Koula 10 - Mbede Lə Luba Kone Gə Sigi

Mbəl kəji lə Kɔrənəy

¹ Dəw kara ri-a na Kɔrənəy, to njekun dɔ njeɗɔje tɔl kara gə ꞌɓar-ɛ na kudu njeɗɔje gə Itali ɗaa n-isi Sejare.

² Dəw nee le ila kuji dɔ ne gə lə Luba ngaɓa gə njeməkəyje lə-a tɔ̰y ꞌɓəəl Luba nəm, gə n-la gə dəw mə ɓeje ya̰ nəm ngaɓa n-aw dəji Luba gə dɔ karje tɔ̰y.

³ Ndɔ-ɛ nee le asə kar gə munda gə kar kumatagə ɗaa n-o ne lokiya gə n-o anji lə Luba kara ɗang-ɗang andə kəy lə-a ngaɓa ɓar-ɛ na: Kɔrənəy.

⁴ N-ore kəm-e dɔ-ɛ gə ndəng gə ɓəəl ɗaa n-pa na: Ɗi wa Mbayɓe? Anji le ila kəne na: Dəjije lə-i gə la gə ꞌla gə dəwje le ce to no Luba gə ɓo m-e uy dɔ-ɛ gə ang.

⁵ Ɓisine ja ula dəwje Jope ar-je d-aw ɗe gə Simo gə d-unda ri-a na Piyɛr.

⁶ N-to kəy lə Simo gə njekunda ndaar gə kəy lə-a ta babo gə.

⁷ Logə Anji pa tar le ila nangə be tɔ ɗaa ɔdə aw, go-e gə ɗaa Kɔrənəy ɓar ngan njekulaje lə-a joo gə njeɗɔ kara gə to njekila kuji dɔ ne gə lə Luba horo nje ka dɔ-ɛje gə.

⁸ Logə n-ɔr gəl tar le n-ar-je tɔ̰y ɗaa n-ula-je Jope le.

⁹ Lo kar-ɛ gə ꞌjejee nay ɗəw boo ngaɓa ꞌnay əw ang gə ɓebo le ɗaa, Piyɛr uba dɔ kəy aw taar gə kar gə ar mə dɔ gə mba dəji Luba.

¹⁰ Ɓo ɔr Piyɛr ar njigi kusa ne. Logə d-aw mba niir ne kar-ɛ n-usa ɓi ɗaa ne ɗe dɔ-ɛ gə yiil ar n-gərə rɔ-ɛ ang.

¹¹ N-o kəm dara cɛ̰ ngaɓa n-o ne kara to to gə ta kubu gə tadə be, d-uwa kel-e gə sɔɔ rad-rad ngaɓa ɗisi gə nangə nee.

¹² Cibi daje gə gɔl-je sɔɔ-sɔɔ tɔ̰y, gə neje gə d-agə gə ta məje gə dɔ nangə nee gə əlje gə dara d-ar m-e gə.

¹³ Go-e gə ɗaa n-o ndu dəw pa ar-ɛ na: Piyɛr, ḭ taar ꞌtɔl ɓo usa.

¹⁴ Ngaa Piyɛr ila kəne na: Ə̰ə̰ə̰, Mbayɓe, mba m-usa ne gə mina, gə ne gə uwa yoro ndɔ kara ang.

¹⁵ Ndu dəw le təl pa ar-ɛ to gə sigi, njekum gə gɔl joo ja cibi na: Ne gə Luba təl-e ar-ɛ arə ngadə le, ꞌi a ko gə ne gə uwa yoro ang.

¹⁶ Ne le ɗe be-be gɔl munda ɗaa təl kərəng aw dara.

¹⁷ Ne gə nee le Piyɛr gərə dɔ ji-a kəne ang ngaa waga ɗaa dəwje gə Kɔrənəy ula-je le, ꞌtuji-je kəy lə Simo d-ar-je d-aw d-ar t-ɛ gə ja ngaɓa,

¹⁸ ꞌɓar ne ꞌdəji tar na: Kəy gə Simo gə d-unda ri-a na Piyɛr to kəne le ja nee wa?

¹⁹ Logə Piyɛr isi aw əji tar dɔ ne gə o lokiya gə le ja ɓi ɗaa Njil pa ar-ɛ na: Dəwje munda d-aw sang-i;

²⁰ Ḭ taar ꞌɗisi nangə ngaɓa ar mə-i pəngə-i ang ɗaa aw gə je mba ꞌma ja m-ula-je.

²¹ Piyɛr ɗisi nangə inga dəwje le ɗaa pa ar-je na: ꞌMa gə aw sangə-mje le ja m-ar nee. A ɗi ɓa ꞌɗeje mb-ɛ wa?

²² D-ila-a kəne na: Kɔrənəy njekɔr no njeɗɔje gə tɔl, gə to dəw gə gadə gə ɓəəl Luba ngaɓa gəl kuji Jiibije tɔ̰y kara ꞌtura-a gə dəw gə gadə-gadə. Ɗaa anji gə njerɔsangə ɗe pa ar-ɛ na kar n-ɓar-i n-ar-i aw kəy lə-a aw pa tar neje nee le ar-ɛ n-o.

²³ Be ɓa Piyɛr ta-je ar ꞌtoje sə-a ɗaa lo kar-ɛ ngaɓa ḭ aw gə je naa gə kara baa. Ngan ko̰ naaje gə kɛm gə Jope kara ꞌdan-je tɔ.

²⁴ Lo kar-ɛ ngaɓa ꞌce Sejare ɗaa Kɔrənəy kara isi pɛrɛrɛ ngina-je gə njenujije lə-a ngaɓa ɓar njekuraje lə-a nəm tɔ.

