Ephésiendjé 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa Pɔl njeka̰ykula lə Kirisi Jeju gə go mə njigi lə Luba, m-ɗa mbede nee m-ar njerɔsangəje gə d-isi Epɛs, gə ꞌto gə njetakagə Kirisi Jeju-je gə tɔgərɔ.

² May kar mənuji gə ɗɛgɛgɛ lə Bɔ-sijee Luba je gə Mbayɓe Jeju Kirisi ꞌnay gə sisəy.

Ndu tɔrje ɓədə-ɓədə gə gəl Kirisi gə

³ May kar ndu tɔr to kar Luba, Bɔ Mbayɓe lə-sijee Jeju Kirisi, gə ar ndu tɔrje ɓədə-ɓədə gə ɗəw njil gə ḭ mə dara gə kuja naa dɔ sijee gə ɗəw gə lə Kirisi,

⁴ ɗaa Luba mbərə ne sijee, ɗəw gə lə Kirisi, kede ləw baa nam ɓa gəl dara gə gəl nangə to, mba kar j-a to gə losang-ɛ ngaɓa kar tar uwa dɔ-si no-ɛ gə ang. Dan njigi gə lə-a,

⁵ ɓa n-ɔr sijee n-unda si gə kəm-e ɓədə kede ləw baa nam, n-təl ne si gə ngan m-eje gəl Jeju Kirisi gə gə go mə njigi lə-a gə may pɛdə,

⁶ mba kila ne riɓar ɔji dɔ njigi gə lə-a gə n-unda ne sijee dan may gə ɗəw gə lə ngon-e gə n-ɓol-e.

⁷ Gə ɗəw gə lə-a gə mbɔr dɔ məs-e ɓa uga dɔ sijee, ɔr tar neɗaje gə kṵra̰y lə-si dɔ-si gə, gə go mənuji lə-a gə ɗusu lo njḭ-njḭ,

⁸ gə n-ar ne si gə kobəre-kobəre gə go kəm karə tɔ̰y gə negərə.

⁹ ꞌNe ɓa n-ɗa n-ar-sijee j-a gərə ne gə to lo kiya-a gə ɔji dɔ mə njigi lə-a nəm, ne gə m-e ɔji gə n-uwa dɔ gɔl-ɛ ɗəw gə lə Kirisi,

¹⁰ gə mba ɗa, logə dɔ kar-ɛ a kasə: kuwa neje tɔ̰y dɔ naa gə ko gəl Kirisi gə, neje gə mə dara gə, gə neje gə dɔ nangə gə nee.

¹¹ Ɗəw gə lə Kirisi le ja tɔ ɓa, sijee gə Luba ɔr-si unda-si gə kəm-e kede ləw baa le, j-inga ne nenduba gə ɔji dɔ-si, ɗəw neje gə ꞌne gə Luba ja n-uwa dɔ gɔl-ɛ nəm, gə neje tɔ̰y gə n-ɗa n-ɔji ne go mə njigi lə-a ꞌne ja,

¹² mba kar-sijee gə j-unda mə-si dɔ Kirisi gə kede nam le, j-ila ne riɓar dɔ-ɛ ꞌne gə Luba gə.

¹³ Ɗəw gə lə Kirisi le ja tɔ ɓa, sisəy oje ne mbərə tar gə tɔgərɔ, Tar gə May gə gə aji-si. Gə go ɗəw gə lə-a le ja cibi ɓa, sisəy ꞌtaje ne kagə, ɗaa d-ɔsə bəngə ji gə kar Njil rɔ-si gə, Njil Njerɔsangə gə d-ɔji gə mba kar-si,

¹⁴ gə to gə nenduba lə-sijee gə Luba ɔsə gə kɔrə, ngəbə ne ndɔ gə n-a kar-si j-inga kɛs-e gə nay tɔ̰y, lo gə j-a kinga ne kaji gə dɔbo̰ kar j-ɔsə ne pa j-ila ne riɓar dɔ-ɛ gə.

Pɔl dəji Luba mba nje gə Epɛs

¹⁵ Gəl-e gə nee ɓa, ꞌma kara, logə tar ta gə ꞌtaje kagə Mbayɓe Jeju, ngaɓa njigi gə ꞌnjigije njerɔsangəje tɔ̰y oso mbi-m gə ɗaa,

¹⁶ m-əw rɔ-m ɗa oyo Luba mba-si ang: dəjije lə-m gə m-aw m-dəji Luba le, m-ila ri-si kəne taar-taar,

¹⁷ mba kar Luba lə Mbayɓe lə-sijee Jeju Kirisi, Bɔ dəwje gə njeriɓar, ar-sisəy njil kəm karə gə njil kila dɔ ne mba kar-si ꞌgər-eje ne.

¹⁸ May kar n-cɛ̰ kəji negərə lə-si n-ila tagə n-ar-si ꞌgərəje ɗi ɓa to gə ne kunda mə gə to ɔji dɔ nje gə n-ɓar-je, ɗi ɓa to gə nenduba lə-a gə gar-ɛ godo, gə to gə nebaw gə ri-a ɓar gə n-uwa dɔ gɔl-ɛ n-ɔji dɔ njerɔsangəje,

¹⁹ ngaɓa ɗi ɓa to gə singamongə lə-a gə dum dɔ neje tɔ̰y gə to ɔji dɔ sijee gə j-a takagə ɗəw singamongə lə-a gə to ɓəəl.

²⁰ N-tɔji singamongə lə-a ɗəw gə lə Kirisi, n-ndol-e ne horo nje gə d-uy gə ngaɓa n-ar-ɛ isi dɔ ji kɔl-ɛ gə mə dara gə taar,

²¹ dɔ nje dum dɔ loje gə tɔ̰y gə njeko̰ ɓeje tɔ̰y gə njesingamongəje tɔ̰y, gə njeko̰ dɔ loje tɔ̰y, gə rije tɔ̰y gə a ɓar dɔ ndɔ gə ɓogəne ja baa ang, ngaa saar gə dɔ ndɔ gə aw ɗe gə kede əng.

²² N-um neje tɔ̰y no gɔl-ɛ gə ngaɓa n-unda-a dɔ neje gə tɔ̰y n-ar-ɛ n-to dəw dɔ Mbo̰ naa lə njetakagəje,

²³ gə to darɔ-ɛ, ꞌne gə n-to darɔ Luba ja dɔngɔ doy.