Jean 21 - Mbede Lə Luba Kone Gə Sigi

Jeju ce dɔ ngan njenendoje gə lə-a bus

¹ Go-e gə ɗaa, Jeju tɔji rɔ-ɛ ta kəm ngan njenendoje gə lə-a ta babo gə Tiberiyadə gə to gə ɗangə ja cibi. Pa tɔji gə n-tɔji ne rɔ-ɛ le ɓa nee.

² Simo Piyɛr, Toma gə ɓar-ɛ Ndunga, Nataniyɛl ngon njeɓe gə Kana dɔ nangə gə Galile, nganje lə Jebede ngaɓa ngan njenendoje lə-a gə ɗangə joo ꞌga̰ naa gə kara baa tɔ.

³ Simo Piyɛr pa ar-je na: M-a kaw kɔsə man. ꞌPa d-ar-ɛ na: Sijee kara ja kaw sə-i tɔ. D-ɔdə d-aw d-al to; mə cil-e gə nee le d-uwa ne kara ang.

⁴ Gə ndɔɔ-sḭ ɗaa, Jeju ar dɔ kungu babo gə, ngaa ngan njenendoje lə-a ꞌgərə to gə to Jeju ang baa.

⁵ Jeju pa ar-je na: Ngan-m, nekusa lə-si ga̰ kəne əng wa? D-ila-a kəne na: Ə̰ə̰ə̰.

⁶ N-pa n-ar-je na: Ila-je bura lə-si gə kar to gə dɔ ji kɔl ɗaa a kuwa-je ne. Be ɓa d-ila bura le tɔ ɗaa d-uma pḭ gə mba ndɔr ce ne ɗaga mba kənjije bula kəne ya̰.

⁷ Be ɓa ngon njenendo gə Jeju njigi-e pa ar Piyɛr na: To gə Mbayɓe! Logə Simo Piyɛr tuga mbi-a o to gə to Mbayɓe ɗaa, n-tɔ kubu lə-a ɓər-e gə tub mba n-ar kud-e dum baa, ɗaa n-puda ji-a n-ur babo gə.

⁸ Ngan njenendoje gə kɛm ꞌɗe gə ngon to ꞌndɔr ne bura gə kənji ɗusu njḭ, mba d-ar ta kungu gə dəb baa, asə ne gə mɛdərɛ tɔl je əng be.

⁹ Logə d-uru nangə ɗaa, d-o pər gə ꞌɗa gə kulu lo-e gə əng, d-um kənji dɔ-ɛ gə, ngaɓa mbə tɔ.

¹⁰ Jeju pa ar-je na: ꞌƊeje gə kənji gə kɛm gə uwa-je ɓisine ɓi le.

¹¹ Simo Piyɛr al mə to gə ɗaa, ndɔr bura gə kənjije gə boy-boy ja tɔl gə dɔg gə mi gə gir-e gə munda kəne um nangə, ngaɓa kənjije gə kobəre ja kən ngaa bura cil ang magə.

¹² Jeju pa ar-je na: ꞌƊe usaje ne. Dəw kara be horo ngan njenendoje asə dəji-e tar na: ꞌTo gə na wa? Be ang ja saar. Mba ꞌgərə som to gə Mbayɓe.

¹³ Jeju ɗe un mbə, ɗaa ula ar-je, ngaɓa gə kənji nəm tɔ.

¹⁴ To gə njekum gə gɔl munda ngaa Jeju tɔji rɔ-ɛ gə ɗaga ta kəm ngan njenendoje gə lə-a, un kud-e lo gə n-ndol ne horo nje gə d-uy gə.

¹⁵ Lo gə d-usa ne ɗɔdə ɗaa, Jeju pa ar Simo Piyɛr na: Simo, ngon lə Ja̰, ꞌnjigi-m unda nje gə nee wa? N-pa n-ar-ɛ na: Oyo Mbayɓe! ꞌI le, ꞌgərə gə maj-ɛ to gə m-njigi-i! Jeju pa ar-ɛ na: Uul ngan badəmje lə-m.

¹⁶ N-pa n-ar-ɛ gə njekum gə gɔl joo na: Simo, ngon lə Ja̰, ꞌnjigi-m unda nje gə nee wa? N-pa n-ar-ɛ na: Oyo Mbayɓe! ꞌI le, ꞌgərə gə maj-ɛ to gə m-njigi-i! Jeju pa ar-ɛ na: May kar-i ꞌto gə njekuul badəmje lə-m.

¹⁷ N-pa n-ar-ɛ gə njekum gə gɔl munda na: Simo, ngon lə Ja̰, ꞌNjigi-m wa? Kəm Piyɛr ɗa ndoo mba pa gə Jeju pa ar-ɛ gə njekum gə gɔl munda na: ꞌNjigi-m wa? Ɗaa n-pa n-ar-ɛ na: Mbayɓe! ꞌI le, ꞌgərə ne tɔ̰y! ꞌI le, ꞌgərə som to gə, ꞌma le, m-njigi-i ja! Jeju pa ar-ɛ na: Uul badəmje lə-m.

¹⁸ Tar gə tɔgərɔ ja, m-pa m-ar-i, logə ꞌI ꞌnay basa̰ baa ɓi le ꞌI ja uwa ɓərə-i gə gagəra, ngaɓa lo gə mə-i njigi ja ɗaa aw kəne, ngaa logə a ɓuga ɗaa a kum ji-i yaw ɗaa dəw gə ɗangə ɓa a tɔ gagəra lə-i ɓərə-i gə mba kaw sə-i lo gə ꞌI a njigi ang baa.

¹⁹ N-pa to gə be mba kɔr ne gəl-e se yo gə ban Piyɛr a kuy mba kila ne riɓar dɔ Luba gə wa? Go tar gə n-pa to gə be ɗaa, n-pa n-ar-ɛ na: Uwa go-m.

²⁰ Piyɛr turu go-e ɗaa o ngon njenendo gə Jeju njigi-e ya̰, ꞌne gə n-isi ta ka nekusa gə ɓa nduna rɔ-ɛ boro kar Jeju ɓa n-pa n-ar-ɛ na: Mbayɓe, na ɓa a kun dɔ-i wa?

²¹ Logə Piyɛr o-e ɗaa, dəji Jeju na: Mbayɓe, ngaa ꞌne gə nee le, ɗi ɓa a ce dɔ-ɛ gə wa?

²² Jeju pa ar-ɛ na: To gə ɓo m-njigi mba kar n-aw kəm baa saar kar-m m-təl m-ɗe ngaa se ɗi ɓa ɔs-i kəne wa? Uwa go-m,

²³ Lo-e gə nee ɗaa, tar ḭ bib oso horo ngan ko̰ naaje na ngon njenendo gə nee le a kuy ang. Bənəng ja kara, Jeju pa ar-ɛ na n-a kuy ang ɓa m-pa bənəng ang baa; ngaa pa na: To gə ɓo m-njigi kar-ɛ n-aw kəm baa saar kar-m m-təl ɗe, ngaa se ɔs-i kəne na ɗi wa?

²⁴ Ngon njenendo gə nee le ja ɓa pa tar naji neje gə nee ngaɓa ɗa tar-ɛ mə mbede gə nee tɔ. Ɗaa ja gərə to gə tar naji lə-a le to tar gə tɔgərɔ.

²⁵ Jeju ɗa neje gə kɛm gə ɗangə bula ya̰ ja ɓi; to gə ɓo ꞌɗa kara kara tɔ̰y nama, m-əji to gə, dɔ nangə gə nee ja tɔ̰y kara, lo gə d-a kum mbedeje gə d-a ɗa le kəne a godo.