Galatedjé 6 - Mbede Lə Luba Kone Gə Sigi

Kɔsə kudu naa

¹ Ngan ko̰-mje, to gə ɓo dəw gə d-uwa dɔ neɗa gə kṵra̰y nama, sisəy gə Njil ɔr no-si baa ɓi le, ꞌgəd-eje gə kəji gə yururu. ꞌI ja kara unda kəm karə dɔ rɔ-i gə, na bayɛ̰, ꞌi kara, a koso dan nekərə gə tɔ.

² ꞌLaje gə naa dan neje gə kədərə gə ce dɔ-si gə yo gə nee, be ɓa, a ꞌɗaje ne torondu Kirisi.

³ Be ɓa to gə ɓo dəw gə o rɔ-ɛ gə dəw gə to ɓəəl ya̰, ngaa to ne ang nama, ərə rɔ-ɛ ye ja baa.

⁴ Ngaa may kar na-na kara tən kula ɗ-ɛ ye ja o, a ɓo inga ne gə to ngira rɔləl kəne nama, a to kɔji dɔ-ɛ ye ja gə kar-e, ɓo a kuwa kɔji ne kar dəw gə ɗangə ang,

⁵ mba na-na ja kara tar kula ɗ-ɛ a kuwa dɔ-ɛ.

⁶ May kar dəw gə ꞌtɔj-ɛ ne nama, kay ta nemayje lə-a tɔ̰y ar dəw gə nje tɔj-ɛ ne le.

⁷ Ərəje rɔ-si ang: Dəw unda Luba kogo ne ang, mba ne gə dəw dubu ja ɓa a kunja tɔ.

⁸ Dəw gə dubu ne gə kəji lə darɔ ḭ m-e gə ɗaa, a kunja ne gə ndum mbudugu ɗəw darɔ gə. Ngaa ɓo, dəw gə dubu ne gə gə kar Njil nama, a kunja kisi kəm baa gə ndɔ gə ndɔ ɗəw Njil ja tɔ.

⁹ May kar-si j-ɔrəje dɔ neɗa gə may gə ang; mba dɔ kar-ɛ asə nama j-a kunjaje kand-e to gə ɓo j-ar njang dɔ-ɛ gə.

¹⁰ Gəl-e gə nee ɓa, ɗəw to kar j-a ɗaje may gə dəwje tɔ̰y, ngaa to may kar j-a ɗa gə njetakagəje ja ɓa.

Ɗudu tar

¹¹ Oje mbede gə ꞌma ja m-unja gə ji-m dərə-dərə m-ar-si nee.

¹² Dəwje gə ꞌnjigi kuwa-si gə singa kar unjaje bərə-si le, ꞌto dəwje ꞌnjigi tɔji rɔ-je ɗəw darɔ to gə ꞌto dəwje gə ꞌto ɓəəl ya̰ ta kəm dəwje gə. ꞌƊa bənəng mba kar d-ula ne kəm-je ndoo ɔji dɔ Kirisi gə ꞌɓər-e kagə dəsə gə ang ja baa.

¹³ Be ɓa, ꞌjejee gə d-unja bərə-je nee ja kara d-ila kuji dɔ torondu gə ang; ngaa ꞌnjigi kar-sisəy unjaje bərə-si mba kar-je d-ɔsə ne gaji rɔ-je ɗəw darɔ gə.

¹⁴ Ye gə ɔji dɔ-m ꞌma le ɗaa, to gə be ang! Kuy lə Mbayɓe Jeju Kirisi kagə dəsə gə ja kara baa ɓa m-a kɔsə ne gaji rɔ-m. Ɗəw kuy gə lə-a nee le ɓa, m-o ne neje tɔ̰y gə dɔ nangə nee gə mal-ɛje to neje gə d-uy ta kəm-m gə, ngaɓa ꞌma kara m-to to gə dəw gə uy be kəm neje gə dɔ nangə nee gə malje tɔ.

¹⁵ Kunja bərə ose kunja bərə ang ɓa to ne ang, ngaa to ne kunda gə sigi ɓa to ne.

¹⁶ Dəwje tɔ̰y gə d-ila kuji gə go ɗəb-e nee le, ɗɛgɛgɛ gə ko kəmtondoo to dɔ-je naa gə kara baa gə ko dəwje lə Luba tɔ̰y.

¹⁷ Un kud-e ɓogəne saar gə kede le, m-njigi kar dəw tɔsə ta-m ang, mba ndura̰ lə Jeju to rɔ-m gə.

¹⁸ Ngan ko̰-mje, may kar mənuji lə Jeju Kirisi Mbayɓe lə-si nay gə sisəy. Oyo!