Koula 13 - Mbede Lə Luba Kone Gə Sigi

PƆL AW ILA MBƏRƏ TAR GƏ MAY Sɔl je gə Barənabas d-aw dɔngɔr mba Sipərə

¹ Mbo̰ naa lə njetakagəje gə mə ɓe gə Antiyos le pajambərəje gə njenetɔjije ꞌga̰ kəne: Barənabas, Simiyo̰ gə ꞌɓar-ɛ Nijɛr, Lusiyus gə ɓe lə-a Sirɛn, Manayɛn gə nje baa kuji lə Erɔdə njeko̰ ɓe ngaɓa Sɔl tɔ.

² Logə d-aw ꞌpolo Luba ngaɓa ꞌtɔl mə-je ɓo ɗaa Njil Njerɔsangə na: Ɔrəje Barənabas je gə Sɔl undaje-je ɓədə mba kula gə m-ɓar-je mb-ɛ.

³ Be ɓa logə ꞌtɔl mə-je ɓo gə ꞌdəji Luba ɗaa d-ila ji-je dɔ Barənabas je gə Sɔl gə ngaɓa d-ḭya̰-je d-ar d-aw ɓi.

⁴ Barənabas je gə Sɔl le Njil Njerɔsangə ula-je to gə be ɗaa d-aw ꞌce mə ɓebo gə Seləsi ngaɓa d-al to mba kaw dɔ-je gə ɓe gə Sipərə.

⁵ Logə ꞌce mə ɓe gə Salamin ɗaa d-ila mbərə Tar gə May lə Luba kəy nendo gə to kar Jiibije. Cibi d-aw gə Ja̰ Marəke gə nje la gə je.

⁶ Be ɓa logə d-unda dɔ ngo gore tɔ̰y nday ꞌce ɓebo gə Papos ɗaa d-inga njembɛ̰ kara gə to pajambərə gə gə mbɔr-ɛ baa, n-to Jiibi, ri-a na Barə Jeju,

⁷ dəw nee le isi naa gə gə njeko̰ ɓe gə gə ri-a na Sɛrəjus Pɔl, gə to dəw gə njenegərə. N-sangə ya̰ mba ko tar lə Luba, be ɓa n-ula n-ɓar Barənabas je gə Sɔl.

⁸ Ngaa Elimasə njembɛ̰, kɔr gəl ri-a le to to gə be, le ila kagə no-je gə, njigi mba kar njeko̰ ɓe le ta kagə ang.

⁹ Be ɓa Sɔl gə ꞌɓar-ɛ Pɔl tɔ le Njil Njerɔsangə ɗusu m-e ar a-ɛ jii,

¹⁰ ngaɓa pa na: ꞋI gə tar kərə gə məngo̰y ɗusu mə-i njḭ, ngon lə ꞌSɛ̰ngərɛ̰, njeba̰a̰ lə neɗa gə gadə-gadə tɔ̰y, kuwa tar gə tɔgərɔ lə Mbayɓe ndṵrḭ le a kunda ngang-ɛ ang gə no ja wa?

¹¹ Ɓisine ji Mbayɓe to dɔ-i gə, kəm-i a tɔ ngaɓa a ko kar ang kur-i əw ɓəl. Gə tɔg-ɛ be ɗaa lo ndul gə cil ciməri d-ḭ ꞌdəbə dɔ-ɛ gə ar n-turu rɔ-ɛ gə yo gə nee, n-sangə dəwje gə d-a kuwa ji-a.

¹² Be ɓa ne gə ce dɔ njembɛ̰ gə nee le cɛdə singa njeko̰ ɓe le ar ta kagə mba tar lə Mbayɓe gə ꞌtɔji le cɛdə singa-a.

ꞌPa tar lə Luba Pisidi gə Antiyos

¹³ Dɔ ndɔ-ɛ gə nee le Pɔl je gə njeba-ɛje lə-a d-ḭ ɓebo gə Papos d-aw Pɛrəjə dɔ nangə gə Paməpili ɗaa Ja̰ uba-je ḭya̰-je təl aw Jerujalɛm.

¹⁴ D-ḭ mə ɓe Pɛrəjə d-aw gə no-je ꞌce Antiyos, dɔ nangə gə Pisidi. Ndɔ kuwa kɔr ɗaa d-aw d-andə kəy nendo gə d-isi kəne.

¹⁵ Logə ꞌtura torondu ngaɓa tar pajambərəje d-ila nangə ɗaa njeko̰ dɔ kəy nendoje ula pa ar-je na: Sisəy ngan ko̰-si, ɓo tar gə kar kula jingaw mə dəwje gə to ta-si gə nama ꞌpaje.

