Jean 11 - Mbede Lə Luba Kone Gə Sigi

Lawjar gə to njekura lə Jeju uy

¹ Dəw kara ga̰ kəne əng, ɗaa rɔ-ɛ to-e, ri-a na Lawjar, n-to dəw gə Ɓetani gə to ɓe kuji Məri je gə ngon ko̰-ɛ gə jene Madə.

² To Məri gə nee le ja ɓa um ubu gə ba̰y kəndə mambo̰ to kəne dɔ Mbayɓe gə cibi ngaɓa bɔrə gɔl-ɛ gə bḭ dɔ-ɛ. Ɗaa, ngon ngaw lə-a Lawjar ɓa rɔ-ɛ to-e.

³ Ko̰ nan-ɛje le d-ula ꞌpa d-ar Jeju na: Mbayɓe, rɔ njekura lə-i to-e.

⁴ Logə tar-ɛ oso mbi Jeju gə ɗaa, pa na: Rɔ to gə kən le n-a kuy ne ang baa, ngaa to rɔ to gə kar kila riɓar dɔ Luba gə ngaɓa gə ɗəb-e gə nee nama Ngon lə Luba a kinga ne riɓar tɔ.

⁵ Mba Məri je gə ngon ko̰-ɛ Madə gə Lawjar le, Jeju njigi-je ya̰.

⁶ Ngaa, logə n-o som to gə rɔ Lawjar to-e ja ɗaa, n-gangə rɔ-ɛ n-isi lo gə n-ga̰ kəne kəm ndɔ joo ja cibi.

⁷ Go-e gə ɗaa, n-pa n-ar ngan njenendoje na: J-a təlje j-awje Jude.

⁸ Ngan njenendoje lə-a ꞌpa d-ar-ɛ na: Njenetɔji, ɓisine ɓi Jiibije ꞌsangə ɗəw gə mba cila-i gə kɔr ər nee le ja, ꞌnjigi mba təl kaw gugu ja cibi wa?

⁹ Jeju ila kəne na: Lo gə arə le, ngira kar kəne dɔg gə gir-je gə joo ang wa? To gə ɓo dəw nja dan kara nama tuga gɔl-ɛ ang, mba n-o lokarə gə dɔ nangə gə nee;

¹⁰ ngaa to gə ɓo dəw ja dan lo ndul gə nama, tuga gɔl-ɛ mba lokarə ndogo ɗəw kab-ɛ gə ang.

¹¹ Go tarje gə n-pa to gə be ɗaa, n-təl n-pa ja cibi na: Njekura lə-sijee Lawjar aw cibi, ngaa m-a kaw ndol-e.

¹² Ngan njenendoje ꞌpa d-ar-ɛ na: Mbayɓe, to gə ɓo n-cibi gə cibi baa nama n-a kaji.

¹³ Jeju pa tar kuy lə Lawjar, ngaa ꞌjejee d-əji to gə n-pa tar cibi gə kar kuwa kɔr.

¹⁴ Be ɓa Jeju pa wɔ̰y ja ar-je na: Lawjar uy.

¹⁵ Ngaɓa rɔ-m ndɔɔ ya̰ ɔji dɔ sisəy mba godo gə m-godo kəne, mba kar-sisəy ꞌtaje ne kagə-m. Ngaa j-awje rɔ-ɛ gə.

¹⁶ Be ɓa Toma gə ꞌɓar-ɛ Ndunga pa ar ngan njenendoje gə kɛm na: Sijee kara, j-awje mba kar-si j-uyje gə Mbayɓe tɔ.

¹⁷ Logə Jeju ce təsərə ɗaa, o to gə ꞌdubu Lawjar nam, ɗa ndɔ sɔɔ ngaa.

¹⁸ To gə Ɓetani to dəb baa gə Jerujalɛm, asə kula mɛdərɛ mundaje əng le ɗaa

¹⁹ Jiibije bula ya̰ ꞌɗe ɓə lə Madə je gə Məri mba bɔrə man no kəm-je gə ɔji dɔ ngon ngaw lə-je.

²⁰ Logə Madə tuga mbi-a o to gə Jeju ɗe ɗaa, ɔdə aw cila kəm-e, ngaa Məri ɗaa isi k-ɛ nangə kəy.

