Jean 6 - Mbede Lə Luba Kone Gə Sigi

Jeju ar nekusa dəwje tɔl dɔg lo mi

¹ Go-e gə gugu ɗaa, Jeju cɛdə man aw tura babo Galile gə ꞌɓar-ɛ na Tiberiyadə.

² Bula dəwje d-uwa go-e mba d-o netɔjije gə n-ɗa dɔ njerɔko̰je gə.

³ Jeju aw uba dɔ ər isi kəne gə ngan njenendoje lə-a.

⁴ Ndɔ ɗa nay lə Jiibije gə ꞌɓar-ɛ Pagə le nay dəb baa.

⁵ Jeju un kəm-e gə taar ɗaa o bula dəwje d-aw ɗe gə rɔ-ɛ gə. N-pa n-ar Pilibi na: Lo gə ɗa ɓa j-a ndogo mbə kəne mba kar dəwje nee d-usa wa?

⁶ N-pa tar be gə mba na ne mə Pilibi gə na baa, mba ꞌne n-gərə ne gə n-a ɗa som.

⁷ Pilibi ila-a kəne na: Le ꞌndogo mbə kəm mbɛl ka tɔl joo ja kara a kasə mba kar d-inga dɔ dum-e kara-kara tɔ̰y ang baa.

⁸ Ngon njenendo lə-a kara horo ngan mar-ɛje gə, ri-a na Andəre gə to ngon ko̰ Simo Piyɛr pa ar Jeju na:

⁹ Ngon basa̰ kara gə mbə gə ꞌɗa gə nduji ɔrəje mi gə kənji lə-a joo ga̰ nee; ngaa ye gə nən ja baa d-a ɗa nena ban gə dəwje gə bula nee wa?

¹⁰ Jeju pa na: Ar-je dəwje gə nee le d-isi nangə. Lo-e nee le mu to kəne ya̰. Be ɓa d-isi nangə, d-asə jingawje tɔl gə dɔg lo mi.

¹¹ Jeju odo mbə ɗaa ɗa Luba oyo ngaɓa kay dəwje nee le kənji le kara n-ɗa to gə bənəng nəm tɔ; dəwje d-inga to gə mə-je njigi.

¹² Lo gə mə-je ci gə maj-ɛ ɗaa, Jeju pa ar ngan njenendoje lə-a na: ꞌMbo̰je dɔ dum-eje gə nay dɔ naa gə mba kar ne kara igi ang.

¹³ Mbə ko gə ꞌɓar-ɛ ɔrəje gə mi gə dəwje d-usa le, ꞌmbo̰ dɔ dum-e gə nay dɔ naa gə tɔ̰y ɗaa, d-um karɛ dɔg gə gir-e gə joo.

¹⁴ Logə dəwje d-o netɔji gə Jeju ɗa ɗaa, ꞌpa na: ꞌNe ja n-to pajambərə gə a ɗe dɔ nangə gə nee to gə tɔgərɔ.

¹⁵ Logə Jeju gərə to gə ꞌkuma-a mə-je gə mba ɗe kuwa-a kaw sə-a kaw kula mbay dɔ-ɛ gə ɗaa, ɔr rɔ-ɛ təl aw dɔ ər gə gə kar-ɛ baa.

Jeju nja dɔ man babo gə

¹⁶ Kar kumatagə ɗaa, ngan njenendoje lə-a d-aw saar ꞌce ta babo gə.

¹⁷ D-al to ꞌgangə babo d-aw dɔ-je gə Kapɛrənom, tura baa gə ər kara. Lo ndul ɗɔdə ja ngaa, ngaa Jeju ɗe inga-je ang ja dɔro ɓi.

¹⁸ Ləl bo ula ya̰ ar ꞌpagəm tuga.

¹⁹ ꞌLəl to d-aw əw asə ne gə kula mɛdərɛ mi ose misa̰ be ɗaa, d-o Jeju gə nja dɔ man gə unda ta to dəb; ɗaa ɓəəl unda-je badə gangə-je,

²⁰ Ngaa n-pa n-ar-je na: To ꞌma ja, ꞌɓəəl-je ang.

