Jean 20 - Mbede Lə Luba Kone Gə Sigi

Jeju Kirisi ce buwa yo gə

¹ Dɔmasi ɗaa, Məri gə Magədala ce gə lo gə to pi-pi aw dɔbarə gə ɗaa, o to gə pil ər gə to ta dɔbarə gə le d-uwa d-ila mbɔr kara.

² N-a̰y n-aw n-inga Simo Piyɛr je gə ngon njenendo gə kara gə to gə Jeju njigi-e ɗaa n-pa n-ar-je na: D-ɔr Mbayɓe le mə buwa yo gə ɗaa, ja gərə lo gə d-ila-a kəne ang!

³ Be ɓa, Piyɛr je gə ngon njenendo gə kara ꞌce mba kaw dɔbarə gə.

⁴ Joo kɛm ja d-a̰y ngɔdə naa gə. Ngaa ngon njenendo gə kara a̰y ngɔdə ya̰ unda Piyɛr ɗaa ce dɔbarə gə kede.

⁵ N-ɗugu nangə n-o ta kubuje gə to nangə kəne; ngaa n-andə buwa gə ang.

⁶ Simo Piyɛr gə uwa go-e le, ɗe ɗaa andə buwa yo gə ɗaa o ta kubuje gə to nangə kəne,

⁷ ngaɓa gə kubu gə ꞌɓiri ne dɔ Jeju tɔ; ngaa kubu gə nee le ꞌkə ɓədə d-ila lo gə ɗangə gə, ɓo to naa gə gə ta kubuje le ang.

⁸ Be ɓa ngon njenendo gə kara gə ce ta buwa yo gə dɔngɔr le andə tɔ; n-o ɗaa n-ta kagə.

⁹ Mba tar lə Luba gə pa na, may kar n-ndol horo nje gə d-uy gə le, ꞌgərə unja-je ngadə ang ɓi.

¹⁰ Be ɓa, ngan njenendoje ꞌtəl d-aw ɓə lə-je.

Jeju ce dɔ Məri gə Magədala gə bus

¹¹ Ngaa Məri ar ɗaga mbɔr dɔbarə gə ɗaa no. Məri ɗugu nangə gə man no kəm-e gə mba ko ne mə buwa yo.

¹² Be ɓa n-o anjije joo d-ula kubu gə nda d-isi lo gə d-ila nin Jeju kəne, dəw gə kara gə əər dɔ gə, ngaɓa dəw gə kara əər gɔl gə tɔ.

¹³ ꞌJejee nee le ꞌpa d-ar Məri na: Jene, ꞌno mba ɗi wa? N-ila-je kəne na: D-ɔr Mbayɓe lə-m ɗaa, m-gərə lo gə d-ila-a kəne ang.

¹⁴ Go tarje gə n-pa nee ɗaa, n-turu go-e; ɗaa n-o Jeju ar lo-e gə əng, ngaa n-gərə to gə to Jeju ang baa.

¹⁵ Jeju dəji-e na: Jene, ꞌno mba ɗi wa? Na ɓa ꞌsang-ɛ wa? N-əji to gə njendɔ ɗaa, n-pa n-ar-ɛ na: Bɔy, to gə ɓo ꞌI ɓa un-e aw sə-a nama ꞌpa lo gə ila-a kəne ar-m, ɗaa ꞌma, m-a kaw kun-e

¹⁶ Jeju pa ar-ɛ na: Məri! ꞌNe n-kəl go-e ɗaa pa n-ar-ɛ gə tar ebərə na: Rabuni, kɔr gəl-e na: Njenetɔji!

¹⁷ Jeju pa ar-ɛ na: Ɔr rɔ-m ang, mba m-aw ɓə lə Bɔ dəwje ang baa ɓi. Ɗaa aw inga ngan ko̰-mje ꞌpa ar-je to gə m-aw gə rɔ Bɔy gə, gə Bɔ-sisəy-je gə ngaɓa Luba lə-m gə Luba lə-sisəy tɔ.

