Jean 4 - Mbede Lə Luba Kone Gə Sigi

Jeju je gə jene gə Samari

¹ Jeju gərə to gə Parijiyɛ̰je d-o tar təl gə n-təl dəwje ya̰ gə ngan njenendoje lə-a ngaɓa n-ɗa-je batɛm ya̰ tɔy Ja̰ nəm tɔ.

² Be ja kara, to gə ngan njenendoje lə Jeju ɓa ꞌɗa dəwje batɛm ɓo to Jeju gə darɔ-ɛ ang.

³ N-ɔdə dɔ nangə gə Jude n-təl n-aw dɔ nangə gə Galile gugu.

⁴ Kaw gə Galile le, n-a nday gə ɗəw gə dɔ nangə gə Samari gə no ja ɓa n-a kaw ɓi.

⁵ Ye əng ngaa n-ce ɓebo gə kara be gə dɔ nangə gə Samari gə ꞌɓar-ɛ na Sysar, mbɔr ndɔ gə Jakobo ar ngon-e Jəjəb.

⁶ Lo gə nee ɓa buwa man lə-a ꞌne gə Jakobo to kəne. Ɗəw mba ɗa Jeju ar-ɛ yɔɔ ya̰ ɗaa, təl cɛɗə kɔr isi nangə ta buwa man gə mburugu bənəng. Kar ar gə mə dara gə dana.

⁷ Jene gə Samari gə kara ɗe mba to man. Jeju pa ar-ɛ na: Ar-m man m-ay.

⁸ Mba ngan njenendoje lə-a d-aw mə ɓe gə mba ndogo nekusa.

⁹ Jene gə Samari pa ar-ɛ na: ꞌI le, ꞌto gə Jiibi, ngaa ban ɓa ꞌdəji-m, ꞌma gə m-to gə jene gə Samari man mba kay wa? Jiibije gə dəwje gə Samari le, ta bandə lə-je uwa naa ang.

¹⁰ Jeju ila-a kəne na: To gə ɓo ꞌgərə nekarə baa lə Luba ose ye gə pa ar-i na ar-m man m-ay le nama, ꞌI ja a to kiigi mba dəji-e man dɔngɔr kay, ɗaa n-a kar-i man gə kar kisi gə təbə ay.

¹¹ Jene pa ar-ɛ na: Bɔy, ꞌI le, ka kula kɔr man lə-i kara godo, ngaɓa buwa man le kara uru ya̰ nəm tɔ; ngaa se a kḭ gə man gə kar kisi gə təbə nee le lo gə ɗa gə wa?

¹² ꞌI ꞌto ɓəəl ya̰ unda ka-sijee Jakobo gə ḭya̰ buwa man gə nee ar-sijee le wa? Buwa gə ꞌne ja n-ay man kəne gə t-ɛ gə ngan-ɛ gə nekuulje lə-a.

¹³ Jeju ila-a kəne na: Dəw gə ɗa-ɗa gə ay man gə nee nama kunda a tɔl-ɛ jaga ɓi;

¹⁴ ngaa dəw gə a kay man gə m-a kar-ɛ le, kunda a tɔl-ɛ ang saar gə no-ɛ, ngaɓa man gə m-a kar-ɛ le a təl to gə ngira man rɔ-ɛ gə, ɗaa ngira man gə nee le a kar-ɛ təbə gə gə ndɔ gə ndɔ.

¹⁵ Jene le pa ar-ɛ na: Bɔy, ar-m man gə nee le, mba kar kunda ɔr-m to gə ɗangə ang, ngaɓa mba kar-m m-təl m-ɗe nee m-ɔr man to gə ɗangə ang ngaa.

¹⁶ Jeju pa ar-ɛ na: Aw ɓar ngab-ije ɓo ꞌtəl ꞌɗe nee.

¹⁷ Jene ila-a kəne na: M-ta ngaw ang. Jeju pa ar-ɛ na: ꞌPa na ꞌta ngaw ang le ɗaa ꞌpa lo-e gə ja.

¹⁸ Mba ꞌta ngaw ji-i mi ngaa, ngaɓa ye gə isi sə-a ɓisine kara to ngab-ije ang nəm tɔ. Ye gə nee le ɗaa ꞌpa tɔgərɔ ja.

¹⁹ Jene pa ar-ɛ na: Bɔy, m-o to gə ꞌto pajambərə.

