Jean 14 - Mbede Lə Luba Kone Gə Sigi

Ɗəw gə aw gə rɔ Bɔ dəwje gə

¹ Ar-je mə-si ila kasə dɛləm ang. ꞌTaje kagə Luba ngaɓa ꞌtaje kagə-m ꞌma nəm tɔ.

² Lo kisi to ya̰ mə kəy lə Bɔy. To gə be ang nama m-a pa kar-si to gə m-a kaw ɗa lo ngəbə gə si wa?

³ Logə m-a kaw, ngaɓa m-a gɔl lo lə-si tɔ̰y nam ɗaa, m-a təl ɗe kodo-si dɔ-m gə, mba kar lo gə ꞌma m-a kisi kəne nama sisəy kara a kisije kəne tɔ.

⁴ Ngaɓa, lo gə ꞌma, m-aw gə kəne le, sisəy ꞌgərəje ɗəb-e ɗɔdə.

⁵ Toma pa ar-ɛ na: Mbayɓe, lo gə aw gə kəne le sijee j-a gərə kara be ang, ngaa j-a ɗa na ban ɓa j-a gərə ɗəb-e le wa?

⁶ Jeju pa ar-ɛ na: ꞌMa ja m-to gə ɗəw, gə Tar gə tɔgərɔ gə təbə. Dəw kara kara a kasə kaw rɔ Bɔy gə lal ce gə ɗəw gə ɓe lə-m ꞌma ang.

⁷ To gə ɓo ꞌgərə-mje nama a gərəje Bɔy tɔ. Un kud-e ɓisine ɗaa ꞌgər-eje ngaɓa o-eje nəm tɔ.

⁸ Pilibi pa ar-ɛ na: Mbayɓe, ꞌtɔji-si rɔ Bɔ dəwje ɗaa ye ja asə-si mbagə.

⁹ Jeju pa ar-ɛ na: Ga̰ gə m-ga̰ gə si ləw baa kuru lo əw nee ja, kar be kara ꞌgərə-m ang ja ɓi wa, Pilibi! Dəw gə o-m ꞌma nama o Bɔy ja tɔ. Ɗa ban ɓa ꞌI cibi ꞌpa na: ꞌTɔji-si rɔ Bɔ dəwje wa?

¹⁰ ꞌTa kagə to gə ꞌma m-to mə Bɔy gə ngaɓa Bɔy kara to mə-m ꞌma gə ang wa? Tarje gə ꞌma m-pa m-ar-si le, m-pa gə dɔ-m baa ang; Ngaa, to gə Bɔy gə nje kisi mə-m gə le ja ɓa ɗa kulaje lə-a gə ɔji dɔ-ɛ ye ja.

¹¹ ꞌTaje kagə-m, m-to mə Bɔ dəwje ngaɓa Bɔ dəwje kara to mə-m ꞌma gə tɔ; be ang kara ꞌtaje kagə mba kulaje nee le.

¹² Tar gə tɔgərɔ ja, m-pa m-ar-si, dəw gə ta kagə-m nama ye kara a ɗa kulaje gə ꞌma m-ɗa nee le tɔ; n-a ɗa yeje gə bo ya̰ unda mar-ɛje ja cibi, mba m-aw gə rɔ Bɔy gə.

¹³ Ne tɔ̰y gə a dəjije gə ri-m le, m-a ɗa mba kar Bɔ dəwje inga rɔnduba ɗəw gə lə Ngon.

¹⁴ To gə ɓo ꞌdəji-mje ne gə ri-m nama m-a ɗa ne ja.

Njetadɔ dəwje

¹⁵ To gə ɓo ꞌnjigi-mje nama a ngomje ndu-mje.

¹⁶ ꞌMa, m-a dəji Bɔ dəwje kar-ɛ ar-si njekuul mə-si gə ɗangə kara, mba kar-ɛ isi gə si gə no.

