Ebərəje 7 - Mbede Lə Luba Kone Gə Sigi

¹ Mɛləkisedɛk nee le to mbay dɔ gə Salɛm nəm, to njekapolo lə Luba gə nje kisi sam dara gə; dɔ ndɔ gə Abəraham ḭ ta ɗɔ gə, tɔl mbay dɔje bula ɗaa n-ɗe n-inga-a ngaɓa n-tɔr ndu-e dɔ-ɛ gə.

² ꞌNe nee le ɓa neje tɔ̰y nama, Abəraham tura dɔg ɗaa un dɔ-ɛ kara kara ar-ɛ ar-ɛ. D-ɔr gəl ri Mɛləkisedɛk na mbay dɔ gə gadə-gadə, cibi ɓa n-to mbay dɔ gə Salɛm, gə kɔr m-e na mbay dɔ gə nje ɗɛgɛgɛ.

³ N-to dəw gə bɔ-ɛje godo, ko̰-eje godo, gəl kuji lə-a godo; ndɔ kuj-e godo, ndɔ kuy lə-a kara godo nəm tɔ. N-to to gə ngon lə Luba be, n-to njekapolo ja gə dɔbo̰.

⁴ Be ɓa oje, n-to dəw gə to ɓəəl ya̰ ɗaa ka-sijee Abəraham gə darɔ-ɛ ja un dɔ neje gə ta ɗɔ gə, dɔg nama un dɔ-ɛ kara kara ar-ɛ.

⁵ Kar nje gə to ngan ka Lebi, gə ꞌto njekapoloje le, torondu un ɗəw ar d-un dɔ neje lə dəw mə ɓeje, ne gə dɔg nama kun dɔ-ɛ kara kara le, d-a ta ji ngan ko̰-je gə ꞌto gəl kuji Abəraham.

⁶ Mɛləkisedɛk le n-to gə gəl kuji gə lə Lebi ang, ngaa neje lə Abəraham le, dɔg nama n-un dɔ-ɛ kara kara! N-tɔr ndu-e dɔ dəw gə d-uwa dɔ gɔl ne d-ar-ɛ!

⁷ Ma̰y-e godo, dəw gə tɔgə ɓa a tɔr ndu-e dɔ dəw gə naa gə.

⁸ Ngaɓa ngan ka Lebi le, ꞌto dəwje gə d-a kuy ɓa ne dɔg nama d-un dɔ-ɛ kara kara d-ar-je, ngaa ye gə nee le ꞌpa na n-to dəw gə nje kuy ang.

⁹ Be ɓa Lebi gə ne dɔg nama d-un dɔ-ɛ kara kara d-ar-ɛ le, ye kara un ar ja tɔ mba k-eje Abəraham kara ar kede tɔ,

¹⁰ mba dɔ ndɔ gə Mɛləkisedɛk inga-a nee le n-uji ngon ang ɓi.

¹¹ To gə ɓo dəw mə ɓeje d-inga torondu ɔji dɔ kula kapolo lə Lebi nam ɗaa, mba ɗi cibi ɓa njekapolo gə ɗəw gə gəl Mɛləkisedɛk ɓa a ɗe ɓo gə gəl ɗəw gə lə Aro̰ ang wa?

¹² Mba logə ɓo ꞌmbəl njekapolo nama d-a mbəl torondu tɔ.

¹³ Ngaɓa dəw gə d-aw ꞌpa tarje ɔji dɔ-ɛ nee le, to gə gəl kuji gə ɗangə gə, cibi ɓa dəw kara gə gəl kuji gə lə-a to njekapolo ang.

¹⁴ Mba ꞌpa arə ngadə to gə Mbayɓe lə-si le to gə gəl ka Juda gə, to gəl ka gə Moyiji pa tar lə njekapoloje mbɔbə ne ang.

¹⁵ Tar gə ɗe ɔsə gəl-e ar-ɛ arə ngadə-ngadə gə kede ja na, ɗəw kara baa to gə Mɛləkisedɛk be ja,

¹⁶ njekapolo kara gə ɗangə ɗe ne, ɗəw torondu dəw ang, ngaa ɗəw singamongə təbə gə a to gə ɓal-ɓal.

¹⁷ Mba ꞌɗa tar naji lə-a na: ꞌTo njekapolo ja gə dɔbo̰ gə ɗəw gə gəl Mɛləkisedɛk gə.

¹⁸ Be ɓa ndu gə kede le ꞌtuji ꞌye gə gugu mba tɔg-ɛ godo ngaɓa may lə-a godo tɔ.

¹⁹ Mba torondu ɗa ne kara ar-ɛ may pɛdə ang, ngaa ɔr ta ɗəw ar-si nekunda mə gə may mba kar j-aw ne gə rɔ Luba gə.

²⁰ Ngaɓa ye gə nee le ꞌnaji d-ore ne kud-e.

²¹ Nje gə kɛm le, ꞌto njekapoloje lal kar d-ore kudu-je gə naji ngaa ꞌne le, Mbayɓe naji ar-ɛ na: ꞌto njekapolo ja gə dɔbo̰, ɗaa nj-ɛ a turu kəji lə-a kəne ang.

²² To gə be ɓa Jeju ja to ngaw dan kone gə gar-ɛ godo.

²³ Cibi ɓa nje gə kede le ꞌto njekapoloje ꞌta toro na-na, mba yo tɔl-je taar-taar,

²⁴ ngaa ꞌne le mba n-isi gə ɓal-ɓal ɗaa, kapolo lə-a le to saar gə no.

²⁵ Be ɓa dəwje gə ꞌce gə ɗəw gə rɔ-ɛ gə mba kaw ɓe lə Luba nama n-asə kar d-inga kaji gə gə ndɔ gə ndɔ, mba n-aw kəm baa gə ɓal-ɓal ɗaa n-aw n-dəji Luba taar-taar mba je.

²⁶ Buba njekapolo gə to gə be ja ɓa a la gə si: n-to njerɔsangə, tar uwa dɔ-ɛ ang, n-mina ang, n-to dang gə njeneɗaje gə kṵra̰y ngaɓa d-un-e d-unda dɔ dara gə taar,

²⁷ buba njekapoloje gə kɛm, d-un nepolo gə ndɔ-ndɔ mba neɗa gə kṵra̰y lə-je ngaɓa kar dəw mə ɓeje nəm, ngaa ꞌne n-aw ndoo-e ang baa. ꞌNe le ɗaa, n-un darɔ-ɛ ja gə nepolo gɔl kara ja gə dɔbo̰.

²⁸ Be ɓa torondu lə Moyiji unda dəwje gə darɔ-je mbɔr-ɛ gə buba njekapoloje, ngaa naji gə Luba naji go torondu gə le ɗe unda Ngon gə ɗe gə dəw gə may pɛdə gə dɔbo̰.