Jean 19 - Mbede Lə Luba Kone Gə Sigi

¹ Be ɓa Pilad uwa Jeju ar-je ꞌlab-ɛ gə nday tarara-tarara.

² Njeɗɔje d-uji jɔgə kun d-ula dɔ-ɛ gə ngaɓa d-ula-a kubu gə kasə rog-rog;

³ ꞌɗəm gə mbɔr-ɛ gə ɗaa ꞌpa na: J-o si ɓa ɓo mbay lə Jiibije! Ngaɓa ꞌkunda-a kambɔr-ɛ bangang-bangang.

⁴ Pilad təl ce ɗaga to gə ɗangə cibi ɗaa pa na: M-ɗe sə-a m-ula-a ji-si gə ɗaga nee, mba kar-sisəy ꞌgərə-je to gə m-inga ne kara be rɔ-ɛ gə mba gangə ne tar dɔ-ɛ gə ang.

⁵ Be ɓa Jeju ce ɗaga gə jɔgə kun gə d-ula dɔ-ɛ gə le gə kubu gə kasə rɔg-rɔg rɔ-ɛ gə tɔ, ɗaa Pilad pa ar-je na: Dəw le ja kən!

⁶ Logə buba njekapoloje gə njengəm loje d-o-e ɗaa, ꞌpa tar gə ndu-je gə boy wəəl na: ꞌƁər-e kagə dəsə gə gə ɓərə ja! Pilad ila-je kəne na: Uwa-aje ɓo sisəy ja aw ꞌɓərə-je kagə dəsə gə mba m-o gəl ne kara be gə mba gangə ne tar dɔ-ɛ gə ang.

⁷ Jiibije d-ila-a kəne ne: Sijee le, torondu lə-si ga̰ kəne əng, ngaɓa gə go torondu nee le ɗaa, kuy ja baa n-a kuy, mba ꞌne ja gə dɔ-ɛ baa n-ɗa rɔ-ɛ gə ngon lə Luba.

⁸ Lo gə Pilad o tar gə nee le ɗaa, ɗəm ɓəəl gə kede-kede baa,

⁹ ɗaa, n-təl aw kəy mbay gə gugu ngaɓa n-dəji Jeju na: ꞌI le, ꞌto dəw gə ɗa wa? Ngaa Jeju ila-a kəne ang.

¹⁰ Be ɓa, Pilad dəji-e na: ꞌMa ja, m-dəji-i tar ɗaa ila-m kəne ang wa? M-asə mba kḭya̰-i kila-i taar, ngaɓa gə mba ɓərə-i kagə dəsə gə nəm le se, ꞌgərə ang baa wa?

¹¹ Jeju ila kəne na: To gə ɓo Luba iya̰ ɗəw ar-i ang nama, a kaw gə singamongə dɔ-m gə kara ang baa. Be ɓa, dəw gə uwa-m ila-m ji-i gə le, tar neɗa gə kṵra̰y gə to ɓəəl ya̰ a kuwa dɔ-ɛ kunda-i.

¹² Un kud-e kəne əng ɗaa, Pilad sangə ɗəw gə mba kḭya̰-a kila-a taar. Ngaa Jiibije ꞌpa tar gə ndu-je gə boy wəəl na: To gə ɓo ḭya̰-a ila-a tar nama ꞌto njekura lə Sejar ang. Dəw gə ɗa-ɗa gə ɗa rɔ-ɛ gə mbay nama to nje tɔsə ta Sejar.

¹³ Lo gə Pilad tuga mbi-a o tarje nee le ɗaa, ɔr Jeju ce sə-a ɗaga ngaɓa isi dɔ ngəndəng gangə tar gə, lo gə ꞌɓar-ɛ Pabe, gə tar ebərə ɗaa na Gabata.

¹⁴ To gə ndɔ Gɔl rɔ mba Pagə, kar ar lum dɔ gə. Ye əng ngaa n-pa n-ar Jiibije na: Mbay lə-si le ja nee!