²⁰ Ka-sijee je ꞌpolo ne dɔ mbal gə nee, ngaa sisəy ɗaa, ꞌpaje na Jerujalɛm ɓa lo polo ne to kəne.

²¹ Jeju pa ar-ɛ na: Jene, ꞌta kagə-m, kar ɗe nama, a polo-je Bɔ dəwje dɔ mbal gə nee ang nəm Jerujalɛm ang nəm tɔ.

²² Sisəy ꞌpoloje ne gə ꞌgərəje ang baa; Sijee ɗaa, ne gə j-a gərə ɓa j-a polo, mba kaji ḭ ɓə lə Jiibije.

²³ Ngaa kar-ɛ ɗe ɗaa dɔ kar-ɛ ja nee mba kar njepolo neje gə tɔgərɔ d-a polo Bɔ dəwje ɗəw njil gə gə ɗəw tar gə tɔgərɔ gə, mba njepolo neje gə to gə be ɓa Bɔ dəwje sangə-je.

²⁴ Luba le to Njil, be ɓa may kar nje gə ꞌpol-e le, ꞌpolo-e ɗəw njil gə, gə ɗəw tar gə tɔgərɔ gə.

²⁵ Jene pa ar-ɛ na: M-gərə to gə dəw gə d-um ubu dɔ-ɛ gə a ɗe ꞌne gə ꞌɓar-ɛ Kirisi. ꞌNe əng le, lo gə n-a ɗe nama n-a kɔr gəl neje tɔ̰y kar-si.

²⁶ Jeju pa ar-ɛ na: To gə ꞌma gə m-aw pa sə-i tar nee ja.

²⁷ Lo-e gə nee ɗaa, ngan njenendoje ꞌce pɔɔ, ɗaa lo tar igi-je sɛl mba tar gə n-ar n-aw n-pa gə jene gə nee le. Be ja kara, dəw kara be kara dəji-e tar na: Ɗi ɓa ꞌsangə wa, ose tar gə ɔji dɔ ɗi ɓa ꞌpa sə-a wa be ang nəm tɔ.

²⁸ Jene ḭya̰ jo to man lə-a, ɔdə aw mə ɓe gə pa ar dəwje na:

²⁹ ꞌƊeje oje dəw gə ɔr gəl kula ɗa-m kɔdɛ-kɔdɛ ar-m nee. N-a to gə Kirisi ang ja baa wa?

³⁰ Dəwje ꞌce mə ɓebo gə mbura-mbura ꞌɗe gə rɔ-ɛ gə.

³¹ Lo-e gə əng ɗaa, ngan njenendoje lə-a ꞌɗ-ɛ kɔgərɔ, ꞌpa na: Njenetɔji, usa ne ɓa.

³² Ngaa, n-pa n-ar-je na: Nekusa ta-m ga̰ ja ngaa sisəy ꞌgərəje ang baa.

³³ Be ɓa ngan njenendoje ꞌpa tar horo-je gə gə yo gə nee na: Dəw ɗe gə ne ar-ɛ n-usa ose ban ɓa nee wa?

³⁴ Jeju pa ar-je na: Nekusa ta-m to gə ɗa mə njigi lə dəw gə njekula-m, ngaɓa ɗa kula lə-a tɔl t-ɛ bɛm nəm tɔ.

³⁵ Sisəy le, ꞌpaje na nay nay sɔɔ gə kede ɓi ɓa kar kunja ko a kasə ɓa ꞌpaje be ang wa? ꞌMa le, ye gə m-pa m-ar-si ɓa nee: Unje kəm-si gə taar oje ne lo gə mə ndɔ gə oje, ko nda pəw asə kəm kunja ngaa. Ɓɛlɛ ngaa,

³⁶ njekunja ko inga lar dɔ ji-a ngaɓa mbo̰ kandə ko ndɔ dɔ naa gə mba təbə gə gə ndɔ gə ndɔ, mba kar Njedubu koje gə njekunja-a ꞌɗa ne rɔləl naa gə kara baa tɔ.

³⁷ Be ɓa gusutar gə ꞌpa na: Njedubu ko dubu ɗaa njekunja-a unja le to ne gə tɔgərɔ ja.

