Ephésiendjé 4 - Mbede Lə Luba Kone Gə Sigi

Mə kara gə ɗəw takagə gə

¹ M-ndəji-si, ꞌma gə m-to kəy kula gə mba to gə m-to ngon njekula lə Mbayɓe le, mba kar-si ꞌnjaje pa nja gə dana gadə gə go njigi gə ꞌnjigije ta ɓar gə ꞌɓar-si gə,

² ulaje dɔ-si ngulum, awje yururu ngaɓa ilaje mə-si dɔ mar-ɛ gə po̰-po̰ tɔ. Oreje ur-si dɔ naa gə gə yo gə nee gə njigi,

³ undaje ne singa-si dɔ mar-ɛ gə ar-je ne dɔ mə kara gə lə Njil gə go ɗɛgɛgɛ gə tɔ-si naa gə.

⁴ Darɔ kara baa ɗəgədə ngaɓa Njil kara baa ɗəgədə, to gə sisəy kara, ꞌɓar-si ɗəw ne kunda mə gə kara baa ɗəgədə gə ngira-a ḭ gəl ɓar gə lə-si le ja tɔ.

⁵ Mbayɓe kara baa ɗəgədə, takagə kara baa ɗəgədə, batɛm kara baa ɗəgədə tɔ,

⁶ Luba kara baa ɗəgədə, gə to Bɔ dəwje tɔ̰y, ꞌne gə to dəw dɔ dəwje tɔ̰y, n-ɗa kula ɗəw gə lə dəwje tɔ̰y, ngaɓa ɗa ɓe mə dəwje gə tɔ̰y tɔ.

⁷ Ngaa, na-na kara horo-sijee gə ɗaa, d-ar-ɛ mənuji gə go ngo kuji nekarə baa lə Kirisi.

⁸ Gəl-e gə nee ɓa, ꞌɗa mə mbede gə na: N-aw mə lo gə taar əw, n-aw gə nje gə ꞌto kəy kula gə dɔ-ɛ gə, ngaɓa n-ar dəwje nekarə baa.

⁹ Ɗaa, kɔr gəl n-ḭ n-aw mə lo gə taar le na ɗi wa, be ang nama n-ɗisi n-aw bəər gəl nangə gə ja tɔ ang wa?

¹⁰ ꞌNe gə nje ɗisi kuru nangə le, to gə ꞌne gə kara baa nee le ja n-ḭ n-aw dɔ dara gə taar tɔ̰y, mba ta ne lo ya̰-ya̰ tɔ.

¹¹ ꞌNe gə n-ar nje gə kɛm ꞌto njeka̰ykulaje, gə pajambərəje, gə nje kila mbərəje lə Tar gə May, gə njekɔr no dəwje ngaɓa gə njenetɔjije tɔ,

¹² mba tɔji ne ne njerɔsangəje kar ꞌto ne ngan njekulaje gə may pɛdə mba kar darɔ Kirisi ərə ne ɓər-ɓər,

¹³ saar kar-sijee ja tɔ̰y, ja təl ja to ne gə dəwje gə kara baa ɗəw takagə gə, gə ɗəw gərə Ngon lə Luba gə, gə to ne gə dəw gə tɔgə asə naa gə lo kunda rɔ Kirisi gə may pɛdə.

¹⁴ Mba kar-sijee j-a to ne gə nganje gə kasə ang ngaa, mba nganje gə kasə le, ꞌpagəm ləngə-je ngaɓa ꞌbil-je aw gə je yo gə nee ɔji dɔ netɔjije ɓədə-ɓədə gə d-ula-je ne gore, d-ar-je ꞌndəm ɗəw nekərə gə, gə ɗəw kula ɗaje gə lə dəwje;

¹⁵ Tar gə tɔgərɔ gə ja pa gə ndu nuji le, ja tɔgə ne kang-kang ɔji dɔ neje tɔ̰y ɗəw gə lə Kirisi gə ye ja ɓa to gə dəw dɔ ne.

¹⁶ Ɗəw gə lə-a ꞌne, ngaɓa mbɔr dɔ lokurugo̰je tɔ̰y ɗaa, darɔ ja tɔ̰y nam ta naa gə to ne kara baa, ngaɓa mbara rɔ kara kara tɔ̰y ja ɗa kula ar darɔ le tɔgə ne dan njigi gə.

