Jude 1 - Mbede Lə Luba Kone Gə Sigi

Tuji rɔ gə ko naa

¹ ꞌMa Jude, gə m-to ngon njekula lə Jeju Kirisi nəm, ngaɓa m-to ngon ko̰ Jagə, m-ɗa mbede nee m-ar-sisəy gə Luba gə Bɔ njigi-si, ɓar-si ngaɓa ngom-si mba Jeju Kirisi.

² May kar məmay, gə ɗɛgɛgɛ gə njigi to dɔ-si gə rib-rib.

Njenetɔji gə gə mbɔr-ɛ

³ Ngan ko̰-mje gə m-njigi-si ya̰, m-njigi ya̰ mba ɗa mbede kar-si ɔji dɔ kaji gə j-inga-je naa gə le, m-un kəm tim-tim mba ɗa, mba kula nee jingaw mə-si kar ꞌɗaje ɗɔ ɔji dɔ takagə gə d-ar njerɔsangəje gɔl kara baa ja gə dɔbo̰.

⁴ Be ɓa, dəwje gə kɛm d-andə horo-si gə go ngə̰y baa, ꞌto dəwje gə ꞌpa tar gangə tar gə uwa dɔ-je ləw baa mə mbede gə. Dəwje gə kṵra̰y gə mbəl mənuji lə Luba lə-si ꞌta ne toro kaya, ngaɓa ꞌmbadə ꞌɓəə-sijee gə kara baa gə Mbayɓe Jeju Kirisi.

⁵ Sisəy gə ꞌgərəje ne gə nee tɔ̰y le, m-njigi kole mə-si to gə, logə Mbayɓe ɔr dəwje gə Ijirayɛl dɔ nangə gə Ejipətə ce gə je ɗaa, ɗa ar nje məkədərəje d-uba tuji go-je gə.

⁶ Cibi, anjije gə asə ngom singa gə d-inga ang, ɗaa d-iya̰ lokisije le, ꞌtɔ-je gə kula lar gə ngangə ꞌngom-je mə buwa gə ndul ngina ne ndɔ gangə tar gə boy.

⁷ Ɗəw kara baa, dəwje gə Sɔdom gə nje gə Gɔmɔr gə ɓeje gə to mbɔr-je gə dəb, d-un rɔ-je ꞌɗa ne kaya, cibi ꞌɗaje nekɔbə, ꞌgangə tar dɔ-je gə kar to ne kɔji mar-ɛ, d-ar pər gə ndɔ gə ndɔ gə a kṵy ang ja o̰-je.

⁸ Be ja kara, dəɓ-eje nee le ꞌtuji rɔ-je pugudu ɗəw kəjije gə lə-je, ꞌdabə nee singamongə lə Mbayɓe, ꞌtaji nee njeriɓarje gə mə dara gə nəm tɔ.

⁹ Be ɓa, logə Misɛl mbay lə anjije ma̰y tar gə ꞌSɛ̰ngərɛ̰ ngaɓa n-ar-ɛ nin Moyiji le, taj-ɛ gangə ne tar dɔ-ɛ gə ang baa, ngaa n-pa na: May kar Mbayɓe ndangə-i!

¹⁰ Ngaa dəwje gə kən le, ne gə ꞌgərə ang kara ꞌtaji nəm, ngaɓa ꞌdole go kəji lə-je to gə daje gə mu gə kore dɔ-je godo be, ꞌtuji ne rɔ-je pugudu.

¹¹ Nekəmandoo to kar dəwje gə nee le, mba d-un kila ɗəw lə Ka̰yi; ꞌpa tar gə baa mba lar to gə Balam be; d-uy yo mbə to gə Kore uy yo dɔ kədərə be.

