Jean 1 - Mbede Lə Luba Kone Gə Sigi

Tar gə ɔji dɔ təbə, gə lokarə, gə Ngon kara

¹ Tar ja ga̰ kede dɔngɔr, Tar le ga̰ kede naa gə kara baa gə Luba, Tar le to gə Luba tɔ.

² Lo kuma kudu neje gə tɔ̰y le, ꞌne ga̰ naa gə gə Luba.

³ ꞌNe ja ɓa n-unda ne neje tɔ̰y, ngaɓa ne kara be gə gə ga̰ gə lal kar n-to njegəl-e le godo tɔ.

⁴ Ɗəw gə lə-a ꞌne ɓa təbə ga̰ ne, ngaɓa təbə le to gə lokarə gə ndogo dɔ dəwje gə tɔ.

⁵ Lokarə le ndogo cil ciməri gə, ngaa cil ciməri dum dɔ-ɛ ang.

⁶ Luba ula dəw kara gə ri-a na Ja̰.

⁷ Ja̰ le ɗe gə nje pa tar naji lə lokarə le, mba kar ɗəw gə lə-a ɗaa dəwje tɔ̰y ꞌta ne kagə.

⁸ Ja̰ le to gə lokarə ang, ngaa ye ɗe gə njetar naji lə lokarə.

⁹ Lokarə le to gə lokarə gə tɔgərɔ gə ɗe ndogo dɔ nangə gə nee, mba kar dəw gə ɗa-ɗa kara o ne lo.

¹⁰ Tar le ga̰ dɔ nangə gə nee, ngaɓa dɔ nangə le to gə nekunda lə-a, ngaa dəwje gə dɔ nangə nee ꞌtəl gər-e ang magə.

¹¹ N-ɗe horo njeka-ɛje gə ja, ngaa njeka-ɛje d-uwa-a gə rɔ-je gə ang.

¹² Ngaa dəwje tɔ̰y gə d-uwa-a gə rɔ-je gə ngaɓa nje gə ꞌta kagə gə ri-a ɗaa, n-ar-je singamongə ar ꞌtəl ꞌto ne gə nganje lə Luba.

¹³ ꞌJejee nee le d-uji-je ɗəw məsə gə ang nəm, ɗəw mə njigi gə lə darɔ gə ang nəm, ɓa gə ɗəw gə mə njigi gə lə dəw ang nəm tɔ, ngaa gə ɗəw mə njigi gə lə Luba.

¹⁴ Tar le təl rɔ-ɛ gə dəw, cibi ɓa isi horo-si gə mənuji gə tar gə tɔgərɔ ɗusu m-e tub-tub, ngaɓa sijee j-o rɔnduba lə-a, to to gə rɔnduba kar Ngon kara gə inga rɔ Bɔ-ɛje gə.

¹⁵ Ja̰ Njeɗabatɛm pa tar naji lə-a, ila ne ndu-e nangə ɓolong na: Dəw gə nee le ɓa m-pa tar lə-a kede m-pa na: Dəw gə ore go-m le, ɗe no-m gə kede nam, mba n-ga̰ kede nam ɓa d-uji-m ꞌma ɓi.

¹⁶ Be ɓa, gə go nebaw lə-a gə unda kubu le, sijee tɔ̰y j-inga ne ne ji-a gə ngaɓa mənuji lə-a kara j-inga gə dɔ mar-ɛ gə dɔ mar-ɛ gə nəm tɔ;

¹⁷ mba Luba ar torondu-e ɗe gə ɗəw gə lə Moyiji, ngaa tar gə tɔgərɔ gə mənuji ɗaa ɗe ɗəw gə lə Jeju Kirisi.

¹⁸ Dəw kara gə o Luba gə kəm-e le godo; ngaa, Ngon kara gə to Luba gə ga̰ naa gə kara baa gə bɔ-ɛje ɓa ɗe riba dɔ-ɛ ar-si ja gər-e.