Pa nja gə ləw gə pa nja gə sigi

¹⁷ Tar gə m-pa gə ri Mbayɓe ɗaa m-təl m-pa ɓi le ɓa nee: Sisəy le ɗaa pa nja lə dəwje gə gərə Luba ang le, ꞌnjaje ang ja gə dɔbo̰ ngaa. ꞌJejee le, ꞌnja gə go tar kəji negərə lə-je gə d-aw ne dɔ mbə gə baa.

¹⁸ Tar kəji lə-je unja wərəng ang, ꞌto gə njembaaje gə ɔji dɔ kisi kəm baa gə ḭ rɔ Luba gə mba negərə ang lə-je gə məkədərə lə-je tɔ.

¹⁹ D-asə mba riya horo ne gə may gə ne gə kṵra̰y ang ɗaa, d-ula rɔ-je bababa dan kaya gə, d-ḭya̰ ne rɔ-je yag dan neɗa gə ɓədə-ɓədə gə to yoro gə polo naa gə ɓo lar.

²⁰ Ngaa sisəy le, to gə be ɓa ꞌgərəje ne Kirisi ang baa,

²¹ ngaa to gə ɓo ꞌne ja to gə tɔgərɔ ɓa ꞌpa tar lə-a d-ar-si oje ose to gə ɓo ꞌne ja ɓa ꞌndo-si neje gə ɔji dɔ-ɛ ɗəw tar gə tɔgərɔ gə ḭ rɔ Jeju ɗaa:

²² may kar ɔrəje darɔ gə ləw gə to gə pa nja-si gə kede ləw ɗəw ɓo neje gə ərə si ar-si ꞌtuji-je ne rɔ-si pugudu,

²³ ɓo ar-je Njil mbəl kəji negərə lə-si to gə sigi,

²⁴ ɗaa unje darɔ gə sigi gə Luba unda-a ɗəw neɗa gə dana gadə, gə ɗəw nesangə gə to gə kandə tar gə tɔgərɔ le ula-aje rɔ-si gə.

²⁵ Be ɓa may kar-si ɔsəje tar gə ɗəgərə ngərəng gə ɗangə, ɗaa na-na kara horo-si gə pa tar gə tɔgərɔ ɓa ar ngon ko̰-ɛ̰; mba ja toje bar kəm rɔ naa yo gə nee.

²⁶ To gə ɓo wungu ɗa si nama, ꞌɗaje neɗa gə kṵra̰y ang. Ar-je kar andə dɔ wungu gə lə-si ang;

²⁷ ngaɓa ar-je ꞌsɛ̰ngərɛ̰ ta-si lo ang.

²⁸ Dəw gə kede to gə nje ɓogo nama, may kar ḭya̰ ɓogo lə-a gə no-ɛ ngaa; ɗaa may kar ula rɔ-ɛ ndubu ɗa kula gə ji-a ye ja, gə kəji gə dana gadə mba kinga ne ne, la ne gə dəw gə ndoo ne to-e.

²⁹ May kar tar gə ha̰rə̰w ce ta-si gə ang, ngaa to gə ɓo ɗəw to nama, ꞌpaje Tar gə May gə a kula jingaw mə naa gə nəm, ngaɓa dəwje d-o nama d-inga mənuji kəne tɔ.

³⁰ May kar-si ꞌtuji-je mə Njil Njerɔsangə lə Luba ang, gə ɗəw lə-a ɓa bəngə ji to ne rɔ-si gə ɔji ne dɔ ndɔ ce ɓe ɓərə gə lə neɗa gə kṵra̰y.

³¹ May kar ꞌtɔrəje neje gə to nee le horo-si gə gə ɗangə: Rɔ kadə gə ɗa-ɗa, kəji lə daje, wungu, kunda ndu, pa gə naa ngaɓa məndul gə ɗa-ɗa kara nəm.

³² ꞌMay-je gə naa gə yo gə nee, ꞌɗa-je gə naa məmay gə yo gə nee; ɔrəje tar dɔ naa gə yo gə nee to gə Luba ɔr ne tar dɔ-si gə ɗəw gə lə Kirisi be tɔ.