²¹ ꞌNjigi mba kun-e gə to, ngaa to le ɔsə kar mbəng gə tɔg-ɛ baa lo gə d-aw gə kəne.

Mbə gə ḭ dara

²² Lokar-ɛ ɗaa, bula dəwje gə d-ar tura babo gə əər kara gə le, d-o to gə to le ga̰ lo-e gə əng kara baa ɗəgədə, ngaɓa Jeju kara al gə ngan njenendoje lə-a to naa gə ang tɔ, ngaa ꞌjejee d-aw gə kar-je baa.

²³ Ngaa, toje gə ɗangə d-ḭ Tiberiyadə gə ꞌɗe ꞌce dəb gə lo gə Mbayɓe ɗa oyo Luba ɓa ar dəwje mbə d-usa kəne.

²⁴ Logə bula dəwje d-o to gə Jeju je gə ngan njenendoje lə-a ꞌgodo lo-e gə əng ɗaa, dəwje ꞌbunga naa d-um mə to gə, ɗaa d-aw Kapɛrənom d-aw ꞌsangə Jeju.

²⁵ Ngaɓa d-inga-a tura babo gə ɗaga əər kara gə ɗaa, ꞌpa d-ar-ɛ na: Njenetɔji, ꞌɗe nee ndɔ gə ɗa gə wa?

²⁶ Jeju ila-je kəne na: Tar gə tɔgərɔ ja, m-pa m-ar-si, ꞌsangə-mje mba netɔjije gə oje ang, ngaa mba mbə gə usaje ar-je mə-si ci tub-tub.

²⁷ Ulaje rɔ-si ndubu mba nekusa gə a kunda nangə mbadagə ang, ngaa mba nekusa gə kar kisi gə təbə gə a to gə no, ye gə Ngon lə dəw a kar-si, mba ꞌne ɓa bəngə ji Bɔ dəwje Luba to rɔ-ɛ gə.

²⁸ Be ɓa ꞌdəji-e tar na: Ja ɗa ban ɓa gə mba ɗa ne kulaje lə Luba wa?

²⁹ Jeju ila-je kəne na: Kula lə Luba le, to mba kar-sisəy ꞌtaje kagə ye gə ꞌne ja n-ula-a.

³⁰ Be ɓa ꞌpa d-ar-ɛ na: Ngaa, ꞌI le, netɔji gə ban ɓa ꞌɗa mba kar-sijee j-o ɓa j-a ta ne kag-i wa? Ɗi ja ɓa to ne gə ꞌɗa wa?

³¹ Ka-sijee je d-o̰ muru misi ndag lo gə, to gə ꞌɗa ne tar-ɛ mə mbede gə na: N-ar-je mbə gə ḭ dara d-usa.

³² Be ɓa, Jeju pa ar-je na: Tar gə tɔgərɔ ja, m-pa m-ar-si, to gə Moyiji ɓa ar-si mbə gə ḭ dara ang ngaa Bɔy ɓa ar-si mbə gə tɔgərɔ gə ḭ dara,

³³ mba mbə lə Luba le, to ye gə ḭ dara mba kar dəwje gə dɔ nangə gə nee təbə.

³⁴ ꞌPa d-ar-ɛ na: Bɔ-sijee, ar-si mbə gə nee le jaga-jaga ja.

³⁵ Jeju pa ar-je na: ꞌMa ja m-to gə mbə gə kar kisi gə təbə; dəw gə ɗe rɔ-m nama, ɓo a kɔr-ɛ ang ja saar, ngaɓa dəw gə ta kagə-m nama kunda a kɔr-ɛ ang ja saar tɔ.

³⁶ Ngaa m-pa m-ar-si kede: Sisəy o-mje ja ngaa, ꞌtaje kagə-m ang.

