Jean 13 - Mbede Lə Luba Kone Gə Sigi

DƆBO̰ TAR GƏ JEJU PA GƏ NGAN NJENENDOJE LƏ-A Jeju togo gɔl ngan njenendoje lə-a

¹ Kede no ndɔ ɗa nay pagə gə le, logə Jeju gərə to gə dɔ kar lə-a asə ɗɔdə ɗaa, dɔ kar gə kar n-ḭya̰ ne dɔ nangə nee n-aw ne gə rɔ Bɔ dəwje gə le ɗaa, ꞌne gə n-njigi njeka-ɛje gə d-isi dɔ nangə gə nee le, n-njigi-je n-ɔr sṵra̰ njal.

² Logə d-isi ta ka nekusa gə ɗaa, Judas Isikariyɔdə ngon lə Simo, gə a kun dɔ Jeju le, ꞌSɛ̰ngərɛ̰ ula kəji tar gə kṵra̰y m-e gə kede ɗɔdə ngaa.

³ Jeju gərə to gə Bɔ dəwje ḭya̰ neje tɔ̰y mə ji-a gə, ngaɓa n-ḭ rɔ Luba gə ɗaa n-aw gə rɔ Luba gə tɔ.

⁴ Jeju uba nangə ḭ ta ka nekusa gə, tɔr kubuje lə-a gə ula dɔ mar-ɛ gə ɗaa, un ta kubu tɔ ne ɓər-e.

⁵ Cibi, n-um man mə ka gə ɗaa n-un kudu togo gɔl ngan njenendoje lə-a, ngaɓa n-bɔr gə ta kubu gə n-tɔ ne ɓər-e le.

⁶ Be ɓa n-ce dɔ Simo Piyɛr gə ɗaa pa ar-ɛ na: ꞌI Mbayɓe ɓa kar-i ꞌtogo gɔl-m ꞌma wɔ̰y!

⁷ Jeju ila-a kəne na: Ne gə m-ɗa nee le, asə gərə ɓisine ang ɓi, ngaa go-e gə gugu ɓa a gərə ɓi.

⁸ Piyɛr pa ar-ɛ na: A togo gɔl-m ꞌma wɔ̰y! Ɓədə be ang! Jeju ila-a kəne na: To gə ɓo m-togo gɔl-i ang nama a kinga ne kara ji-m gə ang.

⁹ Simo Piyɛr pa ar-ɛ na: To gə be nama Mbayɓe, ꞌtogo gɔl-m baa ang, ngaa ji-m nəm ngaɓa dɔ-m nəm tɔ.

¹⁰ Jeju pa ar-ɛ na: Dəw gə ndogo man ɗɔdə le, aw ndoo gə mba kar ndog-e man ang ngaa ɗaa gɔl-ɛ baa ngaɓa kəm togo: rɔ-ɛ arə tɔ̰y nam; ngaa sisəy le, ar-je ngadə, ngaa sisəy tɔ̰y ang baa.

¹¹ Dəw gə a kun dɔ-ɛ le ɗaa ꞌne gər-e som; gəl-e gə nee ɓa n-pa nena: Ar-je ngadə tɔ̰y ang baa.

¹² Go gɔl-je gə n-togo ngaɓa n-təl n-odo kubuje lə-a ɗaa, n-təl n-isi nangə ta ka nekusa gə ngaɓa n-pa na: Ne gə m-ɗa gə si nee le ꞌgərəje gəl-e ja wa?

¹³ Sisəy ꞌɓar-mje Njenetɔji ngaɓa Mbayɓe le ꞌɓar-mje lo-e gə ja, mba to gə ꞌma le ja.

¹⁴ To gə ɓo ꞌma gə Njenetɔji gə Mbayɓe ɓa m-togo gɔl sisəy ɗaa, may kar-sisəy kara ꞌtogoje gɔl naa gə yo gə nee tɔ,

¹⁵ mba to gə nekɔji mar-ɛ ɓa m-ɗa m-ar-si, mba kar-sisəy kara ꞌɗaje to gə ꞌma m-ɗa m-ar-si be tɔ.

¹⁶ Tar gə tɔgərɔ ja m-pa m-ar-si to gə ngon njekula to ɓəəl unda ꞌɓəə-eje ang ngaɓa njeka̰ykula kara to ɓəəl unda nje kula-a ang tɔ.

¹⁷ To gə ɓo ꞌgərəje gəl ne gə kən le gə maj-ɛ ngaɓa ꞌɗaje ne kula nama a toje gə njenokarəje.

¹⁸ M-pa tar gə nee ɔji dɔ sisəy tɔ̰y ang baa; nje gə m-mbərə-je. Ngaa may kar Tar gə ꞌɗa mə mbede gə le aw ne lo-e gə: Dəw gə usa sə-m ne mə ka gə kara ja ɔr gɔl-ɛ tuga ne tamas-m.

¹⁹ M-pa kar be m-ar-si, kede nam ɓa kar ne gə nee a ɗa ne ɓi, mba kar-sisəy ꞌgərəje to gə ꞌMa m-ga̰.

