Jean 7 - Mbede Lə Luba Kone Gə Sigi

Ngan ko̰ Jeju ꞌta kag-ɛ ang

¹ Go-e gə ɗaa Jeju nja dɔ nangə gə Galile; n-njigi mba nja dɔ nangə gə Jude gə ang, mba Jiibije ꞌsangə ɗəw gə mba tɔl-ɛ.

² Ndɔ ɗa nay Kəy kubu lə Jiibije le ɗaa nay dəb baa ngaa.

³ Ngan ko̰-ɛ ꞌpa d-ar-ɛ na: Ɔdə lo gə nee gə ɗangə ɓo aw lo lə-i gə Jude gə mba kar ngan njenendoje lə-i kara d-o kulaje gə ꞌɗa.

⁴ Mba, to gə ɓo dəw sangə mba tɔji rɔ-ɛ kar d-o-e gə kəm-je nda̰-nda̰ nama, ɗa ne lokiya gə ang; to gə ɓo ꞌɗa neje gə nee le nama, ꞌtɔji ne rɔ-i gə ɗaga ta kəm dəwje gə.

⁵ Be ɓa ngan ko̰-ɛ ja kara ꞌta kag-ɛ ang nəm tɔ.

⁶ Jeju pa ar-je na: Dɔ kar nəm asə ang ɓi; ngaa sisəy le ɗaa dɔ kar tɔ̰y to kar-si.

⁷ Dəwje d-a kasə ndɔɔl-si ang; ngaa ꞌma ɗaa ꞌndɔɔl-m mba m-ɗa tar naji lə-je to gə kula ɗa-je kṵra̰y.

⁸ Be ɗaa awje lo ɗa nay gə nee le. ꞌMa ɓa ye, m-a kaw kəne ang baa mba dɔ kar lə-m asə ang ɓi.

⁹ Go tar gə n-pa nee ɗaa, ꞌne n-nay Galile gə gagə.

Jeju aw lo ɗa nay kəy kubu gə

¹⁰ Ngaa logə ngan ko̰-ɛ d-aw lo ɗa nay gə ɗɔdə ɗaa, ꞌne kara n-ɔdə n-un ɗəw n-aw gə go ngə̰y n-ar d-o-e ang.

¹¹ Jiibije ꞌsang-ɛ ndɔ ɗa nay gə ɗaa ꞌdəji na: N-ga̰ ɗa ngaɓa nee wa?

¹² Dan bula dəwje gə le, ꞌma̰y naa tar ya̰ ɔji dɔ-ɛ; nje gə kɛm ꞌpa na: N-to gə dəw gə may. Ngaa nje gə ɗangə tɔ ɗaa ꞌpa ꞌcila ne kəm nje gə ɓe kara na: N-to nje kərə bula dəwje kar-je ꞌndəm.

¹³ Be ja kara, dəw kara asə mba pa sə-a ɗaga təgəsə kəm dəwje ang mba ꞌɓəəl Jiibije.

¹⁴ ꞌƊa nay ꞌce dana bab ɗɔdə ɗaa, Jeju ɔdə aw mə kəy gə lə Luba aw ndo dəwje ne.

¹⁵ Lo tar igi Jiibije sɛl ɗaa ꞌpa na: ꞌNe gə dɔ-ɛ andə kəy nendo gə wɔr ang ja ngaa, n-ɗa na ban ɓa n-gərə Mbede to ɓəəl ya̰ be wa?

¹⁶ Jeju ila-je kəne na: Netɔji lə-m ꞌma le ḭ rɔ-m ꞌma gə ang, ngaa ḭ rɔ dəw gə njekula-m gə.

¹⁷ To gə ɓo dəw njigi mba ɗa mə njigi lə Luba nama, a gərə to gə netɔji gə nee le ḭ rɔ Luba gə ose, to ꞌma ɓa m-pa tar gə dɔ rɔ-m wa?

¹⁸ Dəw gə pa tar ɔji go mə njigi lə-a ye nama sangə riɓar lə-a ye ja; ngaa dəw sangə riɓar lə dəw gə nje kula-a le, nj-ɛ nee ja kara baa to dəw gə tɔgərɔ, ngaɓa neɗa gə dɔ buguru ɓar ri-a ang tɔ.

