Jacques 5 - Mbede Lə Luba Kone Gə Sigi

¹ Ɓisine ɗaa, sisəy njenekingaje, ꞌnoje gə ꞌkuwi ta-si gə, mba nekəmandooje gə d-a ce dɔ-si gə.

² Nekinga lə-si ndum mbudugu ngaɓa yo̰je d-o̰ kubuje lə-si tɔlɔg-tɔlɔg.

³ Maa lə-si gə lar lə-si ɔbə ɓar, ɗaa kɔbəɓar lə-je le, a təl to tar naji gə a kila tar dɔ-si gə ngaɓa a ro darɔ-si pulug-pulug to gə pər be. ꞌKəmələje nekingaje gə dɔ naa gə dɔ naa gə dɔ ɗudu ndɔje gə nee!

⁴ Dəwje gə d-unja ko ndɔɔ lə-si le, uwaje nekuga dɔjije kɛgə ꞌtoje nee le, ɗaa ꞌno ngaɓa bangə no oso mbi Mbayɓe gə ꞌɓəə njeɗɔje.

⁵ Ubaje may dɔ nangə nee, ngaɓa isije dan nemayje gə dana badagə, uulje rɔ-si to gə d-uul ne da mba tɔl-ɛ be.

⁶ Ilaje tar dɔ dəw gə gadə-gadə gə, ꞌtɔl-ɛje; n-ar gədərə no-si gə ang.

Tar ndəjije dang-dang

⁷ Ngan ko̰-mje, uwaje mə-si ndəər, saar ndɔ ɗe lə Mbayɓe. Oje njendɔ ngəbə kandə ne gə ar yororo gə ye gə dubu nangə, uwa məndəər saar kar-ɛ inga man nji gə dɔngɔr, gə ta ngaw nji gə, gə ye gə ɗudu gə dɔ nay gə.

⁸ Sisəy kara, uwaje mə-si ndəər, oreje ur-si ndəng, mba ndɔ ɗe lə Mbayɓe aw ɗe dəb ngaa.

⁹ Ngan ko̰-mje, ꞌpaje tar gə kṵra̰y dɔ naa gə yo gə ne ang, mba kar Luba gangə ne tar dɔ-si gə ang. Oje, nje gangə tar le ar ta kəy gə nee.

¹⁰ Ngan ko̰-mje, unje ne kɔji mar-ɛ dɔ ꞌməsərə gə gə kuwa məndəər lə pajambərəje gə ꞌpa tar gə ri Mbayɓe.

¹¹ Oje, tar gə ja pa ɓa nee: Nokarə to ɔji dɔ dəwje gə d-uwa gədərə. Oje tar lə Job gə uwa gədərə, gə ne gə Mbayɓe ɗa ar-ɛ gə ɗudu, mba Mbayɓe to nje ko kəmtondoo, gə nje bḭ man no kəm dəwje gə.

¹² Dɔngɔr ne tɔ̰y ɗaa, ngan ko̰-mje, ꞌnajije gə dara ang nəm gə nangə ang nəm, gə pa naji gə ɗangə ang nəm tɔ. May kar tar lə-si to oyo nama oyo, a ɓo ə̰ə̰ə̰ nama ə̰ə̰ə̰ mba kar tar gangə uwa dɔ-si ang.

¹³ Se dəw kara horo-si gə isi dan ꞌməsərə gə wa? May kar-ɛ dəji Luba. Se dəw kara isi dan rɔləl gə wa? May kar-ɛ ɔsə pa.

¹⁴ Se dəw kara horo-si gə rɔ-ɛ to-e wa? May kar-ɛ ɓar ngatɔgəje gə Mbo̰ naa lə njetakagəje ɗaa d-a kuwa dɔ-ɛ gə ubu gə ri Mbayɓe, dəji ne Luba ɔji dɔ-ɛ.

¹⁵ Dəji Luba gə takagə le a kaji dəw gə rɔ-ɛ to-e ɗaa Mbayɓe a kun-e kur-e taar, a ɓo n-ɗa neɗa gə kṵra̰y nama d-a kɔr tar dɔ-ɛ gə.

¹⁶ ꞌPaje tar neɗa gə kṵra̰y lə-si gə ɗaga no naa gə ɗaa dəjije Luba ɔji dɔ naa gə yo gə nee, mba kar ajije ne. Dəji Luba lə dəw gə gadə-gadə le, ɓar mii ngaɓa tɔg-e to ya̰ tɔ.

¹⁷ Eli to dəw to gə sijee be ja: n-dəji Luba ngɔɔgɔ-ngɔɔgɔ kar nji ər ang ɗaa, man nji oso nangə cɛ̰ng ang saar ɗa ɓal munda gə nay misa̰.

¹⁸ Cibi n-təl n-dəji Luba to gə ɗangə ngaɓa kəm dara cɛ̰ ar nji ər ɗaa dɔ nangə kuja rɔ-ɛ ar kandə neje cee.

¹⁹ Ngan ko̰-mje, to gə ɓo dəw kara horo-si gə ndəəm aw əw gə tar gə tɔgərɔ, ɓa ɓo dəw gə ɗangə təl sə-a kəne nama,

²⁰ ꞌgərəje to gə dəw gə nje təl gə njeneɗa gə kṵra̰y ɗəw ndəəm gə lə-a ɗe sə-a le, a t-ɛ ta yo gə, ngaɓa a kudu dɔ neɗaje gə kṵra̰y bula tɔ.