɓe gə njeməkəyje lə-a tɔ̰y. Ngaɓa dəwje gə Kɔrɛnt bula gə d-o tar gə Pɔl pa kara ꞌta kagə Mbayɓe ar ꞌɗa-je batɛm.

⁹ Mə cil gə ɗaa, Mbayɓe pa tar ar Pɔl mə ne gə o lokiya gə na: ꞌƁəəl ang ɓo ꞌpa tar ngaɓa isi ta-i munduru ang.

¹⁰ Mba ꞌma ja m-ga̰ sə-i nee ɗaa dəw kara a tɔsə ta-i mba ɗa-i məyɛr ang, mba dəwje nəm ꞌbula ya̰ mə ɓebo gə nee.

¹¹ Be ɓa n-təl n-ɗa ɓal kara gə nay misa̰ horo-je gə, n-tɔji tar lə Luba.

¹² Logə Galiyo̰ to ne njeko̰ ɓe gə dɔ nangə Akayi, ɗaa Jiibije d-unda ndu-je naa gə kara baa ꞌtila kəm Pɔl gə tar ngaɓa d-aw sə-a no ngɔ gangə tar gə

¹³ ꞌpa na: Dəw gə ar nee le tɔji dəwje ɗəw polo Luba gə to dang gə ye gə mə torondu gə.

¹⁴ Logə Pɔl a kaw cɛ̰ t-ɛ be mba pa ne tar ɗaa, Galiyo̰ pa ar Jiibije na: To gə ɓo ɔji dɔ neɗaje gə kṵra̰y ose kula məyɛr ɓa ꞌpaje ɗaa, Jiibije, m-a kila mə-m dɔ mar-ɛ gə mba ko ne gə maj-ɛ ja,

¹⁵ Ngaa ɓo ɔji dɔ ma̰y tarje, gə ɔji dɔ netɔjije ose torondu, gə ɔji dɔ rije ngaɓa gə torondu lə-sisəy ja nama, to tar lə-si, ꞌma m-njigi ɗa tar-ɛ ang.

¹⁶ Be ɓa n-tɔbə neje no ngɔ ɗa tar gə.

¹⁷ Gəl-e gə nee ꞌmbo̰ naa tɔ̰y dɔ Sosətɛn gə to nje ka dɔ kəy nendo lə Jiibije gə, ꞌkunda no ngɔ ɗa tar gə ngaa njɛ̰ ja kara oso Galiyo̰ kəne ang.

Pɔl təl aw Antiyos

¹⁸ Pɔl isi kəne ɗa ndɔ bula ja cibi. Go-e gə ngaɓa ḭya̰ ngan ko̰ naaje, al to aw gə ɓeko̰ gə Siiri naa gə kara baa gə Pirisika je gə Akilas. ꞌCe Sa̰kəre ɗaa Pɔl ar-je ꞌgisa dɔ-ɛ kəne mba un ndu-e.

¹⁹ Logə ꞌce Epɛs ɗaa Pɔl ḭya̰-je ngaa ye ɔdə aw kəy nendo gə lə Jiibije, aw ma̰y gə je tar,

²⁰ ɗaa ꞌdəj-eje mba kar n-isi kur-e əw ɓəl ɓa.

²¹ Ngaa təl kisi le uwa mə Pɔl ang ɗaa ɔdə ḭya̰-je, ngaɓa pa na: Kəm kar-m m-ɗa nay gə aw ɗe əng Jerujalɛm ɓa a may. To gə ɓo Luba njigi nama m-a təl ɗe ɓe lə-si ɓi. Be ɓa n-al to Epɛs n-aw gə Sejare.

²² Logə n-uru nangə Sejare ɗaa n-aw n-o mbo̰ naa lə njetakagəje gə Jerujalɛm ngaɓa n-ɔdə n-aw Antiyos.

Kaw mba kula kila mbərə lə Pɔl gə njekum gə munda

²³ Dɔ ndo-ɛ gə əng le kur-e əw njɛ̰ Antiyos ngaɓa n-day mə ɓeko̰je gə Galasi gə Piriji n-aw n-ula jingaw mə ngan njenendoje gə.

²⁴ Jiibi kara ri-a na Apolos, n-to gə Alɛgəjandəri, to dəw ndu gɔs-ɛ may tar ya̰ ngaɓa gərə mbede lə Luba gə maj-ɛ ɗaa ɗe Epɛs.

²⁵ ꞌNe nee le ꞌtɔj-ɛ ɗəw lə Mbayɓe ngaɓa batɛm lə Ja̰ baa n-gərə ngaa kəji lə-a to njang ɗəw Njil gə ar n-ila mbərə ngaɓa n-tɔji ne gə ɔji dɔ Jeju gə dɔ gɔl-ɛ.

²⁶ ꞌNe nee le n-pa tar kəm ngon gə jingaw mə kəy nendo gə lə Jiibije. Logə Pirisika je gə Akilas d-o ɗaa d-uwa-a gə rɔ-je gə ꞌtəl tɔj-ɛ ɗəw lə Luba bɛrɛ-bɛrɛ ja cibi.

²⁷ Ndɔ gə n-njigi mba kaw gə dɔ nangə gə Akayi ɗaa ngan ko̰ naaje d-ula jingaw m-e gə ngaɓa ꞌtəl ɗa mbede d-ar ngan njenendoje gə nu mba kar d-uwa-a gə maj-ɛ gə rɔ-je gə. Logə n-ce nam ɗaa, gə go ɗəw mənuji lə Luba ɗaa n-a la gə njetakagəje kar may to ɓəəl,

²⁸ mba n-bɛ̰ ta Jiibije nda̰-nda̰ gə n-tɔji mbede lə Luba gə n-pa to gə Jeju ja to Kirisi.