¹⁶ Be ɓa Pɔl uba nangə ḭ taar un ji-a ar-je ngaɓa pa na: Sisəy dəwje gə Ijirayɛl, gə nje gə ɓəəl Luba, ꞌtugaje mbi-si.

¹⁷ Luba lə dəwje gə Ijirayɛl nee, mbərə ka-sijee ngaɓa ar d-uji naa ꞌbula, kisi lə-je dɔ nangə Ejipətə cibi ɓa təl ɔr-je kəne gə ji singamongə lə-a.

¹⁸ Asə ɓal dɔg sɔɔ ja Luba ore m-e dɔ pa nja-je gə mə ndag lo gə,

¹⁹ ngaɓa Luba busu gəl kujije siri rag-rag mə ɓeko̰ gə Kana ɓa ta ɓe le gə nenduba ar-je,

²⁰ Go-e gə ɗaa n-ar-je nje gangə tarje saar n-ce ne dɔ pajambərə gə lə-a Samɛl, kor-e əw asə ɓal tɔl-tɔl sɔɔ gə dɔ-ɛ gə dɔg mi.

²¹ Un kud-e kəne ɗaa ꞌdəji kar d-ar-je mbay kara, be ɓa Luba ar-je Sawul, ngon lə Kis gə gəl ka Bɛnjamɛ̰ gə, gə o̰ ɓe asə ɓal dɔg sɔɔ.

²² Logə Luba ɔr ɓeko̰ ji-a gə ɗaa mbərə Dabidi gə mbay ar-je ngaɓa təl pa tar ɔji dɔ-ɛ na: Dabidi gə ngon lə Jese to dəw gə ta mə-m, gə a ɗa mənjigije lə-m tɔ̰y.

²³ Be ɓa gəl kuji gə Dabidi ɓa Luba uwa dɔ gɔl Jeju ar d-uji-e gə njekaji dəwje gə Ijirayɛl.

²⁴ Ngaa nam ɓa kar d-uji Jeju le, Ja̰ ila mbərə batɛm turu kəji ar dəwje gə Ijirayɛl tɔ̰y.

²⁵ Logə Ja̰ tɔl ta kula lə-a bɛm ɗaa pa na: Əjije na ꞌma ɓa m-to na wa? To ꞌma ang, ngaa dəw kara aw ɗe go-m əng ngaɓa n-to dəw gə m-asə tudu kula sabɔgɔ lə-a gɔl-ɛ gə ang.

²⁶ Ngan ko̰-mje, sisəy gə gəl kuji Abəraham gə ngaɓa nje ꞌɓəəl Luba horo-si gə, tar kaji nee le, sijee ja ɓa Luba ula-a ne ar-si.

²⁷ Mba dəw mə ɓeje gə Jerujalɛm gə mbayje lə-je ꞌgərə Jeju ang. Ngaɓa mbede lə pajambərəje gə ꞌtura gə ndɔ kuwa kɔr taar-taar le kara nəm. Ngaa ꞌgangə tar dɔ-ɛ gə d-ar tarje le aw ne lo-e bɛrɛrɛ.

²⁸ Tar kara kara uwa dɔ-ɛ ang ngaa ꞌdəji Pilad mba kar ꞌtɔl-ɛ.

²⁹ Be ɓa ꞌtɔl ne ta tarje tɔ̰y gə ꞌɗa mə mbede gə ɔji dɔ-ɛ ngaɓa d-ɔr nin-e kar kagə gə d-aw d-ila mə buwa yo gə.

³⁰ Ngaa Luba ndol-e horo nje gə d-uy gə.

³¹ Go-e gə le, n-tɔji rɔ-ɛ gɔl bula n-ar nje gə d-ḭ sə-a dɔ nangə gə Galile ꞌdan-ɛ d-aw sə-a Jerujalɛm d-o-e. Ɓisine dəwje gə d-o-e ꞌto njetar najije lə-a no dəw mə ɓeje.

³² J-ila mbərə Tar gə May nee le j-ar-si gə go kuwa gə d-uwa dɔ gɔl-ɛ d-ar ka-sijee,

³³ Luba tɔl ta ndu kun lə-a mba sijee gə ja to nganje ɓa ar Jeju ce ne mə buwa yo gə to to gə ꞌɗa ne mə Paje gə njekum gə joo gə na: ꞋI ꞌto Ngon-m, ꞌMa ja m-uji ɓogəne.

³⁴ ꞌNdol-e d-ar darɔ-ɛ a təl yɔlɛ mə buwa yo gə ang to to gə n-pa ne kede na: M-a kar-si Neje lə Dabidi gə to gə losang-ɛ, yeje gə asə kəm kar ꞌta kagə-je.