²¹ Madə pa ar Jeju na: Mbayɓe, to gə ɓo ꞌga̰ nee nama ngon ngaw lə-m a kuy ang baa.

²² Ngaa ɓisine ja kara, m-gərə to gə ne tɔ̰y gə a dəji Luba le, Luba a kar-i ja.

²³ Jeju pa ar-ɛ na: Ngon ngaw lə-i a ndol.

²⁴ Madə ila-a kəne na: M-gərə to gə dɔ ɗudu ndɔ nama n-a ndol ndɔ ndol gə lə nje gə d-uy.

²⁵ Jeju pa ar-ɛ na: ꞌMa ja m-to gə kuy ɓa ndol gə kisi kəm baa nəm tɔ: Dəw gə ta kagə-m le, uy gə kuy ja kara, a kaw kəm baa.

²⁶ Cibi dəw gə aw kəm baa ngaɓa ta kagə-m nama a kuy ang saar gə no. ꞌTa kagə tar gə nee le ja wa?

²⁷ N-ila-a kəne na: Oyo, Mbayɓe, ꞌma le, m-ta kagə to gə ꞌI ꞌto gə Kirisi, Ngon lə Luba, ye gə ɗe dɔ nangə gə nee le.

²⁸ Go tar gə Madə pa to gə be ɗaa, ɔdə aw ɓar ngon ko̰-ɛ Məri. Ɗaa n-pa wɛd baa n-ar-ɛ na: Njenetɔji ar kən aw dəji-i.

²⁹ Logə Məri tuga mbi-a tə̰y o ne tar nee ɗaa, uba nangə gə ngɔdə baa ḭ taar aw cila kəm-e.

³⁰ Jeju ar gə lo gə Madə cila kəm-e inga-a kəne ja baa ɓi, ɓo andə mə ɓe gə ang ɓi.

³¹ To gə be ɓa Jiibije gə d-isi gə Məri kəy mba bḭ man no kəm-e gə le, d-o-e lo kḭ gə n-uba nangə gə ngɔdə n-ḭ taar n-ce ɗaga ɗaa, ꞌndole go-e. D-əji to gə n-aw gə dɔbarə gə mba no kəne.

³² Logə Məri ce lo gə Jeju ar kəne, ngaɓa unda kəm-e tə̰y o-e ɗaa, oso nangə burugə no gɔl-ɛ gə ɗaa pa ar-ɛ na: Mbayɓe, to gə ɓo ꞌga̰ nee nama ngon ngaw lə-m a kuy ang.

³³ Logə Jeju o to gə n-aw no ngaɓa Jiibije gə ꞌdan-ɛ kara ꞌno nəm ɗaa, n-si m-e mbig-mbig ngaɓa m-e gangə man badə.

³⁴ N-pa na: ꞌDubu-eje ɗa wa? D-ila-a kəne na: Mbayɓe ꞌɗe ɓoo.

³⁵ Jeju no.

³⁶ Be ɓa Jiibije ꞌpa na: Oje njigi gə n-njig-e kara nee ɗa!

³⁷ Ngaa nje gə naaje horo-je gə pa na: ꞌNe gə nje kar kəm nje kəm tɔ unja le n-asə gə mba kɔgə Lawjar kar-ɛ uy ang mba ɗi wa?

³⁸ Be ɓa Jeju təl-si gə no m-e mbig-mbig ja cibi, ar-ɛ ɔdə aw dɔbarə gə. To gə bolo ər gə d-ila pil mbal t-ɛ gə.

³⁹ Jeju pa na: Uwaje pil ər le gə ɗangə. Madə gə ko̰ nan njegodoje le pa ar-ɛ na: Mbayɓe, n-ə̰ndə ɗɔdə ngaa mba to gə ndɔ gə njekum gə sɔɔ ngaa ɓogəne.

⁴⁰ Jeju ila-a kəne na: To gə ɓo ꞌta kagə nama a ko rɔnduba lə Luba ɓa m-pa be m-ar-i ang wa?

⁴¹ Be ɓa d-uwa pil ər le d-ila ɗangə. Jeju un kəm-e gə taar, ɗaa pa na: Bɔ dəwje, m-ar-i oyo mba ndu-m gə o.

⁴² Kar-m ꞌma le ɗaa, m-gərə to gə o ndu-m ja jaga-jaga, ngaa m-pa ɔji dɔ bula dəwje gə d-ar lo gə nee gə mba kar ꞌta kagə to gə ꞌI ja ɓa ula-m.

