Jacques 3 - Mbede Lə Luba Kone Gə Sigi

Pa tar gə gusu kəm karə

¹ Ngan ko̰-mje, ar-je dəwje bula ꞌto gə njenetɔjije ang, mba sisəy ꞌgərəje gə maj-ɛ to gə tar gə d-a gangə dɔ-si gə le a kədərə ya̰.

² J-a ɗa neje gə kṵra̰y gə ɗəwje bula. To gə ɓo dəw ɗa ne gə kṵra̰y ɗəw pa tar gə ang nama, to dəw gə may pɛdə gə asə mba ngom rɔ-ɛ gə maj-ɛ pɛdə tɔ.

³ To gə ɓo j-ula jɛm ta kundaje gə, mba kuwa ne ta-je nama, darɔ-je tɔ̰y ja ꞌɗa mə njigi lə-si.

⁴ Cibi, oje toje gə bo-bo, d-unda rɔ-je gəngəng-gəngəng, ngaɓa ləl bo ɓa ngɛsə-je, ngaa ngaw to gə njɛ̰ baa ja njeləl-je uwa nee ta-je aw ne gə je lo gə m-e ye njigi gə.

⁵ Ɗəw kara baa to gə ndo̰ gə to gə bar kəm rɔ gə njɛ̰ baa ja, ngaa pa tarje gə to ɓəəl ya̰. Oje to gə kɔr pər gə njɛ̰ ja baa asə tuji kɔr gə bo!

⁶ To gə be ɓa ndo̰ le kara to to gə pər be tɔ; N-to gə ngira neɗa gə dɔ buguru: ndo̰ to gə bar kəm rɔ-si, n-ɗa n-ar darɔ-si tɔ̰y mina ngaɓa n-ro-si lo kisi kəm baa gə lə-si gə dɔ nangə gə nee, ꞌne kara, pər gə ṵy ang le ro-e tɔ.

⁷ Gar daje tɔ̰y gə muu, gə əlje, gə daje gə d-agə nangə gə ta mə-je, gə neje gə man le, dəw uwa ta-je.

⁸ Ngaa ndo̰ le, to ne gə kṵra̰y gə to lo kara ang, dəw kara kara asə kuwa t-ɛ ang; kuma yɛl dəw tɔl-ɛ ɗusu rɔ-ɛ njḭ.

⁹ Ndo̰-si gə ne ja j-a pidi ne Mbayɓe, bɔ-sijee, ngaɓa j-ilaje ne ndɔl dɔ dəwje gə Luba ɗa-je ar ꞌta sə-a naa.

¹⁰ Ta-si gə kara baa nee ja pidi gə ndɔl ꞌce kəne. Ngan ko̰-mje, may kar to to gə be ang.

¹¹ Se kəm bolo man gə kara baa ja man gə kul gə man gə adə ꞌce kəne wa?

¹² Ngan ko̰-mje, se kagə tungu a kandə mbagə ose kagə bḭyə̰ a kandə tungu wa? Kəm man gə to kadə le kara, man gə kul a ka̰y kəne cɛ̰ng ang tɔ.

Kəmkarə gə ḭ rɔ Luba gə

¹³ Na ɓa horo-si gə nee, to gə nje kəm karə ose to gə nje negərə wa? May kar, gə go pa nja lə-a gə may le, tɔji ne kula ɗ-ɛje gə ɗəw kaw yururu gə kəm karə lə-a gə ɗaga.

¹⁴ Ngaa to gə ɓo nər mə gə ɗa mə bo ɗusu dɔ ɓəngərə si nama, ɔsəje gaji rɔ-si ang nəm ꞌgangəje tar gə ɗəgərə ꞌtilaje ne kəm tar gə tɔgərɔ ang.

¹⁵ Kəmkarə gə kən le, to ye gə ḭ dara ang; ngaa, to ye gə ḭ dɔ nangə nee, gə to gə kar darɔ, gə kar ꞌSɛ̰ngərɛ̰.

¹⁶ Mba lo gə nər mə gə ɗa mə bo d-ore naa kəne le, neje gə wɔr-wɔr, gə gar neɗaje gə kṵra̰y ɓədə-ɓədə ꞌto kəne tɔ.

¹⁷ Ngaa, kəm karə gə ḭ dara le, kede dɔngɔr, to arə ngadə, ngaɓa kul lom, aw yururu, gɔl nuji, kəmtondoo ɗusu m-e, ngaɓa kandə neje gə may gə ɔr kəm dəw ang nəm, pa tar mula ang nəm tɔ.

¹⁸ Njekunda ko ɗɛgɛgɛje le, ꞌdubu kandə neɗa gə dana gadə-gadə mba kar ɗɛgɛgɛ ta ne lo.