Ebərəje 9 - Mbede Lə Luba Kone Gə Sigi

Kɔr tar dɔ dəw gə

¹ Kone gə dɔngɔr le ndu gə ɔji dɔ no polo ne gə kəne ga̰ ngaɓa kəy nepolo lə-a ga̰ nangə nee tɔ.

² Be ɓa ꞌɗa kəy kubu ɗaa, m-e gə kəy ꞌɓar-ɛ losangə, gə lambe gə boy gə lo kunda pər lə-a siri, gə bəgərə kum mbə to kəne.

³ Cibi m-e gə njekum gə joo, ꞌgangə gə bal dɔ ngaɓa ꞌɓar-ɛ no kɔgə losangə.

⁴ Ne ro ba̰y kəndə mambo̰ gə d-uba gə maa to kəne ngaɓa sandubu kone gə ꞌrongə gir-e gə maa, ɓa Bay maa gə d-ila mbə gə ḭ dara kəne, cibi ngaɓa kagə tɔsə lə Aro̰ gə unji, gə bəgərə kone to kəne tɔ.

⁵ Dɔ sandubu kone gə le, ꞌɗa neje to to gə anjije gə ꞌɓar-je serubɛ̰je gə njerɔndogoje d-ar-je d-ar kəne, d-um bagəje dɔ lo kunja nepolo gə. Lo pa tar-ɛ gə t-ɛ t-ɛ ɓisine godo.

⁶ ꞌGɔl neje tɔ̰y to gə be ngaɓa njekapoloje d-andə mə kəy kubu gə dɔngɔr gə le taar-taar ꞌɗa kula nepolo.

⁷ Ngaa mə kəy kubu gə njekum gə joo gə to no ngɔ lo sangə le, buba njekapolo ja gə kar-e baa, ɓal kara nama andə kəne gɔl kara baa gə məsə gə ɔji dɔ-ɛ ye nəm ɓa mba neɗa gə kṵra̰y lə dəw mə ɓeje nəm tɔ.

⁸ Njil Njerɔsangə un neje tɔji ne to gə be to gə ɓo bal dɔ gə kay mə kəyje dana joo nee le to saar nama ɗəw kandə no ngɔ gə losangə gə le ɔr ang ɓi.

⁹ Be ɓa gusutarje nee le to ndaji ne gə ɔji dɔ kar gə ɓogəne; tɔji to gə nekarə baaje gə nepoloje le, gə go kəji, d-asə ɗa kar njepolo ne may ne pɛdə ang.

¹⁰ Mba to nduje gə ɔji dɔ nekusaje gə nekayje ja baa ngaɓa gə ji nesangəje ɓədə-ɓədə ngaɓa nduje gə dəwje ja baa d-un ꞌɗa ne kula saar kar d-un ne ndu gə sigi ꞌce ne.

¹¹ Ngaa Kirisi ɗe gə buba njekapolo ɔji dɔ neɗa may bula gə a ɗe, n-andə mə kəy kubu gə boy gə may pɛdə-pɛdə gə ji dəw ɓa ɗa ang, ꞌpa na to nekunda gə nangə nee ang;

¹² ngaɓa n-andə no ngɔ losangə gə gɔl kara ja gə dɔbo̰, n-andə gə məsə bɔ badəm ang nəm gə məsə ngon mangə ang nəm ngaa gə məs-e ja. Be ɓa n-inga ne ɗəw kuga dɔ dəwje gə dɔbo̰ ja.

¹³ Mba məsə bɔ badəmje gə məsə bɔ mangəje ngaɓa bu mandə mangə gə ja̰rɛ̰ dɔ dəwje gə mina gə le, ꞌtogo neje mba kar d-ar ne ɗəw darɔ gə ja baa,

¹⁴ ɓədə ɓa məsə Kirisi gə to ɓəəl ya̰, ngaɓa un rɔ-ɛ gə arə ngadə ar Luba ɗəw gə lə Njil gə a to gə no le, a togo kəji lə si kɔr-si ta yo gə mba kar ja ɗa kula lə Luba gə nje kisi kəm baa!

¹⁵ Gəl-e gə nee ɓa n-to ne nje gɔl tar lə kone gə sigi, ɓa gə mba kar kuy lə-a ja tar neɗaje gə kṵra̰y gə gəl kone gə dɔngɔr gə ɔr ne dɔ nje gə ꞌɓar-je gə, d-inga ne nenduba gə d-uwa dɔ gɔl-ɛ gə a to saar gə no.

¹⁶ Mba dəw un ndu nama kəm kar d-o to gə nj-ɛ le uy nam ɓa.

¹⁷ Be ɓa ndu gə dəw ḭya̰ le, ɓo nj-ɛ aw kəm baa ɓi nama ɗa kula ang, ngaa logə ɓo n-uy nama d-a kila kuji kəne gə go ndu-e ja.

¹⁸ Gəl-e gə nee ɓa kone gə dɔngɔr le, ꞌtɔl t-ɛ lal gə kila məsə nangə ang.

¹⁹ Be ɓa, logə Moyiji ɗa gə go ndu ɔji dɔ dəw mə ɓeje tɔ̰y le, un məsə ngan bɔ mangəje gə məsə bɔ badəmje gə man, gə ta kubu gə kasə gə d-uji gə bḭ daje cibi n-uwa dɔ kamje tusum n-ore ne naa gə ngaɓa n-ula mə məsə gə ɗaa n-tusu dɔ mbede le ja kara nəm gə, gə dɔ dəw mə ɓeje gə n-pa nena:

²⁰ Ye gə nee le to məsə kone gə Luba un ndu-e kəne ar-sisəy.

²¹ Gə go ji ɗ-ɛ gə kara baa ja n-tusu ne məsə dɔ kəy kubu gə ngaɓa dɔ neje gə kar ɗa kula nepolo gə tɔ.

²² Be ɓa məsə togo neje tɔ̰y gə go ndu mba d-a kɔr tar dɔ dəw gə lal kay məsə nangə ang.

²³ Kede nam ɗaa may kar ꞌtogo neje gə tɔji neje gə dara to gə be ngaɓa go-e gə ɗaa neje gə dara ja togo rɔ-je may pɛdə gə go nepolo.

²⁴ Mba no kɔgə gə ji dəw ɗa, gə to ndaji ye gə tɔgərɔ ɓa Kirisi andə kəne ang ngaa, ꞌye gə dara ja, mba kar ne no Luba gə ɓisine mba-si.

²⁵ N-andə mə no kɔgə gə mba kun rɔ-ɛ gə nepolo gɔl bula, to to gə buba njekapolo ɓal kara nama andə kəne taar-taar gə məsə gə ɗangə be ang,

²⁶ mba ɓo be nama, un kud-e lo kunda dara je gə nangə gə ja Kirisi a ko ꞌməsərə gɔl bula. Ngaa ɓisine gə to dɔ ɗudu ndɔ nee ɗaa n-un rɔ-ɛ gə nepolo gɔl kara baa ja n-ɔr ne tar neɗa gə kṵra̰y dɔ dəwje gə.

²⁷ Mba dəw gə ɗa-ɗa kara a kuy gɔl kara baa ja, a ɓo go-e gə nama lo gangə tar ngaɓa a kaw kəne le ɗaa,

²⁸ Kirisi kara ɗəw kara baa ja tɔ, un rɔ-ɛ gɔl kara baa ja ta ne neɗa gə kṵra̰y dɔ dəwje gə bula, a ɓo ɗe lə-a gə gɔl joo nama n-a ɗe mba neɗa gə kṵra̰y ang, ngaa mba nje gə d-aw ngina-a mba kaji.