Galatedjé 4 - Mbede Lə Luba Kone Gə Sigi

¹ Be ɓa, m-pa na: Dɔ kar tɔ̰y gə njekuwa nenduba nay ne ngon baa ɓi le, n-to gə ꞌɓəə neje tɔ̰y ja ngaa, ne kara gə n-unda ne rɔ-ɛ ɓəɗə gə ɓərə le godo.

² Ngaa n-a kila kuji dɔ dəwje gə njegəm-eje gə nje ka dɔ nekingaje lə-a saar n-ngəbə ne ndɔ gə bɔ-ɛje ɔji.

³ Sijee kara, logə j-a nay nganje ɓi le, j-a to ɓərəje lə njilje gə o̰ dɔ nangə nee.

⁴ Ngaa logə dɔ kar gə d-ɔji asə ɗaa, Luba ula ngon-e. Jene ɓa uji-e, ɗaa n-tɔgə gəl torondu gə.

⁵ N-ɗe n-ɔr dəwje gə d-isi gəl torondu mba kar d-a to ngan kodoje.

⁶ Ne gə tɔji to gə ꞌtoje nganje lə Luba le ɓa nee, Luba ula Njil Ngon-e mə-si gə. Njil ɓar ne wəəl na: Aba! Bɔy!

⁷ Be ɓa, ꞌi to ɓərə ang ngaa, ngaa ꞌi to ngon gə kuji kəy ngaa ɓo; to gə ɓo ꞌi to ngon gə kuji kəy nama, ꞌi to nje kuwa nenduba ɗəw gə lə Luba.

Pɔl jɔgə rɔ-ɛ ɔji dɔ njetakagəje gə Galasi

⁸ Kede, logə ꞌgərəje Luba ang ɓi le, ꞌtoje ɓərəje lə njilje gə kṵra̰y gə to magə baa.

⁹ Ngaa ɓisine ɗaa, ꞌgərəje Luba ose, Luba gərə si, ngaa na ban cibi ɓa ꞌtəlje awje rɔ njilje gə tɔgə-je godo, ngaɓa to neje gə baa wa? Se ꞌnjigije mba təl to ɓərəje lə-je cibi wa?

¹⁰ Ilaje kuji dɔ ndɔje gə, nayje, karje, dɔ kar gə Ɓalje!

¹¹ Njil-im ce mba kulaje tɔ̰y gə m-ɗa horo-si gə le təl to ne gə baa.

¹² Ngan ko̰-mje, kɔgərɔ ja, undaje rɔ-si to gə ꞌma be, mba ꞌma m-təl m-to to gə sisəy be tɔ. M-gərə to gə ꞌtujije mə-m ang baa.

¹³ ꞌGərəje gə maj-ɛ to gə mbɔr dɔ rɔ-m gə to-m ɓa m-ila mbərə Tar gə May m-ar-si dɔngɔr.

¹⁴ Rɔ-m gə jɔgə-m ya̰ ja le, təl to nena mə-si, ngaa ꞌdabə-mje ang nəm ngaɓa ꞌyiɛm-mje ang nəm tɔ; uwa-mje rɔ-si to gə anji lə Luba, to gə Kirisi Jeju be.

¹⁵ Se rɔləl lə-si gə kede le aw ɗa ngaa wa? Mba rɔləl lə-si gə m-o dɔ ndɔ-ɛ əng le ɗəw to nama kandə kəm-si ja kara a tɔr-je kar-mje.

¹⁶ Se tar gə tɔgərɔ gə m-pa m-ar-si le ɓa m-təl to ne njeba̰a̰ lə-si wa?

¹⁷ Dəwje gə ꞌɗa rɔ-je to gə ta dɔ-si o̰je ya̰ əng le, ɗa gə ne gə tɔgərɔ, ngaa d-aw njigi mba kɔr-si mə ji-m gə, mba kar ꞌɗaje to gə bənəng ɔji dɔ-je tɔ.

¹⁸ May kun rɔ ɗa ne ne gə may gə dɔ karje tɔ̰y, ɓo gə mba kar-m m-ga̰ horo-si gə ɓa ang.

¹⁹ Ngan-m, m-təl m-o ko̰ ne mba tar lə-si ja cibi, to gə jene gə ndo to-e be saar gə mba kar Kirisi ula ne ngira-a mə-si gə.

²⁰ Ɓogəne gə m-ar nee ja, m-njigi ga̰ horo-si gə mba pa tar gə ndu gɔbə gə ɗangə, mba lo tar igi-m sɛl mba tar lə-si.

²¹ ꞌPaje ar-mje m-o: Sisəy gə ꞌnjigi-je mba kisi gəl torondu gə le, tar gə torondu pa le se mbi-si o ang wa?

²² Be ɓa, ꞌɗa mə Mbede gə na: Abəraham uji nganje gə jingaw joo, ye gə kara n-uji-e gə jene gə to ɓərə, ɗaa ye gə kara gə jene gə dɔ-ɛ to doy.

²³ Ngaa ngon lə jene gə to ɓərə gə n-uji-e ɗəw darɔ gə, ɗaa ngon lə jene gə dɔ-ɛ to doy le n-uji-e gə go ne gə Luba uwa dɔ gɔl-ɛ.

²⁴ Tar gə nee le to ndaji ne: Jeneje gə joo nee le tɔji kone gəl joo ja tɔ. ꞌYe gə kara ḭ dɔ ər gə Sinayi gə ri-a na Agar, n-unda gəl ɓərəje,

²⁵ Agar le tɔji dɔ ər gə Sinayi le to dɔ nangə gə Arabi ɗaa, ꞌne n-asə naa gə ɓe gə Jerujalɛm gə ɓisine, mba n-to ɓərə gə ngan-ɛje naa gə kara baa.

²⁶ Ngaa Jerujalɛm gə taar dɔ-ɛ to doy, ɗaa ꞌne ja to ko̰-sijee.

²⁷ ꞌƊa mə Mbede na: ꞌKaw kadə, ꞌi gə uji ngon ang! ꞌI ɗa rɔləl, ꞌi gə ndɔ kara kara ꞌgərə ndo ang, ꞌɗa rɔləl gə ꞌkuwi ta-i gə! Mba ngan lə jene gə ngab-ɛje mbad-ɛ gə d-a bula Kunda ngan lə jene gə ngab-ɛje ga̰.

²⁸ Ɗaa sisəy ngan ko̰-m le, ꞌtoje nganje gə d-uji-si ɗəw ndu kun gə lə Luba to gə Ijagə be.

²⁹ Kede ləw le, ngon gə d-uji-e ɗəw darɔ gə ula kəm ngon gə d-uji-e ɗəw gə lə Njil ndoo le, ɓogəne kara to to gə be ja ɓi.

³⁰ Ngaa Mbede pa na ban wa? ꞌTɔbə jene gə to ɓərə gə ngon-e mba ngon lə bərə a kuwa nenduba naa gə ngon lə jene gə dɔ-ɛ to doy ang.

³¹ Be ɓa, ngan ko̰-mje, j-a to nganje lə jene gə to ɓərə ang, ngaa j-a toje nganje lə jene gə dɔ-ɛ to doy.