²⁵ Logə Piyɛr aw andə kəy ɗaa Kɔrənəy tila kəm-e, oso nangə ngira gɔl-ɛ gə ngaɓa um məkəji.

²⁶ Ngaa Piyɛr uwa-a ar n-ḭ taar ngaɓa pa na: Ḭ taar ꞌma kara m-to dəw baa tɔ.

²⁷ Ngaɓa n-to̰ sə-a tam taar-taar ɓa n-andə ne kəy ɗaa n-inga dəwje bula gə ꞌmbo̰ naa d-isi.

²⁸ Piyɛr un tar pa ar-je na: ꞌGərəje to gə ndu ɔgə mba kar dəw gə to Jiibi ang nama Jiibi um sə-a naa gə ang nəm andə kəy lə-a ang nəm tɔ ngaa Luba tɔji-m mba kar-m m-o dəw gə dəw gə uwa yoro ose mina ang.

²⁹ Gəl-e gə nee ɓa logə ulaje ꞌɓar-mje ɗaa m-ma̰y tar ang ja, m-ḭ m-ɗe, be ɓa dɔ kar gə nee ɗaa m-dəji-si kar-si ꞌpaje gəl ne gə ꞌɓar-mje ne ar-mje m-ɗe le.

³⁰ Kɔrənəy ila kəne na: Asə ndɔ sɔɔ ja ngaa ɓogəne, logə m-aw m-dəji Luba kar kumatagə mə kəy gə lə-m ɗaa dəw kara ula kubu gə nda kələw-kələw ja ɗe ar no-m gə pa na:

³¹ Kɔrənəy, d-o ndu dəji lə-i nəm ngaɓa mə Luba uy dɔ la gə ꞌla gə dəwje ang nəm.

³² May kar ula mə ɓebo gə Jope ꞌɓar Simo gə d-unda ri-a na Piyɛr, to kəy lə Simo gə njekunda ndaar kar babo gə.

³³ Be ɓa gə tɔg-ɛ baa ja m-ula m-ɓar-i ɗaa ꞌi kara ꞌɗa may ya̰ ja tɔ ɓa ḭ ꞌɗe nee. Ɓisine j-isi no Luba gə tɔ̰y ja mba ko tar gə Mbayɓe ula-i ne le.

³⁴ Be ɓa Piyɛr cɛ̰ t-ɛ pa na: Tɔgərɔ m-gərə to gə Luba ɔr kəm dəwje ang.

³⁵ Ngaa horo gəl kujije gə tɔ̰y ja ɓo dəw gə ɓəəl-e ngaɓa ɗa ne gə gadə-gadə nama ta kəm-e.

³⁶ Luba ula Jeju Kirisi gə to Mbayɓe lə dəwje tɔ̰y ar-ɛ ila mbərə Tar gə May gə kar kinga ne ɗɛgɛgɛ ɗəw gə lə-a ar ngan Ijirayɛlje.

³⁷ Ne gə ɗa ne dɔ nangə gə Jude tɔ̰y le ꞌgərəje, un kud-e dɔ nangə gə Galile, go batɛm gə Ja̰ Njeɗabatɛm pa tar-ɛ le.

³⁸ Luba ar Jeju gə Najarɛd singamongə ɗəw gə lə Njil Njerɔsangə n-nja ne gə lo-lo ɗa ne may ngaɓa n-aji ne dəwje tɔ̰y gə ꞌSɛ̰ngərɛ̰ uwa-je ɓərə gə, mba Luba nay sə-a.

³⁹ ꞌJejee ja ꞌto njetar naji neje tɔ̰y gə n-ɗa mə ɓe gə lə Jiibije nəm ɓa gə Jerujalɛm. Ɗaa d-uwa-a ꞌtɔl-ɛ kagə dəsə gə.

⁴⁰ Ngaa ndɔ munda go-e gə ɗaa Luba ndol-e ar n-tɔji rɔ-ɛ

⁴¹ n-ar dəw mə ɓeje tɔ̰y ang ngaa n-ar njetar najije gə Luba mbərə-je kede ləw baa, sijee gə j-usa gə j-ay sə-a j-o-e go ce buwa yo gə lə-a.

⁴² Be ɓa n-un ndu n-ar-si mba kar j-ila mbərə j-ar dəw mə ɓeje ngaɓa kar j-a pa tar naji to gə ꞌne le ɓa Luba unda gə nje gangə tar dɔ nje gə d-aw kəm gə nje gə d-uy gə.

⁴³ Pajambərəje tɔ̰y ja ꞌpa tar naji lə-a na: Dəw gə ta kag-ɛ nama mbɔr dɔ ri-a ja tar neɗaje gə kṵra̰y a kɔr ne dɔ-ɛ gə.

⁴⁴ Logə Piyɛr aw pa tar gə nee le t-ɛ gə be ja ɓi ɗaa Njil Njerɔsangə ɗe dɔ dəwje tɔ̰y gə d-aw d-o tar le.

⁴⁵ Njetakagəje gə to Jiibije tɔ̰y gə ꞌɗe gə Piyɛr d-o dum dɔ-je mba dəwje gə ꞌgərə Luba ang kara d-inga nekarə baa lə Njil Njerɔsangə.

⁴⁶ Mba d-o ndu dəwje nee le ꞌpa tar gə ndo̰ tarje d-ɔsə ne gaji Luba. Be ɓa Piyɛr təl pa na:

⁴⁷ Se dəwje gə d-inga Njil Njerɔsangə ɗəw kara baa to gə sijee nee le d-a kɔgə-je batɛm kar man ɓi wa?

⁴⁸ Cibi n-un ndu n-ar ꞌɗa-je batɛm gə ri Jeju Kirisi. Go-e gə ɗaa ꞌdəj-eje kar n-ɗa gə je ndɔ ɓəl ja cibi ɓa.