JEJU UN KUDU KULA LƏ-A Tar naji lə Ja̰ Njeɗabatɛm

¹⁹ Oje tar naji gə Ja̰ Njeɗabatɛm pa, logə Jiibije gə Jerujalɛm d-ula njekapoloje gə nje gə gəl ka Lebi gə d-ar dəji-e tar na: ꞌI le ꞌto na wa?

²⁰ Ja̰ Njeɗabatɛm kara ɗəgə tar ang ɗaa ila-je kəne gə maj-ɛ ja na: ꞌMa m-to Kirisi ang baa.

²¹ Ɗaa ꞌtəl ꞌdəji-e ja cibi na: Ɗaa ꞌto gə na ja wa? ꞌI le, ꞌTo Eli wa? N-pa na: M-to Eli ang baa. Ɗaa ꞌI ɓa ꞌto pajambərə le wa? Ɗaa n-ila kəne na: Ə̰ə̰ə̰.

²² Ɗaa ꞌtəl ꞌpa d-ar-ɛ cibi na: ꞌI, ꞌto na ja wa? Mba kar ja təl j-aw pa j-ar nje gə d-ula si le; ꞌI ja le, tar ɗi ɓa ꞌpa ɔji dɔ-i wa?

²³ Ja̰ ila kəne na: ꞌMa m-to dəw gə uru ꞌkuwi mə ndag lo gə na: ꞌGɔl-je ɗəw lə Mbayɓe. To gə pajambərə Ejay pa.

²⁴ Nje gə d-ula-je le ꞌto gə Parijiyɛ̰je

²⁵ ꞌDəji-e na: ꞌI le, to gə ɓo ꞌto Kirisi ang nəm, Eli ang nəm, ngaɓa ꞌto pajambərə ang nəm tɔ ngaa ꞌɗa dəwje batɛm mba ɗi wa? Ɗaa Ja̰ təl ila-je kəne na:

²⁶ ꞌMa, m-ar horo-si gə nee ja, m-ɗa dəwje batɛm mə man gə, ngaa dəw kara gə ꞌgər-eje ang ja aw ɗe go-m gə əng.

²⁷ ꞌMa m-asə tudu kula sabɔgɔ lə-a ang.

²⁸ Neje nee le nday mə ɓe gə Ɓetani, tura man Jurədɛ̰ gə, lo gə Ja̰ ɗa dəwje batɛm kəne.

²⁹ Lokar-ɛ ɗaa, Ja̰ o Jeju aw ɗe gə ɓə lə-a ɗaa, pa na: Oje Ngon badəm lə Luba gə a kɔr neɗa gə kṵra̰y lə dəwje gə dɔ nangə gə nee.

³⁰ Dəw gə m-pa tar lə-a m-pa na: Dəw gə ore go-m le, ɗe no-m gə kede nam, mba n-ga̰ kede nam ɓa d-uji-m ꞌma ɓi.

³¹ ꞌMa ja kara m-gər-e ang, ngaa gə mba kar n-kila rɔ-ɛ gə ɗaga kəm Ijirayɛlje ɓa, m-ɗe m-ɗa ne batɛm mə man gə.

³² Ja̰ pa tar naji lə Jeju na: M-o Njil ḭ dara to to gə dər kuul be ɗe isi dɔ-ɛ gə.

³³ Ngaɓa ꞌma, m-gər-e kede ang, ngaa Luba gə ula-m ar-m m-ɗa batɛm gə man le ja pa na: Dəw gə a ko Njil a kḭ dara ɗisi isi dɔ-ɛ gə ɗaa, ye ɓa to dəw gə a ɗa batɛm gə Njil Njerɔsangə.

³⁴ Be ɓa, ꞌma m-o gə kəm-m ɗaa m-ɗa tar naj-ɛ to gə ꞌne ja n-to Ngon lə Luba.

