Jean 12 - Mbede Lə Luba Kone Gə Sigi

Məri um ba̰y kəndə mambo̰ gɔl Jeju gə

¹ Ndɔ misa̰ kede nam ɓa kar Pagə asə ɗaa, Jeju aw Ɓetani, ɓe kuji Lawjar gə uy ɓa n-ndol-e le.

² ꞌƊa nekusa mə ɓe gə nee le d-uwa-a ne mba; Madə ar-je nekusa ɗaa Lawjar kara ga̰ horo nje gə ꞌɓar-je lo nekusa gə le tɔ.

³ Be ɓa, Məri un ku ubu gə əndə mbo̰ gə ꞌɓar-ɛ na nar gə gə kəm-e ja, gə lar-ɛ ya̰ to kəne. N-um ubu gə əndə mbo̰ le gɔl Jeju n-ar ba̰y-ɛ ta lo kəy tɔlɛ-tɔlɛ; ngaɓa n-bɔr gɔl Jeju gə bḭ dɔ-ɛ tɔ.

⁴ Judas Isikariyɔdə gə to gə kara lə ngan njenendoje, gə ye ɓa a kun dɔ Jeju le, pa na:

⁵ Mba ɗi ɓa ba̰y kəndə mambo̰ gə nee le ꞌɗaɓə ꞌndogo ꞌta ne mbɛl ka tɔl munda ꞌla ne gə njendooje ang wa?

⁶ N-pa bənəng mba kəji gə n-əji dɔ njendooje gə to gə tɔgərɔ ang, ngaa mba n-to nje ɓogo, ngaɓa ɓɔl lar gə to ji-a gə le, n-ula ji-a n-un ne gə d-um kəne taar-taar tɔ.

⁷ Ngaa Jeju pa na: Ḭya̰-a ɗɛgɛgɛ, n-ɗa ne gə nee le ngina ne dɔ ndɔ gə d-a dubu-m ne.

⁸ Njendooje le ɗaa, ꞌga̰ gə si gə ndɔje tɔ̰y, ngaa ꞌma le, m-a ga̰ gə si gə ndɔje tɔ̰y ang baa.

⁹ Bula bo Jiibije d-o tar-ɛ to gə Jeju ga̰ Ɓetani ɗaa ꞌɗe; ꞌɗe mb-ɛ ꞌne ja gə kar-ɛ baa ang, ngaa gə mba ko Lawjar gə n-ndol-e le tɔ.

¹⁰ Be ɓa, buba njekapoloje d-un ndu-je gə mba tɔl Lawjar le,

¹¹ mb-ɛ ꞌne le ɓa Jiibije bula ya̰ d-ḭya̰ ne go sijee ꞌta ne kagə Jeju.

Jeju andə mə ɓe gə Jerujalɛm

¹² Lo kar-ɛ ɗaa, bula bo dəwje gə ꞌɗe mba ɗa nay le, d-o tar-ɛ to gə Jeju ɗe Jerujalɛm.

¹³ Be ɓa dəwje ꞌcɛdə bar kəm kagəje ꞌcila ne kəm Jeju gə ꞌnjil ta-je gə, ꞌta ji naa gə miya̰ pa̰y-pa̰y na: Ojana! Ndu tɔr to dɔ dəw gə ɗe gə ri Mbayɓe, Mbay gə Ijirayɛl.

¹⁴ Jeju inga ngon kororo ɗaa isi dɔ-ɛ gə, to gə ꞌɗa ne mə mbede gə na:

¹⁵ ꞌƁəəl ang, ngon mandə gə Siyo̰; A o, mbay lə-i ɗe, ko̰ kororo ɓa n-isi dɔ ngon-e gə.

¹⁶ Dɔngɔr-ɛ le, ngan njenendoje lə-a ꞌgərə ne gə nee le ang baa, ngaa logə Jeju inga riɓar ɗɔdə ɗaa, mə-je ole to gə ne gə nee le ꞌɗa tar-ɛ mə mbede ɔji dɔ-ɛ, ɗaa ꞌɗa neje nee mb-ɛ ꞌne.

¹⁷ Bula dəwje gə ꞌga̰ sə-a, logə n-ɓar Lawjar n-ar-ɛ ɔsə lo ce buwa yo gə, ngaɓa ndol-e horo nje gə d-uy gə le, ꞌpa tar naji lə-a.

