Koula 12 - Mbede Lə Luba Kone Gə Sigi

Anji ɔr Piyɛr kəy kula gə

¹ Aw gə dɔ kar-ɛ gə əng le, mbay Erɔdə un kudu ɗa məyɛr nje gə ꞌto bar kəm Mbo̰ naa lə njetakagəje gə kɛm,

² ɗaa n-ar ꞌtɔl Jagə gə ngon ko̰ Ja̰ gə kiya bayi.

³ Be ɓa n-o to gə ləl Jiibije ya̰ ɗaa, n-ar d-uwa Piyɛr ja cibi, mə ndɔje gə kar ɗa nay kusa mbə gə guway kodo godo kəne.

⁴ Logə d-uwa Piyɛr d-ila kəy kula gə ꞌtɔr njeɗɔje dɔg gə gir-je gə misa̰ ngaɓa d-uwa-je sɔɔ-sɔɔ ɓa d-ar ꞌngəm-e, mba ꞌnjigi kar pɛdə pagə nday nama kaw sə-a no dəw mə ɓeje gə.

⁵ Piyɛr le ꞌngəm-e kəy kula gə ngaa Mbo̰ naa lə njetakagəje kara d-uwa gədərə gə dəji Luba mba tar lə-a tɔ.

⁶ Logə Erɔdə gɔl mba ce sə-a no ngɔ gangə tar gə ɗaa mə cil-e gə ja, Piyɛr to cibi horo njeɗɔje gə joo gə kula lar joo gə ꞌtɔ-ɛ ne baa ngaɓa njengəm ta kəy kulaje kara d-ar ꞌngəm ta kəy nəm tɔ.

⁷ Ngaa anji lə Mbayɓe kara ce bus ɗaa lo ndogo mə kəy kula gə dol-dol. Ɗaa anji le unda mbo kar Piyɛr ɓa-ɓa ndol-e ngaɓa pa ar-ɛ na: Ḭ ja̰y. Be ɓa kula larje gə ji-a le gə̰y nangə.

⁸ Ɗaa anji le pa ar-ɛ na: Uwa kula gagəra lə-i ꞌtɔ ne ur-i, ɓo ula sabɔgɔ lə-i, ɗaa n-ɗa ja tɔ, cibi anji le təl pa na: ꞌKə rɔ-i gə kubu kul lə-i ɓo uwa go-m.

⁹ Piyɛr kara ce uwa go-e tɔ, n-gərə ɗe lə anji to ne gə tɔgərɔ ang ngaa to ne gə n-o lokiya gə.

¹⁰ Logə ꞌnday-je njengəm loje gə dɔngɔr, ngaɓa njekum gə j-oje ɗaa, ꞌce-je ta ɗəw kəy ngaw lar gə aw gə mə ɓebo gə ɗaa, ɗəw kəy nee cɛ̰ gə kar-ɛ baa ja no-je gə ar ꞌce d-aw ɗəw boo be tɔ, ɗaa anji le ɔdə ḭya̰ Piyɛr.

¹¹ Logə kəm Piyɛr unja bərərə ɗaa pa na: Ɓisine m-gərə ngadə, Mbayɓe ula anji lə-a ar-ɛ ɗe ɔr-m ji Erɔdə gə, gə ne tɔ̰y gə Jiibije d-aw ngina.

¹² Logə n-gərə to gə be ɗaa n-ɔdə n-aw kəy lə Məri gə ko̰ Ja̰-je, Ja̰ gə ꞌɓar-ɛ Marəke, mə kəy gə nee le dəwje bula d-asə mbagə ꞌmbo̰ naa kəne d-aw dəji Luba.

¹³ Logə Piyɛr unda ta kəy gə ta ndogo gə ɗaa ngon njekula gə jene gə ri-a na Rodə a̰y aw ta kəy gə ɗaa dəji na: Na ɓa ar ta kəy gə wa?

¹⁴ N-gərə ndu Piyɛr ɗaa, n-təl gə rɔləl lal kɔr ta kəy n-aw n-ula-je na Piyɛr ar ta ndogo gə əng.

¹⁵ Nje gə d-isi kəy le ꞌtəl d-ila kəne na: Dɔ-i godo wa? Kara n-pa gə no-ɛ ja na to ꞌne ja. Ngaa ꞌjejee nee ꞌpa na: To anji lə-a.

¹⁶ Ngaa Piyɛr unda ta kəy gə no-ɛ ja, logə d-ɔr ɗaa d-o-e ngaa lo tar igi-je sɛl.

¹⁷ Be ɓa Piyɛr ɗa ji-a ar-je kar d-isi ta-je munduru ngaɓa təl ɔr gəl ɗəw gə Mbayɓe ɔr-ɛ ne kəy kula ar-je d-o cibi ngaɓa təl pa ar-je na: Aw paje ar-je Jagə gə ngan ko-mje. Go-e gə ɗaa Piyɛr ce aw lo gə ɗangə gə.

¹⁸ Logə lo arə ɗaa lo asə naa gə əng dɔ njeɗɔje gə ar ꞌdəji rɔ-je tar se Piyɛr le təl ɗi wa?

¹⁹ Erɔdə kara ula-je ar ꞌsang-ɛ ngaa d-inga əng ɗaa, n-təl n-dəji njengəm loje tar-ɛ cibi n-un ndu n-ar ꞌtɔl-je. Go-e gə ɗaa n-ɔdə Jude n-aw Sejare n-aw n-isi kəne.

²⁰ Mə Erɔdə o̰-ɛ dɔ njeɓeje gə Tir gə, gə nje gə Sido̰. Ngaa d-um mə-je naa gə ꞌɗe d-inga ngaɓa logə ꞌgɔlje tar gə ngon njekula gə mə kəy gə lə Erɔdə, gə ri-a na Balasətus ɗa ar ꞌgɔlje gə Erɔdə le d-ar ɗɛgɛgɛ to ne horo-je gə mba nekusa ta dəwje nee tɔ̰y le ḭ mə ɓe gə lə mbay le.

²¹ Gə ndɔ gə d-ila ɗaa, Erɔdə ula kubu mbay rɔ-ɛ gə ɗe isi ta nada, ila ndu-e nangə pa tar ar dəw mə ɓeje.

²² Ɗaa dəwje d-uru ꞌkuwi go̰om na: To ndu magə a ɓar nee ɓo ndu dəw ang.

²³ Gə lo-e gə nee ja anji lə Mbayɓe unda-a mba n-ula rɔnduba dɔ Luba gə ang ɗaa koreje d-o̰-ɛ̰ yom-yom ɗaa, n-uy.

²⁴ Ngaa tar lə Luba ja̰rɛ̰ kɔr pa-pa ngaɓa aw dɔ-ɛ gə kede-kede.

²⁵ Logə Barənabas je gə Sɔl ꞌtɔl ta kula gə d-aw Jerujalɛm mb-ɛ ɗaa, ꞌtəl ɗe Antiyos gə Ja̰ gə d-unda ri-a na Marəke ji-je gə.