³⁵ Gəl-e gə nee ɓa ꞌtəl pa lo gə ɗangə ja cibi na: ꞋI a kḭya̰ ngon njekula lə-i gə gadə-gadə kar yɔlɛ ang.

³⁶ Ngaa Dabidi ɗa kula lə Luba dɔ ndɔje gə lə-a saar ndɔ-ɛ asə ɗaa uy ar ꞌdub-e kar njeka-ɛje gə ngaɓa darɔ-ɛ yɔlɛ mə buwa gə tɔ.

³⁷ Ngaa dəw gə Luba ar-ɛ ce mə buwa yo gə le darɔ-ɛ yɔlɛ ang.

³⁸ Ngan ko̰-mje, oje gə maj-ɛ: Ɗəw gə lə Moyiji ɓa d-ila ne mbərə kɔr tar neɗaje gə kṵra̰y dɔ dəwje gə d-ar-si.

³⁹ Dəw gə ta kag-ɛ nama tar neɗaje gə kṵra̰y gə torondu Moyiji asə kɔr tar-ɛ dɔ-ɛ gə ang le a kɔr dɔ-ɛ gə.

⁴⁰ Be ɓa oje gə maj-ɛ ɓa na neje gə pajambərəje pa tar-ɛ mə mbede gə kede le a ɗa si, tar gə ꞌpa na:

⁴¹ Oje gə maj-ɛ ɓa: Sisəy nje ɗa ngarje A kuwaje dɔ-si jim ɓa a ja̰rɛ̰je naa pəsəsə, Mba m-a ɗa kula dɔ ndɔje gə lə-si, Kula gə m-a ɗa le dəw ɗe tura go-e ar-si kara a taje kag-ɛ ang.

⁴² Logə ꞌce ɗaa ꞌdəji mba kar ndɔ kuwa kɔr gə go-e gə nama ꞌtəl ɗe ꞌpa tar gə nee le ja cibi ɓa,

⁴³ ngaa logə mbo̰ naa unda ngang-ɛ ɗaa Jiibije bula gə njetəl Jiibije njekila kuji dɔ ne gə lə Lubaje ꞌndole go Pɔl je gə Barənabas, ꞌto̰ gə je tam ngaɓa d-ula jingaw mə-je gə mba kar d-uwa tar mənuji lə Luba gədərə.

⁴⁴ Ndɔ kuwa kɔr gə go-e gə le ɗaa ɗa to gə dəwje gə mə ɓebo gə tɔ̰y ja ꞌmbo̰ naa mba ko tar lə Mbayɓe.

⁴⁵ Ngaa logə Jiibije d-o bula dəwje ɗaa mə ɗa-je ar ꞌtəl pa tar ꞌtila ne kəm tar lə Pɔl ngaɓa ꞌtaji Luba nəm.

⁴⁶ Ngaa Pɔl je Barənabas ꞌpa təsərə d-ar-je na: Sisəy ja, d-a pa tar lə Luba kar-si dɔngɔr ngaa mba ꞌmbadəje ngaɓa oje to gə asəje kingaje təbə gə gə ndɔ gə ndɔ ang, ɗaa oje: J-a turu kəm-si gə dɔ dəwje gə ꞌgərə Luba ang gə.

⁴⁷ Mba Mbayɓe ja ɓa un ndu-e ar-si to gə be na: M-unda-i gə ne kɔji mar-ɛ lə Gəl kuji dəwje, Mba kar aw gə tar kaji saar ꞌce ne ko̰ nangə gə.

⁴⁸ Dəwje gə to Jiibije ang le d-o tar gə nee le ɗaa ꞌɗa rɔləl ngaɓa d-ula rɔnduba dɔ tar gə lə Mbayɓe. Be ɓa dəwje tɔ̰y gə Luba mbərə-je mba təbə gə gə ndɔ gə ndɔ le, ꞌta kagə.

⁴⁹ Tar lə Mbayɓe ta lo pɛ-pɛ mə ɓeko̰ gə tɔ̰y.

⁵⁰ Ngaa Jiibije ꞌsula jeneje gə ꞌto nembaje lo polo Luba gə gə buba ɓeje d-ar d-ula kəm Pɔl je gə Barənabas ndoo ngaɓa ꞌtɔbə-je dɔ nangə gə lə-je.

⁵¹ Be ɓa Pɔl je gə Barənabas ꞌkunda kuru gə gɔl-je gə ɓa d-ɔdə d-aw Ikoniyom.

⁵² Ngaa rɔləl gə Njil Njerɔsangə ɗusu ngan njenendoje tub-tub.