Koula 16 - Mbede Lə Luba Kone Gə Sigi

¹ Logə n-ce Dɛrəbə ngaɓa Lisətərə, ɗaa ngon njenendo kara ga̰ kəne, ri-a Timoce, ko̰-ɛje to Jiibi gə takagə Kirisi ngaa bɔ-ɛje to gərɛk.

² Ngan ko̰ naaje gə Lisətərə gə nje gə gə Ikoniyom ꞌpa tar naji lə-a may ya̰.

³ Be ɓa Pɔl njigi kuwa-a ji-a gə, to gə be ɓa Pɔl uwa-a unja bər-e mba kila ne kɔji dɔ torondu gə lə Jiibije gə lo-eje gə nee le mba ꞌgərə som to gə bɔ-ɛje to gərɛk.

⁴ Ndu gə njeka̰ykulaje gə ngatɔgəje d-un mə ɓe gə Jerujalɛm gə ꞌɗa mbede gə, mə ɓeboje tɔ̰y gə Pɔl ce kəne nama ar-je mba kar d-ila kuji kəne.

⁵ Mbo̰ naaje lə njetakagəje uba singa dɔ takagə gə ngaɓa kɔr njetakagəje kara oso dɔ mar-ɛ gə gə ndɔ-ndɔ.

⁶ Dɔ ndɔ-ɛ nee le Njil Njerɔsangə ɔgə-je ɗəw kila mbərə tar dɔ nangə gə Aji. Be ɓa ꞌnday-je ɓeko̰je gə Piriji gə Galasi taar.

⁷ Logə d-aw ꞌce əw ang gə Miji ɗaa ꞌna ɗəw mba kaw Bitini ngaa Njil Jeju ɔgə-je ɗəw.

⁸ Be ɓa ꞌnday-je Miji le taar d-aw Torowas.

⁹ Mə cil-e gə əng ja Pɔl o ne lokiya gə ɗaa dəw pa na: Dəw gə Masedowan ar taar gə ngal-ɛ ɗa kɔgərɔ na, aw mə ɓeko̰ gə Masedowan aw la gə si.

¹⁰ Logə Pɔl o ne lokiya gə to gə be ɗaa, ja sangə ɗəw mba kaw Masedowan gə tɔg-ɛ mba ja gərə to gə Luba ɓar-si kar j-aw j-ila mbərə tar lə Mbayɓe Jeju kəne.

Pɔl aw ɓebo gə Pilibi, ɓeko̰ gə Masedowan

¹¹ Be ɓa j-al to mə ɓebo gə Torowas ɗaa j-aw dɔ si gə ɓe gə Samotəras ngaɓa lo kar-ɛ ɗaa j-a ce ɓebo gə Neyapolis.

¹² J-ḭ lo-e gə nee ɗaa j-aw Pilipi gə to dɔngɔr ɓebo gə dɔ nangə gə Masedowan ngaɓa to ɓeko̰ gə Rɔm. J-isi mə ɓebo gə nee le ndɔ bula ɓəəl.

¹³ Ndɔ kuwa kɔr ɗaa j-a ce gir ɓe gə ɗaga əər kar niya̰ gə, mba j-əji to gə lo dəji Luba to kəne. Logə j-isi nangə ɗaa j-a pa tar j-ar jeneje gə ꞌmbo̰ naa.

¹⁴ Ɗaa jene kara, ri-a na Lidi, n-to nje ɗabə dɔ kubuje gə kasə wɛgɛ ngaɓa n-to gə Tiyatir, n-ɓəəl Luba ya̰. Jene nee le tuga mbi-a o ne tar ɗaa Mbayɓe mbudu dɔ ɓəngər-e ar-ɛ n-ta kagə tarje gə Pɔl pa le.

¹⁵ Logə ꞌɗ-ɛ batɛm gə njeməkəyje lə-a ɗaa n-ɗa-si kɔgərɔ na: To gə ɓo o-mje gə njetakagə Mbayɓe to gə tɔgərɔ nama ꞌɗe andəje kəy lə-m isije kəne. Ɗaa n-ɗa n-ar j-a njigi go-e.

¹⁶ Ndɔ kara j-aw gə lo dəji Luba gə ɗaa ngon njekula gə jene kara gə njil ndo̰ ər to m-e gə, ar ꞌɓəə-ejeje d-inga ne ne ya̰, ḭ tila kəm-si.

¹⁷ N-dole go si gə Pɔl naa gə ngaɓa n-uru ꞌkuwi na: Dəwje gə d-aw nee le ꞌto njekulaje lə Luba gə nje kisi sam dara gə ngaɓa d-aw d-ila mbərə ɗəw kaji.

¹⁸ N-ɗa to gə be ja ndɔ bula. Mə Pɔl ḭ sə-a bububu ɗaa turu kəm-e pa ar njil le na: M-un ɗəw gə ri Jeju Kirisi kar-i ꞌce mə jene gə gugu. Logə n-pa be ɗaa njil le ce dɔ kar-ɛ gə nee ja.

¹⁹ Be ɓa logə ꞌɓəə-ejeje d-o to gə ne gə d-um mə-je kəne mba kinga ne lar le tuji nam ɗaa, d-uwa Pɔl je gə Silas ꞌndɔr-je d-aw gə je nada no njeko̰ ɓeje gə.

