Koula 17 - Mbede Lə Luba Kone Gə Sigi

Pɔl aw ɓebo gə Tesaloniki gə Bere

¹ Go-e gə ɗaa ꞌnday-je gə ɗəw gə Aməpipolis, gə Apoloni ngaɓa ꞌce-je ne Tesaloniki gə kəy nendo lə Jiibije to kəne.

² Ɗaa Pɔl andə kəne to to gə aw andə ne kede-kede le, asə ndɔ kuwa kɔrje munda ja n-pa tar gə Jiibije ɔji dɔ mbede lə Luba,

³ be ɓa Pɔl ɔr gəl-e ngaɓa tɔji to gə Kirisi a ko ꞌməsərə ngaɓa a ndol horo nje d-uy gə. N-təl n-pa na: Jeju gə m-aw m-pa tar lə-a m-ar-si nee le, ꞌne ja n-to Kirisi.

⁴ Tar le oso ur Jiibije gə kɛm ar d-um naa gə gə Pɔl je gə Silas ngaɓa dəwje gə ꞌgərə Luba ang bula gə to nje ɓəəl Lubaje, gə jeneje bula gə to jene nembaje nəm tɔ.

⁵ Ngaa Jiibije gə nje ɗa mə-je, d-aw d-odo gayim dəwje ta nada d-um-je dɔ-je gə ꞌmbo̰ ne bula bo dəwje dɔ naa gə ngaɓa d-ar bangə ɓar ne mə ɓebo gə wu-wu. Cibi d-ɔdə d-aw kəy lə Jaso̰ d-aw ꞌsangə Pɔl je gə Silas mba tuwa-je ɗe gə je no dəw mə ɓeje gə.

⁶ Ngaa logə d-aw ɗaa d-inga-je ang, be ɓa ꞌndɔr-je Jaso̰ je gə ngan ko̰ naaje gə kɛm ꞌɗe gə je no nje gangə tarje gə d-uru ne ꞌkuwi dɔ-je gə na: Dəwje gə d-ar nee ja ꞌturu kəji lə dəwje gə ɓe-ɓe ngaɓa ɓogəne ꞌce ɓe lə-si nee,

⁷ ɗaa Jaso̰ ja uwa-aje mba ꞌjejee nee tɔ̰y ja ꞌsula dəwje ꞌtila ne kəm toronduje lə Sejar cibi ꞌpa d-ar dəwje na mbay gə ɗangə gə ri-a na Jeju ga̰ kəne əng ɓi.

⁸ Tar gə nee le turu kəji lə bula dəwje gə njeko̰ ɓeje nəm,

⁹ ɗaa d-unda lar dɔ Jaso̰ gə je nje gə kɛm gə d-ar-je d-uga ngaɓa d-ḭya̰-je ɓi.

¹⁰ Be ɓa dɔ ndɔ-ɛ gə əng ja londul ɗaa ngan ko̰ naaje d-ar Pɔl je Silas d-ɔdə d-aw Bere. Logə ꞌce-je be ja ɗaa d-andə kəy nendo gə lə Jiibije.

¹¹ Jiibije gə Bere nee le kəji lə-je may unda nje gə Tesaloniki, ꞌtaje tar gə mə kara ngaɓa ꞌtənje mbedeje lə Luba so-so gə ndɔ-ndɔ mba ko se tar gə d-aw pa d-ar-je le to gə dɔ gɔl-ɛ ja wa?

¹² Dəwje bula horo-je gə ta kagə Mbayɓe ngaɓa jene Gərɛgəje gə ꞌto jene nembaje, gə jingawje bula asə mbagə nəm tɔ.

¹³ Ngaa logə Jiibije gə Tesaloniki d-o tar-ɛ to gə Pɔl aw pa tar lə Luba gə Bere tɔ ɗaa d-a̰y d-aw kəne d-aw d-ula njuma mə bula dəwje gə d-ar unda bangə.

¹⁴ Be ɓa gə tɔg-ɛ baa ja ngan ko̰ naaje d-ar Pɔl un ɗəw aw dɔ-ɛ gə ta babo gə, ngaa Silas je gə Timoce ꞌna̰y Bere.

¹⁵ Nje gə dan Pɔl le d-ɔr no-ɛ saar ꞌce sə-a Atɛn. Ɗaa təl lə-je le Pɔl un ndu ar-je mba kar d-ula Silas je gə Timoce d-ar ꞌɗe gə tɔg-ɛ d-inga-a.

Pɔl ar Atɛn, pa tar nada

¹⁶ Logə Pɔl aw ngina-je Atɛn ɗaa kəji lə-a turu buguju mba magəje gə bula mə ɓebo gə nee le.

¹⁷ N-aw n-to̰ tam gə Jiibije mə kəy nendo gə lə-je ngaɓa gə dəwje gə ꞌpolo Luba ngaɓa gə dəwje n-inga-je nada gə ndɔ-ndɔ tɔ.

