Jacques 2 - Mbede Lə Luba Kone Gə Sigi

Tar kɔr kəm naa

¹ Ngan ko̰-mje, takagə Mbayɓe lə-si Jeju Kirisi gə njerɔnduba gə ꞌtaje le, ꞌjungərije gə kɔr kəm dəwje ang.

² J-unje ne kɔji mar-ɛ: To gə ɓo dəw kara gə ula ꞌninga maa gə kubu gə bḭ may rɔ-ɛ gə ɗe nee kəy nendo gə lə-si, ngaɓa njendoo gə ula kubu gə ngisi wunji-wunji ce lo mbo̰ naa gə lə-si;

³ a to gə ɓo kəm-si to gə dɔ njekubu gə bḭ may gə ɓa ꞌpaje ar-ɛje na: ꞌI, ꞌɗe isi lo gə to gə kəm-e nee! Ɗaa ꞌpaje ar-je njendoo na: ꞌI, ꞌɗe ar dɔ gɔl-i gə taar nee ose: ꞌI, isi lo tula gɔl-m gə nangə nee.

⁴ Sisəy ɔrəje kəm naa horo-si gə ang ɓa kən wa? Ose ɔrəje kəm ne gə go tar kəji gə kṵra̰y ang wa?

⁵ Ngan ko̰-mje gə m-njigi-si ya̰, ꞌtugaje mbi-si oje: Se Luba ja ɓa mbərə nje gə ꞌto gə njendooje kəm dəwje gə dɔ nangə nee ɓa mba kar ꞌtəl to gə bawje ɗəw takagə, ngaɓa gə nje kuwa nendubaje gə mə ɓeko̰ gə lə-a, gə n-uwa dɔ gɔl-ɛ n-ngəbə nje gə ꞌnjigi-e le ang wa?

⁶ Ngaa sisəy ilaje rɔ kul dɔ njendooje gə! Se bawje le ɓa d-ula kəm-si ndoo ang wa? ꞌJejee nee le ja cibi ɓa d-aw gə si nadə gangə tar gə le ang wa?

⁷ ꞌJejee le ja ɓa ꞌtaji ri gə may pɛdə gə to dɔ-si gə le ang wa?

⁸ Tɔgərɔ ja, to gə ɓo sisəy ilaje kuji dɔ torondu gə ur dɔ mar-ɛje tɔ̰y, gə go tar gə Mbede pa na: ꞌNjigi njemar-i to gə darɔ-i be nama, ꞌɗaje gə dɔ gɔl-ɛ ja.

⁹ Ngaa to gə ɓo sisəy ɔrəje kəm dəwje nama, ɗaje neɗa gə kṵra̰y, ɗaa torondu ila tar dɔ-si gə to gə sisəy ꞌtoje gə njekal tarje.

¹⁰ Be ɓa, dəw gə ɗa-ɗa gə a dɔ torondu gə t-ɛ ləm-ləm ngaa ɗa neɗa gə kṵra̰y ɔji dɔ ye gə kara baa ja kara, tar uwa dɔ-ɛ ɔji dɔ ye gə kɛm tɔ̰y ja.

¹¹ Mba dəw gə pa na: A ɓogo lo to ang le, pa cibi tɔ pa na: ꞌTɔl dəw ang. A to gə ɓo ꞌɓogo lo to ang a ɓo ꞌtɔl dəw nama, ꞌtəl to njekal dɔ torondu.

¹² ꞌPaje tar gə ꞌɗaje ne to to gə dəwje gə d-a gangə tar dɔ-je gə ɔji go torondu dɔ to doy.

¹³ Mba ndɔ gangə tar le, ko kəmtondoo lə dəw gə o kəmtondoo ang le godo; ngaa dəw gə o kəmtondoo le, ye ɓəəl lo gangə tar ang.

Takagə gə kula ɗa

¹⁴ Ngan ko̰-mje, dəw gə pa na n-ta kagə ngaa kul-ɛ godo le se may lə-a to gə ɗi wa? To gə be ngaa se takagə ne le a kaj-ɛ ja wa?

¹⁵ To gə ɓo ngon ko̰-si gə jene kara ose ngon ko̰-si gə jingaw kara ꞌlal kubu gə ꞌlal nekusa gə ndɔ tɔ̰y,

¹⁶ a ɓo dəw kara horo-si gə pa ar-je na: Awje gə maj-ɛ, ar-je rɔ-si nunga soo ngaɓa ar-je nekusa ləl ta-si gə tɔ, lal kar-je ne gə d-a la ne gə rɔ-je le se, may lə-a to ɗi wa?

¹⁷ Takagə kara to to gə be tɔ: To gə ɓo kul-ɛ godo nama, uy mbudugu.

¹⁸ Ngaa dəw kara a pa na: ꞌI ꞌta kagə, ꞌma m-aw gə kula ɗa-m tɔ. ꞌTɔji-m takagə lə-i gə lal kul-ɛ ar-m m-o nama, ꞌma m-a tɔji-i kula ɗa-mje gə ɗəw takagə gə lə-m kar-i o tɔ.

¹⁹ ꞌTa kagə to gə Luba kara baa ɗəgədə wa? ꞌƊa gə dɔ gɔl-ɛ ja. Njilje gə kṵra̰y kara ꞌta kagə to gə bənəng tɔ, ɗaa ꞌɓəəl d-isa baa ɗɛgə-ɗɛgə.

²⁰ Ngaa ꞌi gə ɛɓɛ, ꞌnjigi gərə to gə takagə le, kula ɗ-ɛ godo nama aw kadə baa ang wa?

²¹ Bɔ-sijee Abəraham le, kula ɗ-ɛ ɓa d-unda-a ne gə dəw gə dana gadə, mba ngon-e Ijagə gə n-un-e n-ar no kɔgə le ang wa?

²² ꞌI o to gə takagə lə-a le aw naa gə kara baa gə kula ɗ-ɛ, ngaɓa kula ɗ-ɛ le gɔl takagə lə-a ar-ɛ may ɔr sṵra̰.

²³ Be ɓa tar gə Mbede pa le aw ne lo-e gə: Abəraham ta kagə Luba, ɗaa d-o-e ne gə dəw gə gadə-gadə, ɗaa ꞌɓar-ɛ ne njekura lə Luba.

²⁴ Oje to gə ɗəw kula ɗa gə le tɔ ɓa d-o ne dəw gə dəw gə dana gadə-gadə, ɓo gə mba takagə ja kara baa ang.

²⁵ Ɗəw kara baa to gə Rahabə, gə kaya jene le, kula ɗ-ɛ ɓa d-o-e ne gə dəw gə dana gadə-gadə, mba kuwa gə n-uwa nje gə d-ulaje gə rɔ-ɛ gə ngaɓa ꞌtɔji-je ɗəw gə ɗangə n-ar d-aw ne le ang wa?

²⁶ Be ɓa, ɗəw kara baa to gə darɔ dəw gə njil godo kəne nama uy mbudugu le, takagə gə kul-ɛ godo nama uy mbudugu tɔ.