⁴³ Go tar gə n-pa to gə be ɗaa, n-pa tar gə ndu-e gə boy wəəl na: Lawjar, ꞌce gə ɗaga nee.

⁴⁴ Ɗaa dəw gə uy le ce gə kula kubu gə ꞌtɔ ne gɔl-ɛ gə ji-a, ngaɓa gə ta kubu gə ꞌɓiri kəm-e nəm tɔ. Jeju pa ar-je na: ꞌTud-eje ɓo ḭya̰-je ar-ɛje n-aw.

D-ula ꞌmɔdəməri dɔ Jeju gə

⁴⁵ Logə Jiibije gə ꞌɗe gə kobəre-kobəre ɓə lə Məri, d-o ne gə Jeju ɗa nee le ɗaa, ꞌta kag-ɛ.

⁴⁶ Ngaa nje gə kɛm horo-je gə d-ɔdə d-aw d-inga Parijiyɛ̰je ꞌpa tar ne gə Jeju ɗa le d-ar-je.

⁴⁷ Ye əng ngaa, buba njekapoloje gə Parijiyɛ̰je d-uwa dɔ naa no ngɔ gangə tar gə lə Jiibije ɗaa ꞌpa na: Ɗi ngaa j-a ɗa wa? Mba dəw gə nee le ɗa netɔjije bula ya̰ ngaa.

⁴⁸ To gə ɓo j-ḭya̰-aje j-ar-ɛje n-ɗa dɔ-ɛ gə kede-kede to gə bənəng nama d-a ta kag-ɛ tɔ̰y ɗaa njeko̰ ɓeje gə Rɔm d-a ɗe kila ɗɔ dɔ-si gə mba tuji ne lo gə to gə losang-ɛ ngaɓa gə gəl kuji-si tɔ.

⁴⁹ Ngaa kara lə-je, Kayip gə to gə buba njekapolo dɔ ɓal-ɛ gə əng le, pa ar-je na: ꞌGərəje ne kara kəne ang.

⁵⁰ Ngaɓa to ne gə may ar-sisəy mba kar dəw kara ɓa uy ta ne dɔ dəw mə ɓeje tɔ̰y ngaɓa kar gəl kuji ja kərəng tuji ne ang tɔ.

⁵¹ Be ɓa, ꞌne n-pa tar gə kən le gə dɔ rɔ-ɛ ang, ngaa mba to gə n-to buba njekapolo dɔ ɓal-ɛ gə əng le ɗaa n-ila ne mbərə tar na may kar Jeju uy mba gəl kuji Ijirayɛl.

⁵² Ngaɓa gə mba gəl kuji Ijirayɛl ja gə kar-ɛ baa ang, ngaa gə mba mbo̰ ne nganje lə Luba gə ꞌsɛ̰rɛ̰ naa le dɔ naa gə gə darɔ gə kara baa.

⁵³ Dɔ ndɔ-ɛ əng ja ɗaa, d-un ndu-je gə mba tɔl-ɛ.

⁵⁴ Be ɓa Jeju ila ngangə nja horo Jiibije gə ɗaga ngəw-ngəw: N-ɔr rɔ-ɛ n-aw dɔ nangə gə to mbɔr ndag lo gə, mə ɓebo gə ꞌɓar-ɛ Epərayim, n-isi kəne gə ngan njenendoje lə-a.

⁵⁵ Ndɔ ɗa nay Pagə lə Jiibije nay dəb baa ɗaa, dəwje bula ya̰ d-ḭ gə ko ɓeje, d-ḭya̰ ndɔ kara gə kede baa, d-uba naa mbura-mbura gə Jerujalɛm gə mba kɔr rɔ-je togo rɔ-je ɔji dɔ neɗa gə kṵra̰y.

⁵⁶ ꞌSangə Jeju ɗaa ꞌpa tar horo naa gə gə yo gə nee ta kəy gə lə Luba na: Əjije to gə ban wa? N-a ɗe lo ɗa nay gə le ang saar wa?

⁵⁷ Buba njekapoloje gə Parijiyɛ̰je d-un nduje na: Dəw gə ɗa-ɗa gə o lo gə ga̰ kəne nama may kar un dɔ-ɛ mba kar d-uwa-a.