Ephésiendjé 3 - Mbede Lə Luba Kone Gə Sigi

Ne gə to lo kiya-a gə ɔji dɔ Kirisi

¹ Gəl-e gə nee ɓa, ꞌma Pɔl gə m-to kəy kula gə ɔji dɔ Kirisi Jeju mba sisəy gə ꞌtoje gə Jiibije ang le.

² Tɔgərɔ ja, mənuji lə Luba gə m-inga ɔji dɔ sisəy le, tar-ɛ oso mbi-si gə ja.

³ Ɗaa to gə ne gə to lo kiya-a gə, gə ꞌkila dɔ-ɛ d-ar-m m-gərə le ɓa m-ɗa tar-ɛ ɗɔgəsɔ be mə mbede gə nee.

⁴ Logə ꞌturaje mbede gə nee le nama, a kasəje mba kar kəm-si unja ngadə dɔ ne gə to lo kiya-a ɔji dɔ Kirisi gə m-gərə le.

⁵ Ne gə to lo kiya-a gə nee le, Luba ar kəm nje gə kede ləw unja dɔ-ɛ gə, to gə n-kila ne dɔ-ɛ ɓisine ɗəw njil gə n-ar njeka̰ykulaje gə ꞌto gə losang-ɛ gə pajambərəje lə-a be ang baa:

⁶ ɗəw gə lə Kirisi Jeju ɗaa, nje gə ꞌto gə Jiibije ang le, ꞌtəl ꞌto gə nje kuwa nendubaje gə ꞌtəl ꞌto gə darɔ gə kara baa, ngaɓa ne gə Luba uwa dɔ gɔl-ɛ le kara to ɔji dɔ-je naa gə kara baa gə Jiibije ɗəw Tar gə May gə.

⁷ M-təl m-to ne gə nje kul-ɛ gə go mənuji lə Luba gə m-inga gə nekarə baa ɗəw singamongə gə lə-a.

⁸ ꞌMa gə m-to gə dəw gə m-to gə ne ang baa horo njerɔsangəje gə le, d-ar-m m-inga mənuji gə nee le m-ila ne mbərə nebaw lə Kirisi gə gar-ɛ godo, m-ar nje gə ꞌto gə Jiibije ang,

⁹ ngaɓa gə mba tɔji kar-ɛ arə ngadə, se to gə ban ɓa Luba gə njekunda ne tɔ̰y le, ɗa ne ne gə to lo kiya-a gə n-ngom m-e gə kede ləw baa le wa;

¹⁰ mba kar ɗəw gə lə mbo̰ naa lə njetakagəje ɗaa, nje dum dɔ loje gə singamongəje gə mə dara gə ꞌgərə ne kəm karə lə Luba gə to gə lo-e ɓədə-ɓədə bula ya̰ ɓisine,

¹¹ gə go ne gə Luba uwa dɔ gɔl-ɛ lo kuma kudu ne gə ləw baa ɗəw gə lə Kirisi Jeju, Mbayɓe lə-sijee.

¹² Mba ɗəw gə lə-a ꞌne, ngaɓa gə go ta gə ja ta kag-e le ɗaa, dɔ-si to ne doy mba ɗəm ne gə rɔ Luba gə gə ɓəəl ang.

¹³ To gə be ɓa, m-dəji-si mba kar-si ilaje kasə ɔji dɔ tuji gə m-isi dan-ɛ gə mba tar lə-si ang. To gə ne riɓar lə-sisəy.

¹⁴ Gəl-e gə nee ɓa m-um ne məkəji-m no Bɔ dəwje gə,

¹⁵ gə ye ɓa gəl kuji dəwje tɔ̰y gə mə dara gə gə dɔ nangə gə nee d-ḭ gəl-e gə;

¹⁶ mba kar, gə go riɓar lə-a gə gad-e dum tura le, n-ar-sisəy singamongə ɗəw Njil gə lə-a, mba kar mə-si ərə ne ɓər-ɓər.

¹⁷ May kar Kirisi ɗa ɓe mə-si gə kəy kɔrɔgə ɗəw takagə gə, ngaɓa may kar njigi ula ngira-a mə-si gə pə̰y-pə̰y nəm, ar-je dan-ɛ gə dana badagə nəm tɔ.

¹⁸ Be ɓa a kasə gərəje, naa gə kara baa gə njerɔsangəje tɔ̰y, se njigi le, tad-ɛ, gə ngal-ɛ, gə kuru lə-a, gə ndə̰w̰ lə-a, unda rɔ-ɛ to gə ban wa?

¹⁹ Ngaɓa gə mba kar ꞌgərəje ne njigi lə Kirisi gə tɔy negərə əw le, kar Luba ɗa ne ɓe mə-si gə dana badagə ta ne rɔ-si yal tɔ.

²⁰ Luba gə singa-a ɗa kula rɔ-sijee ngaɓa asə ɗa gə si may kal ne dɔ ne tɔ̰y gə ja dəji ose ye gə kəji lə-si uwa dɔ-ɛ le,

²¹ may kar riɓar to k-ɛ mə Mbo̰ naa lə njetakagəje ngaɓa ɗəw gə lə Kirisi Jeju ɗaa, gə gəl kujije tɔ̰y ja gə ɓal gə ɓal saar-saar gə no. Oyo!