Koula 14 - Mbede Lə Luba Kone Gə Sigi

Pɔl je gə Barənabas d-ar mə ɓebo gə Ikoniyom

¹ Logə Pɔl je Barənabas d-aw Ikoniyom kara d-aw d-andə kəy nendo gə tɔ, ꞌpa tar ꞌcɛdə ne singa bula bo Jiibije gə dəwje gə ꞌgərə Luba ang d-ar ꞌta kagə.

² Ngaa Jiibije gə to nje məkədərəje ꞌsula dəwje gə ꞌgərə Luba ang d-ar d-aw gə kəji gə kṵra̰y baa ja dɔ ngan ko̰ naa gə.

³ Ngaa d-isi kuru-je əw Ikoniyom, ꞌpa tar gə dɔ Mbayɓe gə ngadə-ngadə, ɗaa ye kara ɗa tar naji ɔji dɔ tar mənuji lə-a, ar netɔjije gə neje dang-dang gə kəm dəw o ndɔ kara ang ce ɗəw gə lə-je.

⁴ Bula dəwje ꞌkay naa dana mə ɓebo gə: nje gə nee d-oso gəl Jiibije gə, nje gə kən d-oso gəl njeka̰ykulaje gə tɔ.

⁵ Mba Jiibije gə dəwje gə ꞌgərə Luba ang gə mbayje lə-je ꞌsangə ɗəw mba ɗa-je məyɛr nəm ɓa, gə mba ɗɔ-je gə ər,

⁶ ngaa Pɔl je gə Barənabas ꞌgərə ɗaa d-a̰y dɔ-je gə Likawni, gə Lisətərə, gə Dɛrəbə ngaɓa mə loje gə gugu dɔ-je.

⁷ D-ila-je mbərə Tar gə May kəne tɔ.

D-ila mbərə Tar gə May Lisətərə

⁸ Mə ɓe gə Lisətərə gə le, dəw kara to njegɔl godo, gə d-uji-e gə njeməndə, gə nja ndɔ kara ang ja, isi nangə.

⁹ Dəw nee le o ndu Pɔl gə aw pa tar a-ɛ ne jii ɗaa, o to gə takagə lə-a asə kaj-ɛ,

¹⁰ ɗaa pa gə singa na: Ḭ taar ar dɔ gɔl-i gə jagəra. N-al jagəra ɗaa n-nja.

¹¹ D-o ne gə Pɔl ɗa le ɗaa, bula dəwje d-ɔr ndu-je gə taar ngaɓa ꞌpa gə ndo̰ tar ɓe gə Likawni na: Oje magəje gə ꞌmbəl rɔ-je d-unda rɔ dəwje d-uru nangə horo-si gə.

¹² Be ɓa ꞌɓarje Barənabas na Jəsə ngaɓa ꞌɓarje Pɔl na Ɛrəmɛs mba Pɔl ɓa to nje pa tar.

¹³ To gə be ɓa njekapolo lə Jəsə gə kəy gə lə Luba lə-a to ta ɗəw kɔgə ɓebo gə nee le ɗe gə bɔ mangəje gə ꞌnim pudu kagəje d-ila-je ꞌdaməsa̰ ngaɓa bula dəwje ꞌɗe sə-a naa gə mba kar njekapolo le un-je gə nepolo ar Pɔl je gə Barənabas.

¹⁴ Ngaa logə njeka̰ykulaje, Barənabas je Pɔl d-o tar-ɛ ɗaa ꞌcir kubuje lə-je ngaɓa d-a̰y d-uru mə bula dəwje gə gə ꞌkuwi ta-je gə,

¹⁵ na: Sisəy le, mba ɗi ɓa ꞌɗaje ne gə to gə be wa? Jeje kara j-a to dəwje to to gə sisəy be tɔ ɓa j-ila mbərə Tar gə May j-ar-si to gə may kar-si ꞌmbadə-je neje gə baa nee le ɓo ꞌturuje kəji lə-si, ꞌɗəmje gə rɔ Luba gə nje kisi kəm baa gə ɗa dara, gə dɔ nangə ngaɓa ɗa babo gə neje tɔ̰y gə to m-e gə.

¹⁶ Dɔ ndɔje gə kede le n-ḭya̰ Gəl kuji dəwje tɔ̰y n-ar d-un ɗəwje gə mə-je njigi,

¹⁷ ngaa n-iya̰ go ɗa tar naji dɔ rɔ-ɛ gə ɗəw ɗa mayje ang, n-ar nji ḭ dara ər ngaɓa ko ndɔje ce gə nay-ɛ nay-ɛ n-ar nekusa asə ne si nagə ngaɓa rɔləl ɗusu mə-si nəm tɔ.

¹⁸ ꞌPa tarje to gə be ja ngaa to kədərə kar d-ɔgə dəwje lo kun nepolo kar je ang.

¹⁹ Cibi ɓa Jiibije gə d-ḭ Antiyos, gə nje gə d-ḭ Ikoniyom ɗe d-oso gəl bula dəwje gə, ꞌtila Pɔl gə kɔr ər ꞌndɔr-ɛ d-aw d-ila-a gir ɓe gə mba d-əji to gə n-uy gə kuy ngaa.

²⁰ Ngaa ngan njenendoje lə-a ꞌɗe ꞌgugu dɔ-ɛ mbugu ɗaa n-uba nangə n-ḭ n-təl n-andə mə ɓebo gə. Ngaɓa lo kar-ɛ ɗaa ꞌje gə Barənabas d-ɔdə d-aw Dɛrəbə. Lo kar-ɛ ɗaa ꞌje gə Barənabas ꞌtəl d-aw Dɛrəbə

Pɔl je Barənabas ꞌtəl d-aw Antiyos

²¹ D-ila mbərə Tar gə May mə ɓebo gə nee ngaɓa ꞌɗa dəwje bula gə ngan njenendoje nam ɓa ꞌtəl d-aw Lisətərə, gə Ikoniyom, gə Antiyos,

²² d-ula jingaw mə ngan njenendoje gə ngaɓa ꞌdəji-je mba kar d-uwa takagə lə-je gədərə tɔ. Cibi ꞌtəl ꞌpa d-ar-je to gə ɗəw ko ꞌməsərə ya̰ ɓa dəw a kandə ne mə ɓeko̰ gə lə Luba.

²³ D-unda ngatɔgəje d-ar-je gə Mbo̰ naa lə njetakagəje kara kara ngaɓa go-e gə ɗaa ꞌtɔl mə-je ɓo gə ꞌdəji Luba ngaɓa d-um-je mə ji Mbayɓe gə to gə ꞌta kag-ɛ le.

²⁴ ꞌNdayje Pisidi ngaɓa d-aw Paməpili.

²⁵ D-ila mbərə tar Pɛrəjə nam ngaɓa d-ɔdə d-aw Atali ɓi.

²⁶ D-ḭ kəne ɗaa ꞌtəl d-al to d-aw Antiyos, lo gə d-ila-je mə ji Luba gə njemənuji gə nam ɓa, d-ar d-aw mba kula gə ꞌɗa-je nee le.

²⁷ Logə ꞌɗe ɗaa, ꞌmbo̰ bar kəm Mbo̰ naa lə njetakagəje, d-ɔr gəl ne tɔ̰y gə Luba ɗa gə je d-ar-je ngaɓa ɗəw gə n-ɔr ne ta ɗəw takagə n-ar dəwje gə ꞌgərə Luba ang.

²⁸ Be ɓa ꞌtəl d-isije gə ngan njenendoje ndɔ bula ɓəl ja cibi.