¹⁸ Gəl-e gə nee ɓa bula dəwje ꞌɗe ne rɔ-ɛ gə, mba d-o tar netɔji gə nee gə n-ɗa le.

¹⁹ Be ɓa Parijiyɛ̰je ꞌpa d-ar naa gə yo gə nee na: Oje to gə ne kara gə a kasə ɗaje kəne godo baa: oje, dəwje tɔ̰y ꞌndole go-e.

Gərɛgəje ꞌdəji mba ko Jeju

²⁰ Gərɛgəje gə kɛm ꞌga̰ horo dəwje gə d-aw mba polo ne ndɔ ɗa nay gə.

²¹ D-inga Pilibi ngon njeɓe gə Bɛdəsayida dɔ nangə gə Galile gə ɗaa, ꞌdəji-e na: Bɔy, j-a njigi mba ko Jeju.

²² Pilibi aw pa ar Andəre ɗaa, Pilibi je gə Andəre d-aw ꞌpa d-ar Jeju.

²³ Jeju ila-je kəne na: Dɔ kar asə mba kar d-ila riɓar dɔ Ngon lə dəw gə.

²⁴ Tar gə tɔgərɔ ja, m-pa m-ar-si, to gə ɓo kandə ko gə ri-a na bəle, gə oso nangə le uy ang nama, to gə kar-ɛ baa, ngaa to gə ɓo uy nama unda mbənji-mbənji.

²⁵ Dəw gə tɔsə kəm-e dɔ təbə gə lə-a nama a kila-a kɔrɔ, ngaɓa dəw gə mbadə təbə lə-a gə dɔ nangə gə nee gə dɔbo̰ nama a ngom-e mba kisi ne kəm baa gə ndɔ gə ndɔ.

²⁶ To gə ɓo dəw njigi mba to ngon njekula lə-m nama, may kar-ɛ ndole go-m; ngaɓa lo gə ꞌma, m-ga̰ kəne le, lo-e gə nee ja tɔ njekula lə-m a ga̰ kəne tɔ. To gə ɓo dəw njigi ɗa kula kar-m nama, Bɔ dəwje ɓa a ɗɔy-e.

²⁷ Ɓisine nee ɗaa, mə-m gangə man badə. Ɗaa m-a pa na ɗi wa? Bɔ dəwje, se kar aji-m dɔ kar gə nee le wa? Ngaa ye gə nee le ja ɓa m-ɗe mb-ɛ ngira kar gə nee.

²⁸ Bɔ dəwje, ila riɓar dɔ ri-i gə! Be ɓa ndu ḭ dara ɓar na: M-ila riɓar dɔ-ɛ gə, ngaɓa m-a kila riɓar dɔ-ɛ gə ja ɓi.

²⁹ Bula dəwje gə d-ar lo-e gə ɓa ꞌtuga mbi-je d-o ne ndu le ꞌpa na to gə nji ɓa ndangə. Nje gə ɗangə tɔ ɗaa ꞌpa na to gə anji ɓa pa sə-a tar.

³⁰ Jeju təl pa cibi na: Mba tar lə-m ꞌma ɓa ndu nee le ɓar ne ar d-o ang, ngaa mba tar lə-sisəy.

³¹ Ɓisine ɗaa to kar gangə tar dɔ dəwje gə dɔ nangə gə nee; Ɓisine ɗaa mbay gə dɔ nangə nee le, d-a tɔb-ɛ kila-a ɗaga.

³² Ɗaa ꞌma le, logə d-a kun-m dɔ nangə gə nee kunda-m tar ɗaa, m-a ndɔr dəwje tɔ̰y gə rɔ-m gə.

³³ N-pa to gə be mba tɔji ne pa kuy gə n-a kuy.

³⁴ Bula dəwje d-ila-a kəne na: Torondu tɔji sijee ar j-a gərə to gə Kirisi le isi kəm baa saar gə no. Ngaa ɗa na ban cibi ɓa ꞌI pa na: May kar d-un Ngon lə dəw le d-unda-a taar cibi wa? Ngon lə dəw nee le, to na wa?