³⁸ ꞌMa m-ula-si lo kunja ko gə sisəy ulaje rɔ-si ndubu kəne kara be ang ja baa; nje gə ɗangə ɓa d-ula rɔ-je ndubu, ɗaa sisəy ngaa ꞌɗeje mba kunja kandə ko gə dəwje gə ɗangə ɓa d-o ko̰ ɗa kul-ɛ.

³⁹ Dəwje bula gə dɔ nangə gə Samari gə d-isi mə ɓebo gə nee le ꞌta kag-ɛ mba tar naji lə jene gə pa na: N-ɔr gəl kula ɗa-mje tɔ̰y n-ar-m.

⁴⁰ Be ɓa lo gə dəwje gə dɔ nangə gə Samari ꞌɗe rɔ Jeju gə ꞌdəji-e mba kar-ɛ isi gə je. Ɗaa n-ɗa gə je ndɔ joo.

⁴¹ Ɗaa dəwje bula ya̰ ꞌta kagə Kirisi mba tar pa lə-a.

⁴² Ɗaa ꞌpa d-ar jene le na: Mba tar lə-i gə ꞌpa ɓa sijee j-a ta ne kag-ɛ ang baa. Sijee ja j-o tar lə-a gə mbi-si ɗaa j-a gərə to gə n-to njekaji dəwje to gə tɔgərɔ ja.

Jeju aji ngon lə njekun dɔ njeɗɔje lə mbay

⁴³ Ɗa ndɔ joo go-e gə ɗaa, Jeju ɔdə lo-e gə əng təl aw dɔ nangə gə Galile gə gugu.

⁴⁴ Jeju gə rɔ-ɛ pa tar naji na: Pajambərə lə Luba le d-ila kuji dɔ-ɛ gə mə ɓe kuj-e gə ang.

⁴⁵ Ngaa, lo gə n-ce dɔ nangə gə Galile ɗaa, dəwje gə kəne d-uwa-a mba gə maj-ɛ mba d-o neje tɔ̰y gə n-ɗa mə ɓebo gə Jerujalɛm dɔ ndɔ ɗa nay gə. Mba ꞌjejee kara d-aw Jerujalɛm lo ɗa nay gə tɔ.

⁴⁶ Jeju təl aw ɓebo gə Kana dɔ nangə gə Galile lo gə n-ɗa man n-ar təl kodo kəne le. Dəw kara mə ɓe gə Kapɛrənom, to Njekun dɔ njeɗɔje lə mbay, ɗaa rɔ ngon-e gə jingaw to-e.

⁴⁷ Logə n-o tar-ɛ to gə Jeju ḭ Jude ɗe dɔ nangə gə Galile ɗaa, n-ɗe n-inga-a n-ɗa ndoo rɔ-ɛ gə mba kar-ɛ aw sə-a naa gə aw aji ngon-e gə to ta yo gə.

⁴⁸ Jeju pa ar-ɛ na: To gə ɓo oje netɔjije, gə neje dang-dang gə kəm dəw o ndɔ kara ang nama a taje kagə kara be ang ja saar.

⁴⁹ Ngon njekula lə mbay pa ar-ɛ na: Mbayɓe aw gə ngɔdə ɓa na ngon-m a kuy.

⁵⁰ Jeju pa ar-ɛ na: Ɔdə aw lo lə-i, ngon-i isi kəm baa. Jingaw le ta kagə tar gə Jeju pa ar-ɛ ɗaa ɔdə un ɗəw lə-a.

⁵¹ Logə n-ɔdə n-aw dɔ-ɛ gə kəy ɗaa, ngan lokisije lə-a ꞌcila kəm-e ꞌpa d-ar-ɛ na: Ngon-i le aji ɗɔdə.

⁵² N-dəji-je na kar gə ban ɓa n-aji ne wa? Ɗaa d-ila-a kəne na: Tagəne gə kar gə ila mbɔr-ɛ ɓa rɔ-ɛ gə nunga kadə-kadə le təl kul lom.

⁵³ Bɔ ngon je le gərə to gə kar-ɛ gə kən le ja ɓa Jeju pa ne ar-ɛ na: Ngon-i aji ɗɔdə, ɗaa n-ta kagə, ꞌne gə nje gə mə kəy gə lə-a ja tɔ̰y.

⁵⁴ Ye gə nee ɓa to gə netɔji gə njekum gə joo gə Jeju ɗa to gə ɗangə lo gə n-ḭ dɔ nangə gə Jude n-təl n-aw dɔ nangə gə Galile gugu.