Jean 16 - Mbede Lə Luba Kone Gə Sigi

¹ M-pa tar nee to gə be m-ar-si mba kar ne kara kara təl to jigi tuga lə-si gə ang tɔ.

² D-a tɔbə-si kəy nendoje gə lə-je. Cibi ngaɓa dɔ kar asə ɗaa na-na gə a tɔ-si le a kəji pa na nepolo gə may ja n-un n-ar Luba a kən.

³ D-a ɗa ne nee le to gə be mba ꞌgərə Bɔ dəwje ang nəm ꞌgərə-m ꞌma ang nəm tɔ.

⁴ M-pa tar nee to gə be m-ar-si mba kar to gə ɓo ndɔ-ɛ asə nama mə-si ole ne dɔ tar gə m-pa m-ar-si. M-pa tar nee le m-ar-si lo kuma kud-e gə ang mba m-ga̰ gə si ɓi.

Kula lə Njil Njerɔsangə

⁵ Nga ɓisine ɗaa m-aw gə ɓə lə ye gə njekula-m le, ɗaa dəw kara kara horo-si gə dəji-m na m-aw gə ɗa wa kara be ang nəm.

⁶ Ngaa mba m-pa tar nee le be m-ar-si ɗaa kəm-si ɗa ndoo ya̰.

⁷ Ngaa ꞌma le, m-pa tar gə tɔgərɔ ja m-ar-si: To may lə-si mba kar ꞌma m-ɔdə m-aw; mba to gə ɓo m-ɔdə m-aw ang nama Njekuul mə-si a ɗe kinga-si ang; ngaa to gə ɓo m-ɔdə m-aw nama, m-a kula-a kar n-ɗe n-inga-si.

⁸ Logə n-ɗe nama, n-a cɛdə gɛ̰ngərɛ̰ dəwje dɔ nangə nee ɔji dɔ neɗa gə kṵra̰y, neɗa gə gadə-gadə ngaɓa ɔji dɔ gangə tar tɔ.

⁹ Ɔji dɔ neɗa gə kṵra̰y le, ꞌta kagə-m ang;

¹⁰ ɔji dɔ neɗa gə dana gadə-gadə ɗaa m-aw gə rɔ Bɔy gə ɗaa a ko-mje ang saar;

¹¹ ɔji dɔ gangə tar ɗaa ngon mbay gə dɔ nangə gə nee le, ꞌgangə tar dɔ-ɛ gə ngaa.

¹² Neje gə kɛm ga̰ kəne əng mba kar-m m-pa tar-ɛ m-ar-si ɓi, ngaa ɓisine ɗaa a kasəje mba kuwa məndəər kəne ang ang.

¹³ Logə Njil gə njetar gə tɔgərɔ a ɗe ɗaa, a kɔr no-si ɗəw tar gə tɔgərɔ gə ja tɔ̰y. Mba n-a pa tar gə dɔ rɔ-ɛ baa ang, nga tarje tɔ̰y gə n-a ko le ja ɓa n-a pa ɓi, ngaɓa neje tɔ̰y gə a ɗe le, n-a pa tar-ɛ kar-sisəy tɔ.

¹⁴ ꞌNe n-a kila riɓar dɔ-m gə, mba n-a kinga ne gə ḭ rɔ-m ꞌma gə ngaɓa n-a kula-si tar-ɛ ɓi.

¹⁵ Neje lə Bɔ dəwje tɔ̰y to kar-m ꞌma; Gəl-e gə nee ɓa m-pa ne to gə tar gə n-a ko ta-m ꞌma gə ja ɓa n-a pa kar-si ɓi.

Ngangə no təl ngangə kogo

¹⁶ Ɓəəl be cibi ɗaa a ko-mje ang magə; cibi ngaɓa ɓəəl be ɗaa a ko-mje.

¹⁷ Be ɓa ngan njenendoje gə kɛm ꞌpa tar gə naa horo-je gə na: Tar gə n-pa na: Ɓəəl cibi ɗaa a ko-mje ang magə; cibi ngaɓa ɓəəl ɗaa a ko-mje ngaɓa na: M-aw gə ɓə lə Bɔy. Tar gə nee le se, n-njigi pa na ɗi ngaa kən wa?

¹⁸ Ɓəəl be gə əng le, m-e na ɗi ngaa kən wa? Ja gərə tar gə n-njigi pa le ang baa.