³⁷ Dəwje tɔ̰y gə Bɔ dəwje um-je ji-m gə le, d-a ɗe rɔ-m gə, ngaɓa dəw gə ɗe rɔ-m gə nama, m-a tɔb-ɛ kila-a ɗaga ang ja saar,

³⁸ mba m-ḭ dara m-ɗe mba ɗa mə njigi lə-m ꞌma ang ngaa, mba ɗa mə njigi lə dəw gə njekula-m.

³⁹ Ɗaa, mə njigi lə dəw gə njekula-m le ɓa nee: Dəwje gə n-um-je mə ji-m gə le, m-ar dəw kara kara igi horo-je gə ang, ngaa kar-m m-ndol-e dɔ ɗudu ndɔ gə.

⁴⁰ Mə njigi lə Bɔy le ja ɓi ɓa nee: kar na-na ɓa o Ngon ngaɓa ta kag-ɛ nama inga təbə gə to gə no, ɗaa ꞌma m-a ndol-e dɔ ɗudu ndɔ gə.

⁴¹ Be ɓa Jiibije d-un kudu yṵrṵ tar ɔji dɔ-ɛ mba n-pa na: ꞌMa m-to mbə gə ḭ dara.

⁴² Ɗaa ꞌpa na: Ngon lə Jəjəb, gə sijee, j-a gərə ko̰-ɛje gə bɔ-ɛje som, ꞌne gə nee le ɓa n-to Jeju le ang wa? Na ban cibi ɓa ɓisine n-pa na: ꞌMa m-ḭ dara wa?

⁴³ Jeju ila-je kəne na: ꞌYṵrṵje tar horo-si gə ang.

⁴⁴ To gə ɓo Bɔ dəwje gə ula-m ndɔr dəw ɗe sə-a rɔ-m gə ang nama, dəw kara kara asə ɗe rɔ-m gə ang; ɗaa ꞌma, m-a ndol-e dɔ ɗudu ndɔ gə.

⁴⁵ ꞌƊa mə mbede gə lə pajambərəje na: Dəwje tɔ̰y ja Luba a tɔji-je ne. Na-na ɓa o ndu Bɔ dəwje ngaɓa uwa nendo lə-a m-e gə nama ɗe rɔ-m gə.

⁴⁶ Dəw kara kara o Bɔ dəwje gə kəm-e ang, be ang nama, ye gə nje kḭ Luba gə le ja baa. ꞌNe gə nee le ɓa n-o Bɔ dəwje gə kəm-e.

⁴⁷ Tar gə tɔgərɔ ja, m-pa m-ar-si, dəw gə ta kagə nama inga təbə gə to gə no.

⁴⁸ ꞌMa le ɓa m-to gə mbə gə kar kisi gə təbə.

⁴⁹ Ka-sijee je d-o̰ muru misi ndag lo gə, ɗaa d-uy.

⁵⁰ Mbə gə nee le, to ye gə ḭ dara, mba kar dəw gə usa nama uy ang.

⁵¹ ꞌMa le, m-to mbə gə to kəm baa gə ḭ dara. To gə ɓo dəw usa mbə gə nee le nama a kaw kəm baa gə ndɔ gə ndɔ; ngaɓa mbə gə ꞌma m-a kar le, to gə darɔ-m gə m-ar mba təbə lə dəwje gə dɔ nangə gə nee.

⁵² Jiibije ꞌmay tar gə singa-je horo naa gə na: Dəw gə nee a kar-si darɔ-ɛ j-usa to gə ban wa?

⁵³ Jeju pa ar-je na: Tar gə tɔgərɔ ja, m-pa m-ar-si, to gə ɓo usaje darɔ Ngon lə dəw ang nəm ngaɓa ayje məs-e ang nama təbə godo mə-si gə.

⁵⁴ Dəw gə usa darɔ-m gə ay məsə-m nama inga təbə gə to gə no, ɗaa ꞌma, m-a ndol-e dɔ ɗudu ndɔ gə.

