Galatedjé 3 - Mbede Lə Luba Kone Gə Sigi

Pɔl dəji tar njetakagəje gə dɔ nangə gə Galasi

¹ Əy! Sisəy dəwje gə dɔ nangə gə Galasi, ꞌtoje ɛbɛje! Ambala ɓa uwa-si wa? Sisəy gə d-ɔr gəl tar kuy lə Jeju Kirisi kagə dəsə arə ngadə d-ar-si.

² Oje, m-a dəji tar kara baa ja mba ko: Se go ɗəw ɗa torondu ɓa ingaje ne Njil ose gə go ko tar takagə wa?

³ ꞌToje ɛbɛje bənəng to gə ban ɓa nee wa? Umaje kudu nja gə maj-ɛ ɗəw Njil gə cibi ngaa, a kaw tɔlje t-ɛ ɗəw darɔ gə wa?

⁴ Se oje ko̰ ne baa ja wa? To may kar oje ko̰ ne bənəng baa ang!

⁵ Luba ar-si Njil, ngaɓa ɗa nemisi horo-si gə mba kuji gə ilaje dɔ torondu ose gə mba ꞌtaje kagə Tar gə May wa?

⁶ Be ɓa Abəraham ta kagə Luba, ɗaa Luba o-e ne gə dəw gə gadə-gadə.

⁷ Oje gə maj-ɛ ɓa, dəwje gə njetakagəje ɓa ꞌto ngan lə Abəraham.

⁸ Ye gə nee le ɓa, Mbede pa kede to gə Luba a ko dəwje gə ꞌgərə Luba ang gə dəwje gə gadə-gadə gə go ɗəw takagə. Luba pa Tar gə May nee le ar Abəraham kede: Gəl kuji dəwje tɔ̰y gə dɔ nangə nee d-a kinga ndu tɔr ɗəw gə lə-i.

⁹ To gə be ɓa, njetakagəje d-inga ndu tɔr naa gə Abəraham, njetakagə.

¹⁰ Dəwje tɔ̰y gə d-ila kuji dɔ torondu gə ɓa mba kinga ne kaji le, ndɔl uwa dɔ-je, mba Mbede pa na: Dəw gə ɗa-ɗa gə ila kuji dɔ tar tɔ̰y gə ɗa mə mbede torondu gə ang, mba ɗa kul-ɛ ang nama ndɔɔl uwa dɔ-ɛ.

¹¹ Dəw kara ja gə to dəw gə gadə-gadə gə go torondu no Luba gə le godo, ye gə nee ɗaa to arə ngadə, mba: Dəw gə gadə-gadə a kaw kəm baa ɗəw gə lə takagə.

¹² Ɗaa torondu to dangə gə takagə, ngaa mbede pa na: Dəw gə a ɗa ne tɔy gə go neje nee nama a kaw ne kəm baa.

¹³ Kirisi uga dɔ-si gəl ndɔɔl gə lə torondu, təl to ne ndɔɔl mba tar lə-si. To gə Mbede pa na: Ndɔɔl uwa dɔ dəw gə ꞌɓər-e kagə.

¹⁴ Be ɓa, dəwje gə ꞌgərə Luba ang gə ꞌta kagə Jeju Kirisi d-inga ne ndu tɔr lə Abəraham, mba kar ɗəw takagə gə ɗaa, sijee kara j-a kinga ne Njil gə Luba uwa dɔ gɔl-ɛ.

¹⁵ Ngan ko̰-mje, ꞌma m-pa tar pa lə dəwje: Ndu gə dəw ḭya̰ gə maj-ɛ ɓa uy le, dəw gə ɗangə a tuji ang nəm a kila mar-ɛ kəne ang nəm tɔ.

¹⁶ Abəraham ɓa Luba uwa dɔ gɔl ndu kunje ar-ɛ gə gəl kuji lə-a. Mbede pa ɔji dɔ gəl kuji dəwje gə bula ang, ngaa ɔji dɔ gəl kuji gə kara baa ɗəgədə gə to Kirisi.

¹⁷ Tar gə m-njigi pa ɓa to nee: Luba uwa dɔ gɔl ndu kun ar Abəraham gə maj-ɛ nəm ngaɓa gə dɔ gɔl-ɛ nəm tɔ, asə ɓal tɔl-tɔl sɔɔ gə dɔg munda nam ɓa torondu ɗe ɓi le ja, torondu nee le a tɔji ndu kun gə Luba uwa dɔ gɔl-ɛ wa?

¹⁸ To gə ɓo, gə go torondu ɓa dəw inga ne nenduba nama, ne nee le a ɗe ɗəw ndu kun gə d-uwa dɔ gɔl-ɛ ang baa, ngaa mba ndu kun gə d-uwa dɔ gɔl-ɛ ɓa, Luba uwa ne nuji gə Abəraham.

¹⁹ Torondu to mba ɗi wa? D-ar torondu or-e dɔ ndu kun gə d-uwa dɔ gɔl-ɛ mba kar kal tar kila ne rɔ-ɛ gə ɗaga saar mba kar gəl kuji gə d-uwa dɔ gɔl-ɛ le ɗe ne. Torondu gə d-ar anjije pa tar-ɛ gə ɗaga ɗəw gə lə nje gɔl tar.

²⁰ Ngaa nje gɔl tar nee le ar horo dəwje gə joo, ngaa ye gə nee le, Luba ja gə kar-ɛ baa.

²¹ Se torondu tila kəm ndu kunje gə Luba uwa dɔ gɔl-ɛ wa? Bənəng ang baa! To gə Luba a kaji dəw ɗəw torondu gə nama, neɗa gə gadə-gadə a ɗe ɗəw torondu gə ja tɔgərɔ.

²² Ngaa Mbede um ne tɔ̰y gəl singamongə gə lə neɗa gə kṵra̰y mba kar ndu kun gə d-uwa dɔ gɔl-ɛ le, d-ar njetakagə ɗəw takagə Jeju Kirisi gə.

²³ Kede nam ɓa kar takagə ɗe le, torondu uwa-si ɓərə mba takagə gə d-a kila dɔ-ɛ gə ɗaga le.

²⁴ Be ɓa, torondu to njekɔr no-si ngina ne Kirisi, mba kar d-o ne si gə dəwje gə gadə-gadə ɗəw takagə gə.

²⁵ Logə takagə ɗe nam ɗaa, torondu le ɔr no-si ang ngaa.

²⁶ ꞌToje nganje lə Luba ja tɔ̰y mba ꞌtaje kagə Kirisi Jeju,

²⁷ sisəy tɔ̰y gə umje naa gə gə Kirisi ɗəw batɛm gə, ꞌtəlje taje ne naa gə Kirisi.

²⁸ Jiibi ang nəm Gərɛk ang nəm, ɓərə ang nəm, ngon kuji ang nəm, jingaw ang nəm jene ang nəm, mba sisəy tɔ̰y ꞌtoje dəwje gə kara baa gəl Kirisi Jeju.

²⁹ Cibi, sisəy tɔ̰y ꞌtoje kar Kirisi, ɗaa ꞌtoje gəl kuji Abəraham, nendubaje gə ɗəw ndu kun gə Luba uwa dɔ gɔl-ɛ.