Jean 10 - Mbede Lə Luba Kone Gə Sigi

Njenekuul gə badəmje lə-a

¹ Tar gə tɔgərɔ, m-pa m-ar-si, dəw gə andə mə kinga gə lə badəmje gə ta ɗəw ang, ngaa al dɔ-ɛ gə lo gə mbɔr kara ɗaa, nj-ɛ nee le to gə nje ɓogo ngaɓa gə gayim nəm tɔ.

² Ngaa dəw gə andə gə ta ɗəw nama to gə njekuul badəmje.

³ Njengəm ta ɗəw ɔr ta ɗəw ar-ɛ ɗaa badəmje d-o ndu-e; badəmje gə ꞌto gə njeka-ɛje le, n-ɓar-je, ye gə ɗa-ɗa kara gə ri-a ri-a, ɗaa n-aw gə je ɗaga.

⁴ Logə n-ar-je ꞌce ɗaga tɔ̰y nam ɗaa, n-nja no-je gə kede, ɗaa badəmje d-uwa go-e, mba ꞌgərə ndu-e.

⁵ D-a ndole go njembaa ang ja saar gə no; cibi ngaɓa, d-o-e nama d-a ka̰y-ɛ gə ka̰y mba ꞌgərə ndu njembaaje ang.

⁶ Jeju pa tar gə ko̰ tar ar-je ngaa ꞌgərə gəl ne gə n-pa tar-ɛ nee le ang.

⁷ Jeju təl pa to gə ɗangə cibi na: Tar gə tɔgərɔ ja, m-pa m-ar-si, m-to gə ta ɗəw kandə lə badəmje.

⁸ Dəwje tɔ̰y gə ꞌɗe no-m gə kede le, ꞌto gə nje ɓogoje gə gayimje baa, ngaa badəmje d-o tar lə-je ang.

⁹ M-to gə ta ɗəw, to gə ɓo dəw andə gə ɗəw gə ɓə lə-m nama a kinga təbə, n-a kaw gə n-a təl ɗaa n-a kinga nekusa t-ɛ.

¹⁰ Njeɓogo ɗe gə mba ɓogo gə ɓogo, gə mba tɔl gə tɔl, ngaɓa gə mba busu ne gə busu ja baa. ꞌMa m-ɗe gə mba kar dəwje d-inga təbə, ngaɓa kar d-inga gə dɔ mar-ɛ dɔ mar-ɛ gə.

¹¹ ꞌMa m-to gə njenekuul gə may; njenekuul gə may ḭya̰ rɔ-ɛ ar yo mba badəmje lə-a.

¹² Njeɗakula lar gə to gə njenekuul gə tɔgərɔ ang, ngaɓa badəmje ꞌto gə k-ɛ ang le, n-o da ngangə aw ɗe ɗaa n-uba badəmje n-ḭya̰-je n-a̰y kagə n-aw; ɗaa da ngangə uwa-je gə k-ɛ ngaɓa sɛ̰rɛ̰-je pəsəsə tɔ.

¹³ Mba n-to gə njeɗakula lar baa, ɗaa njɛ̰ ja baa kara ɔs-ɛ dɔ badəmje gə ang.

¹⁴ ꞌMa m-to njekuul badəmje gə may, m-gərə badəmje lə-m, ngaɓa badəmje lə-m kara ꞌgərə-m tɔ,

¹⁵ ɗəw kara baa to gə Bɔ dəwje gərə-m ꞌma ngaɓa ꞌma kara m-gərə Bɔ dəwje tɔ; ɗaa m-ḭya̰ rɔ-m m-ar yo mba badəmje lə-m.

¹⁶ Badəmje lə-m gə ɗangə ꞌga̰ kəne əng ɓi gə ꞌgodo mə kinga gə nee ɗaa ꞌje gə kən kara, may kar-m m-ɗe gə je; d-a ko ndu-m ɗaa d-a kum naa gə kuduɓe kara baa ngaɓa njekuul-je kara kara baa tɔ.

¹⁷ Bɔ dəwje ɓol-m mba m-ḭya̰ təbə lə-m m-ila kɔrɔ ɓa m-təl m-inga to gə ɗangə ɓi.

¹⁸ Dəw kara kara ɔr təbə lə-m ang, ngaa ꞌma ja gə dɔ-m m-ḭya̰ təbə lə-m m-ila kɔrɔ; M-aw gə singamongə mba kḭya ne təbə lə-m kila kɔrɔ ngaɓa m-aw gə singamongə mba təl kinga ne to gə ɗangə tɔ; ye gə nee ɓa to gə ndu gə m-inga ta Bɔy gə.

¹⁹ Kay naa təl to horo Jiibije gə ɔji dɔ tarje gə nee le tɔ.