¹² Dəɓ-eje nee le to ꞌnjɛgərɛ mə nekusa lə sisəy ngan ko̰ naaje, ꞌmbula nekusa gə mbula, ꞌɗa mə bo nekusa d-ar rɔ kul uwa-je ang, ꞌta naa gə nji gə ḭ ɗaa ləl ɔr-ɛ gə ər ang be, ose ꞌta naa gə kagəje gə ta ngaw nji gə gə kand-e godo, d-uy gɔl joo d-ɔr gə ngiraje ɓɔgɔdə-ɓɔgɔdə,

¹³ ose ꞌta naa gə ꞌpagəm babo gə ḭ pu-pu tomɛ nerɔkulje, ꞌta naa gə ndɛ̰ndərɛ̰ndɛ̰je gə njekila taarje, Luba ar-je d-ar lo kara baa mə cil ciməri gə ndul njudə-njudə gə gə dɔbo̰.

¹⁴ Cibi, Enɔgə gə to gəl ka Adam gə njekum gə siri pa ne ɔji dɔ dəwje nee na: Oje, Mbayɓe a ɗe gə njerɔsangəje lə-a bula-bula,

¹⁵ mba gangə ne tar dɔ dəwje gə tɔ̰y ngaɓa gə mba kila ne tar dɔ dəwje gə ꞌgərə Luba ang ɗəw kula ɗaje gə may ang gə nəm, gə tarje gə baa-baa gə njeneɗaje gə kṵra̰y nee le ꞌpa dɔ Luba gə.

¹⁶ Dəɓ-eje gə nee le, ꞌto nje no rɔ-jeje gə njerɔkadəje ja jaga ɔji dɔ rɔ-je, gə go ɓo ne gə kṵra̰y gə uwa mə-je, ꞌpa tar d-ɔsə ne rɔ-je ngaɓa d-ərə ne kəm dəwje.

¹⁷ Ngaa sisəy gə m-njigi-si ya̰ le, ar-je mə-si ole dɔ tarje gə njeka̰ykulaje lə Mbayɓe lə-si Jeju Kirisi ꞌpa kede.

¹⁸ ꞌPa d-ar-si na: Dɔ ɗudu ndɔ nama, dəwje d-a kunda-si kogo ne ngaɓa d-a nja gə ɓo neje gə kṵra̰y gə uwa mə-je ngaɓa d-a gərə Luba ang.

¹⁹ Oje, dəɓ-eje nee le, ꞌto nje cḭ dəwje. Kəji lə-je to kəji lə daje ngaɓa Njil godo mə-je gə.

Tar ndəji

²⁰ Ngaa sisəy gə m-njigi-si ya̰ le, ꞌtɔsəje kəm-si dɔ takagə lə-si gə to losang-ɛ. ꞌDəjije Luba ɗəw gə lə Njil Njerɔsangə.

²¹ Iyaje rɔ-si mə njigi gə lə Luba, nginaje ne məmay lə Mbayɓe lə-si Jeju Kirisi gə ar-si təbə gə gə ndɔ gə ndɔ.

²² Oje kəmtondoo lə nje gə ɗəgə takagə gə ɗəgə,

²³ nje gə kɛm ɗaa, ꞌnarəje-je kəm pər gə, cibi oje kəmtondoo lə nje gə kɛm gə ɓəəl mə-si gə. May kar aje rɔ-si dɔ kubu gə d-ula ꞌɗa ne kaya.

²⁴ ꞌNe gə n-asə ngom-si kar ꞌtugaje jigi osoje ang, kar-si ar-je gə no riɓar gə lə-a gə rɔ gə may pɛdə, gə rɔləl le,

²⁵ ꞌne gə Luba gə gə kar-ɛ baa gə n-to njekaji-si ɗəw gə lə Jeju Kirisi, Mbayɓe lə-si, may kar riɓar, gə ri mbay, gə singa ko̰ɓe gə singamongə to k-ɛ lo kuma kudu ne gə, ɓisine ngaɓa gə, gə ndɔ gə ndɔ! Oyo!