²⁰ Logə d-aw gə je d-ar njekun dɔ nje gangə tarje ɗaa ꞌpa na: Dəwje gə nee gə ꞌto Jiibije ɓa ꞌɗe ꞌtuji kəji lə dəwje mə ɓebo gə lə-si;

²¹ ngaɓa d-aw d-ila mbərə nejiɓeje gə kəm kar j-a ta ang nəm ɓa ja kila kuji kəne ang nəm mba ja to nje gə Rɔm.

²² Be ɓa bula dəwje d-ore naa gə njekun dɔ nje gangə tarje d-ḭ ꞌɓugu naa dɔ-je gə, ꞌtɔr kubu rɔ-je ngaɓa d-un ɗəw d-ar ꞌkunda-je gə ndəy.

²³ Be ɓa ꞌlabə-je tarara-tarara nam ɓa d-aw d-umje mə kəy kula gə ngaɓa d-un ndu d-ar njengəm ta kəy le kar unda kəm-e dɔ-je gə gə maj-ɛ.

²⁴ Logə njengəm ta kəy le inga ndu gə nee le ɗaa um-je mə kəy kula gə kɔrɔgə ngaɓa ila ja gɔl-je ja cibi.

²⁵ Dan lo dana ɗaa, Pɔl je gə Silas ꞌdəji Luba ngaɓa d-ɔsə pa kɔsə gaji-ɛ d-ar dəwje gə kɛm gə d-uwa-je kara d-o ndu-je.

²⁶ Dɔ nangə ye bus baa to gə boy ngaɓa ɗa ar gɔl kəy kula kara ye tɔ ɗaa ta kəy tɔr tɔ̰y ngaɓa kula larje gə ꞌtɔ neje gə̰y nangə tɔ̰y.

²⁷ Logə njengəm ta kəy ndol, gə o ta kəyje gə to tagəra baa tɔ̰y ɗaa ɔr kiya bayi lə-a mba tɔl ne rɔ-ɛ, mba n-əji to gə dəwje gə kəy kula gə le d-a̰y tɔ̰y ngaa.

²⁸ Ngaa Pɔl uru ꞌkuwi gə singa na: ꞌTɔl rɔ-i ang mba ja ga̰ nee tɔ̰y ja.

²⁹ Be ɓa n-təl n-dəji pər n-andə ne kəy gə gə tɔg-ɛ ɗaa n-isa ɗɛgə-ɗɛgə n-uwa ne nangə burugə no Pɔl je Silas gə.

³⁰ Logə n-ɔr-je n-ce gə je ɗaga ɗaa n-pa na: Yejeje, ɗi ɓa to ne gə m-a ɗa mba kaji ne wa?

³¹ Pɔl je gə Silas d-ila kəne na: ꞌTa kagə Mbayɓe Jeju nama a kaji, ꞌi gə njeməkəyje lə-i.

³² Be ɓa ꞌpa tar lə Mbayɓe d-ar-ɛ gə dəwje tɔ̰y gə d-isi mə kəy gə lə-a.

³³ Dɔ kar-ɛ gə mə cil-e gə nee ja, n-aw gə je n-aw n-togo do lə-je ɗaa gə lo-e gə nee ja ꞌɗ-ɛ batɛm gə njeka-ɛje tɔ̰y tɔ.

³⁴ N-təl n-aw gə je mə kəy gə lə-a, n-um-je ta ka nekusa gə ngaɓa n-ɗa ne rɔləl gə njeməkəyje lə-a tɔ̰y mba ta gə ꞌta kagə Luba.

³⁵ Lo kar-ɛ gə ndɔɔ ɗaa njekun dɔ nje gangə tarje d-ula ngan njekulaje mba kar d-ḭya̰-je.

³⁶ Njengəm ta kəy kula le aw ndəji tar-ɛ ar Pɔl na: Njekun dɔ nje gangə tarje d-un ndu mba kar d-ḭya̰ si ngaa, ɗaa may kar-si ꞌceje awje gə maj-ɛ.

³⁷ Ngaa Pɔl pa ar-je na: Ar-je ꞌlabə-si nada ja tarara-tarara lal ɗa tar lə-si, je gə j-a təl ngan njeɓeje gə Rɔm ja d-um si kəy kula gə ɗaa ɓisine ꞌnjigi kḭya̰-si hɔy baa be wa? Be əng baa, aw ula-je ar-ꞌjejee ja ꞌɗe d-ḭya̰ si.

³⁸ Ngan njekulaje lə nje gangə tarje le ꞌtəl d-aw ndəji tar gə nee le d-ar nje gangə tarje, logə d-o na dəwje nee le to dəwje gə təl ngan njeɓe gə Rɔm ɗaa ɓəəl unda-je badə gangə-je.

³⁹ Be ɓa ꞌɗe ꞌgɔl mə-je ngaɓa d-ḭya̰-je ɗaa ꞌtəl ɗaje kɔgərɔ mba kar d-ɔdə mə ɓebo gə nee le.

⁴⁰ Logə ꞌce kəy kula gə ɗaa d-aw kəy lə Lidi, d-aw d-o ngan ko̰ naaje d-ula jingaw mə-je ngaɓa d-ɔdə d-aw ɓi.