²⁰ Dəwje bula ya̰ horo-je gə ꞌpa na: Njil gə kṵra̰y ɗa ɓe m-e gə, n-to gə mbə, mba ɗi ɓa oje tar lə-a wa?

²¹ Ngaa nje gə ɗangə ꞌpa na: Tarje gə nee le to tar pa lə dəw gə njil gə kṵra̰y ɗa ɓe m-e gə ang; ngaɓa njil gə kṵra̰y asə cɛ̰ kəm nje kəm tɔ wa?

Dəwje ꞌmbadə Jeju

²² ꞌƊa nay kun kəy kar Luba mə ɓebo gə Jerujalɛm, to gə nay kul.

²³ Jeju nja mə kəy gə lə Luba, aw gəl lo gə ꞌɓar-ɛ ta kəy lə Salomo tɔ, təl tɔ.

²⁴ Jiibije ꞌgugu dɔ-ɛ yir ɗaa ꞌpa d-ar-ɛ na: ꞌI a tɔ kəm lə-si masə gə be saar gə ndɔ gə ɗa gə wa? To gə ɓo ꞌto gə Kirisi nama ꞌpa ar-ɛ unja-si ngadə ja ar-si j-o.

²⁵ Jeju ila-je kəne na: M-pa m-ar-si ja ɗaa sisəy ꞌta-je kagə-m ang. Kulaje gə m-ɗa gə ri Bɔy le ja pa tar naji lə-m.

²⁶ Ngaa ꞌtaje kagə-m ang mba ꞌga̰je horo badəmje gə lə-m ang.

²⁷ Badəmje lə-m d-o ndu-m, ꞌma le, m-gərə-je, ɗaa ꞌjejee ꞌndole go-m tɔ.

²⁸ Ɗaa ꞌma, m-ar-je təbə gə to gə ndɔ gə ndɔ; d-a busu ang saar gə no ngaɓa dəw kara kara a kasə kuwa-je kɔr-je ji-m gə ang tɔ.

²⁹ Ne gə Bɔy gə ar-m le, to ɓəəl unda neje tɔ̰y ngaɓa dəw kara kara singamong-ɛ asə kɔr ne kara mə ji Bɔy gə ce ne ang.

³⁰ ꞌMa je gə Bɔy j-a to gə kara baa.

³¹ Jiibije d-odo kɔr ər to gə ɗangə mba cila-a ne.

³² Jeju təl pa ar-je na: M-tɔji-si neje gə may-may gə ḭ rɔ Bɔy gə bula ya̰. Ngaa ye gə ɗa ɓa ꞌnjigije gə mba cila-mje ne gə kɔr ər mb-ɛ wa?

³³ Jiibije d-ila-a kəne na: Mba kula gə may gə ꞌɗa ɓa j-a cila-i gə kɔr ər mb-ɛ ang ngaa mba taji gə ꞌtaji Luba, ngaɓa mba ꞌI gə ꞌto dəw nee ja baa uwa rɔ-i gə Luba.

³⁴ Jeju ila-je kəne na: Tar gə nee le, ꞌɗa mə torondu gə lə-si na: M-pa na: ꞌToje gə Lubaje!

³⁵ Be ɓa nje gə ꞌpa tar lə Luba d-ar-je le, ꞌɓar-je Lubaje tɔ. Mbede lə Luba gə nee le, dəw asə tuji ang.

³⁶ Dəw gə Bɔ dəwje ɔr-ɛ unda-a gə losang-ɛ ngaɓa ula-a dɔ nangə gə nee le, sisəy, ꞌpaje ar-ɛje na: ꞌTaji Luba, mba m-pa na: M-to gə Ngon lə Luba.

³⁷ To gə ɓo m-ɗa kulaje lə Bɔy ang ɗaa, ꞌtaje kagə-m ang!

³⁸ Ngaa to gə ɓo m-ɗa nama, le ꞌtaje kagə-m ang kara, ꞌtaje kagə kulaje nee gə mba kar ꞌgərəje ne unja-si ngadə to gə Bɔy isi mə-m gə ngaɓa ꞌma kara m-isi mə Bɔy gə tɔ.

³⁹ Be ɓa ꞌsangə ɗəw to gə ɗangə ja ɓi gə mba kuwa-a, ngaa n-ce ji-je gə.

⁴⁰ Jeju təl aw tura Jurədɛ̰ gə to gə ɗangə, lo gə Ja̰ un kudu ɗa batɛm kəne, ɗaa n-isi kəne.

⁴¹ Dəwje bula ya̰ ꞌɗe rɔ-ɛ gə ɗaa ꞌpa na: Tɔgərɔ ja, Ja̰ le ɗa netɔji kara ang ja saar, ngaa tar tɔ̰y gə n-pa ɔji dɔ dəw gə nee le, to tar gə tɔgərɔ ja.

⁴² Lo-e gə əng ɗaa, dəwje bula ya̰ ꞌta kag-ɛ.