¹⁹ Moyiji ar-sisəy Torondu le ang baa cibi wa? Be ja kara dəw kara gə nje ɗa ne kula godo: Mba ɗi ɓa ꞌsangəje ɗəw mba tɔl-mje wa?

²⁰ Bula dəwje d-ila-a kəne na: Njil gə kṵra̰y ula gərəng mə-i gə. Na ɓa sangə ɗəw gə mba tɔl-i wa?

²¹ Jeju təl ila-je kəne na: M-ɗa ne kara baa ja ɓi ɗaa, sisəy tɔ̰y ja lo tar igi si sɛl.

²² Moyiji un ɗəw kunja bərə ar-si ngaɓa ka-sijee je ɓa d-unda gəl-e ɓo to Moyiji ang baa ɗaa sisəy unjaje dəwje bərə ndɔ kuwa kɔr gə.

²³ To gə ɓo dəw ar d-unja bər-e ndɔ kuwa kɔr gə nama, Torondu le Moyiji le ye al dɔ-ɛ ang, ngaa mba ɗi ɓa wungu lə-sisəy ḭ gə si pu-pu dɔ-m gə mba kaji gə m-aji dəw ndɔ kuwa kɔr gə m-ar rɔ-ɛ may pɛdə wa?

²⁴ ꞌGangəje tar mba kəm dəwje baa ang, ngaa ꞌgangəje tar gə go neɗa gə dana gadə ɓa.

²⁵ Nje gə kɛm horo dəw mə ɓeje gə Jerujalɛm ꞌpa na: Ne gə d-aw ꞌsang-ɛ gə mba tɔl-ɛ le ja ɓa n-ar nee ang wa?

²⁶ Oje, ꞌne le ja n-aw pa tar kəm dəwje gə ɗaga ja pay-pay a n-ar nee, ɗaa tar kara kara ꞌpa dɔ-ɛ gə ang. Njeko̰ɓeje lə-sijee le d-o ꞌgərə gə maj-ɛ to gə ꞌne le n-to Kirisi to gə tɔgərɔ ja wa?

²⁷ Ngaa, ꞌne gə nee le, j-a gərə lo gə n-ḭ kəne, ngaa lo gə Kirisi a ɗe ɗaa, dəw kara kara a gərə lo gə ye ḭ kəne ang.

²⁸ Be ɓa, Jeju gə aw ndo ne mə kəy gə lə Luba le, ila ndu-e nangə ɓolong pa na: ꞌGərə-mje ngaɓa ꞌgərəje lo m-ḭ kəne! Ngaa ꞌma ɓa m-ɗe gə dɔ rɔ-m ang. Njekula-m le to dəw gə dana gadə, ꞌne gə sisəy ꞌgər-eje ang le.

²⁹ ꞌMa le m-gər-e, mba m-ḭ rɔ-ɛ gə, ngaɓa ꞌne ja ɓa n-ula-m tɔ.

³⁰ Be ɓa ꞌsangə ɗəw mba kuwa-a, ngaa dəw kara kara asə kuwa-a ang, mba kar lə-a asə ang ɓi.

³¹ Dəwje ya̰ dan bula dəwje gə ꞌta kag-ɛ ɗaa ꞌpa na: Logə Kirisi a ɗe le se, ye a ɗa netɔjije ya̰ kunda kar dəw gə nee ja cibi wa?

³² Parijiyɛ̰je d-uru mbi-je d-o ne tar gə bula dəwje ꞌyṵrṵ ɔji dɔ Jeju, ɗaa buba njekapoloje gə Parijiyɛ̰je d-ula njengəm loje kar d-aw d-uwa-a.

³³ Jeju pa na: M-ga̰ gə si ɓəəl ɓi ɗaa, m-a təl kaw rɔ njekula-m gə.

³⁴ A sangə-mje ɗaa a kinga-mje ang; mba lo m-ga̰ kəne, le sisəy a kasəje mba kaw-je kəne ang.

