Jean 3 - Mbede Lə Luba Kone Gə Sigi

Jeju to̰ tam gə Nikodɛm

¹ Horo Parijiyɛ̰je gə le, mbay lə Jiibije kara ga̰ kəne əng, ri-a na Nikodɛm.

² ꞌNe nee le, n-aw cil gə n-aw n-inga Jeju n-pa n-ar-ɛ na: Njenetɔji, ja gərə to gə ꞌto njenetɔji gə ḭ rɔ Luba gə; mba netɔjije gə, ꞌI, ꞌɗa nee le, to gə ɓo Luba nay gə dəw ang nama nj-ɛ a kasə ɗa kara be ang tɔ.

³ Jeju ila-a kəne na: Tar gə tɔgərɔ ja, m-pa m-ar-i, to gə ɓo d-uji dəw to gə sigi ang nama a kasə ko ɓeko̰ lə Luba ang.

⁴ Nikodɛm pa na: Dəw ɓuga nam cibi ɓa d-a təl kuj-e to gə ban wa? Kar-ɛ n-təl n-andə mə ko̰-ɛje gə gugu ɓa mba kar ꞌtəl uji-e ɓi wa?

⁵ Jeju ila-a kəne na: Tar gə tɔgərɔ ja m-pa m-ar-i, to gə ɓo dəw gə d-uji-e gə man gə Njil ang nama a kasə kandə mə ɓeko̰ gə lə Luba ang.

⁶ Ne gə darɔ ɓa uji le to darɔ ja tɔ, ngaa ne gə Njil ɓa uji ɗaa to njil ja tɔ.

⁷ Əw rɔ-i kəji tar mba tar gə m-pa m-ar-i m-pa na: May kar d-uji-si to gə sigi ɓa.

⁸ Ləl ula gə lo gə m-e ja njigi, ar-i o kɔr-ɛ; ngaa ꞌgərə lo gə n-ḭ kəne ang nəm ꞌgərə lo gə n-aw gə kəne əng nəm tɔ. Dəw gə ɗa-ɗa ɓa Njil uji-e nama to to gə be ja tɔ.

⁹ Nikodɛm təl dəji Jeju na: Neje nee le a to to gə be na ban wa?

¹⁰ Jeju təl ila-a kəne na: ꞌI gə to njenetɔji gə boy mə ɓe gə Ijirayɛl le ja ꞌgərə ne gə nee ang wa?

¹¹ Tar gə tɔgərɔ, tɔgərɔ ja m-pa m-ar-i to gə, ne gə j-a gərə nəm, gə j-o gə kəm-si nəm ɓa ja pa tar naj-ɛ, ɗaa sisəy njigi-je tar naji lə-sijee ang.

¹² Neje gə nangə nee ɓi ɓa m-pa tar-ɛ m-ar-si ɗaa ꞌtaje kagə-m ang nee, ngaa to gə ɓo m-a pa tar neje gə dara m-ar-si le se a taje kagə-m ja wa?

¹³ Dəw kara be gə ḭ nangə nee aw dara o lo gə kəne le godo, ngaa Ngon lə dəw gə ḭ dara ɗe dɔ nangə gə nee le, ye ja gə kar-ɛ baa.

¹⁴ Ngaɓa, to gə Moyiji un ne li ɔs-ɛ dɔ kagə gə taar mə ndag lo gə le, to to gə be ja tɔ, may kar Ngon lə dəw kara d-ɔs-ɛ taar tɔ,

¹⁵ mba kar na-na ja ɓa ta kag-ɛ nama inga ne təbə gə gə ndɔ gə ndɔ.

¹⁶ Mba Luba njigi dəwje gə dɔ nangə gə nee ya̰ ɓa un ngon-e gə kara ɗəgədə ula-a mba kar dəw gə ɗa-ɗa ɓa ta kag-ɛ nama, a kuy ang magə, ngaa a kinga təbə gə gə ndɔ gə ndɔ.

¹⁷ Luba ula ngon-e dɔ nangə gə nee mba kar-ɛ ɗe gangə tar dɔ dəwje gə ang, ngaa n-ɗe mba kar d-inga kaji ɗəw gə lə-a.

¹⁸ Dəw gə ta kag-ɛ nama tar uwa dɔ-ɛ ang; ngaa dəw gə mbadə ta kag-ɛ nama tar uwa dɔ-ɛ nam, mba n-mbadə ta kagə gə ri Ngon kara lə Luba.

