Jacques 4 - Mbede Lə Luba Kone Gə Sigi

Kuwa gədərə dan nenaje gə kar darɔ

¹ Kaw gə naa gə tar, gə tɔsə tarje gə horo-si gə le se, d-ḭ ɗa wa? D-ḭ ɗəw ɓo neje gə kar darɔ, gə d-aw ɗa gə naa ɗɔ bar kəm rɔ-sijee gə le ang wa?

² Kəm-si ə̰y dɔ neje gə, ngaa sisəy ingaje ang; ꞌtoje gə nje tɔl dəwje, gə nje ɗa mal neje, ngaɓa mə-si njinga neɗa ingaje ang; ꞌtɔsəje ta naa, gə ꞌɗɔje naa; ngaɓa ingaje ne ang, mba dəjije ang.

³ ꞌDəjije ne nama ingaje ang mba ꞌdəjije gə go ɗəb-e ang, ngaɓa dəjije mba tɔl ne ɓo neje gə uwa-si ɓərə gə ja baa.

⁴ Sisəy nje ɓogo lo toje, to gə ɓo neje gə dɔ nangə nee ɓa uwa mə-si nama, ꞌnjigije Luba ang gə dɔbo̰ le se, ꞌgərəje ang wa? Dəw gə njigi mba kuwa kura gə dɔ nangə nee nama to njeba̰a̰ lə Luba.

⁵ Ose əjije to gə Mbede pa tar gə nee baa wa? Tar gə na: Njil gə Luba njigi kar-ɛ isi mə-si gə le, Luba njigi-e unda-a dan kəm-e gə, a̰y ngang-e kɔrɔrɔ-kɔrɔrɔ le, se ꞌgərəje ang baa wa?

⁶ Ngaa mənuji gə n-ar le, bo unda neje tɔ̰y, to gə be ɓa Mbede pa na: Luba ɔsə njekunda kar-jeje ngərəng, Ngaa n-ar mənuji lə-a nay gə nje gə d-ula dɔ-je ngulum.

⁷ Be ɗaa, osoje kul no Luba gə; ar-je gədərə no ꞌsɛ̰ngərɛ̰ gə ɗaa n-a ka̰y kaw əw kḭya̰-si.

⁸ ꞌƊəmje gə rɔ Luba gə nama Luba kara a ɗəm gə rɔ-si gə tɔ. Njeneɗaje gə kṵra̰y, ꞌtogoje ji-si ngaɓa ar-je dɔ ɓəngərə-si arə ngadə tɔ, sisəy gə ꞌtoje gə ꞌpandəmje.

⁹ Ar-je kəm-si unja dɔ nekəmandoo gə ɗa si, ɓo ꞌɗa-je rɔ-si ndoo, ꞌnoje rɔ-si; May kar ngangə kogo lə-si təl ngangə no ngaɓa rɔləl lə-si təl to ɗa rɔ ndoo tɔ.

¹⁰ Ulaje dɔ-si ngulum no Mbayɓe gə nama a kun-si kunda-si taar.

¹¹ Ngan ko̰-mje, ꞌpaje tar gə kṵra̰y dɔ naa gə ang. Dəw gə pa tar gə kṵra̰y dɔ ngon ko̰-e gə ose gangə tar dɔ-ɛ nama pa tar gə kṵra̰y dɔ torondu ngaɓa gangə tar dɔ torondu gə tɔ. A to gə ɓo, ꞌgangə tar dɔ torondu gə nama, ꞌto nje ɗa kula gə torondu ang, ngaa to gə nje gangə tar dɔ-ɛ gə.

¹² Dəw gə kar-ɛ baa ja to nje kun torondu gə nje gangə tar, ye gə asə kaji dəw, gə tuj-e nəm tɔ. Ngaa ꞌi ꞌto gə na ɓa ꞌgangə tar dɔ njemar-i gə wa?

Dəw a gərə ndɔ gə bara ang

¹³ Ɓisine ɗaa, nje gə ꞌpa na: Ɓogəne ose bara nama j-a kaw ɓebo gə be, j-a ɗa kəne ɓal kara, ɗaa j-a təl ji-si kəne ɗaa j-a kinga ne ne!

¹⁴ Sisəy gə ꞌgərəje ne gə a ɗa təbə lə-si mə ndɔ gə bara ang! Mba ꞌtoje gə kundu ne gə lu mbu kur-e əw ɓəl be, a ɓo go-e gə ɗaa sɛ̰rɛ̰ kadə tɔ.

¹⁵ Tar gə kəm kar-si a paje ɓa nee: To gə ɓo Mbayɓe njigi nama, j-a kaw kəm baa gə mba ɗa ne gə yo ose ne gə nee.

¹⁶ Ngaa ɓisine ɗaa sisəy ɔsəje gaji rɔ-si undaje ne kar-si. Kɔsə gaji rɔ gə bənəng le kṵra̰y baa.

¹⁷ Dəw gə gərə ɗa ne gə may, ɓa bo ɗa ang nama, ye ɗa neɗa gə kṵra̰y.