Koula 11 - Mbede Lə Luba Kone Gə Sigi

Piyɛr gə njetakagəje gə Jerujalɛm

¹ Njeka̰ykulaje gə ngan ko̰ naaje gə d-isi Jude d-o tar-ɛ to gə dəwje gə ꞌgərə Luba ang kara ta tar lə Luba tɔ.

² Be ɓa logə Piyɛr təl aw Jerujalɛm ɗaa nje kunja ta bərəje d-ḭ sə-a gə tar na:

³ ꞋI andə kəy lə dəwje gə d-unja ta bərəje ang ngaɓa usa gə je ne.

⁴ Be ɓa Piyɛr un kudu tar ɔr gə go ɗəb-e no-je gə na:

⁵ N-pa na: M-isi mə ɓebo gə Jope ngaɓa m-aw m-dəji Luba ɗaa ne ɗe dɔ-m gə yiil gə m-gərə rɔ-m ang ngaɓa m-o ne lokiya gə to to gə ta kubu gə tadə be ngaɓa d-uwa kil-e gə sɔɔ rad-rad ḭ dara ɗisi saar ɗe no-m gə.

⁶ Logə m-ore kəm kəne ndəng m-tən m-o ɗaa m-o daje gə gɔl-je sɔɔ-sɔɔ gə dɔ nangə nee, gə daje gə muu, gə daje gə d-agə nangə gə ta mə-je ngaɓa əlje gə dara tɔ.

⁷ Cibi m-o ndu dəw pa ar-m na: Ḭ taar, Piyɛr, ɓo ꞌtɔl usa;

⁸ Ngaa m-pa na: Ə̰ə̰ə̰, Mbayɓe, mba ne gə uwa yoro ose ne gə mina ne andə ta-m gə ndɔ kara ang.

⁹ Ndu dəw le ḭ dara təl pa to gə sigi, njekum gə gɔl joo ja cibi na: Ne gə Luba təl-e ar-ɛ arə ngadə le, o gə ne gə uwa yoro ang.

¹⁰ Ne le ɗa be-be saar gɔl munda ɗaa təl tɔ̰y aw dara to gə ɗangə.

¹¹ Ɗaa oje: Gə tɔg-ɛ baa ja dəwje munda gə d-ula-je ɓə lə-m, d-ḭ Sejare ꞌɗe d-ar ta kəy gə ja to kəne ja.

¹² Be ɓa Njil pa ar-m na m-pəngə ang ɓo m-ḭ m-aw gə je. Ɗaa ngan ko̰ naaje misa̰ gə ꞌdan-m le a d-ar nee ɗaa j-aw j-andə mə kəy gə lə Kɔrənəy.

¹³ ꞌNe nee le n-ɔr gəl ɗəw gə n-o ne Anji gə tɔji rɔ-ɛ mə kəy gə lə-a ngaɓa pa na: Ula kula Jope, ꞌɓar Simo gə d-unda ri-a na Piyɛr,

¹⁴ gə a ɗe pa tar gə ꞌi a kaji ne gə njeməkəyje lə-i tɔ̰y.

¹⁵ Logə m-un kudu pa tar ɗaa Njil Njerɔsangə ɗe dɔ-je gə to to gə ɗe ne dɔ-sijee gə lo kun kud-e gə.

¹⁶ Be ɓa mə-m ole dɔ tar gə lə Mbayɓe gə pa na: Ja̰ ɗa dəwje batɛm mə man gə ngaa sisəy ɗaa a kingaje batɛm lə Njil Njerɔsangə.

¹⁷ To gə ɓo Luba ja ar-je nekarə baa ɗəw kara baa to gə ar-sije gə ja ta kagə Mbayɓe Jeju Kirisi ɗaa ꞌma m-to na ja ɓa m-a kasə kila kagə no Luba gə wa?

¹⁸ Logə d-o-je tar le to gə be ɗaa məko̰ lə-jə unda nangə bɛm ar d-ɔsə gaji Luba na: Be ɓa dəwje gə ꞌgərə Luba ang kara Luba ar-je ɗəw mbəl kəji mba kar d-inga ne təbə tɔ.

Barənabas je gə Sɔl d-aw mə ɓe gə Antiyos

¹⁹ Nje gə ꞌja̰rɛ̰ naa mba nekəmtondoo gə ce dɔ-je ɔji dɔ Etiyɛn le d-a̰y saar ꞌce Penisi, gə Sipərə ngaɓa ꞌce ɓebo Antiyos tɔ ɗaa ꞌpa tar neje nee le d-ar dəwje gə ɗangə ang ngaa ꞌpa d-ar Jiibije ja baa.

²⁰ Ngaɓa horo-je gə le dəwje gə kɛm gə d-ḭ Sipərə gə Sirɛn ꞌɗe Antiyos ꞌpa d-ar Gərɛgəje tɔ ngaɓa d-ila ne mbərə Tar gə May lə Mbayɓe Jeju d-ar-je nəm.

²¹ Mbayɓe dəbə ji-a dɔ-je gə ar kɔr nje gə ꞌta kagə, gə ꞌturu kəji lə-je gə rɔ Mbayɓe gə bo ya̰.

²² Tar lə-je oso mbi Mbo̰ naa lə njetakagəje gə Jerujalɛm ɗaa d-ula Barənabas d-ar-ɛ aw saar Antiyos le.

²³ Logə n-ce Antiyos gə to gə n-o mənuji lə Luba ɗaa n-ɗa rɔləl ngaɓa n-ula jingaw mə-je gə mba kar d-um mə-je dɔ Mbayɓe gə.

²⁴ Mba n-to dəw gə may, gə Njil Njerɔsangə ɗusu m-e gə takagə. Be ɓa bula dəwje d-asə mbagə d-un go Mbayɓe.

²⁵ Go-e gə ɗaa n-ɔdə n-aw Tarəsə mba kaw ɗe gə Sɔl kəne,

²⁶ logə n-inga-a ɗaa n-ɔr-ɛ n-ɗe sə-a Antiyos ɗaa d-isije kəne ɓal kara ja dɔngɔ, mbo̰je naa gə Mbo̰ naa lə njetakagəje ngaɓa ꞌtɔji-je ne bula dəwje. Be ɓa Antiyos gə nee ja d-unda ri ngan njenendoje na njetakagə Kirisije kəne dɔngɔr.

²⁷ Dɔ ndɔ-ɛje gə əng le, pajambərəje d-ḭ Jerujalɛm d-aw Antiyos.

²⁸ Dəw kara horo-je gə ri-a na Agabus uba nangə ḭ pa tar ɗəw gə lə Njil na ɓo bo a koso gə dɔ nangə tɔ̰y. Ɓo bo le oso ɓal ko̰ ɓe gə lə Kolodə tɔ.

²⁹ Be ɓa ngan njenendoje d-unda ndu-je mba kar na-na kara ar ne gə to ji-a gə mba kar d-ula ꞌla ne gə ngan ko̰ naaje gə d-isi dɔ nangə gə Jude.

³⁰ Logə ꞌmbo̰je ne le ɗaa d-ula ne Barənabas je gə Sɔl d-ar ngatɔgəje.