Galatedjé 2 - Mbede Lə Luba Kone Gə Sigi

Pɔl ɔr gəl kula gə ɗa

¹ Ɓal dɔg gə gir-e gə sɔɔ go-e gə ɗaa, m-ar-je gə Barənabas j-aw mə ɓe gə Jerujalɛm to gə ɗangə, m-uwa Titə kara ji-m gə tɔ.

² M-aw m-ila ne kɔji dɔ ne gə Luba kila gəl-e ar-m kar m-aw m-ɔr gəl mbərə Tar gə May gə m-ila m-ar dəwje gə to gə Jiibije ang m-ar-je d-o; m-uwa dɔ naa gə bubaje gə lo-e ɓədə, mba kar kula gə m-ɗa le unda nangə baa ang.

³ Ngaa Titə, dəw gə to Gərɛk gə aw sə-m le, kuwa ja kara d-uwa-a gə singa d-ar n-unja bər-e ang.

⁴ Be ɓa, mba ngan ko̰-sijee gə mbɔr-ɛ baa lom rɔ-je d-andə horo-si gə go ngə̰y, ꞌnga̰ dɔ to doy lə-si gə gəl Jeju Kirisi mba təl ne si gə ɓərəje.

⁵ Kar kara baa ja kara j-ula dɔ-si j-ar-je ang, mba kar tar gə tɔgərɔ lə Tar gə May le to ne horo-si gə gə no.

⁶ Nje gə d-o-je gə bubaje le, le ꞌtoje ne gə bubaje ja kara, ɔsə-m kəne ang! Mba Luba ɔr kəm dəw ang. Dəbeje nee le d-uwa-m gə singa d-ar-m ɗa ne gə ɗangə m-ila dɔ mar-ɛ gə ang.

⁷ Ngaa ꞌjejee d-o to gə Luba ja ɓa um kula kila mbərə Tar gə May horo dəwje gə ꞌgərə Luba ang ji-m gə, to gə n-um ne ji Piyɛr gə ɔji dɔ Jiibije,

⁸ mba Luba ja ɓa ɗa-m gə njeka̰ykula lə dəwje gə ꞌgərə Luba ang, to gə n-ɗa ne Piyɛr gə njekula lə Jiibije.

⁹ Jagə je Sepas gə Ja̰ gə nay to dubu Mbo̰ naa lə njetakagəje ꞌgərə to gə Luba uwa sə-m nuji, ɗaa d-uwa ji kɔl je gə Barənabas tɔji ne mə kara mba kar-sijee gə j-a kaw ɓə lə dəwje gə ꞌgərə Luba ang, ɗaa ꞌjeje d-a kaw bə lə Jiibije.

¹⁰ Ne kara baa gə ꞌdəji kar j-a ɗa ɗaa, kar mə-si to dɔ la gə njendooje ja baa, ɗaa to ne gə uwa mə-m kar-m m-ɗa ja tɔ.

Pɔl pa gə Piyɛr ta kəm-e gə

¹¹ Ngaa logə Sepas ɗe mə ɓe gə Antiyos gə to dɔ nangə gə Siri, ɗaa m-pa sə-a kəm dəwje mba kula ɗ-ɛ gə to gə dɔ gɔl-ɛ ang.

¹² Be ɓa, kede le n-aw n-usa ne gə dəwje gə ꞌgərə Luba ang, ngaa logə dəwje ḭ bə lə Jagə ɗe ɗaa, n-ɗa gusu mbadə n-ɔsə rɔ-ɛ ngərəng mba n-ɓəəl Jiibije.

¹³ Jiibije gə kɛm kara ꞌɗa to gə ꞌne be, d-ar Barənabas kara ndəji kəm-je to ne njetar mula tɔ.

¹⁴ Logə m-o to gə pa nja lə-je to gadə-gadə gə go tar gə tɔgərɔ lə Tar gə May ang ɗaa, m-pa m-ar Sepas kəm-je gə tɔ̰y na: ꞌI gə to Jiibi, ɓa ꞌɗa neɗa lə dəwje gə ꞌgərə Luba ang, ɓo gə pa ne nejiɓe lə Jiibije ang. Ngaa dəwje gə ꞌgərə Luba ang ɓa ꞌi ɔsə-je mba kar d-un kula ɗa nejiɓe lə Jiibije, mba ɗi wa?

¹⁵ Sijee le, j-a to Jiibije gə kuji kəy, ɓo sijee j-a to njeneɗaje gə kṵra̰y to gə dəwje gə ꞌgərə Luba ang be ang.

¹⁶ To gə be ɓa, Luba o dəw gə dəw gə gadə-gadə ɔji dɔ kuji gə kila dɔ torondu gə ang ngaa ɔji dɔ takagə Jeju Kirisi. Sijee kara j-a ta kagə Jeju Kirisi mba kar Luba o ne si gə dəwje gə gadə-gadə ɗəw ta kagə Kirisi gə, ɓo dəw a to gadə-gadə ɗəw kila kuji dɔ torondu gə ang, mba dəw kara gə Luba a ko-e gə dəw gadə-gadə gə go kuji gə kila dɔ torondu le godo.

¹⁷ Ngaa to gə ɓo j-a sangə kar d-o si gə dəwje gə gadə-gadə ɗəw gə lə Kirisi nama, sijee kara j-a təl to njeneɗaje gə kṵra̰y tɔ. Ɗaa se Kirisi to njekula lə neɗa gə kṵra̰y wa? Be ang baa.

¹⁸ Gəl-e gə nee ɓa, to gə ɓo m-təl m-gɔl neje gə m-tɔji nama, ꞌma ja, m-təl tɔji rɔ-m gə njekal tar.

¹⁹ Be ɓa, gə go torondu le, ꞌma m-uy ɗəw torondu gə gə mba kisi ne kəm baa mba Luba. ꞌƁərə-m kar kagə dəsə gə gə Kirisi,

²⁰ m-aw kəm ja baa ngaa to ꞌma ɓa m-aw kəm baa ang, ɗaa Kirisi ɓa isi kəm baa mə-m gə. Kaw kəm baa lə-m ɗəw darɔ gə ɓogəne le m-aw kəm baa ɗəw takagə ngon lə Luba gə njigi-m ngaɓa ila rɔ-ɛ kɔrɔ mba-m.

²¹ ꞌMa, m-mbadə mənuji lə Luba ang, mba to gə ɓo dəw a to dəw gə gadə-gadə ɗəw gə torondu nama, Kirisi uy baa ja.