Ebərəje 8 - Mbede Lə Luba Kone Gə Sigi

No polo gə kone gə sigi

¹ Tar gə to ɓəəl ya̰ gə j-a pa ɓa nee: Buba njekapolo lə-si isi dɔ ji kɔl ngəndəng mbay gə lə Yejeje dɔ dara gə taar.

² N-to njekula gə no polo gə, gə kəy lo gə tɔgərɔ, gə Mbayɓe ja ɗa ɓo dəw ang.

³ Buba njekapolo gə ɗa-ɗa kara d-unda mba kar un nenuji gə nepolo, be ɓa may kar k-ɛ ꞌne gə n-a kun ga̰ ja tɔ ɓa.

⁴ To gə ɓo n-ga̰ dɔ nangə nee kara n-a to njekapolo ang mba nje gə kɛm gə d-aw d-un nenuji gə go torondu ꞌga̰.

⁵ ꞌJejee nee le ꞌpolo ne gə to ndaji ne, gə njil neje gə tɔgərɔ gə dara, be ɓa Moyiji kara Luba ndəj-e, logə n-a kaw ɗa kəy kubu le na: O, ɓo ꞌɗa gə go ji-a gə ꞌtɔ-ji dɔ ər gə le.

⁶ Ngaa ɓisine ɗaa Kirisi inga kula gə to ɓəəl ya̰, ar n-to nje gɔl tar kone gə may ya̰ mba d-uwa dɔ gɔl-ɛ may ya̰ tɔ.

⁷ To gə ɓo tar godo dɔ kone gə dɔngɔr gə nama, d-a sangə ye gə njekum gə joo ang.

⁸ Tar gə ꞌpa d-ila ne tar dɔ-ɛ gə le ɓa nee: Oje, Mbayɓe na, ndɔ-ɛ a ɗe, Gə m-a riya kone gə sigi gə dəwje gə Ijirayɛl gə dəwje gə Juda.

⁹ A to to gə kone gə m-riya gə ka-jeje ang, Dɔ ndɔ gə ꞌma ja m-ɔr-je gə ji-m mə ɓe gə Ejipətə m-ar-je ꞌce. Mba ꞌjejee ja kara d-uwa gədərə dɔ kone gə lə-m ang, ꞌMa ja kara ɔsə-m dɔ-je gə ang ja tɔ, Mbayɓe pa to gə be.

¹⁰ Be ɓa kone gə m-a riya gə dəwje gə Ijirayɛl le ɓa nee, Mbayɓe pa na go ndɔje gə nee ɗaa: M-a kunja torondu-mje kəji negərə gə lə-je, M-a kunja dɔ ɓəngərə-je gə nəm tɔ; M-a to Luba lə-je, Ɗaa d-a to dəwje lə-m.

¹¹ Dəw a tɔji ne njemar-ɛ ang nəm, Ngaɓa ngon ko̰-ɛ ang nəm na: ꞌGərə Mbayɓe! Mba d-a gərə-m tɔ̰y, Un kud-e dɔ dəw gə naa gə saar ce ne dɔ nje gə tɔgə gə horo-je gə.

¹² Mba m-a kɔr tar neɗa gə kṵra̰y lə-je dɔ-je gə, Ɗaa mə-m a kuy dɔ neɗaje gə kṵra̰y lə-je yom.

¹³ Logə ɓo ꞌpa tar kone gə sigi nama, ye gə dɔngɔr unda nangə ngaa. Be ɓa ne gə ləw gə ɓuga le, a kaw kunda nangə ngaa.