³⁵ Be ɓa, Jeju pa ar-je na: Lokarə ga̰ horo-sisəy gə nee dɔ kar njɛ̰ be ɓi. Lokarə ga̰ gə sisəy nee ɓi ɗaa ꞌnja-je dan-ɛ gə mba kar cil ciməri uba-si nangə bus ang: Mba dəw gə nja dan cil ciməri gə le gərə lo gə aw gə kəne ang.

³⁶ Dɔ kar gə lokarə ga̰ gə sisəy ɓi le, ꞌtaje kag-ɛ mba kar-si ꞌtəlje ne gə ngan lokarəje. Jeju pa tar neje gə nee ɗaa, ɔdə aw iya rɔ-ɛ əw ta kəm-je.

Jiibije ꞌmbadə takagə Jeju

³⁷ Gə go netɔjije tɔ̰y gə Jeju ɗa ta kəm dəwje gə nee ja kara, ꞌta kag-ɛ ang.

³⁸ To to gə be mba kar tar gə pajambərə Ejay pa le aw ne lo-e gə yɛrɛrɛ na: Mbayɓe, tar gə j-a pa j-ar d-o le, na ɓa ta kag-ɛ wa? Ngaɓa na ɓa singamongə Mbayɓe kila rɔ-ɛ gə ɗaga ar-ɛ wa?

³⁹ Gəl-e gə nee ɓa, to gə ɓo d-asə ta kagə ang, mba Ejay le təl pa ja cibi na:

⁴⁰ N-tɔ kəm-je sum-sum nəm Dɔ ɓəngərə-je kara n-ar kədərə kang-kang nəm Mba kar d-o lo gə kəm-je ang, Ngaɓa dɔ ɓəngərə-je kara gərə ne kara ang nəm tɔ, Na d-a kḭ mbəl mə-je ɗaa m-a kaji-je.

⁴¹ Tar gə nee le Ejay pa to gə be mba ꞌne n-o rɔnduba lə-a ngaɓa n-pa tar gə ɔji dɔ-ɛ tɔ.

⁴² Ngaa, horo njekɔr no dəwje gə ja kara, dəwje bula ya̰ ꞌta kag-ɛ, ngaa ꞌɓəəl mba Parijiyɛ̰je gə d-a kḭ tɔbə-je kəy nendo gə lə-je le ɗaa, ꞌpa tar lə-a gə ɗaga no dəwje gə ang.

⁴³ Mba ꞌnjigi riɓar gə ḭ rɔ dəwje unda riɓar gə ḭ rɔ Luba gə.

⁴⁴ Jeju pa tar gə ndu-e gə boy na: Dəw gə ta kagə-m nama, to gə ꞌma ɓa ta kagə-m ang, ngaa dəw gə njekula-m le ɓa ta kag-ɛ kən;

⁴⁵ ngaɓa dəw gə o-m ꞌma nama o dəw gə njekula-m le tɔ.

⁴⁶ ꞌMa gə m-to gə lokarə le, m-ɗe dɔ nangə gə nee mba kar na-na gə ta kagə-m nama isi dan cil ciməri gə ang.

⁴⁷ To gə ɓo dəw gə o tar lə-m ɓa ngom ang nama, ꞌma m-gangə tar dɔ-ɛ gə ang, mba m-ɗe mba gangə tar dɔ dəwje gə dɔ nangə gə nee ang baa, ngaa m-ɗe mba kaji dəwje gə dɔ nangə gə nee.

⁴⁸ Dəw gə mbadə-m ngaɓa ta tar lə-m ang nama nje gangə tar dɔ-ɛ gə ga̰ kəne əng: tar gə m-pa nee le ja a gangə tar dɔ-ɛ gə dɔ ɗudu ndɔ gə.

⁴⁹ Mba ꞌma m-pa tar gə dɔ-m baa ang, ngaa Bɔ dəwje gə ula-m le ngaɓa unda tar ta-m kar-m pa le ye ja m-pa ɗaa m-pa.

⁵⁰ Ɗaa m-gərə to gə torondu-e le to gə təbə gə gə ndɔ gə ndɔ. To gə be ɓa, neje gə m-pa tar-ɛ le, m-pa tar-ɛ ɗəw kara baa to gə Bɔy pa ne tar-ɛ ar-m tɔ.