Jacques 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa Jagə, ngon njekula lə Luba, gə Mbayɓe Jeju Kirisi, sisəy gəl kaje gə dɔg gə gir-je gə joo gə ꞌsɛ̰rɛ̰-je naa dɔɓe gə, m-o-si tɔ̰y ɓa!

Ko̰ gə nena

² Ngan ko̰-mje, oje nenaje ɓədə-ɓədə gə ce dɔ-si gə le gə ne rɔləl

³ mba kar-si ꞌgərəje to gə nena gə ɗəw takagə lə-si le ɓa uji kuwa gədərə.

⁴ Ngaa, məndəər le may kar-ɛ ɗa kula gə may pɛdə mba kar ꞌtoje ne dana gadə gə ꞌmayje ɔrəje ne sṵra̰, ngaɓa gə mba kar ne kara kara lal-si ang nəm tɔ.

⁵ Ngaa, to gə ɓo kəm karə lal dəw kara horo-si gə nama, may kar-ɛ dəji Luba gə nje kar ne dəwje tɔ̰y gə go məmay lə-a lal dəji ndu-je le nama, n-a kar-ɛ ja tɔ.

⁶ Ngaa may kar nj-ɛ nee le dəji gə takagə lal ɗəgə mba dəw gə ɗəgə gə ɗəgə le, ta naa gə ꞌpagəm babo gə ləl ɔr aw ne yo gə nee ngaɓa un aw ne taar jururu be.

⁷ Be ɓa, dəw gə to gə be le, may kar-ɛ əji to gə a kinga ne kara mə ji Mbayɓe gə ang,

⁸ dəw nee le to njetar kəji gə ɓe joo gə ꞌpandəm dɔ ɗəw neje gə lə-a tɔ̰y.

⁹ Ngon ko̰-si gə to njendoo le, may kar-ɛ inga rɔndɔɔ ɗəw kunda gə d-unda-a taar ndode.

¹⁰ Ngaa dəw gə to baw nama may kar unda m-e to gə a kunda nangə; mba n-a nday asə naa gə pudu mu gə ce ɗɔgəlɔ oso nangə be.

¹¹ Be ɓa, kar ce ɗaa, kud-e gə nunga kadə-kadə tɔl mu wɔ arə pudu-e ce ɗɔgəlɔ oso nangə ngaɓa ndole lə-a kara sɛ̰rɛ̰ paa tɔ. Ɗəw kara baa to gə be, baw kara nebaw lə-a a kunda nangə ndasag.

¹² Nokarə to ɔji dɔ dəw gə uwa gədərə ta nena gə; mba go nena gə ce dɔ-ɛ gə le, n-a kinga jɔgə təbə gə Mbayɓe uwa dɔ gɔl-ɛ ngina ne dəwje gə ꞌnjigi-e.

¹³ To gə ɓo nekərə ce dɔ dəw gə nama, əw rɔ-ɛ pa na: To gə Luba ɓa ərə-m. Mba Luba a kasə kḭya̰ rɔ-ɛ kar ne gə kṵra̰y ər-e ang, ngaɓa ꞌne gə Luba ja kara n-ərə dəw ang nəm tɔ.

¹⁴ Ngaa, na-na kara nekərə ce dɔ-ɛ gə, mba kəm kə̰y lə-a ja aw sə-a ila ta kula gə ar-ɛ uba-a.

¹⁵ Cibi, lo gə kəm kə̰y əndə kɛm ɗaa uji neɗa gə kṵra̰y; a ɓo neɗa gə kṵra̰y tɔgə nam ɗaa uji yo.

Ko tar gə ɗa kul-ɛ

¹⁶ Sisəy ngan ko̰-mje gə m-njigi-si ya̰ le, ərəje rɔ-si ang.

¹⁷ Nekarə nuji gə may unda mar-ɛje tɔ̰y gə nekarə baa gə may ɔr sṵra̰ le ḭ dara rɔ bɔ-sijee gə nje gəl lokarə gə mbəl rɔ-ɛ ang ose ne gə tɔji mbəl rɔ lə-a godo.

¹⁸ Mə njigi lə-a ɓa n-uji ne si gə go ɗəw tar gə tɔgərɔ, mba kar j-a to neje gə dɔngɔr horo nekundaje gə lə-a (dɔngɔr nekundaje gə Mbede pa le uji dɔ takagə Jeju ose Luba).

¹⁹ Ngan ko̰-mje gə m-njigi-si ya̰, ꞌtugaje mbi-si gə maj-ɛ oje. To gə be, may kar dəw gə ɗa-ɗa kara tuga mbi-a gə tɔg-e o ne tar, ngaɓa ila m-e ɓa pa tar, ngaɓa ɗa wungu gə tɔg-e baa ang nəm tɔ.

²⁰ Mba wungu lə dəw asə ɗa neɗa gə gadə-gadə lə Luba ang.

²¹ Gəl-e gə nee ɓa, to gə ɓo ɔsəje ne gə mina, gə neməyɛr gə al dɔ mar-ɛ ngərəng nam ɗaa, ꞌtaje tar gə a kasə kaji təbə lə-si, gə ꞌmaa dɔ ɓəngərə-si gə le gə mə kul yururu.

²² Tar gə oje le, ꞌɗaje kul-ɛ ɓa, ɓo ꞌtaje ꞌpaje ne tar kəm karə lə-si baa ang.

²³ Mba to gə ɓo dəw o tar, ɓa ɓo ɗa ne kula ang nama, nj-ɛ nee le asə naa kara baa gə dəw gə o rɔ-ɛ tatara gə,

²⁴ ngaa waga baa ja go ko ye o rɔ-ɛ le ɔdə aw ɗaa, m-e uy dɔ lo kunda rɔ-ɛ gə sɛl.

²⁵ Ngaa torondu gə may pɛdə, torondu gə ka dɔ to doy le, dəw gə ore kəm-e kəne ndəng ar ne dɔ gɔl-ɛ gə njang, o ngaɓa m-e uy dɔ-ɛ gə ang, ngaa ɗa nee kula gə mong-e nama, nj-ɛ nee le a to njenokarə dɔ kula ɗ-ɛ gə.

²⁶ To gə ɓo dəw o rɔ-ɛ gə njepolo ne, ɓa ɓo ngom t-ɛ ang nama, dəb-e nee le ərə rɔ-ɛ gə kərə baa. Nepolo lə dəw nee le to nepolo gə baa dɔro.

²⁷ Nepolo gə arə ngadə, gə to ne gə mina kəm Luba gə Bɔ dəwje ang le ɓa nee: Ka lo gə dɔ ngan alje gə, gə jene ndubaje dan nekəmandoo gə ɗa-je, ngaɓa kɔsə neje gə mina gə dɔ nangə ne ngərəng.