³⁵ Lo-e gə əng ɗaa, Jiibije ꞌpa tar horo naa gə na: Logə ɗa ngaɓa n-a kaw gə kəne ɓa j-a kinga-a ang magə wa? N-a kaw kinga nje gə ꞌsɛ̰rɛ̰ naa horo Gərɛgəje gə mba tɔji Gərɛgəje ne wa?

³⁶ N-pa na: A sangə-mje ngaa a kinga-mje ang; lo gə m-ga̰ kəne le sisəy a kasə kawje kəne ang. Ɗaa tar gə nee gə n-pa le m-e na ɗi wa?

³⁷ Ɗudu ndɔ ɗa nay gə to ndɔ gə bɔy le, Jeju ar taar ɗaa ila ndu-e nangə ɓolong pa ne tar na: To gə ɓo dəw gə kunda tɔl-ɛ nama may kar-ɛ ɗe gə rɔ-m gə ɗe ta man ay.

³⁸ Dəw gə ta kagə-m to gə Mbede pa tar-ɛ nama, man babo təbə a kḭ m-e gə kula kəngəng-kəngəng gə man baa.

³⁹ N-pa tar nee n-ɔji dɔ Njil gə nje ta kag-eje d-a kinga: To to gə be mba d-ula rɔnduba dɔ Jeju gə ang baa ɓi ɗaa Njil godo ɓi tɔ.

⁴⁰ Dəwje gə kɛm horo bula dəwje gə d-o tar gə Jeju pa ɗaa, nje gə naaje ꞌpa na: Dəw gə nee le to pajambərə ja tɔgərɔ.

⁴¹ Nje gə ɗangə ꞌpa na: ꞌNe to Kirisi. Ngaa nje gə ɗangə cibi ꞌpa na: Kirisi asə kḭ dɔ nangə gə Galile gə ja wa?

⁴² Kirisi le a kḭ gəl Dabidi gə, ɗaa n-a kḭ Bɛdəlɛhɛm gə to ɓe lə Dabidi ɓa Mbede pa be ang wa?

⁴³ Be ɓa kay naa to horo bula dəwje gə mba tar lə-a.

⁴⁴ Nje gə naaje horo-je gə ꞌsangə ɗəw gə mba kuwa-a, ngaa dəw kara kara ula ji-a uwa-a ne ang.

⁴⁵ Be ɓa njengəm loje ꞌtəl ꞌɗe d-inga buba njekapoloje gə Parijiyɛ̰je gə ɗaa ꞌdəji-je na: Mba ɗi ɓa uwa-aje ꞌɗeje sə-a ang wa?

⁴⁶ Njengəm loje d-ila kəne na: Ndɔ kara ja dəw pa tar to gə ngon jingaw gə kən ang.

⁴⁷ Parijiyɛ̰je ꞌdəji-je na: Sisəy ja kara ar-je n-um-si wəl gə tɔ wa?

⁴⁸ Horo buba ɓeje gə ose horo Parijiyɛ̰je gə le, dəw kara baa be gə ta kag-ɛ ga̰ kəne əng ja wa?

⁴⁹ Ɓɛl bula dəwje gə ꞌgərə ne kara gə ɔji dɔ Torondu ang, ꞌto dəwje gə kugu uwa-je.

⁵⁰ Nikodɛm, gə to kara lə Parijiyɛ̰je gə dɔ ndɔ gə kede, ɗe cil gə inga Jeju le pa ar-je na:

⁵¹ Torondu lə-sijee le ila tar dɔ dəw gə lal gə mba kar d-o tar gə t-ɛ gə nəm, gə lal ko kula ɗ-ɛ nəm tɔ wa?

⁵² D-ila-a kəne na: ꞌI kara ꞌto gə dəw gə Galile gə ja tɔ ang wa? ꞌTən Torondu gə maj-ɛ o, ɗaa a gərə to gə pajambərə a kḭ Galile gə ang.

Jene gə nje ɓogo lo to

⁵³ Ɗaa na-na kara ɔdə aw ɓe lə-a ɓe lə-a.