²⁰ Tar gə tɔgərɔ ja, m-pa m-ar-si, dəw gə uwa njeka̰ykula lə-m gə rɔ-ɛ gə nama to gə ꞌma ja ɓa nj-ɛ uwa-m gə rɔ-ɛ gə kən, ngaɓa dəw gə uwa-m gə rɔ-ɛ gə nama to gə njekula-m ɓa nj-ɛ uwa-a gə rɔ-ɛ gə əng tɔ.

Jeju pa na Judas a kun dɔ ꞌne

²¹ Logə Jeju pa tar to gə be ɗaa, njil-e ce kərəng ɗaa pa na: Tar gə tɔgərɔ ja, m-pa m-ar-si, dəw kara horo-si gə nee a kun dɔ-m.

²² Ngan njenendoje d-a kəm naa gə yo gə nee, ɗaa ꞌdəji naa tar horo naa gə ɔji dɔ dəw gə n-pa tar lə-a.

²³ Kara lə ngan njenendoje, ye gə Jeju njigi-e le, nduna rɔ-ɛ kar Jeju gə ta ka nekusa gə.

²⁴ Simo Piyɛr tɔl kəm-e mbɛl ar-ɛ mba kar n-dəji Jeju n-o se to na ɓa n-pa tar lə-a wa?

²⁵ Ngon njenendo gə nee le nduna rɔ-ɛ kar Jeju ngaɓa dəji-e na: To gə na wa, Mbayɓe.

²⁶ Jeju ila-a kəne na: Dəw gə m-a cɛdə mbə kɔsə ne man nay kar-ɛ ɗaa to gə nj-ɛ ja kən. Ye əng ngaa Jeju cɛdə mbə ɔsə ne man nay ila ji Judas gə ngon lə Simo Isikariyɔdə.

²⁷ Be ɓa, go dɔ dum mbə gə nee ɗaa, ꞌSu andə m-e gə. Ɗaa Jeju pa ar-ɛ na: Ne gə ꞌnjigi ɗa le, ꞌɗa gə ngɔdə.

²⁸ Horo nje gə d-isi ta ka nekusa gə le dəw kara ja gərə se mba ɗi ɓa Jeju pa ne tar gə nee le ang.

²⁹ Mba Judas to njengom ɓɔl le ɗaa, nje gə naaje dəji to gə Jeju pa ar-ɛ mba kar n-ndogo ne gə d-aw ndo-e mba ɗa ne nay ose gə mba kar n-ar njendooje ne.

³⁰ Judas ta mbə le ɗaa, ɔsə lo gə ngɔdə ce ɗaga: Lo ndul ɗɔdə ngaa kən.

³¹ Logə Judas ɔsə lo ce ɗɔdə ɗaa, Jeju pa na: Ɓisine d-ula rɔnduba dɔ Ngon lə dəw gə, ngaɓa Luba kara inga rɔnduba ɗəw gə lə-a ꞌne tɔ.

³² To gə ɓo Luba inga riɓar ɗəw gə lə-a ꞌne nama, ꞌne kara n-a kinga riɓar ɗəw lə Luba tɔ, ngaɓa ɓisine baa ja Luba a kila riɓar dɔ-ɛ gə.

³³ Ngan-m gə gɔ-gɔ, m-isi gə si naa gə waga ɓəəl ɓi. Sisəy a sangə-mje to gə m-pa ne tar-ɛ m-ar Jiibije na: Lo gə ꞌma m-aw gə kəne le, sisəy a kasəje mba kawje kəne ang. Sisəy kara m-pa to gə be m-ar-si ɓisine tɔ.

³⁴ M-un ndu gə sigi m-ar-si: ꞌNjigije naa gə yo gə nee. Ɗəw kara baa to gə ꞌma m-njigi-si le, sisəy kara ꞌnjigije naa gə yo gə nee.

³⁵ To gə ɓo ꞌnjigije naa gə yo gə nee nama, dəwje tɔ̰y d-a gərə to gə ꞌtoje gə ngan njenendoje lə-m.

³⁶ Simo Piyɛr dəji-e na: Mbayɓe, aw gə ɗa wa? Jeju ila-a kəne na: Lo gə m-aw gə kəne le ꞌI a kasə ndole go-m kəne ɓisine ang baa. Ngaa kuru lo a kəw ya̰ ɓa a ndole go-m ɓi.

³⁷ Piyɛr təl dəji-e ɓi na: Mbayɓe, mba ɗi ɓa m-a kasə ndole go-i ɓisine ang wa? M-a kḭya̰ rɔ-m yag kar yo mba tar lə-i.

³⁸ Jeju ila-a kəne na: Kḭya̰ rɔ-i kar yo mba tar lə-m ꞌma! Tar gə tɔgərɔ ja, m-pa m-ar-i, a ma̰y tar gɔl munda na ꞌgərə-m ang ɗɔdə ɓa kura̰ a kila mbərə ɓi.