¹⁹ Oje gəl tar gə uwa dɔ-si le ɓa nee: Lokarə ɗe dɔ nangə ɗaa londul ɓa dəwje ꞌnjigi ya̰ d-unda lokarə, mba kula ɗa-je kṵra̰y.

²⁰ Dəw gə nje ɗa ne gə kṵra̰y le njigi lokarə ang gə kɔrɔ ngaɓa n-ɔsə lokarə ngərəng mba dəwje d-a ko neɗaje lə-a gə kṵra̰y le.

²¹ Ngaa dəw gə nje ɗa ne gə tɔgərɔ le nja dan lokarə gə, mba kila ne dɔ kula ɗ-ɛje gə ɗaga tɔji ne to gə ɗa kulaje lə-a gə go mə njigi lə Luba.

Tar lə Ja̰ Njeɗabatɛm

²² Go-e gə ɗaa Jeju aw gə ngan njenendoje lə-a dɔ nangə gə Jude; n-aw n-isi gə je kəne ngaɓa n-ɗa batɛm.

²³ Ja̰ kara aw ɗa dəwje batɛm ɓe gə Eno, mbɔr ɓe gə Salim, mba to lo gə man to kəne ya̰, ye ɓa dəwje d-aw kəne mba kar ꞌɗa-je batɛm.

²⁴ Mba dɔ ndɔ-ɛ gə əng le, d-uwa Ja̰ d-ila kəy kula gə ang baa ɓi.

²⁵ Be ɓa ngan njenendoje lə Ja̰ ꞌma̰y tar gə Jiibi kara be ɔji dɔ togo rɔ.

²⁶ ꞌƊe d-inga Ja̰ ɗaa ꞌpa d-ar-ɛ na: Njenetɔji, dəw gə ar sə-i tura man Jurədɛ̰ gə ngaɓa, ꞌI, ꞌpa tar naji lə-a le ja, ar aw ɗa batɛm ar dəwje tɔ̰y d-aw gə ɓe lə-a kən.

²⁷ Ja̰ təl ila-je kəne na: To gə ɓo dara ar dəw ne ang nama, nj-ɛ a kasə kinga ne kara be gə dɔ rɔ-ɛ baa ang.

²⁸ Tar gə m-pa na: ꞌMa le, m-to gə Kirisi ang baa, ngaa kula ɓa d-ula-m no-ɛ gə kede le ɗaa, sisəy ja kara, ꞌtoje gə njetar najije lə-m tɔ.

²⁹ Nje ta jene ja ɓa to gə ngab-ɛje ngaa njekura lə ngaw jeneje gə ar mbɔr-ɛ gə le, o tam lə jingaw gə nje jene le gə rɔləl; rɔləl gə nee, gə ꞌma m-isi dan-ɛ gə le, tɔl t-ɛ bɛm ngaa.

³⁰ May kar ꞌne n-ɓar mii gə kede ɗaa ꞌma m-ɗəm gə gugu.

³¹ Dəw gə ḭ dara le to dəw dɔ neje tɔ̰y; dəw gə ḭ dɔ nangə nee le, to dəw gə nangə nee, ɗaa neje gə dɔ nangə nee ja tɔ ɓa ye pa tar-ɛ tɔ. Ngaa dəw gə ḭ dara le, to dəw dɔ neje tɔ̰y,

³² ne gə n-o gə mbi-a gə kəm-e le ɓa n-pa tar naj-ɛ, ngaa dəwje ꞌta tar naji lə-a ang.

³³ Dəw gə njigi go tar naji gə lə-a le, pa ar-ɛ arə ngadə to gə Luba to tar gə tɔgərɔ ja,

³⁴ mba dəw gə Luba ula-a le, tar gə ta Luba gə ja ɓa ye pa, mba Luba ar Njil lal tura go-e.

³⁵ Luba gə Bɔ le njigi Ngon-e ya̰ ngaɓa ḭya̰ neje tɔ̰y mə ji-a gə.

³⁶ Dəw gə ta kagə Ngon nama inga təbə gə to gə ndɔ gə ndɔ; dəw gə ta kagə Ngon ang nama kinga təbə lə-a gə gə ndɔ gə ndɔ a godo, ngaa wungu lə Luba nay dɔ-ɛ gə.