Ephésiendjé 5 - Mbede Lə Luba Kone Gə Sigi

¹ Sisəy le, ꞌtoje gə ngan njigije lə Luba, be ɗaa ꞌndəjije kəm-e,

² ngaɓa ꞌnja-je dan njigi gə ɗəw kara baa to gə Kirisi kara njigi sijee ɗaa ye ja un rɔ-ɛ ila mə ji Luba gə uga ne dɔ sijee gə nenuji, gə nekunja məsə, asə naa gə ba̰y kəndə mambo̰ gə ba̰y-e əndə ləl tɔ.

Cil ciməri gə lokarə

³ May kar kaya, gə wə̰rə̰ kaya gə neje tɔ̰y gə ɔji dɔ-ɛ, ose ɓo lar ɓar ri-si kara be ang; neje ne le uwa ba-ɛ gə njerɔsangəje ang baa;

⁴ ngaɓa tar mbəje, gə tarje gə baa gə nangə əng, ose tar rɔ kulje le, ar-je ce ta-si gə ang; ngaa tarje tɔ̰y gə ce ta-si gə le, ꞌɗaje ne Luba oyo.

⁵ Mba, may kar ꞌgərəje gə maj-ɛ, njekaya gə ɗa-ɗa ose njewə̰rə̰ kaya ose ɓərə lə ɓo neje, gə to gə nje polo magə le, nenduba lə-a godo mə ɓeko̰ gə lə Kirisi je gə Luba.

⁶ May kar dəw kara kara ərə si gə tar paje gə baa gə nangə əng ang; mba neje gə to gə be le ja ɓa wungu lə Luba ɗe ne dɔ nganje lə njekal tarje gə.

⁷ Be ɓa, uwaje gə je ba-ɛ kara be ang.

⁸ Sisəy le ɗaa, kede ləw ꞌtoje gə cil ciməri, ngaa ɓisine ɗaa ꞌtoje gə lokarə gə mə Mbayɓe gə ngaa. ꞌNjaje to gə ngan lokarəje be;

⁹ Mba kandə lokarə le, ɔji dɔ ne ja tɔ̰y gə to gə məmay, neɗa gə gadə-gadə, gə tar gə tɔgərɔ.

¹⁰ ꞌSangəje ɗəw mba gərə ne gə mə Mbayɓe njigi;

¹¹ ɓo undaje rɔ-si naa gə kara baa dɔ kula ɗaje gə lə cil ciməri gə aw kadə baa nee ang, ngaa ꞌceje gə gəl-je gə ɗaga.

¹² Mba neje tɔ̰y gə dəwje ꞌɗa lokiya gə le, pa tar-ɛ kara to gə ne rɔ kul baa.

¹³ Ngaa, neje gə nee tɔ̰y le, ɓo ꞌkila gəl-e gə ɗaga kɔdɛ-kɔdɛ ɗaa, to ɗaga arə ngadə tɔ.

¹⁴ Mba ne tɔ̰y gə to gadəmagay gə le to lokarə. Gəl-e gə nee ɓa Mbede pa na: ꞌI gə ꞌcibi le, ꞌndol dɔ ɓi gə, Uba nangə ḭ horo nje gə d-uy gə, Ɗaa Kirisi a ndogo dɔ-i gə.

¹⁵ Be ɓa, undaje kəm karə dɔ pa nja-si gə gə maj-ɛ: ꞌnjaje ji mbəje ang, ngaa ji njekəmkarəje.

¹⁶ Ḭya̰je dɔ kar ar-ɛje nday baa ang, mba j-isi dɔ ndoje gə kṵra̰y gə.

¹⁷ Be ɓa, ꞌnjaje dɔ mbə gə baa ang, ngaa ꞌgərəje se ɗi ɓa to gə mə njigi lə Mbayɓe wa?

¹⁸ Ayje kodo mbə ang, na a kila-si dan kaya gə. Ngaa ar-je Njil ɓa ta lo mə-si gə ladə-ladə;

¹⁹ Ulaje jingaw mə naa gə pa kɔsə, gə paje ɓədə-ɓədə, gə paje gə ɗəw njil gə, ɔsəje pa ꞌpoloje ne Mbayɓe gə dɔ ɓəngərə si tɔ̰y.

²⁰ Ɔji dɔ ne gə ɗa-ɗa kara, ꞌɗaje oyo Luba gə Bɔ dəwje gə dɔ kar tɔ̰y, gə ri Mbayɓe lə-sijee Jeju Kirisi.

²¹ ꞌƁəəlje Kirisi, osoje kul no naa gə yo gə nee mba ɓəəl gə ꞌɓəəlje Kirisi.

Njenujije gə gəl Kirisi gə

²² Jeneje, na-na kara, oso kul no ngab-ɛje gə ngab-ɛje gə, to gə ꞌɗaje ne gə Mbayɓe be.

²³ Mba jingaw to gə dəw dɔ jene, to gə Kirisi to ne dəw dɔ Mbo̰ naa lə njetakagəje, gə to gə darɔ-ɛ, gə ꞌne ja ɓa n-to gə njekaji-e tɔ.

²⁴ Ngaa, to gə Mbo̰ naa lə njetakagəje oso ne kul no Kirisi gə le, jeneje kara, may kar d-oso kul no ngaw-jeje gə ɔji dɔ ne tɔ̰y tɔ.

²⁵ Jingawje, na-na kara njigi jene lə-a to gə Kirisi njigi ne mbo̰ naa lə njetakagəje ɓa, ye ja gə dɔ-ɛ, un rɔ-ɛ ar mba tar lə-a,

²⁶ n-tog-e ne gə man gə to gə tar, mba kunda-a gə losang-ɛ

²⁷ mba tɔji ne mbo̰ naa lə njetakagəje gə ɗaga kar-ɛ ndole yondə-yondə ta kəm-e ꞌne gə ja, kar-ɛ n-mina ose n-ndole njɔl-njɔl ang nəm, ose mba kar ne gə to gə mar-ɛ bənəng ɓar ri-a ang nəm tɔ. Ngaa mba kar-ɛ n-to gə losang-ɛ ngaɓa kar tar uwa dɔ-ɛ ang nəm tɔ.

²⁸ Be ɓa, jingawje kara, may kar ꞌnjigi jeneje lə-je to gə darɔ-je be ja tɔ. Dəw gə njigi jene lə-a nama, darɔ-ɛ ye ja njigi kən.

²⁹ Mba dəw gə nje njigi darɔ-ɛ ang ja gə kɔrɔ kara be le godo; ngaa ye uul-e ngaɓa unda-a dan kəm-e to gə Kirisi ɗa ne gə Mbo̰ naa lə njetakagəje be tɔ;

³⁰ mba sijee ja to gə bar kəm rɔ-ɛje.

³¹ To gə be ɓa, jingaw a kuba bɔ-ɛje je gə ko̰-eje kḭya̰-je gə mba nam rɔ-ɛ kar jene gə lə-a ɗaa joo kɛm d-a təl to gə darɔ gə kara baa.

³² Ne gə to lo kiya-a gə nee le to ɓəəl; ɗaa ꞌma, m-pa ɔji dɔ Kirisi ngaɓa ɔji dɔ Mbo̰ naa lə njetakagəje tɔ.

³³ Ban-ban ja kara, kara kara lə-si tɔ̰y le, na-na ja kara ye gə ɔji dɔ-ɛ le, may kar njigi jene lə-a to gə darɔ-ɛ ye ja be, ngaɓa kar jene kara ila kuji dɔ ngab-ɛje gə tɔ.