¹⁹ Jeju gərə to gə ꞌnjigi mba dəji-e tar ɗaa, ye pa ar-je na: ꞌDəjije naa tar horo-si gə ɔji dɔ tar gə m-pa na: Ɓəl be ɗaa a ko-mje ta kəm-si gə ang magə, cibi ngaɓa ɓəəl be ɗaa a ko-mje.

²⁰ Tar gə tɔgərɔ ja m-pa m-ar-si, a suumje ngaɓa a noje rɔ-si, ngaa dɔ nangə ɗaa a ɗa rɔləl; kəm-si a ɗa ndoo, ngaa kəm ndoo lə-si a təl to gə rɔləl.

²¹ Logə jene niir ndo ɗaa kəm-e to ndoo mba kar lə-a asə; ngaa logə n-uji ngon ɗɔdə ɗaa, m-e uy dɔ ndo gə to-e le sɛl, ɗaa rɔləl lə-a ngaɓa al dɔ lo mba dəw gə n-uji-e n-ila-a nangə.

²² Sisəy kara, ɓisine ɗaa kəm-si ɗa ndoo; ngaa m-a təl ko-si to gə ɗangə ɓi ɗaa rɔləl a ɗusu mə-si njḭ-njḭ ngaɓa rɔləl lə-si le dəw kara gə a nar gə si ta godo.

²³ Be ɓa, dɔ ndɔ-ɛ gə əng le a dəji-mje tar ɔji dɔ ne kara ang ngaa. Tar gə tɔgərɔ ja, m-pa m-ar-si, ne gə ꞌdəjije Bɔy gə ri-m nama, n-a kar-si ne le ja.

²⁴ Saar ɓisine kara ꞌdəjije ne kara gə ri-m ang ja dɔrɔ ɓi; ꞌdəjije nama a kinga-je mba kar rɔləl lə-si gola ta mar-ɛ yal-yal.

²⁵ M-pa tar nee tɔ̰y gə gusutar ɓa m-ar-si, ngaa ndɔ ga̰ kəne əng gə m-a pa tar gə gusutar ang ja saar, ngaa m-a pa tar gə ɔji dɔ Bɔ dəwje təsərə ja m-ar-si.

²⁶ Ndɔ-ɛ gə əng le a dəjije Bɔ dəwje gə ri-m ngaa, ɗaa m-pa m-ar-si to gə ꞌma ɓa m-a dəji Bɔ dəwje mba tar lə-si ang,

²⁷ mba Bɔ dəwje gə darɔ-ɛ ja njigi-si mba ꞌnjigi-mje ɗaa ꞌtaje kagə-m to gə m-ḭ rɔ Luba gə.

²⁸ M-ḭ ɓə lə Bɔ dəwje ɗaa m-ɗe dɔ nangə gə nee; nga ɓisine m-uba dɔ nangə m-ḭya̰ ɗaa m-aw gə ɓə lə Bɔ dəwje.

²⁹ Ngan njenendoje lə-a ꞌpa na: A o, ɓisine ɗaa ꞌpa tar təsərə ja ngaa ɓo gə gusutar ang ngaa nee;

³⁰ ɓisine ɗaa ja gərə to gə ꞌI le, ꞌgərə neje tɔ̰y ɗaa aw ndoo mba kar dəw kara dəji tar ang. Be ɓa, ja ta kag-i to gə ḭ rɔ Luba gə.

³¹ Jeju ila-je kəne na: ꞌTaje kagə-m ɓisine ngaa wa?

³² Aje oje, kar ɗe, ɗaa kar le asə ngaa, kar-ɛ gə nee le d-a sɛ̰rɛ̰-si pə-pə, na-na kara a kun ɗəw lə-a ɗəw lə-a, ɗaa a kḭya̰-mje gə kar-m baa. Ngaa m-ga̰ gə kar-m ang, Bɔ dəwje ga̰ sə-m naa gə.

³³ M-pa tarje gə nee m-ar-si mba kar inga-je ɗɛgɛgɛ ɗəw gə lə-m. Dɔ nangə gə nee le, isije dan nekəmandoo gə ja, ngaa undaje singa-si dɔ mar-ɛ gə, m-cɛdə ɗɔ dɔ nangə ngaa.