Ngan njenendoje lə Jeju gə dɔngɔr

³⁵ Lokar-ɛ ɗaa Ja̰ təl ar gə lo-e gə əng ja ɓi gə ngan njenendoje lə-a joo;

³⁶ n-a lo n-o Jeju gə aw nday ɗaa n-pa na: Oje ngon badəm lə Luba.

³⁷ Logə ngan njenendoje lə-a gə joo le d-o tar gə n-pa ɗaa d-ɔdə d-aw go Jeju gə.

³⁸ Logə Jeju kəl go-e, oje to gə d-aw ndole go-e ɗaa, dəji-je na: Ɗi ɓa aw sangəje wa? ꞌTəl D-ila-aje kəne na: Rabi – kɔr m-e na: Njenetɔji – lo kisi-i to ɗa wa?

³⁹ Jeju pa ar-je na: ꞌƊeje ɗaa a koje. Be ngaa, ꞌjejee d-ɔdə d-aw sə-a d-aw d-o lo kisi-e; ɗaa ꞌɗəm d-isi sə-a ndɔ-ɛ gə əng le tɔ. Kar-ɛ gə əng le a kaw gə ne gə ngira kar gə sɔɔ je əng be gə kar kumatagə.

⁴⁰ Ngan njenendoje gə joo gə d-o tar gə Ja̰ pa ɓa ꞌndole ne go Jeju le, dəw gə kara ri-a na Andəre, ngon ko̰ Simo Piyɛr.

⁴¹ Ngon ko̰-ɛ Simo ja n-inga dɔngɔr, ɗaa n-pa n-ar-ɛ na: Sijee le j-inga Mesi, kɔr m-e na: Kirisi.

⁴² Be ɓa n-ɔr no-ɛ n-aw sə-a ɓe lə Jeju. Logə Jeju a-e jii ɗaa pa na: ꞌI to Simo, ngon lə Ja̰: D-a ɓar-i Sepas, kɔr m-e na: Kɔr ər.

⁴³ Lokar-ɛ, logə Jeju njigi kaw gə Galile ɗaa, inga Pilibi, ɗaa pa ar-ɛ na: Uwa go-m.

⁴⁴ Pilibi gə Andəre je gə Piyɛr le, ɓe lə-je kara baa Bɛdəsayida.

⁴⁵ Pilibi inga Nataniyɛl ɗaa pa ar-ɛ na: Sijee j-inga dəw gə mbede lə Moyiji gə mbede lə pajambərəje ꞌpa tar lə-a, Jeju gə ɓe gə Najarɛd, gə to ngon lə Jəjəb le.

⁴⁶ Nataniyɛl ila kəne na: Ne gə may a kḭ ɓe gə Najarɛd tɔ wa? Be ɓa Pilibi təl pa ar-ɛ na: ꞌƊe ɓoo.

⁴⁷ Logə Jeju a lo o Nataniyɛl gə aw ɗe ɗaa pa na: Oje dəw gə Ijirayɛl gə kuji kəy gə pa tar gə ɗəgərə ang ɓa aw nee.

⁴⁸ Nataniyɛl təl dəji Jeju na: ꞌGərə-m lo gə ɗa gə wa? Ɗaa Jeju pa ar-ɛ na: Logə ar kɔy tungu gə, kede nam ɓa kar Pilibi ɓar-i ɓi ja m-o-i ɗɔdə.

⁴⁹ Nataniyɛl təl pa na: Njenetɔji, ꞌI le ɓa ꞌto gə ngon lə Luba, ꞌI le ɓa ꞌto gə mbay gə Ijirayɛl.

⁵⁰ Jeju ila kəne na: Mba m-pa na m-o-i kɔy tungu gə ɓa um mə-i kəne nee ɗaa, a ko neje gə to ɓəəl ya̰ ja ɓi!

⁵¹ Tar gə tɔgərɔ ja m-pa m-ar-si, a koje ta dara a cɛ̰, ngaɓa anjije lə Luba d-a kal kaw taar gə ɗisi kuru nangə dɔ Ngon lə dəw gə.