⁵⁵ Mba darɔ-m to nekusa gə tɔgərɔ ngaɓa məsə-m to nekay gə tɔgərɔ tɔ.

⁵⁶ Dəw gə usa darɔ-m gə ay məsə-m nama isi mə-m gə, to gə ꞌma kara m-isi m-e gə tɔ.

⁵⁷ Cibi, to gə Bɔ dəwje gə isi kəm baa ula-m, ngaɓa to gə ꞌma, m-isi kəm baa ɗəw gə lə Bɔ dəwje le, to gə be ja tɔ, dəw gə usa darɔ-m nama isi kəm baa ɗəw gə lə-m ꞌma tɔ.

⁵⁸ Ye gə nee le ɓa to mbə gə ḭ dara, unda rɔ-ɛ ɓədə gə ye gə ka-sijee je d-usa ɗaa d-uy. Ngaa dəw gə usa mbə gə nee le nama a kaw kəm baa gə ndɔ gə ndɔ.

⁵⁹ Neje gə nee le ɓa n-pa tar-ɛ, lo gə n-tɔji ne mə kəy nendo gə gə Kapɛrənom.

⁶⁰ Logə d-o tar lə-a ɗaa, dəwje bula horo ngan njenendoje gə d-un kudu pa tar na: Tar gə nee le ngangə ya̰! Na ɓa a kasə tuga mbi-a ko ne wa?

⁶¹ Ngaɓa, Jeju gərə m-e gə to gə ngan njenendoje lə-a d-aw ꞌyṵrṵ tar ɔji dɔ tar gə nee le ɗaa, pa ar-je na: Tar gə nee le to jigi tuga gɔl si wa?

⁶² Ngaa to gə ɓo sisəy oje Ngon lə dəw uba nangə ḭ aw lo gə ye ga̰ kəne kede le a paje na ɗi ngaa wa?

⁶³ Njil ɓa to nje kar dəw aw kəm baa. Darɔ asə ɗa ne kara ang. Tarje gə ꞌma, m-pa m-ar-si le to Njil gə təbə.

⁶⁴ Ngaa nje gə kɛm horo-si gə nee ꞌta kagə-m ang. Mba Jeju gərə kede ləw baa, lo kuma kudu neje gə, nje gə ꞌta kag-ɛ ang, ngaɓa n-gərə dəw gə njekun dɔ-ɛ nəm tɔ.

⁶⁵ Ɗaa n-pa na: Mba ne gə nee le ɓa m-pa ne m-ar-si na: Dəw gə ɓo Bɔ dəwje un ɗəw ar-ɛ ang nama, asə ɗe rɔ-m gə ang.

⁶⁶ Un kud-e kən nja ɗaa, ngan njenendoje lə-a bula ꞌtəl gə go-je, ɗaa d-uwa sə-a baa nja ang ja yom.

⁶⁷ Be ɓa Jeju dəji nje gə dɔg gə gir-je gə joo na: Ɗaa sisəy, ꞌnjigi kawje lo lə-si ang wa?

⁶⁸ Simo Piyɛr ila-a kəne na: Mbayɓe, sijee j-a kaw gə rɔ na gə wa? Tarje gə kar təbə gə gə ndɔ gə ndɔ le ḭ rɔ-i ꞌI gə.

⁶⁹ Sijee le, j-a ta kagə ngaɓa j-a gərə to gə ꞌI ja ꞌto Kirisi, Njerɔsangə lə Luba.

⁷⁰ Jeju ila-je kəne na: Sisəy gə dɔg gə gir-si gə joo le, ꞌma ja ɓa m-mbərə-si ang wa? Ngaa dəw kara horo-si gə to ꞌSɛ̰ngərɛ̰.

⁷¹ N-pa tar gə nee le n-ɔji ne dɔ Judas gə ngon lə Simo Isikariyɔdə; mba ꞌne gə to kara lə ngan njenendoje gə dɔg gə gir-je gə joo nee le, ꞌne le ja ɓa n-a kun dɔ-ɛ.