Galatedjé 1 - Mbede Lə Luba Kone Gə Sigi

Pɔl ɗa o-je

¹ ꞌMa, Pɔl, m-ɗa mbede nee, m-ar-sisəy njetakagəje gə mə Mbo̰ naaje lə njetakagə gə dɔ nangə gə Galat. M-to njeka̰ykula lə Jeju Kirisi gə dəwje ɓa ula-m ang nəm ngaɓa dəw ɓa ɔr-m ang nəm tɔ. Ngaa Jeju Kirisi je gə Luba gə Bɔ gə to nje ndol Kirisi horo nje gə d-uy ɓa d-ula-m.

² Ngaɓa ngan ko̰-mje tɔ̰y gə ꞌga̰ sə-m naa gə Mbo̰ naa lə njetakagəje gə dɔ nangə gə Galasi

³ j-a dəji Bɔ-sijee Luba gə Mbayɓe lə-si Jeju Kirisi kar d-ar-si mənuji gə ɗɛgɛgɛ.

⁴ Mbayɓe Jeju Kirisi gə un rɔ-ɛ uga ne neɗa gə kṵra̰y lə-si, mba kɔr-si ne dɔ ndɔje gə ɓogəne gə may ang gə go mənjigi lə Bɔ-sijee Luba.

⁵ May kar riɓar to dɔ Luba gə gə ndɔ gə ndɔ! Oyo!

Tar gə May kara baa ɗəgədə

⁶ M-a pḭḭ, m-gərə ang, se ban cibi ɓa ꞌturuje rɔ-si pagəsa mba kḭya̰ go ye gə nje ɓar-si ɗəw mənuji gə lə Kirisi mba ta ne Tar gə May gə ɗangə wa?

⁷ M-pa ɔji ne dɔ Tar gə May gə ɗangə ang ngaa m-pa ɔji dɔ dəwje gə ꞌɗe ꞌjɔgə-si ngaɓa njigi turu dɔ Tar gə May lə Kirisi le gə nangə.

⁸ Ngaa to gə ɓo, to gə sijee ja ose anji gə dara ɓa pa Tar gə May gə ɗangə or-e ne mbo kar ye gə j-a pa j-ar-si nama, may kar ndɔɔl uwa dɔ dəbe nee le!

⁹ M-təl m-pa m-ar-si to gə j-a pa ne tar-ɛ kede le ɓi: to gə ɓo dəw ila mbərə Tar gə May gə ɗangə or-e go ꞌye gə sisəy ingaje rɔ-sijee gə nama, may kar ndɔɔl uwa dɔ dəbe nee le!

¹⁰ Ɗaa ɓisine, se əjije to gə m-aw sangə kar dəwje ɓa d-ila tar kudu-m gə ose Luba wa? Se dəwje ɓa m-sangə mba may ta kəm-je gə wa? Kara be ang! To gə ɓo m-sangə mba may ta kəm dəwje gə nama m-a to ɓərə lə Kirisi ang.

Pɔl ɔr gəl ɗəw gə to ne njekula

¹¹ Ngan ko̰-mje, m-pa kar-si ꞌgərəje gə maj-ɛ, Tar gə May gə m-ila mbər-e le ngira-a ḭ mə ji dəw gə ang.

¹² ꞌMa ja kara, dəw ɓa ar-m ang nəm ngaɓa dəw ɓa tɔji-m ang nəm tɔ, ngaa Jeju Kirisi ɓa kila gəl-e ar-m.

¹³ Be ɓa, sisəy oje tar pa nja-m gə ɔji dɔ nejiɓe lə Jiibije: m-ula kəm Mbo̰ naa lə njetakagəje lə Luba ndoo ya̰ ngaɓa m-njigi tuji-je ne pugudu.

¹⁴ M-ɗa singa m-nday dəwje bula gə to njeba kujije lə-m, gə nje gə gəl kuji-m gə, ɔji dɔ nejiɓe lə Jiibije, m-un rɔ-m ja tɔ̰y mba nejiɓe lə ka-sijee.

¹⁵ Ngaa, logə Luba mbərə-m mə ko̰-mje gə, gə go ɗəw mənuji lə-a ɗaa ɓar-m.

¹⁶ ꞌNe ja n-tɔji-m ngon-e mba kar-m m-ila mbərə lə-a m-ar dəwje gə ꞌgərə Luba ang, be ɓa, m-dəji tar ndəji dəw ang;

¹⁷ m-aw m-inga njeka̰ykulaje gə kede gə isi mə ɓe gə Jerujalɛm ang baa ja, ngaa m-ɔdə m-aw dɔ nangə gə Arabi. Cibi, ɓa m-təl ɗe to gə ɗangə mə ɓe gə Damasə.

¹⁸ Ɗa ɓal munda go-e gə ɓa, m-aw mə ɓe gə Jerujalɛm mba kinga Piyɛr, ngaɓa m-ɗa ndɔ dɔg gə gir-e gə mi ɓə lə-a.

¹⁹ Ngaa m-o njeka̰ykulaje gə kɛm ang, ɗaa Jagə gə ngon ko̰ Mbayɓe ja gə kar-e baa ɓa m-o-e.

²⁰ Tar gə m-aw pa m-ar-si nee le, no Luba gə ja, to tar gə ɗəgərə ang.

²¹ Cibi, m-aw dɔ nangə gə Siiri, gə dɔ nangə gə Silisi.

²² Dəw kara kara gərə-m Mbo̰ naaje lə njetakagəje gə mə Kirisi gə, dɔ nangə gə Jude gə ang.

²³ ꞌPa tar lə-m gə pa baa d-ar-je na: ꞌNe gə nje kula kəm-si ndoo dɔ ndɔ gə kede le, ɓisine n-ila mbərə tar gə takagə gə n-njigi tuji kede le.

²⁴ Ɗaa ꞌpidije nee Luba mba tar lə-m.