Jean 5 - Mbede Lə Luba Kone Gə Sigi

Jeju aji dəw gə rɔ-ɛ uy wɔɔ

¹ Go neje gə nee ɗaa, ndɔ ɗa nay lə Jiibije to ɓebo gə Jerujalɛm, ɗaa Jeju aw kəne.

² Ɗaa mə ɓebo gə Jerujalɛm gə le, dangə kara ga̰ kəne əng gə ꞌɓar-ɛ gə tar Ebərə na Bedəjada, to mbɔr ta ɗəw kandə kəy gə lə badəmje. Lo-e gə nee le, ꞌɗa njilje kəne mi.

³ Gəl njilje gə nee le njerɔtoje bula ꞌto kəne, nje kəm tɔje, njeməndəje, gə nje gə rɔ-je uy wɔɔ-wɔɔ.

⁴ Mba dɔ kar gə naaje nama anji lə Mbayɓe ɗe uru mə man gə le ɗaa, ɗa ar man le ləngə; dəw gə andə mə man gə ləngə gə le dɔngɔr ɗaa, rɔ to lə-a to gə ban ja kara aji kəbərə.

⁵ Lo-e gə nee dəw kara gə rɔ-ɛ to-e ləw baa ɗa ɓal dɔg munda gə gir-e gə ji nay joo ga̰ kəne.

⁶ Jeju o-e n-to nangə, ngaɓa gərə to gə n-to lo gə nee gə le ləw baa kur-e əw ya̰ ɗaa, pa ar-ɛ na: ꞌNjigi mba kar rɔ-i təl to gə maj-ɛ pɛdə wa?

⁷ Njerɔko̰ le ila-a kəne na: Bɔy, dəw lə-m kara be gə a kun-m kila-m dangə gə dɔ kar gə man un kudu ləngə ne le godo. Ngaɓa logə m-ngɛsə gə mba koso kəne ɗaa dəw gə ɗangə ɗe oso kəne no-m gə kede ɗɔdə-ɗɔdə.

⁸ Jeju pa ar-ɛ na: Ḭ taar, un tuwa lə-i ɓo ꞌnja.

⁹ Ɗaa, gə ngɔdə baa, dəw nee le aji kəbərə, un tuwa lə-a ɗaa nja. Ɗaa ndɔ-ɛ gə əng le, to gə ndɔ kuwa kɔr.

¹⁰ To gə be ɓa Jiibije ꞌpa d-ar dəw gə aji le na: Dəw un ɗəw ar-i mba kar-i un tuwa lə-i odo gə ndɔ kuwa kɔr ang.

¹¹ Ngaa ꞌne n-pa n-ar-je na: Dəw gə ar-m m-aji kəbərə le ja ɓa pa ar-m na: Un tuwa lə-i ɓo ꞌnja.

¹² ꞌDəj-e na: Dəw gə nje pa kar-i na: Un tuwa lə-i ɓo ꞌnja le to na wa?

¹³ Ngaa dəw gə aji kəbərə nee le gərə se to gə na wa kara ye gərə ang tɔ, mba Jeju ɔdə igi kagə, bula dəwje ꞌga̰ lo-e gə nee le tɔ.

¹⁴ Go-e gə gugu ɗaa, Jeju inga-a mə kəy gə lə Luba ɗaa pa ar-ɛ na: Aji kəbərə ngaa nee ɗaa, ꞌɗa neɗa gə kṵra̰y gugu ɗangə ang ngaa, na kar ne gə kṵra̰y gə to ɓəəl ya̰ təl ce dɔ-i gə.

¹⁵ Dəw gə nee le ɔdə aw pa ar Jiibije na dəw gə nje kar n-inga kaji le to Jeju.

¹⁶ Be ɓa Jiibije d-un kudu kula kəm Jeju ndoo mba n-ɗa neje nee le gə ndɔ kuwa kɔr.

¹⁷ Ngaa Jeju ila-je kəne na: Saar ɓisine, Bɔy ar ta kula gə ja ɓi, ngaɓa ꞌma kara m-ar ta kula ja ɓi tɔ.

¹⁸ Be ɓa Jiibije ꞌsangə ɗəw gə mba tɔl-ɛ gə tɔl ja kara baa, mba n-al dɔ ndɔ kuwa kɔr ja kara baa ang, ngaa n-təl n-ɓar Luba gə bɔ-ɛje gə nje kuj-e, ngaɓa n-ɗa rɔ-ɛ n-asə ne naa gə Luba nəm tɔ.

¹⁹ Be ɓa, Jeju ila-je kəne na: Tar gə tɔgərɔ ja, m-pa m-ar-si, Ngon asə ɗa ne kara gə dɔ rɔ-ɛ baa ang, be ang nama, ne gə n-o bɔ-ɛje lo ɗ-ɛ gə ja ɓa; ne gə Bɔ ɗa nama, Ngon kara ɗa ja tɔ.

²⁰ Mba Bɔ Ngon-je njigi Ngon ɗaa tɔj-ɛ neje tɔ̰y gə ye ja gə darɔ-ɛ kara ɗa tɔ; n-a tɔj-ɛ kula ɗaje gə to ɓəəl ya̰ ja ɓi mba kar-sisəy le lo tar igi ne si sɛl.

²¹ Be ɓa, to gə Bɔ Ngon-je ndol ne nje gə d-uy ngaɓa n-ar-je d-isi kəm baa le, to gə be ja tɔ, Ngon ar na-na kara isi kəm baa to gə m-e ye ja njigi.

²² Ngaɓa, Bɔ gangə tar dɔ dəw gə kara be ang, n-ḭya̰ gangə tar tɔ̰y n-um mə ji Ngon gə.