¹⁵ Ngaa ꞌpa tar gə ndu-je gə boy wuu na: Kar ꞌtɔl-ɛ gə tɔl! Kar tɔl-ɛ gə tɔl! ꞌƁər-e kagə dəsə gə! Pilad pa ar-je na: Mbay lə-si le ɓa m-a tɔl-ɛ wa? Buba njekapoloje d-ila kəne na: Mbay lə-sijee gə ɗangə gə unda dɔ Sejar gə godo.

¹⁶ Be ɓa n-uwa n-ula-a mə ji-je gə mba kar ꞌɓər-e kagə dəsə gə. D-uwa Jeju ɗaa d-aw sə-a.

ꞌƁərə Jeju kagə dəsə gə

¹⁷ ꞌNe ja gə rɔ-ɛ n-odo kagə dəsə n-ce n-aw ne gə lo gə ꞌɓar-ɛ Ka dɔ, gə tar ebərə na Gɔləgota.

¹⁸ Lo-e gə nee le ɓa ꞌɓər-e kagə dəsə gə, gə nje gə ɗangə sə-a joo kəne, dəw gə kara əər ne ngaɓa dəw kara əər kən ɗaa d-ila Jeju dana.

¹⁹ Pilad ar ꞌɗa bəgərə d-unda taar kagə dəsə gə, d-unja ne kəne na: Jeju gə Najarɛd, mbay lə Jiibije.

²⁰ Jiibije bula ꞌtura mbede gə nee le mba lo gə ꞌɓərə Jeju kagə dəsə gə kəne le to mbɔr ɓebo baa; ꞌɗa mbede le gə tar ebərə gə tar latɛ̰ ngaɓa gə tar gərɛk tɔ.

²¹ Buba njekapoloje ꞌpa d-ar Pilad na: ꞌƊa na Mbay lə Jiibije ang, ngaa ꞌɗa na ꞌNe gə nee le n-pa na: M-to mbay lə Jiibije.

²² Pilad ila kəne na: Mbede gə m-ɗa le ɗaa, m-ɗa gə ɗa ja ngaa.

²³ Logə njeɗɔje ꞌɓərə Jeju kagə dəsə gə ɗɔdə ɗaa, d-odo kubu lə-a ꞌkay dana ɓe sɔɔ, d-ar na-na kara ta k-ɛ. Kubu lə-a gə boy yul gə to gə lo-e baa lal kuru, gə ḭ tar saar uru ngira gɔl-ɛ nangə nee le kara d-un tɔ.

²⁴ Ɗa ꞌpa tar horo-je gə na: Ja cirje kubu le ang, ngaa ja ɗaje ꞌya̰a̰ se na ɓa a to gə k-ɛ wa? To to gə be mba kar tar gə Mbede pa aw ne lo-e gə ja yɛrɛrɛ: Kay naa kubu lə-m Ngaɓa kubu lə-m gə boy yul kara ꞌɗa ꞌya̰a̰ d-ɔji ne dɔ-ɛ tɔ. Ne gə njeɗɔje ꞌɗa le ɓa kən.

²⁵ Ko̰ Jeju-je je gə ngon ko̰-e Məri gə to jene lə Kelopas ngaɓa Məri gə Magədala d-ar mbɔr kagə dəsə gə lə Jeju.

²⁶ Logə Jeju o ko̰-ɛje gə ngon njenendo gə n-njig-e ya̰ gə ar mbɔr-ɛ gə ɗaa pa ar ko̰-ɛje na: Jene, ngon-i ɓa ar nee.

²⁷ Cibi n-pa n-ar ngon njenendo le na: Ko̰-ije le ja ar kən. Un kud-e dɔ kar-ɛ gə əng ja ɗaa, ngon njenendo le uwa-a aw sə-a ɓə lə-a ye.

²⁸ Go-e gə gugu, mba kar tar lə Luba aw ne lo-e gə yɛrɛrɛ le ɗaa, logə Jeju o to gə neje uwa ta naa bɛm ɗaa, pa na: Kunda ɔr-m.