¹⁷ Njil tar gə tɔgərɔ gə dəwje gə dɔ nangə gə nee d-a kasə kinga ang, mba d-o-e ang ngaɓa ꞌgər-e ang nəm tɔ. Sisəy ꞌgər-eje mba n-isi gə si gə naa gə, ngaɓa n-a kisi mə-si gə tɔ.

¹⁸ M-a kḭya̰-si gə ngan alje ang, m-a ɗe kinga-si ɓi.

¹⁹ Waga ɓəəl ɓi ɗaa, dəwje gə dɔ nangə gə nee d-a ko-m ang gə dɔbo̰; ngaa sisəy ɗaa, a ko-mje, ꞌma le, m-isi kəm baa, ngaɓa sisəy kara a kisije kəm baa tɔ.

²⁰ Dɔ ndɔ-ɛ gə əng le, a gərəje to gə m-ga̰ mə Bɔy gə, ngaɓa sisəy ꞌtoje mə-m ꞌma ngaɓa ꞌma m-to mə-sisəy gə tɔ.

²¹ Dəw gə njigi-m nama, nj-ɛ nee le uwa torondu-m kɛgə um m-e dɔ-ɛ gə jəb-jəb. Be ɓa dəw gə njigi-m nama Bɔy kara a njigi-e tɔ. Ɗaa ꞌma kara ꞌma njigi-e ngaɓa m-a tɔji rɔ-m kar-ɛ gərə-m tɔ.

²² Judas, ye gə to gə Isikariyɔdə le ang baa, dəji-e na: Mbayɓe, ɗa na ban cibi ɓa, may kar-i ꞌtɔji rɔ-i ta kəm sijee gə baa ɓo ta kəm dəwje gə dɔ nangə gə nee ang wa?

²³ Jeju ila-a kəne na: To gə ɓo dəw njigi-m nama a ngom tar lə-m ɗaa Bɔy a njigi-e. Ngaɓa j-a ɗe ɓə lə-a mba ɗa ɓe m-e gə mba kisi kəne.

²⁴ Dəw gə njigi-m ang nama ngom tarje lə-m ang tɔ, be ɓa, tar gə sisəy oje nee le to gə tar lə-m ꞌma ang ngaa to gə tar lə Bɔy gə ula-m.

²⁵ M-pa tarje nee to gə be m-ar-si mba m-isi gə si naa gə ɓi.

²⁶ Ngaa njekuul mə, gə to Njil Njerɔsangə gə Bɔy a kula-a gə ri-m a ndo-si neje tɔ̰y ngaɓa a kole mə-si dɔ neje tɔ̰y gə m-pa tar-ɛ m-ar-si tɔ.

²⁷ M-ḭya̰ ɗɛgɛgɛ m-ar-si, m-ar-si ɗɛgɛgɛ lə-m. ꞌMa m-ar-si to gə dəwje gə dɔ nangə gə nee d-ar-si ang. Ar-je mə-si ila kasə dɛləm ang ngaɓa ꞌɓəəl-je ang tɔ.

²⁸ Tar gə m-pa gə oje gə mbi-si gə m-pa na: M-aw mba təl ɗe kinga-si ɓi. To gə ɓo ꞌnjigi-mje nama a ɗaje rɔləl mba kaw gə m-aw gə rɔ Bɔ dəwje gə nee, mba Bɔ dəwje to ɓəəl ya̰ unda-m ꞌma ja ɓi.

²⁹ Un kud-e ɓisine ɗaa m-pa tar nee kede nam m-ar-si ɓa mba kar neje gə a ɗe le, ɗe nama ꞌtaje ne kagə.

³⁰ M-a pa gə si tar gugu ɗangə ang ngaa, mba ngon mbay gə dɔ nangə gə nee le ɗe ngaa. ꞌMa le, n-asə ɗa sə-m ne kara ang,

³¹ ngaa, to to gə be mba kar dəwje d-a gərə ne to gə m-njigi Bɔ dəwje ngaɓa m-ɗa ne m-ila ne kɔji dɔ ne gə n-un ndu-e kəne n-ar-m. Ḭje taar! Ar-je j-ɔdə lo gə nee gə gə ɗangə.