²³ Mba kar dəwje tɔ̰y ja d-ila ne kɔji dɔ Ngon gə to to gə d-ila ne kɔji dɔ Bɔ gə be tɔ. Dəw gə ila kuji dɔ Ngon gə ang nama ila kuji dɔ Bɔ-ɛje gə ula-a le ang tɔ.

²⁴ Tar gə tɔgərɔ ja, m-pa m-ar-si, dəw gə o tar lə-m ɓa ɓo ta kagə ye gə ula-m nama, inga təbə gə gə ndɔ gə ndɔ; a kaw lo gangə tar gə ang, ngaa ce ta yo gə mba kisi kəm baa.

²⁵ Tar gə tɔgərɔ ja, m-pa m-ar-si, kar-ɛ ɗe, ɗaa to kar-ɛ ja ɓisine, logə nje gə d-uy d-a ko ndu Ngon lə Luba, ngaɓa nje gə d-a ko ndu-e le d-a kisi kəm baa.

²⁶ Be ɓa, to gə Bɔ to ngira təbə le, to gə be ja tɔ n-ar Ngon to ngira təbə tɔ.

²⁷ Ngaɓa n-ar-ɛ singamongə mba kar n-gangə ne tar, mba n-to Ngon lə dəw.

²⁸ Ar-je lo tar igi si sɛl ɔji dɔ ne gə nee le ang mba kar-ɛ asə kar dəwje tɔ̰y gə to mə buwa yo gə le d-a ko ndu-e.

²⁹ Ngaɓa nje gə ꞌɗa ne gə may nama d-a ndol ce buwa yo gə mba kisi kəm baa; nje gə d-a ɗa ne gə kṵra̰y nama d-a ndol ce buwa yo gə mba kaw lo gangə tar gə.

³⁰ ꞌMa m-asə ɗa ne kara gə dɔ-m baa ang: ne gə m-o gə mbi-m ja ɓa m-gangə ne tar, ngaɓa tar gangə lə-m le to dana gadə mba mə njigi lə-m ꞌma ɓa m-sangə ang, ngaa mə njigi lə dəw gə nje kula-m.

³¹ To gə ɓo ꞌma ja cibi ɓa m-pa tar naji gə ɔji dɔ-m ꞌma nama, tar naji lə-m le d-a ko gə tar gə tɔgərɔ ang;

³² To gə dəw gə ɗangə ɓa pa tar naji lə-m ꞌma, ɗaa m-gərə to gə tar naji lə-m gə n-pa le, to tar gə tɔgərɔ ja.

³³ Ulaje dəwje ɓə lə Ja̰, ɗaa ꞌne n-pa tar naji lə tar gə tɔgərɔ n-ar-si.

³⁴ ꞌMa le, dəw ɓa pa tar naji lə-m ang, ngaa m-pa tar to gə be mba kar-si ajije ne.

³⁵ Ja̰ to ngəl gə d-ɔsə pər kəne ɗaa ndogo: ɗaa sisəy ꞌnjigije mba kar n-ndogo dɔ-si gə n-ar-si ꞌɗaje rɔləl kəm ngira kar kara.

³⁶ Ngaa tar naji lə-m ꞌma to ɓəəl ya̰ unda kar Ja̰: Kulaje gə Bɔy um ji-m gə mba kar-m m-ɗa le, m-ɗa m-tɔl t-ɛ bɛm. Kulaje gə m-ɗa nee le ja ɗa tar naji lə-m to gə Bɔ dəwje ula-m.

³⁷ Ngaɓa Bɔ dəwje gə ula-m le ye ja pa tar naji lə-m. Ngaa sisəy ꞌtugaje mbi-si oje ne ndu-e ang nəm, oje lo kunda rɔ-ɛ ang nəm tɔ,

³⁸ ngaɓa tar lə-a kara uwa dɔ ɓəngərə si ang mba ꞌtaje kagə ye gə n-ula-a le ang.

³⁹ ꞌTənje mə mbedeje so-so, mba sisəy əjije to gə ɗəw gə kəne nama a kingaje təbə gə gə ndɔ gə ndɔ: Mbedeje gə nee le ja ɓa pa tar naji ɔji dɔ-m.

⁴⁰ Ɗaa ꞌnjigije mba ɗe rɔ-m gə gə mba kinga təbə ang.

⁴¹ ꞌMa m-inga riɓar gə ḭ rɔ dəwje gə ang,

⁴² ngaa m-gərə-si som, sisəy le, njigi lə Luba godo mə-si gə.

⁴³ ꞌMa m-ɗe gə ri Bɔ dəwje, ngaa sisəy ꞌmbadəje kuwa-mje gə rɔ-si gə. Dəw gə ɗangə gə ɗe gə ri-a ye ja ɗaa, nj-ɛ nee ɓa a kuwa-je gə rɔ-si gə.

⁴⁴ Sisəy gə ilaje riɓar dɔ naa gə gə yo gə nee ngaɓa ꞌsangəje riɓar gə ḭ rɔ Luba gə ja gə kar-ɛ baa ang nee le, na ban ɓa a taje kagə-m wa?

⁴⁵ Əjije to gə ꞌma ɓa m-a kila tar dɔ-si gə no gɔl Bɔ dəwje ang: njekila tar dɔ-si gə le, to Moyiji, gə sisəy umje mə-si dɔ-ɛ gə jəb-jəb le.

⁴⁶ Be ɓa to gə ɓo ꞌtaje kagə Moyiji nama a taje kagə-m ꞌma tɔ, mba ne gə n-ɗa tar-ɛ mə mbede gə le ɔji dɔ-m ꞌma.

⁴⁷ Ngaa to gə ɓo ꞌtaje kagə tarje gə Moyiji ɗa mə mbede gə ang nama a taje kagə tarje lə-m ꞌma to gə ban wa?