Galatedjé 5 - Mbede Lə Luba Kone Gə Sigi

Jeju ar dəwje dɔ to doy

¹ Kirisi ɔr kula ɓərə lə torondu gɔbə-si gə mba kar dɔ-si to doy. Be ɗaa, ar-je dɔ gɔl si gə jang, ɓo ꞌtəlje ulaje gɔbə-si jugu ɓərə gə gugu ang.

² Oje! ꞌMa Pɔl, m-pa m-ar-si: To gə ɓo ar-je d-unja bərə-si nama Kirisi a to ne kara mba tar lə-si ang.

³ M-njigi təl pa gɔl kara ja cibi kar dəw gə ɗa-ɗa gə ar d-unja bər-e le: May kar-e ila kuji dɔ torondu gə tɔ̰y ja ɓa.

⁴ Sisəy gə ꞌsangəje mba kar d-o si gə dəwje gadə-gadə ɗəw torondu gə le, horo-si riya dana gə Kirisi, ngaɓa ꞌlalje mənuji.

⁵ Kar-sijee le, j-a ngina gə takagə ɗəw Njil gə mba kar d-o si gə dəwje gə gadə-gadə, ye ɓa gə ne gə m-ngəɓə.

⁶ Mba dəw gə um naa gə Kirisi Jeju nam le, kunja bərə ose kunja bərə ang ɓa to gə ne ang, ngaa takagə gə tɔji rɔ-ɛ, gə njigi ɓa to gə ne.

⁷ Sisəy unje ɗəw gə maj-ɛ nam: Na ɓa ɔgə-si lo kila kuji dɔ tar gə tɔgərɔ gə wa?

⁸ Kɔgə gə d-ɔgə si le, gəl-e ḭ ɓə lə ye gə nje ɓar-si ang.

⁹ Guway kodo njɛ̰ ja ɓa ꞌmbo̰y ne nduji ɗaa ti ɗusu lo.

¹⁰ ꞌMa ɗaa, m-unda mə-m dɔ-si gə go ɗəw lə Mbayɓe, to gə kəji lə-si to dang gə kar ꞌma ang. Ngaa ye gə nje tuji kəji lə-si le, to gə na-na ja kara, tar-ɛ a kuwa dɔ-ɛ.

¹¹ Ngan ko̰-mje, ye gə ɔji dɔ ꞌma le, to gə ɓo m-to gə njekila mbərə tar kunja bərə nama, mba ɗi cibi ɓa d-ula kəm ndoo wa? Bənəng ɗaa, tar kuy lə Kirisi kagə dəsə to jigi tuga lə dəw kara ang.

¹² Nje gə aw tuji kəji lə-si le, may kar ꞌtəl rɔ-je gə mbakuduje!

Nja ɗəw Njil gə

¹³ Sisəy ɗaa, ngan ko̰-mje, ꞌɓar-si kar dɔ-si to doy; ɗaa ne kara ɓa le, may kar unje dɔ to doy nee le ꞌnjaje ne ɗəw darɔ gə ang, ngaa go ɗəw njigi ɗaa, ꞌɗaje kula ar-je naa gə yo gə nee.

¹⁴ Be ɓa, torondu tɔ̰y le tɔl t-ɛ gə tar gə kara baa nee: ꞋI a njigi njemar-i to gə darɔ-i be.

¹⁵ Ngaa to gə ɓo ꞌto̰je naa gə usaje naa gə yo gə nee nama, oje gə maj-ɛ ɓa na a tujije naa gə yo gə nee tɔ.

¹⁶ Tar gə m-pa m-ar-si ɓa nee: Ḭya̰je Njil Njerɔsangə ar-je tɔji-si ɗəw, ɗaa a ɗaje mə njigi lə darɔ ndɔ kara ang.

¹⁷ Mba neje gə kar darɔ tila kəm kar Njil, ngaɓa kar Njil kara tila kəm kar darɔ; neje lə darɔ gə neje lə Njil, ꞌtɔsə kəm naa ɓa gə mba kar ꞌɗaje neje gə mə-si njigi ang.

¹⁸ Ngaa to gə ɓo Njil ɔr no-si nama, torondu o̰ dɔ-si ang.

¹⁹ Neje gə darɔ njigi le to ɗaga ɗang-ɗang. Neje le ɓa nee: Kaya, wə̰rə̰ neɗa gə kṵra̰y, bula jagəda,

²⁰ polo magəje, ɓar uma, njigi naa ang gə kɔrɔ, ko ta naa ang, nər mə, wungu mbə, kəji mə bo, tḭ naa, ngaɓa kay naa,

²¹ ɗa kəm kə̰y, to mbə kodo, to ka guru, ngaɓa neje gə ɗangə gə ta gə je naa be. M-təl m-pa m-ar-si to gə m-ndəji-si ne kede le; dəwje gə nje ɗa neje gə to gə be le, d-a kandə ɓeko̰ gə lə Luba ang yom ja.

²² Ngaa kandə Njil le ɓa nee: Njigi, rɔləl, ɗɛgɛgɛ, kore ur, məmay, ɗa may, takagə,

²³ kaw yururu, kuwa mə ngangə; neje gə nee le, torondu ila tar dɔ-ɛ gə ang.

²⁴ Ɗaa nje kar Kirisi Jeju-je le ɓərə darɔ gə ɓo neje gə uwa-je ɓərə gə kagə dəsə gə.

²⁵ To gə ɓo Njil ɓa ar-si j-isi kəm baa nama, j-a njaje gə go ɗəw lə-a.

²⁶ J-undaje kar-si j-a tɔsə ne ta naa gə yo gə nee ang, ngaɓa j-a ꞌɗa kəm kə̰y dɔ naa gə yo gə ne ang tɔ.