¹⁸ Njetɔji tar kəm karəje gə kɛm gə gəl dəw gə ri-a na Epikur gə nje kar Sətoysə d-ḭ ꞌpa gə Pɔl tar. Nje gə əər kara gə ꞌpa na: Tar ɗi ɓa njetura tar nee njigi pa wa? Nje gə kɛm na: To to gə n-aw n-ila mbərə magə mbaje be, mba Pɔl ila mbərə Tar gə May lə Jeju, gə tar ce buwa yo lə nje gə d-uy.

¹⁹ Be ɓa d-ɔr-ɛ d-aw sə-a lo gə ꞌɓar-ɛ Areyopaje ngaɓa ꞌpa na: Se ɗəw a to kar ɔr gəl netɔji gə sigi gə aw pa tar-ɛ nee le gə maj-ɛ ar-si j-a gərə wa?

²⁰ Mba tar nee le uru mbi-si gə gə ne gə sigi ɓi. Ɗaa j-a njigi gərə gəl-e.

²¹ Njeɓeje gə Atɛn gə mbaje gə ꞌɗe horo-je gə le d-isi gə dɔ karje tɔ̰y ja mba to̰ tam ne gə sigi ose mba tuga mbi-je ko ne.

²² Be ɓa Pɔl ar taar gə ngal-ɛ dan lo gə ꞌɓar-ɛ Areyopaje un tar pa na: Sisəy ngan njeɓeje gə Atɛn, ko gə m-o-si nee ɗaa tar polo ne o̰ si ya̰ ja tɔ.

²³ Mba logə m-aw nday ɗaa m-o neje gə aw poloje ngaɓa m-inga no kɔgə kara d-unja ne kəne na: Kar magə gə dəw gər-e ang. Ne gə ꞌgər-eje ang gə ꞌpolo-eje nee le ɓa m-aw m-pa tar-ɛ m-ar-si.

²⁴ Luba gə nje ɗa dɔ nangə gə neje tɔ̰y gə to kəne, ꞌNe gə n-to Mbayɓe gə dara gə dɔ nangə nee le, n-isi mə kəyje gə dəwje ꞌɗa gə ji-je ang,

²⁵ ji dəw a ɗa ne kar-ɛ ang, to to gə n-aw ndoo ne be, ꞌne gə n-ar dəwje tɔ̰y təbə gə kəm ngaɓa neje tɔ̰y.

²⁶ N-ɗa n-ar gəl kuji dəwje gə d-isi dɔ nangə nee gə lo-lo le, gar-je kara baa ja, n-ɔji dɔ ndɔje gə ɗəw nim ɓeje lə-je,

²⁷ n-ɗa be mba kar dəwje ꞌsangə ne Luba ɓo ɗəw to nama d-inga-a ne, mba na-na kara n-isi sə-a əw ang baa.

²⁸ Mba mbɔr dɔ-ɛ ꞌne ɓa d-inga ne təbə ja nja ne gə dəwje ngaɓa j-unda ne rɔ-si. Ye ja tɔ to tar gə njeno̰paje lə-si gə kɛm ꞌpa na: Ja to ngan m-e ja tɔ.

²⁹ Be ɓa ɓo ja to ngan mə Luba nama j-a kəji to gə Luba unda rɔ maa ose lar ose kɔr ər, gə kagə gə ꞌtɔl ngaɓa unda rɔ-ɛ to to gə dəw əji ne m-e gə ang.

³⁰ Luba le, ḭya̰ go neje gə dəw ɗa dɔ kar mbə gə ɗaa ɓogəne ila mbərə ar dəwje gə lo tɔ̰y ja mba kar ꞌturu kəji lə-je,

³¹ mba n-ɔr ndɔ kara n-unda doy, gə n-a gangə ne tar gə ɗəw gə gadə-gadə dɔ dəwje tɔ̰y gə dɔ nangə gə nee. N-ɔr dəw kara n-unda-a kar ye ɓa a ɗa tar nee le, uy ɓa təl ce mə buwa yo gə kəm kar dəwje ꞌta kag-ɛ.

³² Logə d-o-je tar ce buwa yo gə ɗaa nje gə ɓe kara ꞌkogo-e gə kogo ngaa nje gə kɛm ꞌpa na: Ndɔ gə ɗangə ɓa a pa tar gə əng kar j-o ɓi.

³³ Be ɓa Pɔl ɔsə lo horo-je gə ce.

³⁴ Ngaa nje gə kɛm gə d-um sə-a naa gə ngaɓa ꞌta kagə, horo-je gə le Dənis gə to kara lə nje lo gə ɓar-ɛ Ayeropage, gə jene gə ri-a na Damaris ngaɓa nje gə kɛm ga̰ kəne ja cibi.