Ephésiendjé 6 - Mbede Lə Luba Kone Gə Sigi

¹ Nganje, ilaje kuji dɔ njekuji-sije gə gə ɗəw gə lə Mbayɓe, mba ye ɓa to ne gə to dana gadə:

² ila kuji dɔ bɔ-ije je gə ko̰-ije gə to gə ndu gə dɔngɔr gə d-uwa dɔ gɔl ne d-or-e ne go-e

³ mba kar inga ne rɔləl ngaɓa kar ndɔ-i bula ne dɔ nangə gə nee.

⁴ Ngaɓa sisəy bɔ nganje kara, ulaje wungu mə ngan sijee gə ang, ngaa odoje-je nəm ngaɓa gə ꞌsirije-je gə ꞌndəjije-je gə go ɗəw lə Mbayɓe.

⁵ Ngan lokisije ilaje kuji dɔ ꞌɓəə-sijee gə ɗəw darɔ gə, gə ꞌɓəəl gə kisa gə mə gə dana gadə, to gə ꞌɗaje ne gə Kirisi be tɔ;

⁶ ɓo ꞌɗaje gə mba ta kəm-je baa ang, ngaɓa to gə gə mba may ne ta kəm dəwje gə, ngaa asə naa gə ngan lokisije lə Kirisi, gə ꞌɗa mə njigi lə Luba gə dɔ ɓəngərə-je tɔ̰y ja.

⁷ ꞌƊaje kula gə dɔ ɓəngərə-si tɔ̰y, to gə ꞌɗaje ar-je Mbayɓe be ɓo ar-je dəwje baa ang,

⁸ may kar-si ꞌgərəje gə maj-ɛ to gə kara kara tɔ̰y ja, ngon lokisi ose ngon kuji kara, neɗa lə-a gə may gə ye ɗa ja ɓa a kinga ne ne gə may mə ji Mbayɓe gə.

⁹ Ye gə ɔji dɔ sisəy ꞌɓəəje ɗaa, ꞌɗaje ne ar-je ngan lokisije lə-si ɗəw kara baa to gə be ja tɔ, ngaɓa undaje dɔ-si gə gə maj-ɛ mba kar ulaje ɓəəl mə-je gə ang, ngaɓa undaje dɔ-si gə gə maj-ɛ to gə Mbayɓe gə to ꞌɓəə sisəy gə ꞌjejee, gə isi dara le ɔr kəm dəw kara ang.

Neɗɔje lə njetakagə Kirisi

¹⁰ Ne gə ɗangə ɓi ɗaa, undaje singa-si dɔ mar-ɛ gə ɗəw gə lə Mbayɓe gə go singamong-e gə to gə dɔ-ɛ doy.

¹¹ Umje neɗɔje lə Luba tɔ̰y rɔ-si gə mba kar-si asə kar-je ne gədərə ta gusuje gə lə ꞌSɛ̰ngərɛ̰.

¹² Mba ɗɔ lə-sijee ɔji buwa darɔ gə məsə ang, ngaa ɔji dɔ nje dum dɔ loje gə njeko̰ ɓeje, gə njeko̰ dɔ loje gə cil ciməri gə gə dɔ nangə gə nee, gə njilje gə njesingamongəje gə kṵra̰y gə dara.

¹³ Gəl-e gə nee ɓa, umje neɗɔje lə Luba tɔ̰y rɔ-si gə mba kasə dum ne dɔ lo dɔ ndɔ gə kṵra̰y gə, ngaɓa, lo gə sisəy ꞌgɔlje dɔ gɔl neje tɔ̰y ɗaa, mba kuwa ne gədərə tɔ.

¹⁴ Uwaje gədərə ja: tar gə tɔgərɔ ɓa uwaje ne mə-si gə gagəra ngaɓa ulaje neɗa gə gadə-gadə gə kubu ɗɔ gə ngira king-king;

¹⁵ mə kar kəgəgə dɔ kila mbərə Tar gə May gə lə ɗɛgɛgɛ ɓa ulaje gə sabɔgɔ gɔl si gə;

¹⁶ dan neje gə tɔ̰y le, unje dər ɗɔ gə to gə takagə undaje ne ndo̰ ninga lə njeməkṵra̰y gə un pər lam-lam kalang gə ɗangə;

¹⁷ unje jɔgə kaji ji-si gə naa gə kara baa gə kiya bayi lə Njil gə to gə tar lə Luba.

¹⁸ ꞌDəjije Luba gə dɔ karje tɔ̰y ɗəw njil gə gə pa dəji gə gə lo-e lo-e ꞌɗaje ne kɔgərɔ. Bənəng ɗaa, undaje kəm karə dɔ rɔ-si gə, ḭya̰je rɔ-si yag ja ꞌtugaje ne njoro lo dəji Luba gə mba njerɔsangəje tɔ̰y;

¹⁹ ngaɓa mba ꞌma gə mba kar lo gə ɓo m-cɛ̰ ta-m ja̰ nama Luba um tar lə-a kəne ar-m m-pa gə ɓəəl ang m-ar dəwje ꞌgərə ne ne gə to lo kiya-a gə ɔji dɔ Tar gə May.

²⁰ Tar gə May gə nee, gə m-to gə njekila mbər-e le ɓa ꞌtɔ-m ne gə kula lar; may kar-m m-pa tar-ɛ gə ɓəəl ang, ngaɓa gə go ɗəb-e gə may kar-m m-pa ne le ja tɔ.

Ko naa gə gə ɗudu

²¹ Mba kar-sisəy kara, ꞌgərəje ne pa kisi-m gə m-isi, gə kula ɗa-m gə m-ɗa le ɗaa, ngon ko̰-m gə m-njig-e ya̰, njekula lə Mbayɓe gə gadə, gə ri-a na Tisikə ɓa a pa tɔ̰y kar-si oje.

²² M-o som ja m-ula-a ɓə lə-si mba kar ꞌgərəje ne pa kisi gə j-isi ngaɓa mba kar n-ula ne jingaw mə-si gə tɔ.

²³ May kar ɗɛgɛgɛ gə njigi lə Luba gə Bɔ dəwje je gə Mbayɓe Jeju Kirisi nay gə ngan ko̰ naaje gə ɗəw takagə gə.

²⁴ May kar mənuji nay gə dəwje tɔ̰y gə ꞌnjigi Mbayɓe lə-sijee Jeju Kirisi gə pa njigi gə unda nangə ang.