¹⁸ Məri gə Magədala ɗe pa ar ngan njenendoje na: M-o Mbayɓe ɗaa pa tarje gə nee ar-m.

Jeju ce dɔ ngan njenendoje gə

¹⁹ Kar kumatagə, dɔ ndɔ-ɛ gə nee gə to gə dɔngɔr ndɔ gə mə dɔmasi gə le ngan njenendoje ꞌɓəəl Jiibije ɗaa lo gə d-isi kəne le d-udu ta ɗəw dɔ-je gə badə ja ngaa Jeju ɗe ar dan-je gə dana, ɗaa pa ar-je na: Ɗɛgɛgɛ nay gə si!

²⁰ Logə n-pa to gə be n-ar-je ɗaa, n-tɔji-je ji-a gə mbo kar-ɛ. Be ɓa, ngan njenendoje ꞌɗa rɔləl mba ko gə d-o Mbayɓe.

²¹ Be ɓa, Jeju pa to ɗangə ar-je ja cibi na: Ɗɛgɛgɛ nay gə si! To gə Bɔ dəwje ula-m le, ꞌma kara m-ula-si tɔ.

²² Go tar gə n-pa to gə be ɗaa, n-to ləl dɔ-je gə pu ɗaa n-pa n-ar-je na: ꞌTaje Njil Njerɔsangə.

²³ To gə ɓo ɔrəje tar neɗa gə kṵra̰y dɔ dəwje gə nama, tar neɗaje gə kṵra̰y lə-je a kɔr dɔ-je gə; ngaɓa to gə ɓo ar-je tar neɗa gə kṵra̰y uwa dɔ-je nje gə kɛm nama tar-ɛ a kuwa dɔ-je ja tɔ.

²⁴ Logə Jeju ɗe le, Toma gə ꞌɓar-ɛ Ndunga, gə to kara lə nje gə dɔg gə gir-je gə joo le ga̰ gə je naa gə ang baa.

²⁵ Be ɓa ngan njenendoje gə kɛm ꞌpa d-ar-ɛ na: J-o Mbayɓe. Ngaa ꞌne pa ar-je na: To gə ɓo m-o toro pondeje gə mə ji-aje gə ang nəm, m-ila ngaw ji-m toro pondeje gə ang, ngaɓa m-ila ji-m mbo kar-ɛ gə ang magə nama, m-a ta kagə ang ja saar!

²⁶ Ndɔ ji nay joo go-e ɗaa, ngan njenendoje lə-a ꞌga̰ to gə ɗangə mə kəy gə ngaɓa Toma kara ga̰ gə je tɔ. Ta kəy udu badə ja ngaa Jeju ɗe ar dan-je gə dana ɗaa pa ar-je na: Ɗɛgɛgɛ nay gə si!

²⁷ Ngaɓa n-pa n-ar Toma na: Ula ngaw ji-i nee, ngaɓa o ji-mje, ula ji-i gə kede ɓo ila mbo kar-m gə! Ar mə-i kədərə ang ɓo ꞌta kagə!

²⁸ Toma ila kəne ɗaa pa ar-ɛ na: Mbayɓe lə-m, ngaɓa Luba lə-m!

²⁹ Jeju pa ar-ɛ na: Mba ko gə o-m nee ɓa ꞌta kagə wa? Nje gə ꞌta kagə lal ko ne gə kəm-je le, ꞌto gə njenokarəje!

³⁰ Be ɓa, Jeju ɗa netɔjije gə ɗangə bula no ngan njenendoje gə lə-a, gə ꞌɗa mə mbede gə nee ang!

³¹ Ɗaa, neje gə nee le, ꞌɗa mba kar-si ꞌtaje ne kagə to gə Jeju to Kirisi, Ngon lə Luba, ngaɓa gə ɗəw takagə gə nee tɔ ɗaa ingaje ne təbə gə ri-a tɔ.