²⁹ Lo-e gə nee le, jo gə man bḭyə̰ gə masə ɗusu tubu to kəne. D-ɔsə nekibi man ta ngəw kagə gə gə ꞌɓar-ɛ na hijɔpə, gə man bḭyə̰ gə masə yo̰m kəne, ɗaa d-ula t-ɛ gə.

³⁰ Lo gə Jeju ibi man bḭyə̰ nee le ɗaa pa na: Ne tɔ̰y aw lo-e gə ngaa. Ngaɓa n-ula dɔ-ɛ nangə ɗaa, kəm lə-a ce.

³¹ Ndɔ-ɛ nee le to gə ndɔ kuwa dɔ gɔl rɔ, ngaɓa gə mba kar nin to kagə dəsə gə saar ce dɔ ndɔ kuwa kɔr gə ang – mba ndɔ kuwa kɔr gə nee le to gə ndɔ gə bo ya̰ le ɗaa – Jiibije ꞌdəji Pilad kar ꞌguru kasə gɔl-je ɗaa ꞌɗisije kagə dəsə gə d-umje nangə.

³² Be ɓa njeɗɔje ꞌɗe ɗaa, ꞌguru kasə gɔl dəw gə dɔngɔr ngaɓa kar ye gə kara gə ɗangə gə ꞌɓər-e sə-a kagə dəsə gə tɔ.

³³ Logə ꞌce dɔ Jeju gə ɗaa, d-o to gə n-uy ɗɔdə ngaa ɗaa ꞌguru kasə gɔl-ɛ ꞌne ang ngaa;

³⁴ ngaa njeɗɔ kara ɔsə mbo kar-ɛ gə ninga ꞌmbudu ɗaa gə ngɔdə baa məsə gə man ce kəne.

³⁵ Ye gə o-e le to gə nje pa tar naji ɗaa, tar naji lə-a le to tar gə tɔgərɔ; ꞌne le, n-gərə to gə n-pa tar gə tɔgərɔ, mba kar-sisəy kara ꞌtaje ne kagə tɔ.

³⁶ Ne gə nee le ɗe to to gə be mba kar Tar lə Luba le aw ne lo-e gə yɛrɛrɛ: Singa rɔ-ɛ kara be kara a guru ang.

³⁷ Tar lə Luba gə ɗangə pa ja cibi na: ꞌJejee d-a ka lo gə ɓə lə dəw gə d-ɔsə mbo kar-ɛ gə ninga ꞌmbudu.

ꞌDubu Jeju

³⁸ Go-e gugu ɗaa, Jəjəb gə Arimate gə to ngon njenendo lə Jeju, ɓəəl Jiibije ɗaa, ɗe gə go ngə̰y ɓa inga Pilad dəji-e kar iya̰ ɗəw ar-ɛ un nin Jeju. Ɗaa Pilad iya̰ ɗəw ar-ɛ tɔ. Be ɓa Jəjəb ɗe un nin le.

³⁹ Nikodɛm gə kede ɗe inga Jeju lo ndul gə le, ye kara ɗe gə ba̰y kəndə mambo̰ gə ɓar-ɛ na mir gə alowɛs gə ꞌkal bodo, gə gad-ɛ to ɓəəl ya̰ tɔ.

⁴⁰ Be ɓa, d-un nin Jeju ꞌɓiri gə ta kubuje, gə ba̰yi kəndə mambo̰je, gə go pa dubu dəwje lə Jiibije.

⁴¹ Logə ꞌɓər-e kagə dəsə gə kəne le ndɔɔ kara to kəne əng, ɗaa mə ndɔɔ gə nee le buwa gə ꞌsɔɔ mə ər gə dəw kara kara d-ila kəne kede ang ɓi ga̰ kəne.

⁴² Lo-e gə əng le ɓa d-ila Jeju kəne, mba to gə ndɔ kuwa dɔ gɔl rɔ lə Jiibije, ngaɓa mba buwa yo le to dəb baa tɔ.